ເຊື່ອມໂຍງຊາວຫວຽດນາມຢູ່ຕ່າງປະເທດ, ສົ່ງເສີມແຫຼ່ງກຳລັງປັນຍາຊົນຫວຽດນາມຢູ່ສິງກະໂປ

ການພົບປະຄັ້ງນີ້ ດຳເນີນໄປໃນຂອບເຂດການຢ້ຽມຢາມສິງກະໂປຢ່າງເປັນທາງການ ແລະ ຮ່ວມເປັນປະທານການສົນທະນາຍຸດທະສາດ ຫວຽດນາມ - ສິງກະໂປ ຄັ້ງທີ 1 ລະຫວ່າງພັກກອມມູນິດຫວຽດນາມ ແລະ ພັກກິດປະຊາຊົນສິງກະໂປ (PAP) ຂອງທ່ານ ເຈິ່ນເກີ່ມຕູ໋, ຜູ້ປະຈຳການຄະນະເລຂາທິການ.

ຕາງໜ້າສະຖານທູດ ແລະ ຊຸມຊົນຊາວຫວຽດນາມຢູ່ສິງກະໂປ, ທ່ານ ເຈິ່ນເຟືອກແອັງ, ເອກອັກຄະລັດຖະທູດ ໄດ້ສະແດງຄວາມດີໃຈທີ່ໄດ້ຕ້ອນຮັບທ່ານ ເຈິ່ນເກີ່ມຕູ໋, ຜູ້ປະຈຳການຄະນະເລຂາທິການ ພ້ອມດ້ວຍຄະນະຜູ້ແທນຂັ້ນສູງພັກກອມມູນິດຫວຽດນາມ; ພ້ອມທັງເຫັນວ່າ ການຢ້ຽມຢາມຄັ້ງນີ້ມີຄວາມໝາຍສຳຄັນ, ປະກອບສ່ວນເຮັດໃຫ້ສາຍພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສິງກະໂປ ນັບມື້ນັບເລິກເຊິ່ງຍິ່ງຂຶ້ນ.

ທ່ານ ເຈິ່ນເຟືອກແອັງ ໃຫ້ຮູ້ວ່າ ພະນັກງານ, ເຈົ້າໜ້າທີ່ສະຖານທູດ ໄດ້, ພວມ ແລະ ຈະສືບຕໍ່ປະຕິບັດໃຫ້ດີ 3 ໜ້າທີ່ສຳຄັນ ຄື: ວຽກງານການເມືອງ, ວຽກງານຊຸມຊົນ, ວຽກງານພັກ ແລະ ຄວາມສາມັກຄີພາຍໃນ, ປະກອບສ່ວນເຂົ້າໃນພາລະກິດສ້າງສາ ແລະ ປົກປັກຮັກສາປະເທດ.

ໂດຍໃຫ້ຂໍ້ມູນກ່ຽວກັບຊຸມຊົນຊາວຫວຽດນາມຢູ່ສິງກະໂປ, ທ່ານ ເຈິ່ນເຟືອກແອັງ ໃຫ້ຮູ້ວ່າ ພີ່ນ້ອງຊາວຫວຽດນາມຍາມໃດກໍ່ເອົາໃຈໃສ່, ສະໜັບສະໜູນ ແລະ ຫັນໃຈສູ່ບ້ານເກີດເມືອງນອນ, ປະເທດຊາດ; ປະສານສົມທົບກັບສະຖານທູດຈັດຕັ້ງຫຼາຍກິດຈະກຳເຊື່ອມໂຍງ, ນັບແຕ່ວຽກງານການທູດປະຊາຊົນ ຈົນເຖິງການເຊື່ອມຕໍ່ກັບພາຍໃນປະເທດໃນບັນດາຂົງເຂດວິທະຍາສາດ, ເຕັກໂນໂລຊີ, ນະວັດຕະກຳ, ການສຶກສາ - ການຝຶກອົບຮົມ, ການຫັນເປັນດິຈິຕອນ ແລະ ການເລີ່ມຕົ້ນທຸລະກິດ.

ທ່ານ ເຈິ່ນເກີ່ມຕູ໋, ຜູ້ປະຈຳການຄະນະເລຂາທິການ ກ່າວຄຳເຫັນທີ່ການພົບປະຊຸມຊົນຊາວຫວຽດນາມຢູ່ສິງກະໂປ.

