ໃນການຢ້ຽມຢາມ, ທ່ານນາຍົກລັດຖະມົນຕີ ຣານິນ ວິກກຣາເມຊິງ ໄດ້ເຂົ້າຮ່ວມພິທີຕ້ອນຮັບ, ພົບປະເຈລະຈາກັບທ່ານນາຍົກລັດຖະມົນຕີ ຫງວຽນຊວນຢຸກ; ເຂົ້າຢ້ຽມຂ່ຳນັບທ່່ານເລຂາທິການໃຫຍ່ ພັກກອມມູນິດຫວຽດນາມ ຫງວຽນຝູຈ້ອງ; ພົບປະແລກປ່ຽນຄຳຄິດເຫັນກັບທ່ານປະທານປະເທດ ເຈີ່ນດ້າຍກວາງ; ພົບປະແລກປ່ຽນຄຳຄິດເຫັນກັບທ່ານນາງ ປະທານສະພາແຫ່ງຊາດ ຫງວຽນທິກີມເງິນ; ເຂົ້າຮ່ວມເວທີປາໄສການລົງທຶນຫວຽດນາມ - ສີລັງກາ. ທ່ານນາຍົກລັດຖະມົນຕີ ຣານິນ ວິກກຣາເມຊິງ ໄດ້ມາວາງພວງມາລາທີ່ອະນຸສາວະລີນັກຮົບວິລະຊົນທີ່ເສຍຊີວິດເພື່ອຊາດ, ໄຫວ້ອາໄລທີ່ອະນຸສາວະລີຫໍສົບຂອງທ່ານປະທານໂຮ່ຈີມິນ.
ທີ່ບັນດາການພົບປະ, ທັງສອງຝ່າຍໄດ້ສະແດງຄວາມເພິ່ງພໍໃຈກ່ຽວກັບການພັດທະນາຢ່າງຈົບງາມຂອງການພົວພັນມິດຕະພາບອັນເປັນມູນເຊືື້ອ ແລະ ການຮ່ວມມືໃນຫຼາຍດ້ານ ລະຫວ່າງສອງປະເທດໃນ 47 ປີທີ່ຜ່ານມາ ນັບຕັ້ງແຕ່ເວລາສ້າງຕັ້ງການພົວພັນທາງການທູດ (ວັນທີ 21 ກໍລະກົດ 1970). ສອງຝ່າຍກໍ່ໄດ້ຢືນຢັນກ່ຽວກັບຄວາມຮັກແພງກັນ ແລະ ຄວາມສະໜັບສະໜູນອັນປະເສີດ ເຊິ່ງທັງສອງຝ່າຍໄດ້ສະຫງວນໃຫ້ກັນ ໃນພາລະກິດແຫ່ງການກໍ່ສ້າງ, ພັດທະນາຢູ່ແຕ່ລະປະເທດ ອັນເປັນພື້ນຖານທີ່ໜັກແໜ້ນໃຫ້ແກ່ການເພີ່ມທະວີ ແລະ ເຮັດໃຫ້ການພົວພັນລະຫວ່າງສອງປະເທດໃນຊຸມປີຕໍ່ໜ້ານີ້ເລິກເຊິ່ງກວ່າອີກ.
ທ່ານນາຍົກລັດຖະມົນຕີ ຫງວຽນຊວນຝຸກ ໄດ້ໃຫ້ຄຳອວຍພອນມາຍັງລັດຖະບານເອກະພານແຫ່ງຊາດ ແລະ ປະຊາຊົນສີລັງກາ ກ່ຽວກັບບັນດາຜົນງານອັນສຳຄັນທີ່ບັນລຸໄດ້ ໃນພາລະກິດແຫ່ງການຟື້ນຟູບູລະນະປະເທດ ແລະ ການປອງດອງຊາດ, ເຮັດໃຫ້ປະເທດສີລັງກາ ມີການພັດທະນາຢ່າງໝັ້ນຄົງເປັນກ້າວໆ. ທ່ານ ນາຍົກລັດຖະມົນຕີ ຫງວຽນຊວນຝຸກ ກໍ່ໄດ້ສະແດງຄວາມຫວັງວ່າ ດ້ວຍທີ່ຕັ້ງພູມສາດຂອງຕົນເອງ ສີລັງກາ ຈະມີຖານະບົດບາດອັນສຳຄັນ ເປັນສູນກາງເສດຖະກິດແຫ່ງໜຶ່ງຂອງພາກພື້ນມະຫາສະມຸດອິນເດຍ.
