ຫວຽດນາມ - ເດນມາກ ຂະຫຍາຍການຮ່ວມມືດ້ານການພັດທະນາສີຂຽວ

ເຂົ້າຮ່ວມລາຍການມີທ່ານນາງ ຫງວຽນ ທິ ທູ ຢາງ, ຮອງປະທານສະຫະພັນບັນດາອົງການມິດຕະພາບຫວຽດນາມ; ທ່ານ ເລ ກົງ ແທ່ງ, ອະດີດຮອງລັດຖະມົນຕີກະຊວງກະສິກຳ ແລະ ສິ່ງແວດລ້ອມ, ປະທານສະມາຄົມມິດຕະພາບຫວຽດນາມ - ເດນມາກ; ທ່ານນາງ Lina Gandløse Hansen, ເອກອັກຄະລັດຖະທູດເດນມາກປະຈຳຫວຽດນາມ; ທ່ານ ຫງວຽນ ເລ ແທງ, ເອກອັກຄະລັດຖະທູດຫວຽດນາມປະຈຳເດນມາກ (ເຂົ້າຮ່ວມທາງອອນລາຍ), ພ້ອມດ້ວຍຜູ້ຕາງໜ້າສະຖານທູດຂອງສອງປະເທດ ແລະ ນັກສຶກສາຈຳນວນຫຼາຍຈາກມະຫາວິທະຍາໄລຊັບພະຍາກອນ ແລະ ສິ່ງແວດລ້ອມ.

ທ່ານນາງ ຫງວຽນ ທິ ທູ ຢາງ, ຮອງປະທານສະຫະພັນບັນດາອົງການມິດຕະພາບຫວຽດນາມ ກ່າວເປີດພິທີ.

55 ປີ ແຫ່ງການທະນຸບຳລຸງສາຍພົວພັນມິດຕະພາບ ແລະ ການຮ່ວມມື

ກ່າວປາໄສໃນພິທີ, ທ່ານນາງ ຫງວຽນ ທິ ທູ ຢາງ, ຮອງປະທານສະຫະພັນບັນດາອົງການມິດຕະພາບຫວຽດນາມ ໄດ້ຢືນຢັນວ່າ ມິດຕະພາບ, ຄວາມເຂົ້າໃຈ ແລະ ຄວາມໄວ້ວາງໃຈເຊິ່ງກັນ ແລະ ກັນ ແມ່ນພື້ນຖານທີ່ດຳລົງຢູ່ຕະຫຼອດໃນສາຍພົວພັນຫວຽດນາມ - ເດນມາກ. ວັນທີ 25 ພະຈິກ 1971, ໃນຂະນະທີ່ຫວຽດນາມຍັງຢູ່ໃນຊຸມປີແຫ່ງການຕໍ່ສູ້ຕ້ານສັດຕູ, ເດນມາກໄດ້ກາຍເປັນໜຶ່ງໃນບັນດາປະເທດຕາເວັນຕົກທຳອິດທີ່ສ້າງຕັ້ງສາຍພົວພັນການທູດກັບຫວຽດນາມ. ຂີດໝາຍນີ້ສະແດງເຖິງນ້ຳໃຈສາມັກຄີ ແລະ ການສະໜັບສະໜູນອັນລ້ຳຄ່າທີ່ປະຊາຊົນເດນມາກມອບໃຫ້ແກ່ຫວຽດນາມ.

ພາຍຫຼັງ 55 ປີ, ການຮ່ວມມືລະຫວ່າງສອງປະເທດໄດ້ມີບາດກ້າວພັດທະນາຢ່າງສຳຄັນ, ຫັນປ່ຽນຈາກສາຍພົວພັນການຊ່ວຍເຫຼືອຝ່າຍດຽວ ມາເປັນການຮ່ວມມືຫຼາຍຂົງເຂດທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ລວມມີການຄ້າ, ການລົງທຶນ, ການສຶກສາ, ສາທາລະນະສຸກ, ພະລັງງານ ແລະ ການແລກປ່ຽນລະຫວ່າງປະຊາຊົນ. ໂດຍສະເພາະ, ການຍົກລະດັບສາຍພົວພັນຂຶ້ນເປັນຄູ່ຮ່ວມຍຸດທະສາດຮອບດ້ານໃນເດືອນຕຸລາຜ່ານມາ ເນື່ອງໃນໂອກາດການຢ້ຽມຢາມຂອງທ່ານ ໂຕ ເລິມ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ໄດ້ສ້າງຂອບການຮ່ວມມືໃໝ່ເພື່ອໃຫ້ສອງຝ່າຍດຳເນີນການຮ່ວມມືຢ່າງເປັນຮູບປະທຳ, ຍືນຍົງ ແລະ ຕອບສະໜອງຜົນປະໂຫຍດໄລຍະຍາວຂອງປະຊາຊົນສອງປະເທດ.