ທີ່ການພົບປະ, ທ່ານ ສາດສະດາຈານ, ປະລິນຍາເອກ ຫວູມິງເຄືອງ, ອາຈານສອນຢູ່ໂຮງຮຽນນະໂຍບາຍສາທາລະນະ ຫຼີກວນຢູ, ຕີລາຄາວ່າ ການຢ້ຽມຢາມຂອງທ່ານ ເຈິ່ນເກີ່ມຕູ໋, ຜູ້ປະຈຳການຄະນະເລຂາທິການ ແລະ ຄະນະຜູ້ແທນຂັ້ນສູງພັກກອມມູນິດຫວຽດນາມ ມີຄວາມໝາຍທາງປະຫວັດສາດ, ເປີດກວ້າງໂອກາດອັນໃຫຍ່ຫຼວງ, ສາມາດກາຍເປັນແບບຢ່າງໃນສາຍພົວພັນສອງປະເທດ ກໍຄື ໃນພາກພື້ນ, ມຸ່ງສູ່ການສ້າງສັນສັນຕິພາບ, ຄວາມຈະເລີນຮຸ່ງເຮືອງ ແລະ ການຮ່ວມມື.

ທ່ານນາງ ຕ້າຖຸ່ຍລຽນ, ຫົວໜ້າຄະນະປະສານງານຊາວຫວຽດນາມຢູ່ສິງກະໂປ, ໄດ້ແບ່ງປັນກ່ຽວກັບຮູບແບບການຫັນເປັນດິຈິຕອນ ແລະ ເຫັນວ່າ ການຢ້ຽມຢາມຄັ້ງນີ້ເປັນແຫຼ່ງກຳລັງໃຈສຳລັບຊຸມຊົນ, ຊຸກຍູ້ຄວາມປາດຖະໜາຢາກປະກອບສ່ວນພູມປັນຍາໃຫ້ແກ່ບ້ານເກີດເມືອງນອນ, ປະເທດຊາດ. ຊຸມຊົນຊາວຫວຽດນາມຢູ່ສິງກະໂປ ໃຫ້ຄຳໝັ້ນວ່າ ຈະກາຍເປັນຂໍ້ຕໍ່ຍຸດທະສາດໜຶ່ງ, ຮ່ວມເດີນທາງກັບພາຍໃນປະເທດ ເພື່ອຫັນຄວາມປາດຖະໜາສ້າງຫວຽດນາມໃຫ້ເຂັ້ມແຂງເປັນຈິງ.

ກ່າວຄຳເຫັນຕໍ່ພີ່ນ້ອງຊາວຫວຽດນາມຢູ່ຕ່າງປະເທດ, ທ່ານ ເຈິ່ນເກີ່ມຕູ໋ ໃຫ້ຮູ້ວ່າ ການຢ້ຽມຢາມສິງກະໂປຢ່າງເປັນທາງການ ແລະ ຮ່ວມເປັນປະທານການສົນທະນາຍຸດທະສາດ ຫວຽດນາມ - ສິງກະໂປ ຄັ້ງທີ 1 ສະແດງເຖິງນະໂຍບາຍທີ່ສະເໝີຕົ້ນສະເໝີປາຍຂອງຫວຽດນາມ ຄື ໃຫ້ບູລິມະສິດສູງແກ່ບັນດາປະເທດໃກ້ຄຽງໃນພາກພື້ນ, ໃນນັ້ນມີສິງກະໂປ.

ການຢ້ຽມຢາມຍັງແນໃສ່ເຮັດໃຫ້ສາຍພົວພັນລະຫວ່າງພັກກອມມູນິດຫວຽດນາມ ແລະ ພັກກິດປະຊາຊົນສິງກະໂປ ນັບມື້ນັບເລິກເຊິ່ງ, ສ້າງພື້ນຖານການເມືອງທີ່ໝັ້ນຄົງ, ຊຸກຍູ້ການຮ່ວມມືຮອບດ້ານຜ່ານຊ່ອງທາງພັກ, ລັດ ແລະ ປະຊາຊົນ, ປະກອບສ່ວນນຳສາຍພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສິງກະໂປ ເຂົ້າສູ່ລວງເລິກ.

ໂດຍແຈ້ງໃຫ້ຊາບກ່ຽວກັບສະພາບການພາຍໃນປະເທດ, ທ່ານ ເຈິ່ນເກີ່ມຕູ໋ ໃຫ້ຮູ້ວ່າ ຫວຽດນາມໄດ້ຜ່ານໜຶ່ງປີແຫ່ງການດຳເນີນຮູບແບບການປົກຄອງທ້ອງຖິ່ນສອງຂັ້ນ. ນີ້ແມ່ນການປະຕິຮູບທີ່ມີຂອບເຂດກວ້າງ, ຫຍຸ້ງຍາກ ແລະ ດຳເນີນຢ່າງເດັດຂາດ, ມີຄວາມໝາຍຍຸດທະສາດຕໍ່ປະເທດ.

