ນະຄອນເກິ່ນເທີ ຂະຫຍາຍການຮ່ວມມືກັບສະວິດ ໃນຂົງເຂດວິທະຍາສາດ, ສາທາລະນະສຸກ ແລະ ການພັດທະນາຢ່າງຍືນຍົງ

ງານພົບປະຄັ້ງນີ້ຈັດຂຶ້ນໂດຍສະຫະພັນບັນດາອົງການມິດຕະພາບນະຄອນເກິ່ນເທີ ປະສານສົມທົບກັບສະມາຄົມມິດຕະພາບຫວຽດນາມ - ສະວິດ ນະຄອນເກິ່ນເທີ ແລະ ບັນດາພາກສ່ວນທີ່ກ່ຽວຂ້ອງ, ເນື່ອງໃນໂອກາດສະຫຼອງຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດຫວຽດນາມ - ສະວິດ (11 ຕຸລາ 1971 - 11 ຕຸລາ 2026).

ເຂົ້າຮ່ວມງານມີ ທ່ານ Werner Bardill, ຫົວໜ້າສະຖານກົງສຸນໃຫຍ່ສະຫະພັນສະວິດ ປະຈຳນະຄອນໂຮ່ຈີມິນ; ທ່ານນາງ ຫງວຽນ ທິ ຫງອກ ດຽບ, ຮອງປະທານຄະນະກຳມະການປະຊາຊົນນະຄອນເກິ່ນເທີ; ຜູ້ຕາງໜ້າບັນດາອົງການ, ສະຖາບັນ ແລະ ວິສາຫະກິດສະວິດ ພ້ອມດ້ວຍການນຳບັນດາພະແນກ ແລະ ຂະແໜງການຂອງທ້ອງຖິ່ນ.

ທ່ານນາງ ຫງວຽນ ທິ ຫງອກ ດຽບ, ຮອງປະທານຄະນະກຳມະການປະຊາຊົນນະຄອນເກິ່ນເທີ (ຂວາສຸດ) ແລະ ທ່ານນາງ ເລ ທິ ແທັງ ຢາງ, ປະທານສະຫະພັນບັນດາອົງການມິດຕະພາບນະຄອນເກິ່ນເທີ (ຊ້າຍສຸດ), ມອບດອກໄມ້ ແລະ ຂອງຂວັນທີ່ລະນຶກໃຫ້ແກ່ທ່ານກົງສຸນໃຫຍ່ສະຫະພັນສະວິດ ພ້ອມດ້ວຍພັນລະຍາ ໃນງານພົບປະ.

ໃຫ້ບູລິມະສິດແກ່ການຮ່ວມມືດ້ານເຕັກໂນໂລຊີ, ການສຶກສາ ແລະ ເສດຖະກິດສີຂຽວ

ກ່າວຄຳເຫັນໃນງານພົບປະ, ທ່ານນາງ ຫງວຽນ ທິ ຫງອກ ດຽບ, ຮອງປະທານຄະນະກຳມະການປະຊາຊົນນະຄອນເກິ່ນເທີ ໄດ້ສະແດງຄວາມປາຖະໜາຢາກເພີ່ມທະວີການເຊື່ອມຕໍ່ກັບບັນດາຄູ່ຮ່ວມມືສະວິດ ໃນບັນດາຂົງເຂດທີ່ສອງຝ່າຍມີຈຸດແຂງ ແລະ ຄວາມຕ້ອງການຮ່ວມມື, ປະກອບມີ ວິທະຍາສາດ - ເຕັກໂນໂລຊີ, ນະວັດຕະກຳ, ການສຶກສາ - ຝຶກອົບຮົມ, ສາທາລະນະສຸກ, ການເງິນ ແລະ ການພັດທະນາຢ່າງຍືນຍົງ.