ທ່ານນາງ ຫງວຽນ ທິ ທູ ຢາງ ໃຫ້ຮູ້ວ່າ ປັດຈຸບັນ ເດນມາກແມ່ນໜຶ່ງໃນບັນດາຄູ່ຮ່ວມມືສຳຄັນຂອງຫວຽດນາມຢູ່ເອີຣົບ, ໂດຍມີວິສາຫະກິດຫຼາຍກວ່າ 150 ແຫ່ງພວມດຳເນີນກິດຈະການຢູ່ຫວຽດນາມ. ໃນນັ້ນ, ການຫັນປ່ຽນສີຂຽວແມ່ນຂົງເຂດຮ່ວມມືທີ່ໂດດເດັ່ນ, ໂດຍສຸມໃສ່ການພັດທະນາພະລັງງານທົດແທນ, ເສດຖະກິດໝູນວຽນ, ກະສິກຳອັດສະລິຍະ ແລະ ການຮັບມືກັບການປ່ຽນແປງດິນຟ້າອາກາດ.

ກ່ຽວກັບທິດທາງໃນໄລຍະຕໍ່ໄປ, ທ່ານນາງໄດ້ສະແດງຄວາມປາຖະໜາໃຫ້ສອງປະເທດຂຸດຄົ້ນທ່າແຮງການຮ່ວມມືເພີ່ມຕື່ມໃນການພັດທະນາໂຄງລ່າງພື້ນຖານຍຸດທະສາດ, ທ່າເຮືອ, ໂລຈິສຕິກ, ການຂົນສົ່ງທາງທະເລສີຂຽວ ແລະ ການເຊື່ອມຕໍ່ຕ່ອງໂສ້ການສະໜອງ.

ແບ່ງປັນໃນງານ, ທ່ານນາງ Lina Gandløse Hansen, ເອກອັກຄະລັດຖະທູດເດນມາກປະຈຳຫວຽດນາມ ໄດ້ທົບທວນຄືນຂະບວນການຮ່ວມມືລະຫວ່າງສອງປະເທດ, ເລີ່ມຈາກບັນດາເງິນກູ້ຂອງລັດ ແລະ ການຊ່ວຍເຫຼືອເພື່ອການພັດທະນາທີ່ເດນມາກມອບໃຫ້ຫວຽດນາມໃນຊຸມທົດສະວັດທຳອິດຫຼັງສ້າງຕັ້ງສາຍພົວພັນການທູດ, ເຊິ່ງສ່ວນໃຫຍ່ແນໃສ່ການຟື້ນຟູພື້ນຖານໂຄງລ່າງ ແລະ ການຜະລິດ. ບົນພື້ນຖານນັ້ນ, ບັນດາກິດຈະກຳຮ່ວມມືໄດ້ຄ່ອຍໆຂະຫຍາຍໄປສູ່ຂົງເຂດກະສິກຳ, ການປະມົງ, ສາທາລະນະສຸກ, ພະລັງງານ ແລະ ຫຼາຍຂົງເຂດອື່ນໆ.

ທ່ານນາງເອກອັກຄະລັດຖະທູດ ໄດ້ເນັ້ນໜັກເປັນພິເສດເຖິງຄວາມໝາຍຂອງການຢ້ຽມຢາມລະດັບລັດຢູ່ເດນມາກຂອງທ່ານ ໂຕ ເລິມ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ໃນເດືອນຕຸລາຜ່ານມາ. ໃນລະຫວ່າງການຢ້ຽມຢາມ, ບັນດາວິສາຫະກິດສອງປະເທດໄດ້ລົງນາມໃນ 15 ຂໍ້ຕົກລົງຮ່ວມມື, ຄຽງຄູ່ກັບ 7 ບົດບັນທຶກຄວາມເຂົ້າໃຈທີ່ໄດ້ລົງນາມລະຫວ່າງບັນດາອົງການລັດຖະບານ.

