ສໍາເລັດບັນດາຂໍ້ຕົລົງຕ່າງໆກ່ຽວກັບການຮ່ວມມືໃນຂົງເຂດພະລັງງານລະຫວ່າງຫວຽດນາມ - ລາວ ໂດຍໄວ

ທ່ານ ຈີ້ງດີ່ງຢຸງ ຮອງນາຍົກລັດຖະມົນຕີ ແລະ ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່

ໃນການຕອນຮັບ, ທ່ານ ຈີ້ງດີ່ງຢຸງ ຮອງນາຍົກລັດຖະມົນຕີ ໄດ້ເນັ້ນຫນັກວ່າສາຍພົວພັນລະຫວ່າງຫວຽດນາມ ແລະ ລາວ ແມ່ນສາຍພົວພັນສາມັກຄີ, ມິດຕະພາບ, ອ້າຍນ້ອງແບບພິເສດ. ໂດຍສະເພາະ, ການຮ່ວມມືດ້ານເສດຖະກິດ - ການຄ້າ - ການລົງທຶນແມ່ນຫນຶ່ງໃນເສົາຫຼັກເພື່ອເສີມຂະຫຍາຍກໍາລັງແຮງຂອງທັງສອງປະເທດ.

ທ່ານ ຈີ້ງດີ່ງຢຸງ ຮອງນາຍົກລັດຖະມົນຕີ ໄດ້ກ່າວວ່າການຮ່ວມມືໃນຂະແຫນງພະລັງງານມີບົດບາດສໍາຄັນ, ບໍ່ພຽງແຕ່ເຮັດໃຫ້ມີຜົນປະໂຫຍດດ້ານເສດຖະກິດ, ແຕ່ຍັງມີຄວາມຫມາຍອັນສໍາຄັນໃນດ້ານການເມືອງ, ຄວາມປອດໄພ, ພ້ອມກັນນັ້ນກໍ່ໄດ້ສະແດງໃຫ້ເຫັນການສະຫນັບສະຫນູນເຊິ່ງກັນ ແລະ ກັນ ລະຫວ່າງສອງປະເທດອ້າຍນ້ອງ.

ບົນພື້ນຖານນັ້ນ, ທ່ານ ຈີ້ງດີ່ງຢຸງ ຮອງນາຍົກລັດຖະມົນຕີ ໄດ້ຕີລາຄາສູງຕໍ່ກະຊວງອຸດສາຫະກໍາ ແລະ ການຄ້າຂອງຫວຽດນາມ ແລະ ກະຊວງພະລັງງານ ແລະ ບໍ່ແຮ່ ຂອງລາວ ທີ່ກໍາລັງມີການເຈລະຈາຢ່າງຕັ້ງໜ້າກ່ຽວກັບເນື້ອໃນຂອງສັນຍາລະຫວ່າງສອງລັດຖະບານໃນການຮ່ວມມືພັດທະນາບັນດາໂຄງການໄຟຟ້ານໍ້າຕົກ, ພະລັງງານທົດແທນ ແລະ ຂຸດຄົ້ນບໍ່ແຮ່ ເພື່ອການນໍາຂັ້ນສູງຂອງສອງປະເທດສາມາດໃຫ້ການອະນຸມັດ, ລົງນາມໃນເວລາມໍ່ໆນີ້.

ທ່ານ ຈີ້ງດີ່ງຢຸງ ຮອງນາຍົກລັດຖະມົນຕີ ກໍ່ໄດ້ກ່າວວ່າ, ຫວຽດນາມບໍ່ສະຫນັບສະຫນູນ, ພັດທະນາບັນດາໂຄງການພະລັງງານທີ່ສົ່ງຜົນກະທົບທາງລົບຕໍ່ສິ່ງແວດລ້ອມ. ຄຽງຄູ່ກັນນັ້ນ, ສອງປະເທດຄວນສ້າງກົນໄກເພື່ອຮັບປະກັນການຄວບຄຸມຢ່າງເຂັ້ມງວດໃນການລົງທຶນກໍ່ສ້າງ, ຄຸນນະພາບ, ຄວາມປອດໄພຂອງບັນດາໂຄງການກ່ຽວກັບໜອງ - ເຂື່ອນຊົນລະປະທານ, ໄຟຟ້ານໍ້າຕົກໃນເຂດຊາຍແດນ, ລະບົບແມ່ນໍ້າຕ່າງໆທີ່ມີການໄຫຼລົງເຂດລຸ່ມແມ່ນໍ້າຂອງຫວຽດນາມ.

ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ແຫ່ງ ສປປ ລາວ ໄດ້ກ່າວໃນກອງປະຊຸມວ່າລາວໄດ້ເຮັດວຽກຮ່ວມກັບກະຊວງອຸດສາຫະກໍາ ແລະ ການຄ້າ, ກຸ່ມບໍລິສັດໄຟຟ້າ, ກຸ່ມບໍລິສັດນ້ໍາມັນອາຍແກັສຫວຽດນາມໃນການຈັດຕັ້ງປະຕິບັດບັນດາຂໍ້ຕົກລົງລະຫວ່າງສອງລັດຖະບານກ່ຽວກັບການຮ່ວມມືເພື່ອພັດທະນາໂຄງການໄຟຟ້ານໍ້າຕົກຢູ່ລາວ, ຫົວຕໍ່ລະບົບໄຟຟ້າ ແລະ ການຊື້ຂາຍໄຟຟ້າລະຫວ່າງສອງປະເທດ. 

ປະຈຸບັນ, ທັງສອງຝ່າຍໄດ້ເຫັນດີກ່ຽວກັບເນື້ອໃນໃນການຮ່ວມມືຮ່ວມກັນ ແລະ ໂຄງການຂະຫນາດໃຫຍ່ຈໍານວນໜຶ່ງເພື່ອສາມາດລາຍງານ, ຂໍຄວາມເຫັນຂອງຜູ້ນໍາຂັ້ນສູງຂອງສອງປະເທດ, ລົງນາມໂດຍໄວເພື່ອຈັດຕັ້ງປະຕິບັດຢ່າງເປັນລະອຽດ. 

ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ແຫ່ງ ສປປ ລາວ ກໍ່ໄດ້ຢືນຢັນວ່າຈະສ້າງເງື່ອນໄຂອັນສະດວກເພື່ອໃຫ້ວິສາຫະກິດຂອງສອງປະເທດສາມາດຮ່ວມມືຢ່າງໃກ້ຊິດ, ມີປະສິດຕິຜົນກວ່າເກົ່າໃນສະເພາະໜ້າ, ໂດຍສະເພາະແມ່ນໃນຂົງເຂດພະລັງງານ, ຂຸດຄົ້ນບໍ່ແຮ່.

（ໄຊພອນ）