ຫວຽດນາມ - ອົດສະຕຣາລີ ຢືນຢັນຄວາມໄວ້ວາງໃຈທາງຍຸດທະສາດຜ່ານຖະແຫຼງການຮ່ວມ

ໃນການປະຊຸມ, ລັດຖະມົນຕີທັງສອງທ່ານໄດ້ປຶກສາຫາລືຢ່າງກວ້າງຂວາງ ແລະ ເລິກເຊິ່ງ ກ່ຽວກັບສາຍພົວພັນສອງຝ່າຍ ກໍຄືບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງໃຫ້ຄວາມສົນໃຈ. ສອງຝ່າຍໃຫ້ຄຸນຄ່າຕໍ່ການຈັດ FMM-8 ໃນໂອກາດການຢ້ຽມຢາມລະດັບລັດຄັ້ງນີ້, ຖືວ່າເປັນການສືບຕໍ່ບັນດາກິດຈະກຳແລກປ່ຽນຂັ້ນສູງ ແລະ ຜົນສຳເລັດສຳຄັນທີ່ສອງປະເທດບັນລຸໄດ້. ໃນນັ້ນ, ການຮັບຮອງຖະແຫຼງການຮ່ວມ 3 ສະບັບ ໄດ້ສະທ້ອນເຖິງຄວາມໄວ້ວາງໃຈທາງຍຸດທະສາດອັນເລິກເຊິ່ງ, ຜົນປະໂຫຍດທີ່ສອດຄ່ອງກັນ ແລະ ວິໄສທັດຮ່ວມຂອງສອງຝ່າຍ.

ສອງລັດຖະມົນຕີໄດ້ຕີລາຄາສູງຜົນການຜັນຂະຫຍາຍແຜນປະຕິບັດງານຄູ່ຮ່ວມມືຍຸດທະສາດຮອບດ້ານຫວຽດນາມ - ອົດສະຕຣາລີ ໄລຍະ 2024-2027, ໂດຍທັງ 6 ເສົາຄ້ຳການຮ່ວມມືລ້ວນແຕ່ມີຜົນງານພົ້ນເດັ່ນ. ການຮ່ວມມືດ້ານປ້ອງກັນຊາດ - ຄວາມໝັ້ນຄົງ ນັບມື້ນັບເລິກເຊິ່ງ; ມູນຄ່າການຄ້າສອງຝ່າຍເພີ່ມຂຶ້ນສອງເທົ່າພາຍໃນ 5 ປີ, ບັນລຸຫຼາຍກວ່າ 14 ຕື້ USD ໃນປີ 2025. ຂະນະດຽວກັນ, ບັນດາຂົງເຂດການສຶກສາ - ຝຶກອົບຮົມ, ການພັດທະນາ, ວິທະຍາສາດ - ເຕັກໂນໂລຊີ, ນະວັດຕະກຳ ແລະ ການແລກປ່ຽນປະຊາຊົນ ກໍສືບຕໍ່ຂະຫຍາຍຕົວ.

ລັດຖະມົນຕີການຕ່າງປະເທດ ເລຮວ່າຍຈຸງ ແລະ ລັດຖະມົນຕີການຕ່າງປະເທດອົດສະຕາລີ Penny Wong.

ທ່ານ ເລ ຮວ່າຍ ຈຸງ ເນັ້ນວ່າ ຈຳເປັນຕ້ອງເລັ່ງຫັນບັນດາຄຳໝັ້ນສັນຍາ ແລະ ທິດທາງທີ່ການນຳຂັ້ນສູງສອງປະເທດໄດ້ຕົກລົງກັນ ໃຫ້ກາຍເປັນຜົນສຳເລັດທີ່ເປັນຮູບປະທຳໂດຍໄວ. ທ່ານສະເໜີໃຫ້ສອງກະຊວງການຕ່າງປະເທດສົ່ງເສີມບົດບາດເປັນຈຸດປະສານງານຫຼັກ ໃນການທົບທວນຄວາມຄືບໜ້າ, ກຳນົດວຽກງານບຸລິມະສິດ, ຊຸກຍູ້ການປະຕິບັດ ແລະ ຮ່ວມກັນແກ້ໄຂບັນດາຂໍ້ຫຍຸ້ງຍາກທີ່ເກີດຂຶ້ນ.