“ບໍ່ພຽງແຕ່ບັນດາວິສາຫະກິດເດນມາກທີ່ປາຖະໜາຂະຫຍາຍການດຳເນີນງານຢູ່ຫວຽດນາມເທົ່ານັ້ນ, ການຢ້ຽມຢາມຍັງສະແດງໃຫ້ເຫັນເຖິງຄວາມສົນໃຈຢ່າງແຮງກ້າຂອງຄະນະຜູ້ນຳທາງການເມືອງສອງປະເທດ ຕໍ່ການເພີ່ມທະວີການແລກປ່ຽນ ແລະ ການພົວພັນສອງຝ່າຍ”, ທ່ານນາງເອກອັກຄະລັດຖະທູດຢືນຢັນ.

ຕາມທ່ານນາງ Lina Gandløse Hansen, ການສ້າງຕັ້ງສາຍພົວພັນຄູ່ຮ່ວມຍຸດທະສາດຮອບດ້ານ ໄດ້ເປີດໄລຍະພັດທະນາໃໝ່ໃນສາຍພົວພັນສອງປະເທດ. ຄຽງຄູ່ກັບການສືບຕໍ່ສົ່ງເສີມປະສິດທິຜົນການຮ່ວມມືໃນບັນດາຂົງເຂດມູນເຊື້ອ, ຫວຽດນາມ ແລະ ເດນມາກ ຍັງມີເງື່ອນໄຂເພີ່ມຕື່ມໃນການຂະຫຍາຍການຮ່ວມມືດ້ານເຕັກໂນໂລຊີໃໝ່, ນະວັດຕະກຳ, ການຄົ້ນຄວ້າ, ການປ້ອງກັນຊາດ ແລະ ຄວາມໝັ້ນຄົງ.

ບັນດາຜູ້ແທນປຶກສາຫາລືກ່ຽວກັບໂອກາດການຮ່ວມມືໃນຂົງເຂດການຫັນປ່ຽນສີຂຽວ.

ສ້າງແຮງຂັບເຄື່ອນໃໝ່ໃຫ້ແກ່ສາຍພົວພັນຄູ່ຮ່ວມຍຸດທະສາດຮອບດ້ານ

ກ່າວປາໄສທາງອອນລາຍຈາກເດນມາກ, ທ່ານ ຫງວຽນ ເລ ແທງ, ເອກອັກຄະລັດຖະທູດຫວຽດນາມປະຈຳເດນມາກ ໄດ້ທົບທວນຄືນຂະບວນການພັດທະນາສາຍພົວພັນສອງຝ່າຍຜ່ານບັນດາຂີດໝາຍສຳຄັນ. ສອງປະເທດໄດ້ສ້າງຕັ້ງຄູ່ຮ່ວມຍຸດທະສາດດ້ານການຮັບມືກັບການປ່ຽນແປງດິນຟ້າອາກາດ, ພະລັງງານ, ສິ່ງແວດລ້ອມ ແລະ ການເຕີບໂຕສີຂຽວ ໃນປີ 2011; ຄູ່ຮ່ວມຮອບດ້ານໃນປີ 2013; ຄູ່ຮ່ວມຍຸດທະສາດສີຂຽວໃນປີ 2023 ແລະ ຍົກລະດັບຂຶ້ນເປັນຄູ່ຮ່ວມຍຸດທະສາດຮອບດ້ານຢ່າງເປັນທາງການໃນວັນທີ 20 ຕຸລາ 2026.

ດ້ວຍບາດກ້າວພັດທະນານີ້, ເດນມາກໄດ້ກາຍເປັນປະເທດເອີຣົບເໜືອທຳອິດ ແລະ ເປັນປະເທດທີສອງໃນສະຫະພາບເອີຣົບ (EU) ທີ່ສ້າງຕັ້ງສາຍພົວພັນຄູ່ຮ່ວມຍຸດທະສາດຮອບດ້ານກັບຫວຽດນາມ.