ການນຳນະຄອນຢືນຢັນວ່າ ເກິ່ນເທີພ້ອມທີ່ຈະປະສານສົມທົບ ແລະ ສ້າງເງື່ອນໄຂອັນສະດວກໃຫ້ແກ່ບັນດາອົງການ, ສະຖາບັນ ແລະ ວິສາຫະກິດສະວິດ ໃນການຊອກຮູ້ໂອກາດ ແລະ ດຳເນີນບັນດາໂຄງການ, ແຜນງານຮ່ວມມືຢູ່ທ້ອງຖິ່ນ.

ທ່ານ Werner Bardill, ຫົວໜ້າສະຖານກົງສຸນໃຫຍ່ສະວິດ ປະຈຳນະຄອນໂຮ່ຈີມິນ ໄດ້ຕີລາຄາວ່າ ພາຍຫຼັງ 55 ປີ ແຫ່ງການສ້າງຕັ້ງສາຍພົວພັນການທູດ, ຫວຽດນາມ ແລະ ສະວິດ ໄດ້ສ້າງສາຍພົວພັນຄູ່ຮ່ວມມືບົນພື້ນຖານແຫ່ງຄວາມເຄົາລົບ, ການສົນທະນາ ແລະ ບັນດາຄຳໝັ້ນສັນຍາຮ່ວມກັນກ່ຽວກັບການພັດທະນາຢ່າງຍືນຍົງ.

ຕາມທ່ານ, ການລົງນາມໃນສັນຍາການຄ້າເສລີລະຫວ່າງຫວຽດນາມ ແລະ ສະມາຄົມການຄ້າເສລີເອີຣົບ (EFTA), ເຊິ່ງປະກອບມີ ສະວິດ, ໄອສແລນ, ເລັກເຕນສະເຕນ ແລະ ນອກແວ, ໄດ້ສ້າງໂອກາດເພີ່ມຂຶ້ນໃນການຂະຫຍາຍການຮ່ວມມືດ້ານການຄ້າ, ການລົງທຶນ ແລະ ນະວັດຕະກຳ.

ດ້ວຍທີ່ຕັ້ງເປັນສູນກາງເສດຖະກິດຂອງເຂດທົ່ງພຽງແມ່ນ້ຳຂອງ, ນະຄອນເກິ່ນເທີມີທ່າແຮງຫຼາຍໃນການຮ່ວມມືກັບສະວິດ ໃນຂົງເຂດກະສິກຳ, ການແປຮູບອາຫານ, ໂລຈິສຕິກ, ເສດຖະກິດສີຂຽວ, ນະວັດຕະກຳ ແລະ ການທ່ອງທ່ຽວຢ່າງຍືນຍົງ.

ທ່ານ Werner Bardill ໄດ້ຊຸກຍູ້ໃຫ້ອຳນາດການປົກຄອງທ້ອງຖິ່ນ, ວິສາຫະກິດ, ມະຫາວິທະຍາໄລ ແລະ ບັນດາອົງການບໍ່ຂຶ້ນກັບລັດຖະບານ ເພີ່ມທະວີການເຊື່ອມຕໍ່, ນຳໃຊ້ບັນດາໂຄງການຮ່ວມມືສອງຝ່າຍ ກໍຄືບັນດາໂອກາດຈາກສັນຍາການຄ້າເສລີຫວຽດນາມ - EFTA ໃຫ້ເກີດປະໂຫຍດ.

ການຊ່ວຍເຫຼືອຈາກສະວິດ ສະໜັບສະໜູນປະຊາຊົນເກິ່ນເທີຫຼາຍກວ່າ 442.600 ຄົນ

ສາຍພົວພັນການຮ່ວມມືລະຫວ່າງນະຄອນເກິ່ນເທີ ແລະ ບັນດາຄູ່ຮ່ວມມືສະວິດ ໄດ້ບັນທຶກຜົນສຳເລັດໃນຂົງເຂດການພັດທະນາຕົວເມືອງ, ການປັບຕົວຕໍ່ການປ່ຽນແປງດິນຟ້າອາກາດ, ການດູແລສຸຂະພາບ ແລະ ການຊ່ວຍເຫຼືອຊຸມຊົນ.