ທ່ານນາຍົກລັດມົນຕີ ຣານິນ ວິກກຣາເມຊິງ ໄດ້ຍົກຍໍສັນລະເສີນຖານະບົດບາດຂອງປະທານ ໂຮ່ຈີມິນ ໃນພາລະກິດແຫ່ງການຕໍ່ສູ້ຍາດເອົາເອກະລາດແຫ່ງຊາດ ຂອງຫວຽດນາມ; ອວຍໄຊໃຫ້ພອນຫວຽດນາມ ບັນລຸຜົນສຳເລັດອັນສຳຄັນຫຼາຍຢ່າງ ໃນການພັດທະນາເສດຖະກິດ - ສັງຄົມ. ທ່ານນາຍົກລັດຖະມົນຕີ ຣານິນ ວິກກຣາເມຊິງ ກໍ່ໄດ້ອວຍໄຊໃຫ້ພອນຫວຽດນາມ ຈະບັນລຸເປົ້າໝາຍກາຍເປັນປະເທດອຸດສາຫະກຳພັດທະນາໂດຍໄວ.
ສອງຝ່າຍກໍ່ໄດ້ເຫັນດີເປັນເອກະພາບກັນວ່າ ຈະຊຸກຍູ້ການພົວພັນທາງດ້ານການເມືອງລະຫວ່າງຫວຽດນາມ ແລະ ສີລັງກາ ໃຫ້ຂະຫຍາຍຕົວຍິ່ງກວ່າອີກ; ຢືນຢັນຄວາມສຳຄັນຂອງການເພີ່ມທະວີການຢ້ຽມຢາມ ແລະ ພົບປະຂັ້ນສູງ, ການແລກປ່ຽນຄະນະຜູ້ແທນຂັ້ນຕ່າງໆ ລະຫວ່າງບັນດາກະຊວງ, ຂະແໜງການ, ທ້ອງຖິ່ນ ແລະ ແລກປ່ຽນປະຊາຊົນ ລະຫວ່າງສອງປະເທດ. ສອງຝ່າຍກໍ່ໄດ້ເຫັນດີເປັນເອກະພາບ ຈະສົ່ງເສີມການແລກປ່ຽນບັນດາຮູບການສະແດງສີລະປະ ແລະ ວັດທະນະທຳ ແນໃສ່ສ້າງສະພາບແວດລ້ອມອັນມີປະສິດທິຜົນ ເພື່ອເພີ່ມທະວີຄວາມເຂົ້າໃຈລະຫວ່າງສອງປະເທດກວ່າອີກ.
ສອງຝ່າຍກໍ່ໄດ້ໃຫ້ຄຳໝັ້ນສັນຍາກ່ຽວກັບການເພີ່ມທະວີການຮ່ວມມືໃນຂົງເຂດປ້ອງກັນຊາດ - ປ້ອງຄວາມສະຫງົບ ໂດຍຜ່ານການຜັນຂະຫຍາຍຢ່າງມີປະສິດທິຜົນ ບົດບັນທຶກຊ່ວຍຈຳວ່າດ້ວຍການຮ່ວມມືປ້ອງກັນຊາດ 2011, ເພີ່ມທະວີການແລກປ່ຽນຄະນະຜູ້ແທນ, ແລກປ່ຽນບົດຮຽນກ່ຽວກັບການເຂົ້າຮ່ວມການເຄື່ອນໄຫວຮັກສາສັນຕິພາບ ຂອງອົງການສະຫະປະຊາຊາດ. ສອງຝ່າຍກໍ່ໄດ້ເຫັນດີເປັນເອກະພາບ ເພີ່ມທະວີການຮ່ວມມືກ່ຽວກັບການຄົ້ນຄວ້າດ້ານປ້ອງກັນຊາດ ໂດຍຜ່ານການແລກປ່ຽນຄະນະຜູ້ແທນ ລະຫວ່າງສະຖາບັນການປ້ອງກັນຊາດ ຫວຽດນາມ ແລະ ສະຖາບັນການປ້ອງກັນຊາດ ໂກທະລາວະລາ.
