ປັນຍາຊົນຫວຽດນາມຢູ່ຮົງກາລີ ເຊື່ອມຕໍ່ການຮ່ວມມືດ້ານວິທະຍາສາດ ແລະ ເຕັກໂນໂລຊີລະຫວ່າງສອງປະເທດ

ຫວ່າງມໍ່ໆ ມານີ້, ທ່ານ ບຸ່ຍ ເລ ຖາຍ, ເອກອັກຄະລັດຖະທູດຫວຽດນາມ ປະຈຳຮົງກາລີ ໄດ້ມີການພົບປະເຮັດວຽກກັບຄະນະການນຳສະມາຄົມປັນຍາຊົນຫວຽດນາມຢູ່ຮົງກາລີ ເພື່ອຕີລາຄາຜົນການເຄື່ອນໄຫວ ແລະ ແລກປ່ຽນທິດທາງການຮ່ວມມືດ້ານວິທະຍາສາດ, ເຕັກໂນໂລຊີ, ນະວັດຕະກຳ ແລະ ການຫັນປ່ຽນດິຈິຕອນ. ໃນການພົບປະ, ທ່ານ ປອ. ຟຸ່ງ ກິມ ຊານ, ປະທານສະມາຄົມ ໃຫ້ຮູ້ວ່າ ນັບແຕ່ຕົ້ນປີ 2026, ສະມາຄົມໄດ້ຈັດກອງສຳມະນາກ່ຽວກັບການປະຍຸກໃຊ້ປັນຍາປະດິດໃນຂະແໜງຍຸຕິທຳ, ຂະຫຍາຍເຄືອຂ່າຍປັນຍາຊົນຫວຽດນາມຢູ່ເອີຣົບ ແລະ ເຊື່ອມຕໍ່ກັບບັນດາອົງການວິທະຍາສາດ ແລະ ຜູ້ຊ່ຽວຊານທັງພາຍໃນ ແລະ ຕ່າງປະເທດ. ສະມາຄົມຍັງກຳລັງກະກຽມຈັດກອງສຳມະນາສະເພາະດ້ານການແພດໃນເດືອນພະຈິກ 2026 ແລະ ບັນດາກິດຈະກຳເຊື່ອມຕໍ່ປັນຍາຊົນໃນຕົ້ນປີ 2027.

ພາບລວມບັນຍາກາດການພົບປະເຮັດວຽກລະຫວ່າງທ່ານ ບຸ່ຍ ເລ ຖາຍ, ເອກອັກຄະລັດຖະທູດຫວຽດນາມ ປະຈຳຮົງກາລີ ແລະ ຄະນະການນຳສະມາຄົມປັນຍາຊົນຫວຽດນາມຢູ່ຮົງກາລີ.

ກ່າວຄຳເຫັນໃນການພົບປະເຮັດວຽກ, ທ່ານ ບຸ່ຍ ເລ ຖາຍ ໄດ້ແຈ້ງໃຫ້ຊາບກ່ຽວກັບບັນດາເນື້ອໃນຫຼັກຂອງມະຕິເລກທີ 23-NQ/TW ລົງວັນທີ 2 ສິງຫາ 2026 ຂອງກົມການເມືອງ ກ່ຽວກັບວຽກງານຄົນຫວຽດນາມຢູ່ຕ່າງປະເທດ ແລະ ມະຕິເລກທີ 57-NQ/TW ກ່ຽວກັບການພັດທະນາວິທະຍາສາດ, ເຕັກໂນໂລຊີ, ນະວັດຕະກຳ ແລະ ການຫັນປ່ຽນດິຈິຕອນແຫ່ງຊາດ. ທ່ານເອກອັກຄະລັດຖະທູດໄດ້ເນັ້ນໜັກເຖິງບົດບາດຂອງຖັນແຖວປັນຍາຊົນຊາວຫວຽດນາມຢູ່ຕ່າງປະເທດ ໃນການເຊື່ອມຕໍ່ອົງຄວາມຮູ້, ການຄົ້ນຄວ້າ, ການປະຍຸກໃຊ້ ແລະ ການຖ່າຍທອດເຕັກໂນໂລຊີ. ທ່ານໄດ້ສະເໜີໃຫ້ສະມາຄົມສືບຕໍ່ສົ່ງເສີມບົດບາດເປັນຂົວເຊື່ອມລະຫວ່າງບັນດາມະຫາວິທະຍາໄລ, ສະຖາບັນຄົ້ນຄວ້າ ແລະ ວິສາຫະກິດຫວຽດນາມ - ຮົງກາລີ, ໂດຍໃຫ້ບູລິມະສິດແກ່ບັນດາຂົງເຂດທີ່ຮົງກາລີມີຈຸດແຂງ ເຊັ່ນ ການແພດ ແລະ ການຢາ, ເຕັກໂນໂລຊີຊີວະພາບ, ປັນຍາປະດິດ, ກະສິກຳເຕັກໂນໂລຊີສູງ, ເຕັກໂນໂລຊີສິ່ງແວດລ້ອມ, ການຄຸ້ມຄອງຊັບພະຍາກອນນ້ຳ ແລະ ວັດສະດຸໃໝ່.