ທາງດ້ານທ່ານນາງ Penny Wong ຢືນຢັນວ່າ ອົດສະຕຣາລີໃຫ້ຄວາມສຳຄັນຕໍ່ສາຍພົວພັນຄູ່ຮ່ວມມືຍຸດທະສາດຮອບດ້ານກັບຫວຽດນາມ ແລະ ຕີລາຄາສູງບັນດາບາດກ້າວພັດທະນາຢ່າງເປັນຮູບປະທຳຂອງສາຍພົວພັນສອງປະເທດ. ທ່ານນາງປາດຖະໜາໃຫ້ສອງຝ່າຍນຳໃຊ້ຈຸດແຂງທີ່ເກື້ອກູນກັນຂອງສອງເສດຖະກິດໃຫ້ໄດ້ດີຍິ່ງຂຶ້ນ, ເພີ່ມທະວີການຮ່ວມມືດ້ານປ້ອງກັນຊາດ - ຄວາມໝັ້ນຄົງ ແລະ ຂະຫຍາຍການຮ່ວມມືໃນຂົງເຂດໃໝ່ໆ.

ໃນນັ້ນ, ທ່ານນາງ Penny Wong ໄດ້ໃຫ້ຄວາມສຳຄັນເປັນພິເສດຕໍ່ການເຊື່ອມໂຍງຕ່ອງໂສ້ສະໜອງ, ການລົງທຶນທີ່ມີຄຸນນະພາບສູງ, ເສດຖະກິດສີຂຽວ, ເສດຖະກິດດິຈິຕອນ, ພະລັງງານໃໝ່, ບັນດາຂະແໜງອຸດສາຫະກຳແຫ່ງອະນາຄົດ ແລະ ການເຊື່ອມຕໍ່ລະບົບນິເວດນະວັດຕະກຳຂອງສອງປະເທດ.

ກ່ຽວກັບສະພາບການພາກພື້ນ ແລະ ສາກົນ, ລັດຖະມົນຕີທັງສອງທ່ານໄດ້ແລກປ່ຽນວິໄສທັດຮ່ວມກັນກ່ຽວກັບຄວາມຈຳເປັນໃນການສ້າງໂຄງສ້າງພາກພື້ນທີ່ເປີດກວ້າງ, ກວມລວມ, ໂປ່ງໃສ ແລະ ອີງໃສ່ກົດລະບຽບ. ສອງຝ່າຍເນັ້ນວ່າ ທຸກປະເທດຄວນມີໂອກາດປະກອບສ່ວນຮັກສາສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ, ພ້ອມທັງຢືນຢັນບົດບາດໃຈກາງຂອງ ASEAN ແລະ ເຫັນດີເພີ່ມທະວີການປະສານງານໃນຂອບ ASEAN, ສະຫະປະຊາຊາດ, APEC ແລະ ບັນດາເວທີຫຼາຍຝ່າຍ.

ທ່ານນາງ Penny Wong ຢືນຢັນວ່າ ອົດສະຕຣາລີໃຫ້ຄວາມສຳຄັນຕໍ່ອາຊີຕາເວັນອອກສ່ຽງໃຕ້ ແລະ ບົດບາດໃຈກາງຂອງ ASEAN, ພ້ອມທັງຕີລາຄາສູງຖານະ ແລະ ບົດບາດທີ່ນັບມື້ນັບສຳຄັນຂອງຫວຽດນາມໃນ ASEAN ແລະ ບັນດາກົນໄກພາກພື້ນ. ທ່ານນາງຍັງຢືນຢັນການສະໜັບສະໜູນຫວຽດນາມໃນການປະຕິບັດບົດບາດເຈົ້າພາບ APEC 2027 ໃຫ້ສຳເລັດຜົນ, ຜ່ານນັ້ນຊຸກຍູ້ການຮ່ວມມືທາງເສດຖະກິດ, ການເຕີບໂຕຢ່າງຍືນຍົງ ແລະ ການເຊື່ອມໂຍງພາກພື້ນ.