ຜົນການສະຫຼຸບຂັ້ນຕົ້ນສະແດງໃຫ້ເຫັນວ່າ ກົງຈັກໄດ້ຮັບການຈັດໃຫ້ກະທັດຮັດ ແລະ ເປັນເອກະພາບ; ລະບົບກົດໝາຍໄດ້ຮັບການປັບປຸງໃຫ້ສົມບູນ; ວຽກງານການນຳພາ, ຊີ້ນຳ ແລະ ຈັດຕັ້ງປະຕິບັດມີຫຼາຍການປ່ຽນແປງໃໝ່; ປະຊາຊົນເຫັນດີ ແລະ ສະໜັບສະໜູນແນວທາງໃຫຍ່ຂອງພັກ. ແນວໃດກໍຕາມ, ນີ້ພຽງແຕ່ເປັນບາດກ້າວເບື້ອງຕົ້ນ ແລະ ຍັງມີຫຼາຍໜ້າທີ່ທີ່ຕ້ອງສືບຕໍ່ຜັນຂະຫຍາຍດ້ວຍຄວາມຕັດສິນໃຈສູງກວ່າ, ວິທີການທີ່ເປັນວິທະຍາສາດ ແລະ ຈິດໃຈປ່ຽນແປງໃໝ່ທີ່ແຮງກ້າກວ່າ.

ໜ້າທີ່ໃຈກາງໃນຕໍ່ໜ້າແມ່ນຍົກສູງຄຸນນະພາບການດຳເນີນງານ, ຄວາມສາມາດຮັບໃຊ້ ແລະ ຄວາມສາມາດສ້າງສັນການພັດທະນາຂອງກົງຈັກໃໝ່. ໃນນັ້ນ, ຫວຽດນາມສືບຕໍ່ປັບປຸງລະບົບກົດໝາຍ ແລະ ການຈັດຕັ້ງກົງຈັກໃຫ້ສົມບູນ ແລະ ເປັນເອກະພາບ; ປ່ຽນແປງໃໝ່ວິທີການນຳພາຂອງພັກ; ຊຸກຍູ້ການແບ່ງຂັ້ນ, ແບ່ງສິດອຳນາດ ຄຽງຄູ່ກັບການຮັບປະກັນແຫຼ່ງກຳລັງ ແລະ ຄວບຄຸມອຳນາດ; ຍົກສູງຄຸນນະພາບໂຄງລ່າງໂທລະຄົມ, ໂຄງລ່າງດິຈິຕອນ; ຊຸກຍູ້ການຫັນເປັນດິຈິຕອນໃນທົ່ວລະບົບການເມືອງ ແລະ ສ້າງຖັນແຖວພະນັກງານໃຫ້ຕອບສະໜອງຄວາມຮຽກຮ້ອງຂອງຮູບແບບໃໝ່.

ທ່ານ ເຈິ່ນເກີ່ມຕູ໋ ຍັງໃຫ້ຮູ້ວ່າ ສູນກາງໄດ້ຕີລາຄາຜົນການຜັນຂະຫຍາຍມະຕິເລກທີ 57-NQ/TW ຂອງກົມການເມືອງ ວ່າດ້ວຍການບຸກທະລຸພັດທະນາວິທະຍາສາດ, ເຕັກໂນໂລຊີ, ນະວັດຕະກຳ ແລະ ການຫັນເປັນດິຈິຕອນແຫ່ງຊາດ ພາຍຫຼັງໜຶ່ງປີຫົກເດືອນ; ກຳນົດ 10 ເຕັກໂນໂລຊີຍຸດທະສາດ ທີ່ຕິດພັນກັບ 30 ຜະລິດຕະພັນເຕັກໂນໂລຊີຍຸດທະສາດ ແລະ 20 ບັນຫາໃຫຍ່ລະດັບຊາດ.

ວິສາຫະກິດຫວຽດນາມຈຳນວນໜຶ່ງພວມຄ່ອຍໆກຳເຕັກໂນໂລຊີ, ພັດທະນາຜະລິດຕະພັນເພື່ອຮັບໃຊ້ຕະຫຼາດພາຍໃນ ແລະ ສົ່ງອອກ. ແນວໃດກໍຕາມ, ຍັງມີບັນດາຈຸດອຸດຕັນດ້ານລະບຽບກົນໄກ, ໂຄງລ່າງ, ຊັບພະຍາກອນມະນຸດ ແລະ ຄວາມປອດໄພທາງໄຊເບີ ທີ່ຕ້ອງໄດ້ແກ້ໄຂ.