ສິ່ງທີ່ໜ້າສົນໃຈແມ່ນ ລັດຖະບານສະວິດ ໂດຍຜ່ານສຳນັກງານເລຂາທິການລັດດ້ານເສດຖະກິດຂອງສະວິດ (SECO) ໄດ້ໃຫ້ການຊ່ວຍເຫຼືອແບບບໍ່ຕ້ອງຊຳລະຄືນມູນຄ່າ 10 ລ້ານໂດລາສະຫະລັດ ເພື່ອດຳເນີນໂຄງການ “ພັດທະນານະຄອນເກິ່ນເທີ ແລະ ເພີ່ມທະວີຄວາມສາມາດໃນການປັບຕົວຂອງຕົວເມືອງ”.

ໂຄງການໄດ້ປະກອບສ່ວນປັບປຸງລະບົບໂຄງລ່າງພື້ນຖານ, ຍົກສູງຄວາມສາມາດໃນການຄວບຄຸມນ້ຳຖ້ວມ ແລະ ການປັບຕົວຕໍ່ການປ່ຽນແປງດິນຟ້າອາກາດ. ບັນດາສິ່ງກໍ່ສ້າງຄວບຄຸມນ້ຳຖ້ວມໄດ້ສ້າງປະໂຫຍດໃຫ້ແກ່ປະຊາຊົນຫຼາຍກວ່າ 442.600 ຄົນ ໃນເນື້ອທີ່ປະມານ 2.675 ເຮັກຕາ ຢູ່ເຂດໃຈກາງຕົວເມືອງ.

ນອກຈາກການຊ່ວຍເຫຼືອພັດທະນາໂຄງລ່າງພື້ນຖານແລ້ວ, ບັນດາອົງການສະວິດຍັງໄດ້ຮ່ວມເດີນທາງກັບນະຄອນເກິ່ນເທີ ໃນຂົງເຂດການສຶກສາ, ສາທາລະນະສຸກ, ການພັດທະນາຊຸມຊົນ ແລະ ການຍົກສູງຄວາມສາມາດຂອງປະຊາຊົນ.

ສະເພາະໃນປີ 2026, ນະຄອນໄດ້ອະນຸມັດການຊ່ວຍເຫຼືອ 3 ລາຍການຈາກບັນດາອົງການສະວິດ, ດ້ວຍມູນຄ່າລວມຫຼາຍກວ່າ 448.000 ໂດລາສະຫະລັດ, ໂດຍສຸມໃສ່ການປັບຕົວຕໍ່ການປ່ຽນແປງດິນຟ້າອາກາດ ແລະ ການພັດທະນາທັກສະດິຈິຕອນ.

ໃນຂົງເຂດສາທາລະນະສຸກ, ສະມາຄົມ VMA ສະວິດ ໄດ້ດຳເນີນບັນດາກິດຈະກຳຝຶກອົບຮົມ, ຊ່ວຍເຫຼືອດ້ານວິຊາການ ແລະ ອຸປະກອນການແພດໃຫ້ແກ່ໂຮງໝໍເດັກນ້ອຍນະຄອນເກິ່ນເທີ.

ພ້ອມກັນນັ້ນ, ສາຍພົວພັນການຮ່ວມມືລະຫວ່າງໂຮງໝໍ Morges (ສະວິດ) ແລະ ໂຮງໝໍທົ່ວໄປສູນກາງເກິ່ນເທີ ໄດ້ປະກອບສ່ວນຍົກສູງຄວາມສາມາດດ້ານວິຊາການ, ຄຸນນະພາບການກວດ ແລະ ປິ່ນປົວພະຍາດ ກໍຄືການດູແລສຸຂະພາບຂອງປະຊາຊົນ.

