ຍສໝ - ຢູ່ນະຄອນຫຼວງ ດູຊານເບ, ທ່ານ ຫງວຽນ ແທ່ງ ເລ, ເອກອັກຄະລັດຖະທູດຫວຽດນາມ ໄດ້ຍື່ນສຳເນົາສານຕາຕັ້ງຕໍ່ທ່ານ Sirojiddin Muhriddin, ລັດຖະມົນຕີກະຊວງການຕ່າງປະເທດຕາຈິກິດສະຖານ, ເພື່ອເລີ່ມຕົ້ນປະຕິບັດໜ້າທີ່ຢູ່ຕາຈິກິດສະຖານຢ່າງເປັນທາງການ. ສອງຝ່າຍໄດ້ແລກປ່ຽນບັນດາມາດຕະການເພື່ອເພີ່ມທະວີການຮ່ວມມືສອງຝ່າຍ ແລະ ວຽກງານກະກຽມສຳລັບການຢ້ຽມຢາມຫວຽດນາມໃນໄວໆ ນີ້ ຂອງປະທານາທິບໍດີຕາຈິກິດສະຖານ.
ຍສໝ - ຕອນບ່າຍວັນທີ 12 ພະຈິກ, ທ່ານ ຫງວຽນ ນາມ ເຢືອງ, ເອກອັກຄະລັດຖະທູດຫວຽດນາມປະຈຳອີຢິບ ໄດ້ພົບປະເຮັດວຽກກັບທ່ານ Salah Suleiman Jamblatt, ລັດຖະມົນຕີກະຊວງອຸດສາຫະກຳປ້ອງກັນຊາດອີຢິບ, ເພື່ອແລກປ່ຽນບັນດາມາດຕະການເປີດກວ້າງການຮ່ວມມືດ້ານປ້ອງກັນຊາດລະຫວ່າງສອງປະເທດ, ໂດຍສະເພາະໃນຂົງເຂດເຕັກໂນໂລຊີຂັ້ນສູງ.
ຍສໝ - ແຕ່ວັນທີ 6-8 ພະຈິກ, ສະຖານທູດຫວຽດນາມປະຈຳປາກິດສະຖານ ໄດ້ເຂົ້າຮ່ວມງານບຸນການທ່ອງທ່ຽວ, ກິລາ ແລະ ຄອບຄົວປາກິດສະຖານ ຄັ້ງທີ 2 (Pakistan Tourism, Sports & Family Festival 2026) ຢູ່ນະຄອນຫຼວງ ອິດສະລາມາບັດ, ເພື່ອແນະນຳວັດທະນະທຳ, ຜູ້ຄົນ ແລະ ບັນດາສະຖານທີ່ທ່ອງທ່ຽວຂອງຫວຽດນາມຕໍ່ສາທາລະນະຊົນສາກົນ.
ຍສໝ - ຕອນເຊົ້າວັນທີ 13 ພະຈິກ, ຢູ່ສຳນັກງານລັດຖະບານ, ທ່ານ ເລ ມິງ ຮຸ່ງ, ນາຍົກລັດຖະມົນຕີຫວຽດນາມ ໄດ້ຕ້ອນຮັບທ່ານ Bruno Rodríguez Parrilla, ທູດພິເສດຂອງພັກ ແລະ ລັດຖະບານກູບາ, ກຳມະການກົມການເມືອງ, ລັດຖະມົນຕີກະຊວງການຕ່າງປະເທດກູບາ ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ.
ຍສໝ - ວັນທີ 12 ພະຈິກ, ຢູ່ຮ່າໂນ້ຍ, ໄດ້ມີການລົງນາມຂໍ້ຕົກລົງຮ່ວມມື 8 ສະບັບ ໃນຂອບເຂດກອງປະຊຸມ AI - ເຄິ່ງຊັກນຳໄຟຟ້າ ຫວຽດນາມ - ສ.ເກົາຫຼີ ຄັ້ງທີ 1 (VKAISS 2026), ໂດຍສຸມໃສ່ການພັດທະນາເຕັກໂນໂລຊີ, ການເຊື່ອມໂຍງຕ່ອງໂສ້ສະໜອງໃນຂົງເຂດເຄິ່ງຊັກນຳໄຟຟ້າ ແລະ ການຝຶກອົບຮົມບຸກຄະລາກອນ.