ໃນໄລຍະຕໍ່ໜ້າ, ຫວຽດນາມກຳນົດຫັນປ່ຽນຢ່າງແຂງແຮງໄປສູ່ການສ້າງຜະລິດຕະພັນ, ຜົນງານ ແລະ ຄຸນຄ່າທີ່ເປັນຮູບປະທຳ, ປະກອບສ່ວນເຂົ້າໃນເປົ້າໝາຍເຕີບໂຕສອງຕົວເລກ; ເຊື່ອມໂຍງວິທະຍາສາດ, ເຕັກໂນໂລຊີ ກັບການສ້າງອົງຄວາມຮູ້ໃໝ່, ກຳເຕັກໂນໂລຊີ ແລະ ຫັນເປັນຄຸນຄ່າໃໝ່ໃຫ້ສັງຄົມ; ສຸມແຫຼ່ງກຳລັງເພື່ອກຳ ແລະ ພັດທະນາເຕັກໂນໂລຊີຍຸດທະສາດໃຫ້ກາຍເປັນຜະລິດຕະພັນຮູບປະທຳ.

ນີ້ກໍແມ່ນຂົງເຂດທີ່ສິງກະໂປມີທ່າແຮງ. ສອງຝ່າຍໄດ້ເຫັນດີໃນເບື້ອງຕົ້ນຕໍ່ບາງເນື້ອໃນກ່ຽວກັບຍຸດທະສາດເຊື່ອມໂຍງເຕັກໂນໂລຊີ ຫວຽດນາມ - ສິງກະໂປ ດ້ວຍບັນດາໂຄງການ ແລະ ກິດຈະກຳທີ່ເປັນຮູບປະທຳ, ມຸ່ງສູ່ການນຳຮູບແບບ “ສາມພາກສ່ວນຂອງສອງປະເທດ” ເຂົ້າສູ່ຕົວຈິງ ໃນບັນດາຂົງເຂດທີ່ສອງຝ່າຍມີທ່າແຮງ ແລະ ຄວາມຕ້ອງການ.

ຕາມທ່ານ ເຈິ່ນເກີ່ມຕູ໋, ກອງປະຊຸມຄັ້ງທີ 3 ຂອງຄະນະບໍລິຫານງານສູນກາງພັກ ສະໄໝທີ XIV ທີ່ຈັດຂຶ້ນໃນເດືອນ 7 ຜ່ານມາ ໄດ້ພິຈາລະນາບັນດາບັນຫາສຳຄັນກ່ຽວກັບການສ້າງພັກ, ລະບົບການເມືອງ ແລະ ການພັດທະນາປະເທດໃນໄລຍະໃໝ່; ປະຕິບັດ 4 ບາດກ້າວຫັນປ່ຽນຍຸດທະສາດ ກ່ຽວກັບການສ້າງພັກ ແລະ ລະບົບການເມືອງ; ການຄຸ້ມຄອງພື້ນທີ່ພັດທະນາ, ສົ່ງເສີມແຫຼ່ງກຳລັງແຫ່ງຊາດໃຫ້ເກີດປະສິດທິຜົນ; ເສດຖະກິດ - ສັງຄົມ; ການປົກປັກຮັກສາປະເທດ ແລະ ການພັດທະນາແບບຍືນຍົງ.

ທ່ານ ເຈິ່ນເກີ່ມຕູ໋ ໄດ້ສະແດງຄວາມຍິນດີຕໍ່ບົດບາດແກນນຳຂອງຄະນະປະສານງານຊຸມຊົນຊາວຫວຽດນາມຢູ່ສິງກະໂປ ໃນການເຊື່ອມໂຍງຊຸມຊົນ, ຮັກສາ ແລະ ສົ່ງເສີມເອກະລັກວັດທະນະທຳດັ້ງເດີມ; ພ້ອມທັງມີບັນດາທິດທາງເພື່ອນຳໃຊ້ທ່າແຮງຂອງຖັນແຖວຊ່ຽວຊານ, ປັນຍາຊົນຊາວຫວຽດນາມຢູ່ຕ່າງປະເທດ ທີ່ພ້ອມນຳຄວາມຮູ້, ເຕັກໂນໂລຊີມາປະກອບສ່ວນໃຫ້ປະເທດ.

