| ຮັດແໜ້ນນຳ້ໃຈສາມັກຄີ, ມິດຕະພາບລະຫວ່າງເຍົາວະຊົນ 3 ປະເທດ ຫວຽດນາມ -ລາວ - ກຳປູເຈຍ | |
| ນະຄອນໂຮ່ຈີມິນ ແລະ ແຂວງຈໍາປາສັກ - ລາວ ຊຸກຍູ້ການຮ່ວມມືຢ່າງຮອບດ້ານ |
ທ່ານຫົວໜ້າຄະນະຂົນຂວາຍປະຊາຊົນແຂວງ, ປະທານຄະນະກຳມະການແນວໂຮມປະເທດຊາດຫວຽດນາມ ແຂວງ ຫວູແທ່ງອານ ແລະ ສະຫາຍ ນາງ ວາດສະໜາ ສີລິມາ ປະທານຄະນະກຳມະການແນວລາວສ້າງຊາດ ແຂວງຈຳປາສັກ ເປັນປະທານກອງປະຊຸມ.
ກ່າວຄຳເຫັນທີ່ກອງປະຊຸມ, ສະຫາຍ ຫວູແທ່ງອານ ໄດ້ສະແດງຄວາມຍິນດີຕ້ອນຮັບຄະນະຜູ້ແທນຄະນະກຳມະການແນວລາວສ້າງຊາດ ແຂວງຈຳປາສັກ ທີ່ມາຢ້ຽມຢາມ, ພົບປະເຈລະຈາ ແລະ ແລກປ່ຽນບົດຮຽນກ່ຽວກັບວຽກງານແນວໂຮມປະເທດຊາດ ກວາງຫງາຍ. ເຫດການນີ້ມີຄວາມໝາຍພິເສດກວ່າເມື່ອສອງພັກ, ລັດ ແລະ ປະຊາຊົນສອງປະເທດຫວຽດນາມ - ລາວ ສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ, 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ.
 |
| ແຂວງກວາງງາຍ ແລະ ແຂວງຈໍາປາສັກ (ລາວ) ແລກປ່ຽນປະສົບການວຽກງານແນວໂຮມ. (ພາບ:baoquangngai) |
ສະຫາຍ ຫວໍແທ່ງອານ ຫວັງວ່າ ຜ່ານການພົບປະເຈລະຈາ ແລະ ແລກປ່ຽນປະສົບການນີ້, ຄະນະກຳມະການແນວໂຮມປະເທດຊາດຫວຽດນາມ ແຂວງ ກວາງຫງາຍ ແລະ ຄະນະກຳມະການແນວລາວສ້າງຊາດ ແຂວງຈຳປາສັກ ຈະເກັບກຳຂໍ້ມູນຂ່າວສານ ແລະ ປະສົບການຫຼາຍຢ່າງໃນວຽກງານແນວໂຮມ, ຜ່ານນັ້ນກໍປະກອບສ່ວນເຂົ້າໃນການເພີ່ມທະວີຄວາມເຂົ້າໃຈ, ການຮ່ວມມື ແລະ ມິດຕະພາບລະຫວ່າງປະຊາຊົນສອງປະເທດ ແລະ ໂດຍສະເພາະ ແມ່ນສອງແນວໂຮມຂອງແຂວງ ກວາງຫງາຍ ແລະ ແຂວງຈຳປາສັກ.
ປະຈຸບັນ, ບົດບາດຂອງແນວໂຮມນັບມື້ນັບໄດ້ຮັບການຢືນຢັນ, ການພົວພັນມິດຕະພາບທີ່ເປັນມູນເຊື້ອລະຫວ່າງ 2 ແຂວງເວົ້າລວມ ແລະ ແນວໂຮມ 2 ແຂວງເວົ້າສະເພາະ ນັບມື້ນັບຮັດແໜ້ນ ແລະ ພັດທະນາ.
ທີ່ການພົບປະ, ການນຳສອງຝ່າຍໄດ້ແຈ້ງໃຫ້ກັນຊາບ ກ່ຽວກັບໝາກຜົນແຫ່ງການພັດທະນາເສດຖະກິດ - ສັງຄົມ, ໝາກຜົນການປະຕິບັດໜ້າທີ່ ແລະ ວຽກງານຂອງແນວໂຮມຢູ່ແຕ່ລະແຂວງ; ພ້ອມກັນນັ້ນ, ກໍແບ່ງປັນປະສົບການໃນການກໍ່ສ້າງ ແລະ ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ການເຄື່ອນໄຫວຂົນຂວາຍ ແລະ ຂະບວນການຂອງມະຫາຊົນ; ການປະສານສົມທົບລະຫວ່າງແນວໂຮມກັບອົງການລັດ ແລະ ອົງການຈັດຕັ້ງສະມາຊິກ; ວຽກງານໂຄສະນາເຜີຍແຜ່…
ບັນດາຜູ້ແທນທີ່ເຂົ້າຮ່ວມກອງປະຊຸມຍັງໄດ້ປະກອບສ່ວນຫຼາຍຄຳເຫັນ, ຂໍ້ສະເໜີວິທີແກ້ໄຂ ແລະ ປະສົບການເພື່ອຍົກສູງປະສິດທິຜົນການເຄື່ອນໄຫວຂອງແນວໂຮມ ແລະ ເພີ່ມທະວີການສົມທົບກັນລະຫວ່າງສອງແນວໂຮມແຂວງ ກວາງຫງາຍ - ແຂວງຈຳປາສັກ.
ໂດຍຕາງໜ້າໃຫ້ຄະນະ, ສະຫາຍ ນາງ ວາດສະໜາ ສີລິມາ ໄດ້ຕີລາຄາສູງການພົວພັນຮ່ວມມື ລະຫວ່າງສອງອົງການແນວໂຮມຂອງສອງແຂວງໃນໄລຍະຜ່ານມາ. ພ້ອມກັນນັ້ນ, ທ່ານນາງກໍປາດຖະໜາວ່າ ສອງແຂວງຈະສືບຕໍ່ເພີ່ມທະວີການສົມທົບກັນ, ປະກອບສ່ວນຮັດແໜ້ນນ້ຳໃຈສາມັກຄີແບບພິເສດ, ມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານ ລະຫວ່າງສອງປະເທດ ຫວຽດນາມ - ລາວ ເວົ້າລວມ ແລະ ສອງແຂວງ ກວາງຫງາຍ - ຈໍາປາສັກ ເວົ້າສະເພາະ.
ເນື່ອງໃນໂອກາດນີ້, ຄະນະຜູ້ແທນແນວລາວສ້າງຊາດແຂວງຈໍາປາສັກ ໄດ້ເຂົ້າຢ້ຽມຂ່ຳນັບການນໍາແຂວງກວາງຫງາຍ; ຢ້ຽມຢາມ ແລະ ຖະຫວາຍທູບທຽນຢູ່ເຂດອະນຸສອນສະຖານນາຍົກລັດຖະມົນຕີ ຟ້າມວັນດົ່ງ.
ຄຳຮຸ່ງ
