ສະມາຄົມມິດຕະພາບຫວຽດນາມ - ລາວ ສົ່ງຄຳອວຍພອນເຖິງການນຳສະມາຄົມຝ່າຍລາວ

ທ່ານ ຫງວຽນ ດັກ ວິງ, ກຳມະການຄະນະບໍລິຫານງານສູນກາງພັກ, ປະທານຄະນະກຳມາທິການວັດທະນະທຳ ແລະ ສັງຄົມ ຂອງສະພາແຫ່ງຊາດຫວຽດນາມ ໄດ້ສົ່ງຄຳອວຍພອນເຖິງທ່ານນາງ ສູນທອນ ໄຊຍະຈັກ, ເລຂາທິການຄະນະບໍລິຫານງານສູນກາງພັກປະຊາຊົນປະຕິວັດລາວ, ຮອງປະທານສະພາແຫ່ງຊາດລາວ ພ້ອມດ້ວຍສູນກາງສະມາຄົມມິດຕະພາບລາວ - ຫວຽດນາມ ໃນໂອກາດປັບປຸງ ແລະ ຈັດຕັ້ງຄະນະບໍລິຫານງານ ແລະ ຄະນະການນຳຂອງສະມາຄົມໃຫ້ສົມບູນ.

ສະມາຄົມມິດຕະພາບຫວຽດນາມ - ລາວ ໄດ້ສົ່ງຈົດໝາຍອວຍພອນເຖິງທ່ານນາງ ສູນທອນ ໄຊຍະຈັກ ໃນໂອກາດທີ່ທ່ານນາງໄດ້ຮັບການມອບໝາຍໃຫ້ດຳລົງຕຳແໜ່ງປະທານສູນກາງສະມາຄົມມິດຕະພາບລາວ - ຫວຽດນາມ.

ເມື່ອຫວນຄືນສາຍພົວພັນການຮ່ວມມືໃນໄລຍະຜ່ານມາ, ທ່ານໄດ້ຍ້ອງຍໍບັນດາກິດຈະກຳແລກປ່ຽນລະຫວ່າງປະຊາຊົນ, ການແລກປ່ຽນຄະນະຜູ້ແທນ, ການສຶກສາອົບຮົມມູນເຊື້ອ, ການລະນຶກເຖິງບຸນຄຸນ ແລະ ການຕອບແທນບຸນຄຸນຜູ້ມີຄຸນງາມຄວາມດີ, ພ້ອມທັງການຊ່ວຍເຫຼືອດ້ານຊີວິດການເປັນຢູ່ ແລະ ການຮຽນຂອງນັກສຶກສາຕ່າງປະເທດຢູ່ສອງປະເທດ. ຜ່ານນັ້ນ, ສອງສະມາຄົມໄດ້ປະກອບສ່ວນເສີມສ້າງພື້ນຖານທາງສັງຄົມໃຫ້ແກ່ສາຍພົວພັນສາມັກຄີພິເສດ ແລະ ມິດຕະພາບອັນຍິ່ງໃຫຍ່ ລະຫວ່າງສອງພັກ, ສອງລັດ ແລະ ປະຊາຊົນຫວຽດນາມ - ລາວ.

ທ່ານ ຫງວຽນ ດັກ ວິງ ໄດ້ສະແດງຄວາມຂອບໃຈຕໍ່ທ່ານ ບໍ່ວຽງຄຳ ວົງດາລາ, ອະດີດປະທານສະມາຄົມ ພ້ອມດ້ວຍອະດີດຮອງປະທານສອງທ່ານ ຄື ທ່ານ ທຸມມາລີ ວົງພະຈັນ ແລະ ທ່ານ ໄຊຄົງ ໄຊນາສິນ ສຳລັບບັນດາການປະກອບສ່ວນຕໍ່ສາຍພົວພັນສອງຝ່າຍ ແລະ ວຽກງານການທູດປະຊາຊົນ.

ທ່ານເຊື່ອໝັ້ນວ່າ ພາຍໃຕ້ການນຳພາຂອງທ່ານນາງ ສູນທອນ ໄຊຍະຈັກ, ສອງສະມາຄົມຈະສືບຕໍ່ປະສານສົມທົບກັນ, ໂດຍສະເພາະໃນບັນດາກິດຈະກຳສະຫຼອງຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດ ແລະ ຄົບຮອບ 50 ປີ ແຫ່ງວັນລົງນາມສົນທິສັນຍາມິດຕະພາບ ແລະ ການຮ່ວມມືຫວຽດນາມ - ລາວ ໃນປີ 2027, ປະກອບສ່ວນຮັກສາ ແລະ ພັດທະນາສາຍພົວພັນພິເສດລະຫວ່າງສອງປະເທດ.

ຊາວໜຸ່ມຫວຽດນາມ - ລາວ - ກຳປູເຈຍ ຂະຫຍາຍການຮ່ວມມືເພື່ອຊຸມຊົນ ຍສໝ - ວັນທີ 8 ພະຈິກ, ທີ່ແຂວງກວາງຫງາຍ, ຜູ້ແທນເກືອບ 100 ທ່ານ ໄດ້ເຂົ້າຮ່ວມງານມະຫະກຳຊາວໜຸ່ມຫວຽດນາມ - ກຳປູເຈຍ - ລາວ ປີ 2026, ຮ່ວມກັນແລກປ່ຽນປະສົບການ ແລະ ຂໍ້ລິເລີ່ມການຮ່ວມມືໃນຂົງເຂດວິທະຍາສາດ, ເຕັກໂນໂລຊີ, ການຫັນປ່ຽນດິຈິຕອນ, ການເລີ່ມຕົ້ນທຸລະກິດ, ການປົກປັກຮັກສາສິ່ງແວດລ້ອມ ແລະ ວຽກງານອາສາສະໝັກເພື່ອຊຸມຊົນ.

ຊາວໜຸ່ມຫວຽດນາມ - ລາວ - ກຳປູເຈຍ ສະເໜີສ້າງຕັ້ງກອງທຶນອາສາສະໝັກຮ່ວມກັນ ຍສໝ - ໃນງານມະຫະກຳຊາວໜຸ່ມຫວຽດນາມ - ກຳປູເຈຍ - ລາວ ປີ 2026, ຜູ້ຕາງໜ້າຊາວໜຸ່ມລາວໄດ້ສະເໜີໃຫ້ສຶກສາການສ້າງຕັ້ງກອງທຶນອາສາສະໝັກຮ່ວມກັນ ເພື່ອລະດົມແຫຼ່ງຊັບພະຍາກອນມາຊ່ວຍເຫຼືອຊຸມຊົນ, ພັດທະນາອາຊີບການຫາລ້ຽງຊີບ ແລະ ສ້າງເຂດຊາຍແດນໃຫ້ມີສັນຕິພາບ, ມິດຕະພາບ ແລະ ການພັດທະນາຢ່າງຍືນຍົງ.