ທ່ານຢືນຢັນວ່າ ພັກ ແລະ ລັດ ຍາມໃດກໍ່ເອົາໃຈໃສ່, ເບິ່ງແຍງຊຸມຊົນຊາວຫວຽດນາມຢູ່ຕ່າງປະເທດ, ຖືນີ້ເປັນພາກສ່ວນທີ່ບໍ່ສາມາດແຍກອອກໄດ້ ແລະ ເປັນແຫຼ່ງກຳລັງສຳຄັນຂອງຊາດ.

ທ່ານ ເຈິ່ນເກີ່ມຕູ໋ ຍັງໄດ້ຍ້ອງຍໍພະນັກງານ, ເຈົ້າໜ້າທີ່ສະຖານທູດຫວຽດນາມປະຈຳສິງກະໂປ ທີ່ໄດ້ພະຍາຍາມສຳເລັດບັນດາໜ້າທີ່ການເມືອງທີ່ໄດ້ຮັບມອບໝາຍ, ຜັນຂະຫຍາຍແນວທາງການຕ່າງປະເທດຂອງພັກຢ່າງມີປະສິດທິຜົນ, ປະກອບສ່ວນເສີມສ້າງສາຍພົວພັນລະຫວ່າງສອງພັກ, ສອງປະເທດ; ພ້ອມທັງສະເໜີໃຫ້ສະຖານທູດສືບຕໍ່ເອົາໃຈໃສ່ເບິ່ງແຍງຊຸມຊົນ, ເພີ່ມທະວີການເຊື່ອມໂຍງຊາວຫວຽດນາມຢູ່ສິງກະໂປກັບພາຍໃນປະເທດ.

ເຊື່ອມໂຍງແຫຼ່ງກຳລັງຂອງຊາວຫວຽດນາມຢູ່ຕ່າງປະເທດ ເພື່ອຮັບໃຊ້ການພັດທະນາປະເທດ ຍສໝ - ມະຕິເລກທີ 23-NQ/TW ໄດ້ວາງອອກຂໍ້ຮຽກຮ້ອງໃໝ່ໃນວຽກງານຊາວຫວຽດນາມຢູ່ຕ່າງປະເທດ: ບໍ່ພຽງແຕ່ຢຸດຢູ່ການຂົນຂວາຍ, ເຕົ້າໂຮມ ແລະ ເອົາໃຈໃສ່ດູແລ ເທົ່ານັ້ນ, ຫາກຍັງສຸມໃສ່ສ້າງກົນໄກເພື່ອເຊື່ອມໂຍງແຫຼ່ງກຳລັງຂອງຊາວຫວຽດນາມຢູ່ຕ່າງປະເທດ ເຂົ້າກັບບັນດາຄວາມຕ້ອງການພັດທະນາອັນລະອຽດຂອງປະເທດ, ພ້ອມທັງສົ່ງເສີມບົດບາດເປັນຂົວຕໍ່ເຊື່ອມໂຍງຫວຽດນາມກັບໂລກ.

ຊາວຫວຽດນາມຢູ່ຕ່າງປະເທດຫັນໃຈສູ່ປະເທດຊາດ ເນື່ອງໃນໂອກາດວັນຊາດ 2/9 ຍສໝ - ເນື່ອງໃນໂອກາດສະເຫຼີມສະຫຼອງ 81 ປີ ວັນຊາດ 2/9, ບັນດາອົງການຕາງໜ້າຫວຽດນາມປະຈຳມາເລເຊຍ, ກຳປູເຈຍ ແລະ ເຂດຕາເວັນອອກໄກ (ສະຫະພັນລັດເຊຍ) ໄດ້ຈັດຫຼາຍກິດຈະກຳ ໂດຍມີຊາວຫວຽດນາມຢູ່ຕ່າງປະເທດ ແລະ ເພື່ອນມິດທ້ອງຖິ່ນເຂົ້າຮ່ວມຢ່າງຫຼວງຫຼາຍ. ຈາກຄວາມພາກພູມໃຈຕໍ່ການພັດທະນາຂອງປະເທດ, ປະຊາຄົມຊາວຫວຽດນາມໄດ້ສະແດງຄວາມປາດຖະໜາຢາກປະກອບສ່ວນໃຫ້ແກ່ບ້ານເກີດເມືອງນອນ ແລະ ຮ່ວມກັນສ້າງສາສາຍພົວພັນມິດຕະພາບກັບປະເທດທີ່ຕົນອາໄສຢູ່.