ຫວຽດນາມເຂົ້າຮ່ວມຂໍ້ຕົກລົງ Artemis ກ່ຽວກັບການຮ່ວມມືດ້ານອະວະກາດ

ໃນຂອບກິດຈະກຳສັບປະດາດິຈິຕອນສາກົນຫວຽດນາມ 2026, ຕອນເຊົ້າວັນທີ 28/10, ທ່ານ ຫວູ ຫາຍ ກວັນ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ຕາງໜ້າໃຫ້ຫວຽດນາມ ໄດ້ມອບເອກະສານຂໍ້ຕົກລົງ Artemis ໃຫ້ແກ່ທ່ານນາງ Jennifer Wicks, ເອກອັກຄະລັດຖະທູດສະຫະລັດອາເມລິກາປະຈຳຫວຽດນາມ.

ກ່າວຄຳປາໄສໃນເຫດການ, ທ່ານລັດຖະມົນຕີ ຫວູ ຫາຍ ກວັນ ໄດ້ເນັ້ນໜັກວ່າ ຫວຽດນາມຖືວ່າວິທະຍາສາດ ແລະ ເຕັກໂນໂລຊີອະວະກາດເປັນຂົງເຂດສຳຄັນໃນການຍົກສູງຂີດຄວາມສາມາດດ້ານວິທະຍາສາດ ແລະ ເຕັກໂນໂລຊີຂອງຊາດ, ພ້ອມທັງປະກອບສ່ວນເຂົ້າໃນເປົ້າໝາຍການພັດທະນາທີ່ຍືນຍົງ.

ທ່ານ ຫວູ ຫາຍ ກວັນ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ມອບເອກະສານສົນທິສັນຍາ Artemis ໃຫ້ແກ່ທ່ານນາງ Jennifer Wicks, ເອກອັກຄະລັດຖະທູດສະຫະລັດອາເມລິກາປະຈຳຫວຽດນາມ ຢູ່ນອກຂອບກິດຈະກຳສັບປະດາດິຈິຕອນ 2026 ທີ່ແຂວງກວ໋າງນິງ, ວັນທີ 28/10.

ຕາມທ່ານລັດຖະມົນຕີແລ້ວ, ຫວຽດນາມສຸມໃສ່ຍົກສູງຂີດຄວາມສາມາດໃນການເພິ່ງພາຕົນເອງດ້ານເຕັກໂນໂລຊີ ແລະ ຂໍ້ມູນອະວະກາດ; ເລັ່ງຊຸກຍູ້ການນຳໃຊ້ເຕັກໂນໂລຊີອະວະກາດໃນການຄຸ້ມຄອງຊັບພະຍາກອນ, ປົກປ້ອງສິ່ງແວດລ້ອມ, ຮັບມືກັບການປ່ຽນແປງດິນຟ້າອາກາດ ແລະ ປ້ອງກັນ, ຕ້ານໄພພິບັດທຳມະຊາດ.

ພ້ອມກັນນັ້ນ, ຫວຽດນາມຍັງຄ່ອຍໆສ້າງລະບົບນິເວດເສດຖະກິດອະວະກາດ ແລະ ຍົກສູງຂີດຄວາມສາມາດໃນການບໍລິຫານຈັດການບັນດາກິດຈະກຳທີ່ກ່ຽວຂ້ອງກັບອະວະກາດ.

ຜ່ານການເຂົ້າຮ່ວມຂໍ້ຕົກລົງ Artemis, ຫວຽດນາມປາຖະໜາຢາກເພີ່ມທະວີການປະສານງານກັບບັນດາປະເທດສະມາຊິກໃນການສຳຫຼວດ ແລະ ນຳໃຊ້ອະວະກາດ ບົນພື້ນຖານກົດໝາຍສາກົນ, ຮັບປະກັນບັນດາຫຼັກການແຫ່ງສັນຕິພາບ, ຄວາມປອດໄພ, ຄວາມສະເໝີພາບ, ຄວາມໂປ່ງໃສ ແລະ ຄວາມຍືນຍົງ. ບັນດາຄວາມພະຍາຍາມຮ່ວມມືເຫຼົ່ານີ້ມຸ່ງໄປສູ່ການນຳມາເຊິ່ງຜົນປະໂຫຍດອັນແທ້ຈິງໃຫ້ແກ່ມະນຸດ ແລະ ໂລກ.