ສຳລັບບັນຫາທະເລຕາເວັນອອກ, ສອງຝ່າຍຢືນຢັນຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ ແລະ ເສລີພາບໃນການເດີນເຮືອ ແລະ ການບິນ. ທັງສອງຝ່າຍເນັ້ນໃຫ້ແກ້ໄຂບັນດາບັນຫາບົນພື້ນຖານການເຄົາລົບກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດວ່າດ້ວຍກົດໝາຍທະເລ ປີ 1982 (UNCLOS 1982).

ລັດຖະມົນຕີທັງສອງທ່ານໄດ້ແລກປ່ຽນຄວາມເຫັນຢ່າງເລິກເຊິ່ງ ແລະ ກວ້າງຂວາງ ກ່ຽວກັບການພົວພັນສອງຝ່າຍ ແລະ ບັນດາບັນຫາພາກພື້ນ, ສາກົນທີ່ທັງສອງຝ່າຍສົນໃຈ.

ໃນໂອກາດດຽວກັນ, ທ່ານ ເລ ຮວ່າຍ ຈຸງ ໄດ້ມີກອງປະຊຸມເຮັດວຽກກັບກະຊວງການຕ່າງປະເທດ ແລະ ການຄ້າອົດສະຕຣາລີ, ເພື່ອແລກປ່ຽນປະສົບການກ່ຽວກັບການນຳໃຊ້ປັນຍາປະດິດ (AI) ໃນວຽກງານການທູດ. ທ່ານໃຫ້ຮູ້ວ່າ ຫວຽດນາມພວມກ້າວເຂົ້າສູ່ໄລຍະພັດທະນາສຳຄັນ, ດຳເນີນຮູບແບບການພັດທະນາໃໝ່ ໂດຍມີເປົ້າໝາຍກາຍເປັນປະເທດພັດທະນາແລ້ວໃນປີ 2045. ໃນສະພາບການນີ້, ວຽກງານການຕ່າງປະເທດມີບົດບາດຍຸດທະສາດ ແລະ ເປັນປະຈຳ ໃນການລະດົມ ແລະ ສ້າງແຫຼ່ງກຳລັງເພື່ອຮັບໃຊ້ການພັດທະນາປະເທດ, ໂດຍການທູດຮັບໃຊ້ການພັດທະນາເປັນໜຶ່ງໃນບັນດາບຸລິມະສິດສຳຄັນຂອງຂະແໜງການທູດ.

ທ່ານ ເລ ຮວ່າຍ ຈຸງ ສະແດງຄວາມປາດຖະໜາໃຫ້ອົດສະຕຣາລີສືບຕໍ່ແບ່ງປັນບົດຮຽນ ແລະ ສະໜັບສະໜູນກະຊວງການຕ່າງປະເທດຫວຽດນາມໃນການຍົກສູງຂີດຄວາມສາມາດຂອງຖັນແຖວພະນັກງານ, ມຸ່ງໄປສູ່ການສ້າງຂະແໜງການທູດທີ່ເປັນມືອາຊີບ, ຮອບດ້ານ ແລະ ທັນສະໄໝ.

ທ່ານເນັ້ນວ່າ ປັນຍາປະດິດພວມສ້າງການປ່ຽນແປງຢ່າງເລິກເຊິ່ງຕໍ່ເສດຖະກິດ, ສັງຄົມ, ການບໍລິຫານ ແລະ ສາຍພົວພັນສາກົນ. ສຳລັບວຽກງານການທູດ, AI ເປີດໂອກາດໃນການຍົກສູງຄວາມສາມາດວິເຄາະນະໂຍບາຍ, ຄາດຄະເນຍຸດທະສາດ ແລະ ສະໜອງບໍລິການສາທາລະນະ, ແຕ່ຂະນະດຽວກັນກໍນຳມາຊຶ່ງສິ່ງທ້າທາຍໃໝ່ຫຼາຍປະການ.

