 |
ພິທີຖະແຫລງຂ່າວ ງານວາງສະແດງ ຜະລິດຕະພັນລາວ 2019. (ພາບ: ອ່າຍຄຳ)
ອີງຕາມງານຖະແຫລງຂ່າວ ໃນວັນທີ 30 ເມສາ 2019, ທ່ານ ນາງ ຈັນທະຈອນ ວົງໄຊ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດ ລະບຸວ່າ: ງານວາງສະແດງ ຜະລິດຕະພັນລາວ ຄັ້ງນີ້ ໄດ້ລະດົມ ຂົນຂວາຍ ຜູ້ປະກອບການ, ຜູ້ຜະລິດ ສິນຄ້າ ໃນທຸກຂະແໜງ ໃນທົ່ວປະເທດ ລວມເຖິງທຸລະກິດ ທີ່ຢູ່ໃນເຂດເສດຖະກິດ ພິເສດ ເພື່ອນຳເອົາ ຜະລິດຕະພັນ ທີ່ເປັນເອກະລັກ ຂອງແຕ່ລະແຂວງມາວາງ ສະແດງ, ໂຄສະນາ ແລະ ຈຳໜ່າຍ ຫລາຍກວ່າ 250 ຫ້ອງວາງສະແດງ ເພື່ອແນໃສ່ຍົກລະດັບ ການຜະລິດ-ການຈຳໜ່າຍ ພາຍໃນໃຫ້ນັບມື້ ຂະຫຍາຍຕົວ, ມີຄຸນນະພາບ, ໄດ້ມາດຕະຖານ ແລະ ກ້າວຂຶ້ນສູ່ລະດັບສາກົນ, ທັງເປັນການສ້າງ ຄວາມພາກພູມໃຈ ຕໍ່ສິນຄ້າ-ຜະລິດຕະພັນ ທີ່ຜະລິດໃນລາວ ເພື່ອດຶງດູດນັກທ່ອງທ່ຽວ ແລະ ນັກລົງທຶນ ເຂົ້າມາລາວ ໃຫ້ຫລາຍຂຶ້ນ.
ງານວາງສະແດງ ປີ 2019 ຈະມີຫລາກຫລາຍ ຜະລິດຕະພັນ ຂອງຜູ້ປະກອບການ ທັງພາຍໃນ ແລະ ຕ່າງປະເທດ ເຂົ້າຮ່ວມວາງສະແດງ ເຊັ່ນ: ຂະແໜງຫັດຖະກຳ, ອຸດສາຫະກຳ, ອັນຍະມະນີ, ເຟີນີເຈີ, ຕັດຫຍິບ, ການຢາ, ທ່ອງທ່ຽວ ແລະ ການບໍລິການ, ລວມເຖິງສິນຄ້າ ໜຶ່ງເມື່ອງ ໜຶ່ງຜະລິດຕະພັນ ແລະ ອື່ນໆ. ມາຮອດປັດຈຸບັນ, ບໍລິສັດ ສະໝັກເຂົ້າ ຮ່ວມງານ 180 ຫ້ອງວາງສະແດງ ປະກອບມີ: ສະພາການຄ້າ ແລະ ອຸດສາຫະກຳ ແຂວງ ຈຳນວນ 18 ຫ້ອງ, ປະເພດຜະລິດຕະພັນ ໂອດັອບ 35 ຫ້ອງ, ປະເພດ ຜະລິດຕະພັນ ຫັດຖະກຳ ຜ້າໄໝ-ຜ້າຝ້າຍ 30 ຫ້ອງ, ປະເພດ ຜະລິດຕະພັນ ຫັດຖະກຳເຄື່ອງເງິນ 10 ຫ້ອງ, ປະເພດ ຜະລິດຕະພັນ ອາຫານ 29 ຫ້ອງ ແລະ ປະເພດອື່ນໆ 58 ຫ້ອງ.
ໃນລະຫວ່າງການຈັດງານ ຍັງຈັດໃຫ້ມີການສຳມະນາ ແລະ ພົບປະທຸລະກິດ ເພື່ອໃຫ້ຄວາມຮູ້ ແກ່ຜູ້ຜະລິດ ແລະ ຜູ້ຂາຍ, ພາຍໃຕ້ຫົວຂໍ້: ການແປຮູບ ສິນຄ້າ ກະສິກໍາ, ການກຽມ ຄວາມພ້ອມ ເຂົ້າຮ່ວມງານ ວາງສະແດງ ຢູ່ຕ່າງປະເທດ, ການນຳສະເໜີ ຂອງບໍລິສັດ ທີ່ປະສົບຜົນສຳເລັດ ໃນການເຮັດ ທຸລະກິດໃນ ສປປ ລາວ, ການນຳສະເໜີ ກ່ຽວກັບຜະລິດຕະພັນ ແລະ ການບໍລິການ ທີ່ທັນສະໄໝ ແລະ ເງື່ອນໄຂ ການເຂົ້າຫາ ແຫລ່ງທຶນ ຂອງທະນາຄານ ພັດທະນາລາວ ແລະ ອື່ນໆ. ການສຳມະນາດັ່ງກ່າວ ຈະໄດ້ເຊື້ອເຊີນ ເອົາຜູ້ບັນຍາຍ ທີ່ມີປະສົບການ ທັງພາຍໃນ ແລະ ຕ່າງປະເທດ ເຊິ່ງຄາດວ່າ ຈະມີຜູ້ປະກອບການ ແລະ ນັກສຶກສາ ເຂົ້າຮ່ວມ ຫລາຍກວ່າ 500 ຄົນ.
（ແຫຼ່ງຂໍ້ມູນ： ຊາຍຄົນເດີມ/ຂປລ）
