 |
ພິທີສະເຫຼີມສະຫຼອງວັນເດັກນ້ອຍສາກົນ.(ພາບ:vientianemai.net)
ທ່ານ ຄຳປະດິດ ເຂັມມານິດ ກ່າວວ່າ: ວັນເດັກນ້ອຍສາກົນທີ່ຕິດພັນກັບວັນປູກຕົ້ນໄມ້ແຫ່ງຊາດເປັນວັນທີ່ມີຄວາມສຳຄັນເພື່ອເຮັດໃຫ້ອະນຸຊົນ ເຍົາວະຊົນ ນັກຮຽນ ນັກສຶກສາ ໄດ້ເຂົ້າໃຈຢ່າງເລິກເຊິ່ງເຖິງວັນດັ່ງກ່າວ, ເດັກນ້ອຍແມ່ນຜູ້ສືບທອດອະນາຄົດຂອງປະເທດຊາດ ເດັກນ້ອຍວັນນີ້ຄືຜູ້ໃຫຍ່ໃນວັນໜ້າ ເປັນຊັບພະຍາກອນມະນຸດທີ່ພັດທະນາປະເທດຊາດໃນອະນາຄົດ ເດັກຈະເປັນເດັກທີ່ມີລະບຽບວິໄນ ເປັນຄົນຮູ້ຜູ້ດີໃນສັງຄົມ ກໍຍ້ອນຄອບຄົວ ຜູ້ປົກຄອງ ເອົາໃຈໃສ່ເບິ່ງແຍງດູແລ ແລະ ເປັນແບບຢ່າງທີ່ດີໃຫ້ເຂົາເຈົ້າ ເຊິ່ງຍາມໃດພັກ-ລັດ ກໍໄດ້ໃຫ້ຄວາມສຳຄັນຕໍ່ເດັກນ້ອຍໃຫ້ເຂົາເຈົ້າໄດ້ມີໂອກາດສຶກສາຮ່ຳຮຽນ ເຂົ້າຮ່ວມກິດຈະກຳຕ່າງໆທີ່ສໍາຄັນ ຊຸກຍູ້-ສົ່ງເສີມເຂົາເຈົ້າໃຫ້ໄດ້ເປີດກວ້າງມີສ່ວນຮ່ວມໃນສັງຄົມ.
ສຳລັບການສະເຫຼີມສະຫຼອງຄັ້ງນີ້ ຫໍສະໝຸດ ນວ ໄດ້ຈັດຫຼາຍກິດຈະກຳ ເປັນຕົ້ນ ກິດຈະກຳຖາມ-ຕອບຄວາມຮູ້ຮອບຕົວ ການສະແດງສິລະປະ ເລົ່ານິທານ ຫຼິ້ນເກມມ່ວນຊື່ນ ຈັບສະຫຼາກຮັບລາງວັນ ແລະ ແຈກຢາຍຂອງຂວັນ ເຊິ່ງກິດຈະກຳດັ່ງກ່າວ ເປັນການສົ່ງເສີມໃຫ້ເດັກກ້າສະແດງອອກ ພັດທະນາຄວາມຮູ້-ຄວາມສາມາດ ຕິດພັນກັບການສົ່ງເສີມການອ່ານ.
（ແຫຼ່ງຂໍ້ມູນ： vientianemai.net）
