 |
ນະຄອນຫລວງວຽງຈັນ - ນະຄອນໂຮ່ຈິມິງ ຮັດແໜ້ນພົວພັນຮ່ວມມືວຽກງານແນວໂຮມ
ເປັນການສະຫລຸບຕີລາຄາ ໝາກຜົນແຫ່ງການ ຜັນຂະຫຍາຍປະຕິບັດເນື້ອໃນ ບົດບັນທຶກຊ່ວຍຈຳການຮ່ວມມື ລະຫວ່າງສອງອົງການຈັດຕັ້ງ ແນວໂຮມ ແຕ່ປີ 2016-2019 ແລະ ສືບຕໍ່ການຜັນຂະຫຍາຍເນື້ອໃນ ແຜນການໃນຊຸມປີຕໍ່ໜ້າ ແນໃສ່ສືບຕໍ່ການເພີ່ມພູມຄູນສ້າງ ສາຍພົວພັນມິດຕະພາບ ທີ່ເປັນມູນເຊື້ອແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ກໍຄື ສອງອົງການຈັດຕັ້ງແນວໂຮມ ໃຫ້ມີຄວາມແໜ້ນແຟ້ນຍິ່ງຂຶ້ນ.
ການພົບປະຄັ້ງນີ້, ຝ່າຍລາວ ນຳໂດຍທ່ານ ບຸນທ່ຽງ ຂຸນສີ ປະທານແນວລາວສ້າງຊາດ ນວ ແລະ ທ່ານ ເຈີ່ນຮິ້ວ ເຝືອກ ຮອງປະທານແນວໂຮມ ແຫ່ງຊາດຫວຽດນາມ ນະຄອນໂຮ່ຈີມິງ ແລະ ພາກສ່ວນກ່ຽວ ຂ້ອງສອງຝ່າຍເຂົ້າຮ່ວມ. ທ່ານ ບຸນທ່ຽງ ຂຸນສີ ກ່າວວ່າ: ຜ່ານການຈັດຕັ້ງປະຕິບັດບົດບັນທຶກໃນ 3 ປີຜ່ານມາສອງຝ່າຍສາມາດຍາດໄດ້ຜົນສຳເລັດຫລາຍດ້ານ ໂດຍສະເພາະ ປະຊາ ຊົນບັນດາເຜົ່າ ໄດ້ຮັບຮູ້ ແລະເຂົ້າໃຈ ເຖິງສາຍພົວພັນແບບພິເສດ ລາວ-ຫວຽດນາມ ແລະ ຫວຽດ ນາມ-ລາວ ຢ່າງກວ້າງຂວາງ ແລະ ເລິກເຊິ່ງ.
ນອກນັ້ນ, ຍັງດຳເນີນກິດຈະກຳ ຮ່ວມກັນຫລາຍດ້ານ ເປັນຕົ້ນການສະແດງ ສິລະປະວັນນະຄະ ດີຂອງ ລາວ-ຫວຽດນາມ ເພື່ອເປັນການແລກປ່ຽນດ້ານວັດທະນະທຳ, ວາງສະແດງຮູບພາບ ການເຄື່ອນໄຫວຕ່າງໆ, ງານຕະຫລາດນັດສົ່ງເສີມ ສິນຄ້າຂອງສອງປະເທດ ແລະ ຈັດກິດຈະກຳຮ່ວມກັນ ໃນການສະເຫລີມສະຫລອງ ວັນສຳຄັນຕ່າງໆຂອງຊາດ. ສອງຝ່າຍສືບຕໍ່ແລກປ່ຽນຜູ້ແທນຂັ້ນສູງ ຊຸກຍູ້ໃຫ້ຄະນະວິຊາການຂັ້ນຕ່າງໆ ໃຫ້ມີການພົບປະແລກປ່ຽນບົດຮຽນເຊິ່ງກັນ ແລະ ກັນ ຫລາຍຂຶ້ນ.
（ແຫຼ່ງຂໍ້ມູນ： ຂປລ）