ສອງຝ່າຍກໍ່ໄດ້ເຫັນດີເປັນເອກະພາບກັນ ກ່ຽວກັບບັນດາທິດທາງໃຫຍ່ ແນໃສ່ເຮັດໃຫ້ການພົວພັນສອງຝ່າຍຂະຫຍາຍຕົວຂຶ້ນສູ່ລະດັບໃໝ່; ເຫັນດີເປັນເອກະພາບມອບໃຫ້ ບັນດາອົງການຮັບຜິດຊອບຂອງສອງປະເທດ ສະເໜີມາດຕະການເພື່ອເຮັດໃຫ້ການຮ່ວມມືໃນຂົງເຂດທີ່ໄດ້ຢູ່ ເລິກເຊິ່ງກວ່າອີກ ແລະ ເປີດກວ້າງບັນດາຂົງເຂດຮ່ວມມື ທີ່ສອງຝ່າຍມີຄວາມສາມາດບົ່ມຊ້ອນ; ກວດຄືນ ແລະ ຜັນຂະຫຍາຍບັນດາເອກະສານ, ຂໍ້ຕົກລົງທີ່ໄດ້ລົງລາຍເຊັນ ໃຫ້ມີປະສິດທິຜົນ; ພິຈາລະນາປັບປຸງ, ລົງນາມເຊັນໃໝ່ ບັນດາເອກະສານໃຫ້ເໝາະສົມກັບສະພາບການໃໝ່; ຊຸກຍູ້ການພົວພັນທາງດ້ານການເມືອງລະຫວ່າງຫວຽດນາມ ແລະ ສີລັງກາ ໃຫ້ແໜ້ນແຟ້ນກ່ວາອີກ; ສົ່ງເສີມການແລກປ່ຽນບັນດາຮູບການສະແດງສີລະປະ ແລະ ວັດທະນະທຳ ແນໃສ່ສ້າງສະພາບແວດລ້ອມອັນດີ ເພື່ອເພີ່ມທະວີຄວາມເຂົ້າໃຈລະຫວ່າງສອງປະເທດຍິ່ງກວ່າອີກ.
ສອງຝ່າຍກໍ່ໄດ້ເຫັນດີເປັນເປັນເອກະພາບຈະຜັນຂະຫຍາຍບົດບັນທຶກຊ່ວຍຈຳວ່າດ້ວຍການຮ່ວມມືຊຸກຍູ້ການລົງທຶນສອງຝ່າຍ ທີ່ໄດ້ຮັບການລົງນາມ ລະຫວ່າງກົມລົງທຶນຕ່າງປະເທດຫວຽດນາມ ແລະ ຄະນະກຳມະການລົງທຶນ ສີລັງກາ ປີ 2011 ໃຫ້ມີປະສິດທິຜົນ; ເພີ່ມທະວີການຮ່ວມມື, ແລກປ່ຽນແບ່ງປັນບົດຮຽນ ແລະ ເຕັກໂຍໂລຊີ ການພັດທະນາດ້ານກະສິກຳ - ການປະມົງ; ຖືເອົາແຜນການເຮັດວຽກ ກ່ຽວກັບການຮ່ວມມືດ້ານການປະມົງ ລະຫວ່າງສອງປະເທດ ເປັນລຳດັບການດຳເນີນປະຕິບັດການກຳນົດທິດນີ້; ການເຊື່ອມຕໍ່ຄົມມະນາຄົມທາງອາກາດ ເປັນມາດຕະການອັນໜຶ່ງທີ່ຊຸກຍູ້ຄວາມສາມາດບົ່ມຊ້ອນໃນການຮ່ວມມືດ້ານທ່ອງທ່ຽວລະຫວ່າງສອງປະເທດຢ່າງແຂງແຮງ.