ກ່າວເຖິງຜົນການຮ່ວມມືດ້ານເສດຖະກິດ, ທ່ານເອກອັກຄະລັດຖະທູດ ຫງວຽນ ເລ ແທງ ໃຫ້ຮູ້ວ່າ ມູນຄ່າການຄ້າສອງຝ່າຍໃນ 9 ເດືອນຕົ້ນປີ 2026 ເພີ່ມຂຶ້ນປະມານ 35% ເມື່ອທຽບກັບໄລຍະດຽວກັນຂອງປີກ່ອນ, ບັນລຸລະດັບເທົ່າກັບ 93% ຂອງມູນຄ່າການຄ້າຕະຫຼອດປີ 2025. ຜົນສຳເລັດນີ້ສ້າງເງື່ອນໄຂອັນສະດວກໃຫ້ສອງປະເທດສືບຕໍ່ມຸ່ງສູ່ເປົ້າໝາຍຍົກມູນຄ່າການຄ້າສອງຝ່າຍໃຫ້ບັນລຸ 1 ຕື້ໂດລາສະຫະລັດ.

ກ່ຽວກັບການລົງທຶນ, ປັດຈຸບັນ ເດນມາກມີ 180 ໂຄງການທີ່ຍັງມີຜົນບັງຄັບໃຊ້ຢູ່ຫວຽດນາມ, ດ້ວຍຍອດທຶນຈົດທະບຽນລວມເກືອບ 2,5 ຕື້ໂດລາສະຫະລັດ. ວິສາຫະກິດເດນມາກຫຼາຍກວ່າ 150 ແຫ່ງພວມດຳເນີນກິດຈະການຢູ່ຫວຽດນາມ, ປະກອບສ່ວນເຂົ້າໃນການພັດທະນາເສດຖະກິດ, ປັບປຸງຄວາມສາມາດໃນການແຂ່ງຂັນ ແລະ ຊຸກຍູ້ຂະບວນການຫັນປ່ຽນສີຂຽວ.

ທ່ານເອກອັກຄະລັດຖະທູດ ຍັງໄດ້ກ່າວເຖິງບັນດາກິດຈະກຳທີ່ສອງປະເທດດຳເນີນການທັນທີພາຍຫຼັງການຢ້ຽມຢາມລະດັບລັດຂອງທ່ານ ໂຕ ເລິມ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ. ພຽງໜຶ່ງອາທິດຫຼັງການຢ້ຽມຢາມ, ຫວຽດນາມ ແລະ ເດນມາກ ໄດ້ດຳເນີນການປະຊຸມຄະນະກຳມະການຮ່ວມລະຫວ່າງລັດຖະບານວ່າດ້ວຍການຄ້າ, ການລົງທຶນ ແລະ ວິທະຍາສາດ - ເຕັກນິກ, ພ້ອມທັງດຳເນີນບັນດາກິດຈະກຳຮ່ວມມືກ່ຽວກັບໂຮງໝໍອັດສະລິຍະ, ສາທາລະນະສຸກດິຈິຕອນ ແລະ ນະວັດຕະກຳເຕັກໂນໂລຊີຈຸລິນຊີ.

ຕາມທ່ານເອກອັກຄະລັດຖະທູດ ຫງວຽນ ເລ ແທງ, ບັນດາກິດຈະກຳເຫຼົ່ານີ້ສະແດງເຖິງຄວາມພະຍາຍາມໃນການຫັນບັນດາຂໍ້ຕົກລົງລະດັບສູງໃຫ້ເປັນຮູບປະທຳ, ຜ່ານນັ້ນສ້າງແຮງຂັບເຄື່ອນເພີ່ມຕື່ມໃຫ້ແກ່ສາຍພົວພັນຮ່ວມມືສອງຝ່າຍໃນໄລຍະໃໝ່.

ບໍ່ພຽງແຕ່ໃນຂົງເຂດການເມືອງ ແລະ ເສດຖະກິດເທົ່ານັ້ນ, ການແລກປ່ຽນລະຫວ່າງປະຊາຊົນສອງປະເທດກໍໄດ້ບັນທຶກບັນດາການປ່ຽນແປງໃນທາງບວກ. ການເປີດນຳໃຊ້ເສັ້ນທາງບິນກົງ ນະຄອນໂຮ່ຈິມິນ - ໂຄເປນຮາເກນ ນັບແຕ່ເດືອນທັນວາ 2025 ໄດ້ສ້າງຄວາມສະດວກຫຼາຍຂຶ້ນໃຫ້ແກ່ກິດຈະກຳການຄ້າ, ການລົງທຶນ ແລະ ການທ່ອງທ່ຽວ.