ບົນພື້ນຖານນັ້ນ, ທ່ານ ເລ ຮວ່າຍ ຈຸງ ສະເໜີໃຫ້ຝ່າຍອົດສະຕຣາລີແບ່ງປັນປະສົບການໃນການສ້າງຂອບການບໍລິຫານ AI, ການປະຍຸກໃຊ້ AI ເຂົ້າໃນການວາງແຜນນະໂຍບາຍຕ່າງປະເທດ ແລະ ກິດຈະກຳການທູດ, ຕະຫຼອດຈົນການຍົກສູງຄວາມສາມາດດ້ານດິຈິຕອນຂອງພະນັກງານການທູດ. ທ່ານຍັງເນັ້ນຄວາມຈຳເປັນຂອງການນຳໃຊ້ AI ຢ່າງປອດໄພ, ໝັ້ນຄົງ ແລະ ມີຄວາມຮັບຜິດຊອບ.

ທີ່ການພົບປະ, ກະຊວງການຕ່າງປະເທດ ແລະ ການຄ້າອົດສະຕຣາລີ ໄດ້ປະກາດມອບທຶນການສຶກສາລະດັບປະລິນຍາເອກດ້ານ AI ຈຳນວນ 3 ທຶນ ໃຫ້ແກ່ກະຊວງການຕ່າງປະເທດຫວຽດນາມ. ສອງຝ່າຍຍັງເຫັນດີຊຸກຍູ້ການແລກປ່ຽນນະໂຍບາຍ, ການຝຶກອົບຮົມ ແລະ ການຮ່ວມມືລະຫວ່າງບັນດາໜ່ວຍງານທີ່ກ່ຽວຂ້ອງ, ພ້ອມທັງຄົ້ນຄວ້າການນຳເອົາເນື້ອໃນກ່ຽວກັບ AI ເຂົ້າໃນວາລະແລກປ່ຽນເປັນປະຈຳຂອງກົນໄກ FMM ແລະ ບັນດາກົນໄກຮ່ວມມືລະຫວ່າງສອງກະຊວງ.

ຫວຽດນາມ - ອົດສະຕາລີ ມຸ່ງໄປສູ່ການຮ່ວມມືທີ່ແທດຈິງ ແລະ ມີປະສິດທິຜົນ ຍສໝ - ການຢ້ຽມຢາມຂັ້ນລັດຂອງທ່ານ ໂຕເລິມ, ເລຂາທິການໃຫຍ່, ປະທານປະເທດ ຢູ່ ອົດສະຕາລີ ແມ່ນຂີດໝາຍປະຫວັດສາດ, ສະທ້ອນເຖິງວິໄສທັດຍຸດທະສາດ, ຄວາມຕັດສິນໃຈທາງການເມືອງ ແລະ ຄວາມໄວ້ເນື້ອເຊື່ອໃຈທີ່ນັບມື້ນັບເລິກເຊິ່ງລະຫວ່າງການນຳ ແລະ ປະຊາຊົນສອງປະເທດ, ພ້ອມທັງເປີດໂອກາດໃໝ່ໆ ເພື່ອຊຸກຍູ້ການພົວພັນສອງຝ່າຍໃຫ້ພັດທະນາຢ່າງຮອບດ້ານ, ແທດຈິງ ແລະ ມີປະສິດທິຜົນຍິ່ງຂຶ້ນ.

ຫວຽດນາມ - ອົດສະຕາລີ ຊຸກຍູ້ເຕັກໂນໂລຊີ RNA ຊີວະການແພດ ຍສໝ - ວັນທີ 9/8/2026, ພາຍໃຕ້ການເປັນສັກຂີພິຍານຂອງກົງສຸນໃຫຍ່ຫວຽດນາມປະຈຳ Sydney, ສະຖາບັນຄົ້ນຄວ້າ ເຕິມແອງ ແລະ ສະຖາບັນຄົ້ນຄວ້າ RNA ແຫ່ງມະຫາວິທະຍາໄລ New South Wales ຂອງອົດສະຕາລີ ໄດ້ລົງນາມຮ່ວມມືດ້ານການຄົ້ນຄວ້າ ແລະ ພັດທະນາເຕັກໂນໂລຊີ RNA, ເປີດທ່າແຮງໃນການນຳໄປປະຍຸກໃຊ້ເພື່ອຜະລິດຢາ ແລະ ວັກຊີນຮຸ່ນໃໝ່.