ຂໍ້ຕົກລົງ Artemis ໄດ້ກຳນົດບັນດາຫຼັກການຮ່ວມເປັນພື້ນຖານໃນການກຳນົດທິດທາງການຮ່ວມມືສາກົນ ສຳລັບການສຳຫຼວດ ແລະ ນຳໃຊ້ດວງຈັນ, ດາວອັງຄານ ແລະ ວັດຖຸທ້ອງຟ້າອື່ນໆ ເພື່ອຈຸດປະສົງສັນຕິພາບ.

ບັນດາຫຼັກການດັ່ງກ່າວສຸມໃສ່ການເພີ່ມທະວີຄວາມໂປ່ງໃສ, ຮັບປະກັນຄວາມສາມາດໃນການເຮັດວຽກຮ່ວມກັນລະຫວ່າງບັນດາລະບົບ, ແບ່ງປັນຂໍ້ມູນທາງວິທະຍາສາດ, ຊ່ວຍເຫຼືອນັກບິນອະວະກາດ ແລະ ຊຸກຍູ້ການນຳໃຊ້ອະວະກາດຢ່າງມີຄວາມຮັບຜິດຊອບ ແລະ ຍືນຍົງ.

ນີ້ແມ່ນພື້ນຖານໃຫ້ບັນດາປະເທດເພີ່ມທະວີການປະສານງານ ແລະ ດຳເນີນກິດຈະກຳສຳຫຼວດອະວະກາດໄປໃນທິດທາງທີ່ປອດໄພ, ສັນຕິພາບ ແລະ ຍືນຍົງ.

ຫວຽດນາມ ຊຸກຍູ້ການໂຄສະນາ ແລະ ການຮ່ວມມື ຢູ່ແຂວງ ໂອອິຕະ (ຍີ່ປຸ່ນ) ຍສໝ - ໂຄງການແລກປ່ຽນສະເພາະຫົວຂໍ້ ໂດຍສະຖານກົງສຸນໃຫຍ່ ຫວຽດນາມ ປະຈໍາ ຟູກູໂອກະ ຮ່ວມມືຈັດຂຶ້ນ ເມື່ອມໍ່ໆມານີ້ ໄດ້ໄຂໂອກາດການຮ່ວມມືໃໝ່ຫຼາຍຢ່າງ ລະຫວ່າງ ຫວຽດນາມ ແລະ ແຂວງ ໂອອິຕະ.

ອະດີດທະຫານອາສາສະໝັກສືບຕໍ່ສານສຳພັນມິດຕະພາບຫວຽດນາມ - ລາວ ຍສໝ - ຜ່ານບັນດາກິດຈະກຳລະນຶກເຖິງບຸນຄຸນຂອງວິລະຊົນຜູ້ເສຍສະຫຼະຊີວິດ, ການເບິ່ງແຍງດູແລເພື່ອນຮ່ວມຮົບ, ການຊ່ວຍເຫຼືອອະດີດນັກຮົບລາວ, ການກັບຄືນໄປຢ້ຽມຢາມສະໜາມຮົບເກົ່າ ແລະ ການຊ່ວຍເຫຼືອນັກຮຽນໃນເຂດທຸລະກັນດານ, ບັນດາອະດີດທະຫານອາສາສະໝັກ ແລະ ຊ່ຽວຊານການທະຫານຫວຽດນາມທີ່ເຄີຍປະຕິບັດໜ້າທີ່ຢູ່ລາວ ແລະ ປັດຈຸບັນຢູ່ຮ່າໂນ້ຍ ຍັງຄົງສືບຕໍ່ທະນຸບຳລຸງສາຍພົວພັນມິດຕະພາບລະຫວ່າງສອງປະເທດ.