ໃນຂົງເຂດການທ່ອງທ່ຽວ, ໂຄງການພັດທະນາການທ່ອງທ່ຽວຢ່າງຍືນຍົງຂອງສະວິດຢູ່ຫວຽດນາມ (ST4SD) ໄດ້ສະໜັບສະໜູນບັນດາກິດຈະກຳທີ່ມຸ່ງສູ່ການທ່ອງທ່ຽວສີຂຽວ, ການທ່ອງທ່ຽວຊຸມຊົນ ແລະ ການທ່ອງທ່ຽວທີ່ມີຄວາມຮັບຜິດຊອບ.

ບັນດາໂຄງການເຫຼົ່ານີ້ ນອກຈາກປະກອບສ່ວນແກ້ໄຂຄວາມຕ້ອງການດ້ານການພັດທະນາຂອງທ້ອງຖິ່ນແລ້ວ, ຍັງສ້າງພື້ນຖານໃຫ້ນະຄອນເກິ່ນເທີສືບຕໍ່ຂະຫຍາຍການຮ່ວມມືກັບບັນດາອົງການ, ວິສາຫະກິດ ແລະ ຄູ່ຮ່ວມມືສະວິດ.

ບັນດາຜູ້ແທນຖ່າຍຮູບທີ່ລະນຶກຮ່ວມກັນ ໃນງານພົບປະສະຫຼອງຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດຫວຽດນາມ - ສະວິດ.

ຍ້ອງຍໍການປະກອບສ່ວນຂອງບັນດາອົງການມິດຕະພາບ ແລະ ຄູ່ຮ່ວມມືສະວິດ

ໃນຂອບເຂດງານພົບປະ, ມູນນິທິ Dariu (The Dariu Foundation) ໄດ້ຮັບໃບຍ້ອງຍໍຈາກປະທານຄະນະກຳມະການປະຊາຊົນນະຄອນເກິ່ນເທີ ເນື່ອງຈາກມີການປະກອບສ່ວນໃນວຽກງານສະຫວັດດີການສັງຄົມຢູ່ທ້ອງຖິ່ນ ໃນໄລຍະປີ 2018-2025.

ຄະນະຈັດງານຍັງໄດ້ມອບຂອງຂວັນເພື່ອສະແດງຄວາມຮູ້ບຸນຄຸນແກ່ບັນດາພະນັກງານ, ແພດໝໍ ແລະ ສະມາຊິກຄະນະບໍລິຫານງານສະມາຄົມມິດຕະພາບຫວຽດນາມ - ສະວິດ ນະຄອນເກິ່ນເທີ ທີ່ມີການປະກອບສ່ວນຫຼາຍໃນການບຳລຸງສ້າງມິດຕະພາບ ແລະ ການຮ່ວມມືລະຫວ່າງສອງປະເທດ.

ບັນດາຜູ້ແທນຍັງໄດ້ຢ້ຽມຊົມງານວາງສະແດງຮູບພາບ, ຮັບຊົມບັນດາລາຍການສິລະປະ, ຊົມວິດີໂອ ແລະ ຮັບຟັງການແບ່ງປັນກ່ຽວກັບຂະບວນການຮ່ວມມືດ້ານສາທາລະນະສຸກລະຫວ່າງນະຄອນເກິ່ນເທີ ແລະ ບັນດາຄູ່ຮ່ວມມືສະວິດ.

ຜ່ານກິດຈະກຳພົບປະ, ແລກປ່ຽນ ແລະ ຮັບຮູ້ບັນດາຜົນສຳເລັດດ້ານການຮ່ວມມືທີ່ໄດ້ຮັບ, ງານພົບປະຄັ້ງນີ້ໄດ້ປະກອບສ່ວນເພີ່ມທະວີການເຊື່ອມຕໍ່ລະຫວ່າງບັນດາອົງການ, ສະຖາບັນ ແລະ ປະຊາຊົນສອງປະເທດ, ພ້ອມທັງເປີດໂອກາດໃໝ່ໃນການຮ່ວມມືທີ່ເປັນຮູບປະທຳໃຫ້ແກ່ນະຄອນເກິ່ນເທີໃນໄລຍະຕໍ່ໜ້າ.