ຍສໝ - ວັນທີ 11 ພະຈິກ, ຢູ່ແຂວງເຊີນລາ, ທະຫານຊາຍແດນແຂວງເຊີນລາ (ຫວຽດນາມ) ແລະ ຄະນະຜູ້ແທນຕຳຫຼວດແຂວງຫຼວງພະບາງ (ລາວ) ໄດ້ຈັດການເຈລະຈາ, ປະເມີນຜົນການຮ່ວມມື ແລະ ເຫັນດີຮ່ວມກັນກ່ຽວກັບບັນດາໜ້າທີ່ຈຸດສຸມໃນການຄຸ້ມຄອງ, ປົກປັກຮັກສາຊາຍແດນ ແລະ ປ້ອງກັນ, ຕ້ານອາຊະຍາກຳຂ້າມຊາດ.
ຍສໝ - ຕອນຄ່ຳວັນທີ 10 ພະຈິກ, ຢູ່ແຂວງກວາງຫງາຍ, ງານມະຫະກຳຊາວໜຸ່ມຫວຽດນາມ - ກຳປູເຈຍ - ລາວ ປີ 2026 ໄດ້ປິດລົງດ້ວຍງານກາລາພາຍໃຕ້ຫົວຂໍ້ “ຮ່ວມສາຍທານມິດຕະພາບ - ສ້າງສັນວັນພຸ່ງນີ້”. ບັນດາກິດຈະກຳແລກປ່ຽນ ແລະ ສຳຜັດປະສົບການໃນຂອບເຂດງານມະຫະກຳ ໄດ້ປະກອບສ່ວນເພີ່ມທະວີຄວາມຜູກພັນລະຫວ່າງຊາວໜຸ່ມສາມປະເທດ, ມຸ່ງສູ່ການສ້າງເຂດຊາຍແດນແຫ່ງສັນຕິພາບ, ມິດຕະພາບ, ການຮ່ວມມື ແລະ ການພັດທະນາຢ່າງຍືນຍົງ.
ຍສໝ - ວັນທີ 10 ພະຈິກ, ທ່ານ ຫວູ ໂຮ່, ເອກອັກຄະລັດຖະທູດຫວຽດນາມປະຈຳ ສ.ເກົາຫຼີ ໄດ້ຕ້ອນຮັບທ່ານ Jung Kwang-cheon, ປະທານສະມາຄົມນະວັດຕະກຳວິສາຫະກິດຂະໜາດກາງ ແລະ ນ້ອຍ ສ.ເກົາຫຼີ (INNOBIZ), ເພື່ອແລກປ່ຽນກ່ຽວກັບການຮ່ວມມືດ້ານວິທະຍາສາດ, ເຕັກໂນໂລຊີ, ນະວັດຕະກຳ ແລະ ການພັດທະນາຊັບພະຍາກອນມະນຸດທີ່ມີຄຸນນະພາບສູງ.
ຍສໝ - ຕອນບ່າຍວັນທີ 11 ພະຈິກ, ຢູ່ຮ່າໂນ້ຍ, ສະຫະພັນບັນດາອົງການມິດຕະພາບຫວຽດນາມ ແລະ ສະມາຄົມມິດຕະພາບຫວຽດນາມ - ເດນມາກ ໄດ້ຈັດພິທີລະນຶກຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດລະຫວ່າງສອງປະເທດ ພາຍໃຕ້ຫົວຂໍ້ “ການຮ່ວມມືເພື່ອອະນາຄົດສີຂຽວ”. ນີ້ເປັນໂອກາດເພື່ອທົບທວນຄືນບັນດາຂີດໝາຍສຳຄັນໃນສາຍພົວພັນສອງຝ່າຍ ແລະ ແລກປ່ຽນທິດທາງການຮ່ວມມື ພາຍຫຼັງສອງປະເທດຍົກລະດັບສາຍພົວພັນຂຶ້ນເປັນຄູ່ຮ່ວມຍຸດທະສາດຮອບດ້ານ.
ຍສໝ - ວັນທີ 11 ພະຈິກ, ຢູ່ຮ່າໂນ້ຍ, ທ່ານ ເລ ແອງ ຕວັນ, ຮອງລັດຖະມົນຕີການຕ່າງປະເທດ ໄດ້ເຂົ້າຮ່ວມພິທີລະນຶກວັນຊາດອານເຊຣີ ຄົບຮອບ 72 ປີ, ພ້ອມທັງຢືນຢັນຄວາມປາຖະໜາທີ່ຈະນຳພາສາຍພົວພັນຄູ່ຮ່ວມຍຸດທະສາດລະຫວ່າງສອງປະເທດໃຫ້ພັດທະນາຢ່າງເລິກເຊິ່ງ ແລະ ກວ້າງຂວາງ, ໂດຍສຸມໃສ່ດ້ານເສດຖະກິດ, ວິທະຍາສາດ - ເຕັກໂນໂລຊີ ແລະ ການແລກປ່ຽນລະຫວ່າງປະຊາຊົນ.
