ເຜີຍແຜ່ຄຸນຄ່າອັນລ້ຳເລີດຂອງປະເພນີການສຶກສາຫວຽດນາມ ຜ່ານ 950 ປີ ແຫ່ງກວັກຕື້ຢາມ ທັງລອງ

ວັນທີ 11 ຕຸລາ, ສູນກິດຈະກຳວັດທະນະທຳ ແລະ ວິທະຍາສາດ ວັນມຽວ - ກວັກຕື້ຢາມ ໄດ້ປະສານສົມທົບກັບບ້ານວັດທະນະທຳ - ທ່ອງທ່ຽວ ບັນດາຊົນເຜົ່າຫວຽດນາມ ຈັດງານວາງສະແດງຫົວຂໍ້ພິເສດ “950 ປີ ແຫ່ງກວັກຕື້ຢາມ ທັງລອງ (1076-2026)” ເພື່ອມຸ່ງສູ່ການລະນຶກຄົບຮອບ 950 ປີ ແຫ່ງການສ້າງຕັ້ງກວັກຕື້ຢາມ, ວັນຄູຫວຽດນາມ (20/11) ແລະ ວັນມໍລະດົກວັດທະນະທຳຫວຽດນາມ (23/11).

ເຜີຍແຜ່ຄຸນຄ່າປະເພນີການສຶກສາ

ກ່າວຄຳປາໄສໃນພິທີເປີດ, ທ່ານ ເຈິ່ນ ຈຸງ ຮຽວ, ຮອງຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວຮ່າໂນ້ຍ ເນັ້ນໜັກວ່າ ການລະນຶກຄົບຮອບ 950 ປີ ແຫ່ງການສ້າງຕັ້ງກວັກຕື້ຢາມ ເປັນໂອກາດໃຫ້ທົບທວນຄືນໄລຍະທາງປະຫວັດສາດ, ພ້ອມທັງໄຕ່ຕອງເຖິງບົດບາດຂອງການສຶກສາ, ຄວາມຮູ້ ແລະ ບຸກຄະລາກອນຜູ້ມີຄວາມສາມາດ ຕໍ່ການພັດທະນາປະເທດຊາດ ແລະ ປະຊາຊາດ.

ການຈັດງານວາງສະແດງຢູ່ບ້ານວັດທະນະທຳ - ທ່ອງທ່ຽວ ບັນດາຊົນເຜົ່າຫວຽດນາມ ຍັງສ້າງການເຊື່ອມໂຍງລະຫວ່າງສອງພື້ນທີ່ວັດທະນະທຳ, ນຳເອົາຄຸນຄ່າຂອງການສຶກສາແຫ່ງຊາດເຂົ້າໃກ້ປະຊາຊົນຫຼາຍຂຶ້ນ, ເຊື່ອມໂຍງກັບຄວາມອຸດົມສົມບູນ ແລະ ຫຼາກຫຼາຍທາງວັດທະນະທຳຂອງຊຸມຊົນ 54 ຊົນເຜົ່າອ້າຍນ້ອງ.

ເປີດງານວາງສະແດງຫົວຂໍ້ພິເສດ “950 ປີ ແຫ່ງກວັກຕື້ຢາມ ທັງລອງ (1076-2026)”. (ພາບ: T.L)

ສ່ວນທ່ານ ຫງວຽນ ວັນ ຕູ໋, ຮອງຜູ້ອຳນວຍການສູນກິດຈະກຳວັດທະນະທຳ ແລະ ວິທະຍາສາດ ວັນມຽວ - ກວັກຕື້ຢາມ ໃຫ້ຮູ້ວ່າ ງານວາງສະແດງມີຈຸດປະສົງແນະນຳບັນດາຄຸນຄ່າອັນລ້ຳຄ່າຂອງການສຶກສາ ແລະ ລະບົບການສອບເສັງຄັດເລືອກບຸກຄະລາກອນແບບດັ້ງເດີມ, ຜ່ານນັ້ນເຜີຍແຜ່ປະເພນີຮັກການຮ່ຳຮຽນ, ການເຄົາລົບຄູອາຈານ ແລະ ການໃຫ້ຄວາມສຳຄັນແກ່ຜູ້ມີຄວາມຮູ້ຄວາມສາມາດຂອງຊາດຫວຽດນາມ.

ກວັກຕື້ຢາມ ທັງລອງ ຖືກສ້າງຕັ້ງຂຶ້ນໃນປີ 1076 ໃນສະໄໝກະສັດ ຫຼີ ເຍິນ ຕົງ, ເປັນໂຮງຮຽນແຫ່ງຊາດແຫ່ງທຳອິດຂອງຫວຽດນາມ. ຜ່ານບັນດາລາຊະວົງກະສັດ, ສະຖານທີ່ແຫ່ງນີ້ໄດ້ກາຍເປັນສູນກາງການສຶກສາທີ່ໃຫຍ່ທີ່ສຸດຂອງປະເທດ, ຝຶກອົບຮົມບຸກຄະລາກອນຜູ້ມີຄວາມສາມາດຫຼາຍລຸ້ນຄົນ, ປະກອບສ່ວນເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດ.