ທ່ານ ບຸ່ຍ ເລ ຖາຍ ຢືນຢັນວ່າ ສະຖານທູດຈະສືບຕໍ່ຮ່ວມເດີນທາງ, ສະໜັບສະໜູນ ແລະ ສ້າງເງື່ອນໄຂໃຫ້ສະມາຄົມສົ່ງເສີມບົດບາດຂອງຕົນ, ປະກອບສ່ວນເຂົ້າໃນການພັດທະນາປະເທດຊາດ. ບັນດາຜູ້ແທນຍັງໄດ້ແລກປ່ຽນກ່ຽວກັບກົນໄກການເຊື່ອມຕໍ່ຄູ່ຮ່ວມມື, ການລະດົມແຫຼ່ງກຳລັງ ແລະ ຄວາມເປັນໄປໄດ້ໃນການສ້າງບັນດາໂຄງການຄົ້ນຄວ້າ, ການປະຍຸກໃຊ້ ແລະ ການຖ່າຍທອດເຕັກໂນໂລຊີລະຫວ່າງສອງປະເທດໃນໄລຍະຕໍ່ໜ້າ.

ປັນຍາຊົນຊາວຫວຽດນາມຢູ່ຕ່າງປະເທດຮ່ວມແຮງແກ້ໄຂໂຈດດ້ານວິທະຍາສາດ - ເຕັກໂນໂລຊີ ຍສໝ - ວັນທີ 10/8/2026, ທີ່ ຮ່າໂນ້ຍ, ຄະນະກຳມະການແຫ່ງລັດວ່າດ້ວຍຊາວຫວຽດນາມຢູ່ຕ່າງປະເທດ ສັງກັດກະຊວງການຕ່າງປະເທດ ໄດ້ຈັດກອງສຳມະນາ “ການສ້າງ ແລະ ພັດທະນາເຄືອຂ່າຍຜູ້ຊ່ຽວຊານ, ປັນຍາຊົນໃນບັນດາຂົງເຂດເຕັກໂນໂລຊີຍຸດທະສາດ”. ທີ່ກອງສຳມະນາ, ບັນດາຜູ້ແທນສະເໜີໃຫ້ສືບຕໍ່ປັບປຸງກົນໄກ, ນະໂຍບາຍໃຫ້ສົມບູນ ເພື່ອສ້າງເງື່ອນໄຂສະດວກຫຼາຍຂຶ້ນໃຫ້ຜູ້ຊ່ຽວຊານ, ປັນຍາຊົນຊາວຫວຽດນາມຢູ່ຕ່າງປະເທດ ເຂົ້າຮ່ວມແກ້ໄຂບັນດາໂຈດໃຫຍ່ ແລະ ບັນດາໜ້າທີ່ດ້ານວິທະຍາສາດ - ເຕັກໂນໂລຊີຢູ່ພາຍໃນປະເທດ.

ເຊື່ອມໂຍງຊາວຫວຽດນາມຢູ່ຕ່າງປະເທດ, ສົ່ງເສີມແຫຼ່ງກຳລັງປັນຍາຊົນຫວຽດນາມຢູ່ສິງກະໂປ ຍສໝ - ຕອນຄ່ຳວັນທີ 24/8, ທີ່ສິງກະໂປ, ທ່ານ ເຈິ່ນເກີ່ມຕູ໋, ກຳມະການກົມການເມືອງ, ຜູ້ປະຈຳການຄະນະເລຂາທິການ ໄດ້ພົບປະກັບພະນັກງານ, ເຈົ້າໜ້າທີ່ສະຖານທູດ ພ້ອມດ້ວຍຊາວຫວຽດນາມ, ຊ່ຽວຊານ ແລະ ປັນຍາຊົນຫວຽດນາມຈຳນວນຫຼາຍ. ທ່ານສະເໜີໃຫ້ສືບຕໍ່ເຊື່ອມໂຍງຊຸມຊົນ, ສົ່ງເສີມແຫຼ່ງກຳລັງດ້ານປັນຍາ ແລະ ເຕັກໂນໂລຊີຂອງຊາວຫວຽດນາມຢູ່ຕ່າງປະເທດ ເພື່ອປະກອບສ່ວນເຂົ້າໃນການພັດທະນາປະເທດ ແລະ ສາຍພົວພັນ ຫວຽດນາມ - ສິງກະໂປ.