ຍສໝ - ແຕ່ວັນທີ 7-11 ພະຈິກ, ໃນຂອບເຂດການຢ້ຽມຢາມ ແລະ ເຮັດວຽກຢູ່ຊູແອດ, ທ່ານ ຈິ້ງ ວັນ ກວຽດ, ຫົວໜ້າຄະນະໂຄສະນາສຶກສາອົບຮົມສູນກາງ ໄດ້ພົບປະກັບບັນດາພັກການເມືອງ, ອຳນາດການປົກຄອງທ້ອງຖິ່ນ, ສະຖາບັນຄົ້ນຄວ້າ ແລະ ວິສາຫະກິດຂອງປະເທດເຈົ້າພາບ, ເພື່ອແລກປ່ຽນຫຼາຍທິດທາງການຮ່ວມມືດ້ານເຕັກໂນໂລຊີ, ການສຶກສາ, ການພັດທະນາຕົວເມືອງ ແລະ ການແລກປ່ຽນປະຊາຊົນ.
ຍສໝ - ວັນທີ 9 ພະຈິກ, ທ່ານ ຫງວຽນ ດັກ ວິງ, ປະທານສູນກາງສະມາຄົມມິດຕະພາບຫວຽດນາມ - ລາວ ໄດ້ສົ່ງຈົດໝາຍອວຍພອນເຖິງທ່ານນາງ ສູນທອນ ໄຊຍະຈັກ ໃນໂອກາດຮັບໜ້າທີ່ເປັນປະທານສູນກາງສະມາຄົມມິດຕະພາບລາວ - ຫວຽດນາມ, ພ້ອມທັງສະແດງຄວາມປາຖະໜາໃຫ້ສອງສະມາຄົມສືບຕໍ່ປະສານສົມທົບກັນໃນບັນດາກິດຈະກຳມິດຕະພາບ.
ຍສໝ - ວັນທີ 9 ພະຈິກ, ທີ່ຮ່າໂນ້ຍ, ຫວຽດນາມ ແລະ ອົດສະຕຣາລີ ໄດ້ຈັດການສົນທະນານະໂຍບາຍປ້ອງກັນຊາດຄັ້ງທີ 9, ເພື່ອແລກປ່ຽນບັນດາມາດຕະການຜັນຂະຫຍາຍການຮ່ວມມືສອງຝ່າຍ, ໃນນັ້ນມີການຮັກສາສັນຕິພາບຂອງສະຫະປະຊາຊາດ ແລະ ການແກ້ໄຂຜົນກະທົບຈາກສົງຄາມ.
ຍສໝ - ໃນຕອນແລງວັນທີ 9 ພະຈິກ, ທີ່ນະຄອນຫຼວງວຽງຈັນ (ລາວ), ບໍລິສັດຮຸ້ນສ່ວນການເດີນທາງສີຂຽວ ແລະ ອັດສະລິຍະ (Green SM) ໄດ້ຈັດພິທີລົງນາມໃນບົດບັນທຶກຄວາມເຂົ້າໃຈ ເພື່ອສ້າງຕັ້ງພັນທະມິດການຫັນປ່ຽນສີຂຽວລາວ, ພ້ອມທັງສະຫຼອງຄົບຮອບ 3 ປີ ແຫ່ງການດຳເນີນທຸລະກິດໃນຕະຫຼາດລາວ. ເຫດການດັ່ງກ່າວໄດ້ເປີດໂອກາດໃໝ່ໃນການຮ່ວມມືດ້ານການຂົນສົ່ງສີຂຽວ, ເຕັກໂນໂລຊີດິຈິຕອນ ແລະ ການບໍລິການ ລະຫວ່າງວິສາຫະກິດຫວຽດນາມກັບບັນດາຄູ່ຮ່ວມມືລາວ.
ຍສໝ - ຕອນບ່າຍວັນທີ 10 ພະຈິກ, ຢູ່ຮ່າໂນ້ຍ, ສະຖານທູດອັງໂກລາປະຈຳຫວຽດນາມ ໄດ້ຈັດການສຳມະນາຫົວຂໍ້ “ອັງໂກລາ ແລະ ຫວຽດນາມ: ຈາກຄວາມຊົງຈຳສູ່ອະນາຄົດ - ການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ”, ເນື່ອງໃນໂອກາດລະນຶກຄົບຮອບ 51 ປີ ວັນຊາດອັງໂກລາ (11 ພະຈິກ 1975 - 11 ພະຈິກ 2026). ໃນງານດັ່ງກ່າວ, ບັນດາຜູ້ແທນໄດ້ແລກປ່ຽນທິດທາງຕ່າງໆ ເພື່ອສົ່ງເສີມສາຍພົວພັນມິດຕະພາບມູນເຊື້ອ, ຂະຫຍາຍການຮ່ວມມືດ້ານເສດຖະກິດ ແລະ ການແລກປ່ຽນລະຫວ່າງປະຊາຊົນສອງປະເທດ.