ໃນປີ 2025, ຫວຽດນາມໄດ້ຕ້ອນຮັບນັກທ່ອງທ່ຽວເດນມາກເກືອບ 40.000 ເທື່ອຄົນ. ໃນ 8 ເດືອນຕົ້ນປີ 2026, ຈຳນວນນັກທ່ອງທ່ຽວຈາກປະເທດເອີຣົບເໜືອແຫ່ງນີ້ທີ່ເດີນທາງມາຫວຽດນາມໄດ້ລື່ນກາຍ 30.000 ເທື່ອຄົນ.

ທ່ານເອກອັກຄະລັດຖະທູດ ຫງວຽນ ເລ ແທງ ຢືນຢັນວ່າ ສະຖານທູດຫວຽດນາມປະຈຳເດນມາກ ພ້ອມທີ່ຈະຮ່ວມເດີນທາງ ແລະ ປະສານສົມທົບກັບບັນດາອົງການມິດຕະພາບຂອງສອງປະເທດ ເພື່ອດຳເນີນບັນດາຂໍ້ລິເລີ່ມດ້ານການແລກປ່ຽນ, ການເຊື່ອມຕໍ່ ແລະ ການຮ່ວມມືຢ່າງເປັນຮູບປະທຳ, ປະກອບສ່ວນສ້າງພື້ນຖານຄວາມສຳພັນລະຫວ່າງປະຊາຊົນທີ່ໝັ້ນຄົງ ໃຫ້ແກ່ສາຍພົວພັນຄູ່ຮ່ວມຍຸດທະສາດຮອບດ້ານ.

ໃນພິທີດັ່ງກ່າວ, ທ່ານ ເລ ກົງ ແທ່ງ, ປະທານສະມາຄົມມິດຕະພາບຫວຽດນາມ - ເດນມາກ ໄດ້ໃຫ້ຄວາມເຫັນວ່າ ການຍົກລະດັບສາຍພົວພັນສອງຝ່າຍຂຶ້ນເປັນຄູ່ຮ່ວມຍຸດທະສາດຮອບດ້ານ ບໍ່ພຽງແຕ່ເປັນຂີດໝາຍແຫ່ງບາດກ້າວພັດທະນາດ້ານການເມືອງເທົ່ານັ້ນ, ແຕ່ຍັງສືບຕໍ່ຢືນຢັນຖານະຂອງການຫັນປ່ຽນສີຂຽວໃນບັນດາບູລິມະສິດການຮ່ວມມືຍຸດທະສາດໄລຍະຍາວລະຫວ່າງສອງປະເທດ.

ຕາມທ່ານ ເລ ກົງ ແທ່ງ, ເຖິງແມ່ນວ່າຫວຽດນາມ ແລະ ເດນມາກ ມີເງື່ອນໄຂ ແລະ ລະດັບການພັດທະນາທີ່ແຕກຕ່າງກັນ, ແຕ່ສອງປະເທດລ້ວນແຕ່ມີຄວາມຮັບຮູ້ຮ່ວມກັນກ່ຽວກັບຄວາມຈຳເປັນໃນການປະສົມປະສານການເຕີບໂຕທາງເສດຖະກິດກັບການປົກປັກຮັກສາສິ່ງແວດລ້ອມ, ການນຳໃຊ້ຊັບພະຍາກອນທຳມະຊາດຢ່າງປະຢັດ ແລະ ມີປະສິດທິຜົນ ພ້ອມທັງປັບປຸງຄຸນນະພາບຊີວິດຂອງປະຊາຊົນ.

ເດນມາກມີປະສົບການຫຼາຍໃນການຫັນປ່ຽນພະລັງງານ, ການພັດທະນາເສດຖະກິດໝູນວຽນ ແລະ ການສ້າງບັນດາຮູບແບບການພັດທະນາທີ່ຍືນຍົງ. ໃນຂະນະດຽວກັນ, ຫວຽດນາມພວມສຸມໃສ່ການປ່ຽນໃໝ່ຮູບແບບການເຕີບໂຕ, ຮັບມືຢ່າງຕັ້ງໜ້າກັບການປ່ຽນແປງດິນຟ້າອາກາດ ແລະ ປະຕິບັດຄຳໝັ້ນສັນຍາບັນລຸລະດັບການປ່ອຍອາຍແກັສສຸດທິເທົ່າກັບ “0” ໃນປີ 2050.