ກວັກຕື້ຢາມ ບໍ່ພຽງແຕ່ຕິດພັນກັບປະຫວັດສາດການສຶກສາ ແລະ ການສອບເສັງຄັດເລືອກບຸກຄະລາກອນເທົ່ານັ້ນ, ແຕ່ຍັງເປັນບ່ອນລວມສູນບັນດາຄຸນຄ່າຂອງປະເພນີການສຶກສາຫວຽດນາມ. ບັນດາຄູອາຈານຜູ້ມີຄວາມຮູ້ເລິກເຊິ່ງ ແລະ ມີຄຸນທຳສູງສົ່ງ ເຊັ່ນ ຈູ ວັນ ອານ, ເທິນ ເຍິນ ຈຸງ, ຟຸ່ງ ຄັກ ຄວານ ພ້ອມດ້ວຍລູກສິດຫຼາຍລຸ້ນຄົນທີ່ເຕີບໃຫຍ່ຈາກໂຮງຮຽນແຫ່ງນີ້ ໄດ້ປະກອບສ່ວນຫຼໍ່ຫຼອມປະເພນີຮັກການຮ່ຳຮຽນ ແລະ ແນວຄິດໃຫ້ຄວາມສຳຄັນແກ່ຜູ້ມີຄວາມຮູ້ຄວາມສາມາດ.

ປັດຈຸບັນ, ວັນມຽວ - ກວັກຕື້ຢາມ ຍັງຄົງເປັນສັນຍະລັກອັນໂດດເດັ່ນຂອງປະເພນີຮັກການຮ່ຳຮຽນ ແລະ ເຄົາລົບຄູອາຈານຂອງຊາດ, ພ້ອມທັງເປັນຈຸດໝາຍປາຍທາງດ້ານວັດທະນະທຳຂອງນະຄອນຫຼວງ ແລະ ທົ່ວປະເທດ.

ຈຳລອງເສັ້ນທາງປະເພນີການສຶກສາ, ອະນຸລັກມໍລະດົກ

ງານວາງສະແດງໄດ້ຈັດຂຶ້ນຕາມ 3 ຫົວຂໍ້ຫຼັກ ຄື: “ບ່ອນກຳເນີດປະເພນີການສຶກສາ”; “ກວັກຕື້ຢາມ - ໂຮງຮຽນແຫ່ງຊາດແຫ່ງທຳອິດ”; ແລະ “ເສັ້ນທາງການອະນຸລັກ ແລະ ສົ່ງເສີມຄຸນຄ່າໂບຮານສະຖານ ວັນມຽວ - ກວັກຕື້ຢາມ”.

ຜ່ານລະບົບເອກະສານ, ຮູບພາບ ແລະ ວັດຖຸຈັດສະແດງ, ປະຊາຊົນມີໂອກາດຮຽນຮູ້ບັນດາເຫດການສຳຄັນໃນປະຫວັດສາດການກໍ່ຕັ້ງ ແລະ ພັດທະນາຂອງກວັກຕື້ຢາມ, ພ້ອມທັງບັນດາຄຸນຄ່າອັນໂດດເດັ່ນຂອງວັນມຽວ - ກວັກຕື້ຢາມ ທີ່ຕິດພັນກັບລະບົບການສຶກສາ ແລະ ການສອບເສັງຄັດເລືອກບຸກຄະລາກອນຂອງຫວຽດນາມ.

ງານວາງສະແດງມີ 3 ຫົວຂໍ້ຫຼັກ ຄື: “ບ່ອນກຳເນີດປະເພນີການສຶກສາ”; “ກວັກຕື້ຢາມ - ໂຮງຮຽນແຫ່ງຊາດແຫ່ງທຳອິດ”; ແລະ “ເສັ້ນທາງການອະນຸລັກ ແລະ ສົ່ງເສີມຄຸນຄ່າໂບຮານສະຖານ ວັນມຽວ - ກວັກຕື້ຢາມ”. (ພາບ: T.L)

ເນື້ອໃນການວາງສະແດງຍັງແນະນຳບັນດາຜົນງານປະກອບສ່ວນຂອງບຸກຄົນສຳຄັນໃນປະຫວັດສາດ ເຊັ່ນ ກະສັດ ຫຼີ ແທັງ ຕົງ, ກະສັດ ຫຼີ ເຍິນ ຕົງ, ກະສັດ ເລ ແທັງ ຕົງ ແລະ ຈູ ວັນ ອານ ຜູ້ດຳລົງຕຳແໜ່ງຕື້ງຽບຂອງກວັກຕື້ຢາມ, ຜ່ານນັ້ນເຮັດໃຫ້ເຫັນຢ່າງຈະແຈ້ງເຖິງບົດບາດຂອງບັນດາລຸ້ນຄົນໃນການສ້າງສາ ແລະ ຫຼໍ່ຫຼອມປະເພນີການສຶກສາ.