ຍສໝ - ທ່ານ ບຸ່ຍ ເລ ຖາຍ, ເອກອັກຄະລັດຖະທູດຫວຽດນາມ ປະຈຳຮົງກາລີ ໄດ້ສະເໜີໃຫ້ສະມາຄົມປັນຍາຊົນຫວຽດນາມຢູ່ຮົງກາລີ ຂະຫຍາຍເຄືອຂ່າຍຜູ້ຊ່ຽວຊານ, ເຊື່ອມຕໍ່ບັນດາມະຫາວິທະຍາໄລ, ສະຖາບັນຄົ້ນຄວ້າ ແລະ ວິສາຫະກິດຂອງສອງປະເທດ, ມຸ່ງສູ່ບັນດາໂຄງການຄົ້ນຄວ້າ, ການປະຍຸກໃຊ້ ແລະ ການຖ່າຍທອດເຕັກໂນໂລຊີທີ່ເປັນຮູບປະທຳ.
ຍສໝ - ວັນທີ 7 ພະຈິກ, ທີ່ຮ່າໂນ້ຍ, ອົງການ Good Neighbors International (GNI) ປະຈຳຫວຽດນາມ ໄດ້ມອບທຶນການສຶກສາລະດັບມະຫາວິທະຍາໄລ ແລະ ວິທະຍາໄລ ຈຳນວນ 46 ທຶນ ພາຍໃຕ້ຊື່ “ເຕີບໃຫຍ່ໄປພ້ອມກັບຂ້ອຍ 2026” ໃຫ້ແກ່ນັກສຶກສາໃໝ່ທີ່ມີສະພາບຄອບຄົວຫຍຸ້ງຍາກ, ເພື່ອຊ່ວຍໃຫ້ພວກເຂົາສືບຕໍ່ການຮຽນ ແລະ ສານຕໍ່ຄວາມໃຝ່ຝັນ.
ຍສໝ - ແຂວງກວາງຈິ ຈະດຳເນີນການທົດລອງສ້າງດ່ານຊາຍແດນຕົວແບບ ຢູ່ຄູ່ດ່ານສາກົນລາວບາວ (ຫວຽດນາມ) - ແດນສະຫວັນ (ລາວ) ໃນໄລຍະ 2027-2028, ແນໃສ່ຫັນພື້ນຖານໂຄງລ່າງໃຫ້ທັນສະໄໝ, ຍົກສູງປະສິດທິຜົນການຄຸ້ມຄອງ ແລະ ອຳນວຍຄວາມສະດວກໃຫ້ແກ່ກິດຈະກຳການຄ້າລະຫວ່າງສອງປະເທດ.
ຍສໝ - ວັນທີ 9 ພະຈິກ, ຢູ່ນະຄອນຫຼວງມິນສະກ໌ (ເບລາຣຸດ), ສະຖານທູດຫວຽດນາມ ແລະ ສະມາຄົມຊາວຫວຽດນາມຢູ່ເບລາຣຸດ ໄດ້ຈັດພິທີເປີດສົກຮຽນພາສາຫວຽດນາມ 2026-2027, ຄຽງຄູ່ກັບກິດຈະກຳດ້ານວັດທະນະທຳ ແລະ ສິລະປະ ເພື່ອມຸ່ງສູ່ວັນວັດທະນະທຳຫວຽດນາມ (24 ພະຈິກ).
ຍສໝ - ວັນທີ 5 ພະຈິກ, ໃນງານພົບປະສະຫຼອງຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດຫວຽດນາມ - ສະວິດ, ການນຳນະຄອນເກິ່ນເທີ ໄດ້ສະແດງຄວາມປາຖະໜາຢາກຂະຫຍາຍການຮ່ວມມືກັບບັນດາຄູ່ຮ່ວມມືສະວິດ ໃນຂົງເຂດວິທະຍາສາດ - ເຕັກໂນໂລຊີ, ນະວັດຕະກຳ, ການສຶກສາ, ສາທາລະນະສຸກ, ການເງິນ ແລະ ການພັດທະນາຢ່າງຍືນຍົງ.