ຕາມທ່ານ, ຄວາມຄ້າຍຄືກັນໃນເປົ້າໝາຍການພັດທະນາ ພ້ອມດ້ວຍບັນດາຈຸດແຂງທີ່ສາມາດເສີມຊ່ວຍເຊິ່ງກັນ ແລະ ກັນ ແມ່ນພື້ນຖານໃຫ້ສອງປະເທດຂະຫຍາຍການຮ່ວມມືໃນການສ້າງນະໂຍບາຍ, ການຝຶກອົບຮົມຊັບພະຍາກອນມະນຸດ, ການຖ່າຍທອດເຕັກໂນໂລຊີ, ການດຶງດູດການລົງທຶນ ແລະ ການປະຕິບັດບັນດາຂໍ້ລິເລີ່ມພັດທະນາສີຂຽວ.

ໃນຂອບເຂດພິທີລະນຶກ, ບັນດາຊ່ຽວຊານໄດ້ແລກປ່ຽນ ແລະ ປຶກສາຫາລືກ່ຽວກັບໂອກາດ ແລະ ສິ່ງທ້າທາຍທີ່ເກີດຂຶ້ນໃນຂະບວນການຫັນປ່ຽນສີຂຽວ. ກິດຈະກຳດັ່ງກ່າວໄດ້ຮັບຄວາມສົນໃຈຈາກນັກສຶກສາຈຳນວນຫຼາຍຂອງມະຫາວິທະຍາໄລຊັບພະຍາກອນ ແລະ ສິ່ງແວດລ້ອມຮ່າໂນ້ຍ.

ນອກຈາກຄວາມໝາຍໃນການລະນຶກເຖິງໄລຍະທາງ 55 ປີ ແຫ່ງການສ້າງຕັ້ງສາຍພົວພັນການທູດແລ້ວ, ລາຍການຍັງໄດ້ສ້າງໂອກາດໃນການເຊື່ອມຕໍ່ລະຫວ່າງບັນດາອົງການ, ອົງກອນ, ຊ່ຽວຊານ ແລະ ຄົນຮຸ່ນໜຸ່ມຂອງສອງປະເທດ. ຜ່ານນັ້ນ, ບັນດາຂໍ້ລິເລີ່ມຮ່ວມມືທີ່ເປັນຮູບປະທຳໄດ້ຮັບການຊຸກຍູ້ໃຫ້ກໍ່ຕົວຂຶ້ນ, ປະກອບສ່ວນເຂົ້າໃນເປົ້າໝາຍການພັດທະນາສີຂຽວ ແລະ ຍືນຍົງຂອງຫວຽດນາມ ແລະ ເດນມາກ ໃນໄລຍະຕໍ່ໄປ.

ຫວຽດນາມ - ອົດສະຕຣາລີ ຂະຫຍາຍການຮ່ວມມືດ້ານປ້ອງກັນຊາດ ຍສໝ - ວັນທີ 9 ພະຈິກ, ທີ່ຮ່າໂນ້ຍ, ຫວຽດນາມ ແລະ ອົດສະຕຣາລີ ໄດ້ຈັດການສົນທະນານະໂຍບາຍປ້ອງກັນຊາດຄັ້ງທີ 9, ເພື່ອແລກປ່ຽນບັນດາມາດຕະການຜັນຂະຫຍາຍການຮ່ວມມືສອງຝ່າຍ, ໃນນັ້ນມີການຮັກສາສັນຕິພາບຂອງສະຫະປະຊາຊາດ ແລະ ການແກ້ໄຂຜົນກະທົບຈາກສົງຄາມ.

ສະມາຄົມມິດຕະພາບຫວຽດນາມ - ລາວ ສົ່ງຄຳອວຍພອນເຖິງການນຳສະມາຄົມຝ່າຍລາວ ຍສໝ - ວັນທີ 9 ພະຈິກ, ທ່ານ ຫງວຽນ ດັກ ວິງ, ປະທານສູນກາງສະມາຄົມມິດຕະພາບຫວຽດນາມ - ລາວ ໄດ້ສົ່ງຈົດໝາຍອວຍພອນເຖິງທ່ານນາງ ສູນທອນ ໄຊຍະຈັກ ໃນໂອກາດຮັບໜ້າທີ່ເປັນປະທານສູນກາງສະມາຄົມມິດຕະພາບລາວ - ຫວຽດນາມ, ພ້ອມທັງສະແດງຄວາມປາຖະໜາໃຫ້ສອງສະມາຄົມສືບຕໍ່ປະສານສົມທົບກັນໃນບັນດາກິດຈະກຳມິດຕະພາບ.