ນອກຈາກການແນະນຳປະຫວັດສາດແລ້ວ, ງານວາງສະແດງຍັງສະທ້ອນໃຫ້ເຫັນບັນດາຄວາມພະຍາຍາມໃນການອະນຸລັກ ແລະ ສົ່ງເສີມຄຸນຄ່າຂອງໂບຮານສະຖານ, ຄ່ອຍໆນຳມໍລະດົກເຂົ້າໃກ້ຊີວິດສະໄໝໃໝ່ຫຼາຍຂຶ້ນ. ພື້ນທີ່ວັນມຽວ - ກວັກຕື້ຢາມ ກໍພວມໄດ້ຮັບການສົ່ງເສີມຄຸນຄ່າຕາມທິດທາງໃຫ້ກາຍເປັນພື້ນທີ່ວັດທະນະທຳສ້າງສັນຂອງນະຄອນຫຼວງຮ່າໂນ້ຍ.

ກິດຈະກຳທົດລອງປະສົບການກ່ຽວກັບການຮ່ຳຮຽນ ແລະ ການສອບເສັງໃນສະໄໝກ່ອນຫຼາຍກິດຈະກຳໄດ້ຖືກຈັດຂຶ້ນ ເພື່ອຊ່ວຍໃຫ້ປະຊາຊົນເຂົ້າເຖິງເລື່ອງລາວຂອງມໍລະດົກໄດ້ຢ່າງໃກ້ຊິດ ແລະ ມີຊີວິດຊີວາຫຼາຍຂຶ້ນ. ຜ່ານນັ້ນ, ບັນດາຄຸນຄ່າທາງວັດທະນະທຳ ແລະ ການສຶກສາທີ່ບັນພະບຸລຸດຫຼາຍລຸ້ນຄົນໄດ້ສ້າງສາ ແລະ ສືບທອດມາ ຈຶ່ງມີໂອກາດເຜີຍແຜ່ໃນຊີວິດປັດຈຸບັນຫຼາຍຂຶ້ນ.

ຜ່ານງານວາງສະແດງ, ປະຊາຊົນ, ໂດຍສະເພາະຄົນຮຸ່ນໜຸ່ມ, ມີໂອກາດຮຽນຮູ້ເລິກເຊິ່ງຍິ່ງຂຶ້ນກ່ຽວກັບປະເພນີຮັກການຮ່ຳຮຽນ, ການເຄົາລົບຄູອາຈານ ແລະ ການໃຫ້ຄວາມສຳຄັນແກ່ຜູ້ມີຄວາມຮູ້ຄວາມສາມາດ; ຈາກນັ້ນ ຍົກສູງຄວາມຮັບຮູ້, ປຸກລະດົມຄວາມພາກພູມໃຈ ແລະ ຈິດສຳນຶກຄວາມຮັບຜິດຊອບໃນການຮັກສາ ແລະ ສົ່ງເສີມຄຸນຄ່າມໍລະດົກວັດທະນະທຳຂອງຊາດ.

ສູນສຶກສາຫວຽດນາມ ວິທະຍາ ແລະສະມາຄົມມິດຕະພາບໄທ - ຫວຽດນາມ ຮ່ວມມືບຳລຸງສ້າງພາສາຫວຽດ ຍສໝ - ວັນ​ທີ 2 ພຶດສະພາ​ ຢູ່​ໄທ, ສູນ​ສຶກສາ​ຫວຽດນາມ ວິທະຍາ ຂຶ້ນກັບ​ມະຫາວິທະຍາ​ໄລ Ratjabath Udon Thani (​ໄທ) ​ແລະ ສະມາຄົມ​ມິດຕະພາບ​ໄທ - ຫວຽດນາມ ​ໄດ້​ຈັດ​ພິທີ​ລົງ​ນາມ​ໃນ​ການ​ຮ່ວມ​ມື​ດ້ານ​ການບຳລຸງສ້າງພາສາ​ຫວຽດ.

ນັກສຶກສາຫວຽດນາມ ດຳລົງຊີວິດຢ່າງມີຄວາມຮັບຜິດຊອບ ແລະ ຮ່ຳຮຽນຢູ່ລາວຢ່າງຈິງຈັງ ຍສໝ - ວັນທີ 28 ມິຖຸນາ, ທ່ານເອກອັກຄະລັດຖະທູດ ຫວຽດນາມ ປະຈຳ ລາວ ຫງວຽນມິງເຕີມພ້ອມກັບການນໍາບັນດາອົງການຂຶ້ນກັບສະຖານທູດ, ຄະນະພັກ ແບະ ບັນດາຫົວໜ່ວຍທີ່ມີໜ້າທີ່ໄດ້ໄປຢ້ຽມຢາມ ແລະ ເຮັດວຽກກັບຄະນະນັກສຶກສາຫວຽດນາມ ທີ່ພວມຮໍ່າຮຽນຢູ່ມະຫາວິທະຍາໄລແຫ່ງຊາດ ລາວ.