ມູນຄ່າການສົ່ງອອກບັນລຸລື່ນກາຍ 3 ຕື້ໂດລາສະຫະລັດ, ນະຄອນ ເກິ່ນເທີ (Cần Thơ) ເລັ່ງຄວາມໄວເພື່ອມຸ່ງສູ່ຄາດໝາຍການເຕີບໂຕທາງດ້ານເສດຖະກິດໃນລະດັບ 2 ຕົວເລກ ຍສໝ - ມູນຄ່າການສົ່ງອອກບັນລຸລື່ນກາຍ 3 ຕື້ໂດລາສະຫະລັດ, ຂະແໜງການທ່ອງທ່ຽວຕ້ອນຮັບນັກທ່ອງທ່ຽວຫຼາຍກວ່າ 7,5 ລ້ານເທື່ອຄົນ, ເນື້ອທີ່ການຜະລິດເຂົ້າຄຸນນະພາບສູງໄດ້ຮັບການຂະຫຍາຍຕົວຫຼາຍກວ່າ 170.000 ເຮັກຕາ, ແລະ ອາຄານ-ເນື້ອທີ່ດິນຂອງລັດທີ່ເຫຼືອໃຊ້ຫຼາຍຮ້ອຍແຫ່ງໄດ້ຖືກນຳເຂົ້າມາຂຸດຄົ້ນ ແລະ ນຳໃຊ້ຢ່າງມີປະສິດທິຜົນ. ບັນດາໝາກຜົນໃນທາງບວກພາຍໃນໄລຍະເຄິ່ງຕົ້ນປີ 2026 ນີ້ ພວມສ້າງພື້ນຖານອັນໜັກແໜ້ນ ເພື່ອໃຫ້ນະຄອນ ເກິ່ນເທີ ເລັ່ງຄວາມໄວພາຍໃດການຫັນຄາດໝາຍການເຕີບໂຕທາງດ້ານເສດຖະກິດໃນລະດັບ 2 ຕົວເລກພາຍໃນປີນີ້ໃຫ້ປະກົດຜົນເປັນຈິງ.

ສັບປະດາວັດທະນະທຳ - ການທ່ອງທ່ຽວ ເກິ່ນເທີ ສົ່ງເສີມການຮ່ວມມື ແລະ ພັດທະນາຜະລິດຕະພັນໃໝ່ ຍສໝ - ຕອນຄ່ຳວັນທີ 18 ມິຖຸນາ, ຢູ່ສວນສາທາລະນະທ່າເຮືອ ນິງກ່ຽວ, ສູນສົ່ງເສີມການລົງທຶນ - ການຄ້າ ແລະ ການທ່ອງທ່ຽວນະຄອນ ເກິ່ນເທີ ຮ່ວມກັບບັນດາກົມກອງທີ່ກ່ຽວຂ້ອງ ໄດ້ຈັດພິທີເປີດສັບປະດາວັດທະນະທຳ - ການທ່ອງທ່ຽວ ເກິ່ນເທີ ປະຈຳປີ 2026 ພາຍໃຕ້ຫົວຂໍ້ “ໄຕໂດ ສີສັນແຫ່ງລະດູຮ້ອນ”. ງານດັ່ງກ່າວເປັນກິດຈະກຳທີ່ສະທ້ອນເອກະລັກວັດທະນະທຳເຂດແມ່ນ້ຳລຳເຊຂອງພາກຕາເວັນຕົກພາກໃຕ້ (ທົ່ງພຽງແມ່ນ້ຳຂອງ) ແລະ ຄາດວ່າຈະກາຍເປັນຈຸດເດັ່ນສຳຄັນຂອງການທ່ອງທ່ຽວນະຄອນໃນລະດູຮ້ອນປີນີ້.