ສອງຝ່າຍກໍ່ໄດ້ເຫັນດີເປັນເອກະພາບ ກ່ຽວກັບຄວາມສຳຄັນຂອງການເພີ່ມທະວີການຮ່ວມມືໃນບັນດາຂົງເຂດທີ່ມີຄວາມສາມາດບົ່ມຊ້ອນຕ່າງໆຄື ການສຶກສາ - ບຳລຸງກໍ່ສ້າງ, ພັດທະນາແຫຼ່ງບຸກຄະລາກອນ; ຊຸກຍູ້ການຮ່ວມມືທາງດ້ານເຕັກໂນໂລຊີຂໍ້ມູນຂ່າວສານ ໂດຍຜ່ານການລົງນາມເຊັນ ບົດບັນທຶກວ່າດ້ວຍຂໍ້ມູນຂ່າວສານ ແລະ ສື່ມວນຊົນ; ແບ່ງປັນບົດຮຽນປະສົບການທີ່ດີໃນຂົງເຂດສິ່ງແວດລ້ອມ ໂດຍຜ່ານການລົງນາມເຊັນ ບົດບັນທຶກຊ່ວຍຈຳວ່າດ້ວຍການຮ່ວມມືໃນຂົງເຂດສິ່ງແວດລ້ອມ; ຊຸກຍູ້ການຮ່ວມມືໃນຂົງເຂດປະມົງແລະ ກະສິກຳ. ສອງຝ່າຍກໍ່ໄດ້ເປັນເອກະພາບກັນ ຈະເພີ່ມທະວີການຮ່ວມມືກ່ຽວກັບການຍົກສູງຖານະບົດບາດຂອງ ແມ່ຍິງ, ການຫຼຸດຜ່ອນຄວາມອຶດຫິວ ແລະ ຄວາມທຸກຍາກ, ເຮືອນຢູ່ໃຫ້ຜູ້ອອກແຮງງານທີ່ມີລາຍໄດ້ຕ່ຳ ແລະ ສະຫວັດດີການສັງຄົມ ສຳລັບຜູ້ທີ່ຕົກໃນສະພາບທຸກຍາກ. ຫວຽດນາມກໍ່ໄດ້ຈົດຈຳຄວາມສະເໜີຂອງ ສີລັງກາ ກ່ຽວກັບ “ສັນຍາຂອບວ່າດ້ວຍການຮ່ວມມືເສດຖະກິດ-ສັງຄົມ ໃຕ້ - ໃຕ້”.
ສອງຝ່າຍໄດ້ຊົມເຊີຍ ແລະ ຢືນຢັນຈະສຶບຕໍ່ປະສານສົມທົບນຳກັນ ແນໃສ່ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ອາຊຽນ ແລະ ສະມາຄົມຄວາມຮ່ວມມືໃນພາກພື້ນອາຊີໃຕ້ (SAARC) ເພີ່ມທະວີການຮ່ວມມື ແລະ ເຊືີ່ອມຕໍ່ໃນທຸກດ້ານ, ເພື່ອສັນຕິພາບ, ສະຖຽມລະພາບ, ຄານຮ່ວມມື ແລະ ພັດທະນາຢູ່ພາກພື້ນອາຊີ. ຫວຽດນາມກໍ່ໄດ້ຈົດຈຳ ຄຳສະເໜີຂອງສີລັງກາ ກ່ຽວກັບການສະໜັບສະໜູນສີລັງກາກາຍເປັນຄູ່ຮ່ວມມືສົນທະນາຕາມຂົງເຂດ ຂອງອາຊຽນ ແລະ ສົ່ງເສີມໃຫ້ສີລັງກາ ຊຸກຍູ້ການຮ່ວມມືອັນລະອຽດ ແລະ ມີປະສິດທິຜົນກັບອາຊຽນ ໃນເວລາຕໍ່ໜ້າ.
ສອງຝ່າຍໄດ້ເນັ້ນໜັກເຖິງຄວາມສຳຄັນຂອງການຮັກສາສັນຕິພາບ ແລະ ສະຖຽມລະພາບ ຢູ່ທະເລຕາເວັນອອກ, ເສລີພາບໃນການເດີນທະເລ ເດີນອາກາດ ແລະ ການຄ້າທີ່ບໍ່ຖືກກີດຂວາງ, ແກ້ໄຂບັນດາຂໍ້ຂັດແຍ້ງພິດພາດ ແລະ ຄວາມແຕກຕ່າງກັນ ໂດຍສັນຕິວິທີ, ສອດຄ່ອງກັບກົດໝາຍສາກົນ.
ເນື່ອງໃນໂອກາດນີ້, ນາຍົກລັດຖະມົນຕີທັງສອງທ່ານ ກໍ່ໄດ້ເປັນສັກຂີພິຍານພິທີລົງນາມເຊັນບັນດາເອກະສາສຳຄັນຄື: ຂໍ້ຕົກລົງການຮ່ວມມືດ້ານສຶກສາ ລະຫວ່າງກະຊວງສຶກສາ ແລະ ປຳລຸງສ້າງຫວຽດນາມ ແລະ ກະຊວງມະຫາວິທະຍາໄລ ແລະ ຄົມມະນາຄົມທາງບົກ ສີລັງກາ; ໂຄງການປະຕິບັດກ່ຽວກັບການຮ່ວມມືພັດທະນາດ້ານກະສິກຳ ໄລຍະ 2017 – 2019 ລະຫວ່າງ ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ແລະ ກະຊວງກະສິກຳ ສີລັງກາ./.
ໂດຍ ບນ (ຕາມ TTXVN)
