ທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລີມ ໄດ້ສະແດງຄວາມຂອບອົກຂອບໃຈຄວາມຮັກແພງ ແລະ ບັນດາການປະກອບສ່ວນອັນໃຫຍ່ຫຼວງຂອງທ່ານປະທານາທິບໍດີ Biden ໃຫ້ແກ່ ຫວຽດນາມ ແລະ ການພົວພັນ ຫວຽດນາມ - ອາເມລິກາ; ເຊື່ອໝັ້ນວ່າ ການຢ້ຽມຢາມໄປຍັງ ອາເມລິກາ ຄັ້ງປະຫວັດສາດໃນປີ 2015 ຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ ການຢ້ຽມຢາມໄປຍັງ ຫວຽດນາມ ຂອງທ່ານປະທານາທິບໍດີ Biden ໃນເດືອນກັນຍາ 2023 ໄດ້ສ້າງກຳລັງຜັກດັນທີ່ສຳຄັນ ເພື່ອນຳການພົວພັນລະຫວ່າງ 2 ປະເທດພັດທະນາຢ່າງກະໂດດຂັ້ນ, ຂຶ້ນສູ່ລະດັບສູງສຸດແມ່ນການພົວພັນຄູ່ຮ່ວມມືຍຸດທະສາດຮອບດ້ານຄືປະຈຸບັນ, ເປີດພື້ນທີ່ໃຫ້ສາຍພົວພັນລະຫວ່າງສອງປະເທດເພື່ອພັດທະນາຢ່າງເຂັ້ມແຂງໃນຫຼາຍທົດສະວັດຈະມາເຖິງ.
 |
| ທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລີມ ພົບປະກັບ ທ່ານປະທານາທິບໍດີ ອາເມລິກາ Joe Biden. (ພາບ: TTXVN) |
ທ່ານເລຂາທິການໃຫຍ່, ປະທານປະເທດ ຫວຽດນາມ ໄດ້ເຫັນດີເປັນເອກະພາບວ່າ ຫວຽດນາມ ແລະ ອາເມລິກາ ມີວິໄສທັດອັນດຽວກັນໃນການສ້າງອະນາຄົດທີ່ດີງາມກ່ວາໃຫ້ແກ່ມວນມະນຸດຈາກບົດຮຽນປະສົບການນີ້, ນັ້ນແມ່ນການຍົກສູງບົດບາດຂອງຈິດໃຈປົວແປງ, ເຄົາລົບ ແລະ ເຂົ້າໃຈເຊິ່ງກັນ ແລະ ກັນ, ໃນນັ້ນ ເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົນຄົບຖ້ວນ ແລະ ລະບອບລະບຽບການການເມືອງຂອງກັນ ແມ່ນສຳຄັນທີ່ສຸດ.
ທ່ານເລຂາທິການໃຫຍ່, ປະທານປະເທດ ຫວຽດນາມ ຢືນຢັນວ່າ ການພົວພັນ ຫວຽດນາມ - ອາເມລິກາ ມີຈຸດພິເສດຫຼາຍຢ່າງ, ໃນໄລຍະ 50 ປີຜ່ານມາ, ຈາກອະດີດທີ່ເປັນສັດຕູໄປສູ່ການເປັນຄູ່ຮ່ວມມື, ຄູ່ຮ່ວມມືຮອບດ້ານ ແລະ ປະຈຸບັນໄດ້ກ້າວຂຶ້ນສູ່ລະດັບສູງສຸດຂອງການພົວພັນ - ຄູ່ຮ່ວມມືຍຸດທະສາດຮອບດ້ານ. ການພົວພັນລະຫວ່າງສອງປະເທດພວມກ້າວເຂົ້າສູ່ໜ້າປະຫວັດສາດໃໝ່ ແລະ ແມ່ນແບບຢ່າງໃນການພົວພັນສາກົນຢ່າງແທ້ຈິງກ່ຽວກັບຄວາມມານະພະຍາຍາມປົວແປງ ແລະ ກໍ່ສ້າງການພົວພັນພາຍຫຼັງສົງຄາມ.
ທ່ານປະທານາທິບໍດີ Joe Biden ໄດ້ສົ່ງຄວາມເຫັນໃຈເຖິງ ຫວຽດນາມ ຕໍ່ບັນດາຄວາມເສຍຫາຍຈາກພາຍຸ Yagi ເມື່ອບໍ່ດົນມານີ້, ພ້ອມກັນນັ້ນ ກໍ່ຢືນຢັນລັດຖະບານ ອາເມລິກາ ພ້ອມແລ້ວທີ່ຈະໜູນຊ່ວຍ ຫວຽດນາມ ໃນຂະບວນການຟື້ນຟູພາຍຫຼັງພາຍຸ.
ທ່ານປະທານາທິບໍດີ Joe Biden ໄດ້ຢືນຢັນວ່າ ອາເມລິກາ ສະໜັບສະໜູນ ຫວຽດນາມ ທີ່ “ເຂັ້ມແຂງ, ເປັນເອກະລາດ, ເປັນເຈົ້າຕົນເອງ ແລະ ວັດທະນາຖາວອນ” ແລະ ຈະສືບຕໍ່ຊຸກຍູ້ການພົວພັນຄູ່ຮ່ວມມືລະຫວ່າງ 2 ປະເທດບົນພື້ນຖານເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົນຄົບຖ້ວນ ແລະ ລະບອບລະບຽບການການເມືອງຂອງກັນ, ເພື່ອໃຫ້ການພົວພັນລະຫວ່າງ ອາເມລິກາ - ຫວຽດນາມ ສືບຕໍ່ເປັນແບບຢ່າງໃນການປົວແປງ ແລະ ການຮ່ວມມືເພື່ອສ້າງອະນາຄົດ.
ທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລີມ ເນັ້ນໜັກວ່າ ຫວຽດນາມ ພວມຢືນຢູ່ຕໍໜ້າກັບຈຸດເລີ່ມຕົ້ນປະຫວັດສາດໃໝ່, ຍຸກໃໝ່ - ຍຸກແຫ່ງຄວາມກ້າວໜ້າຂອງປະຊາຊົນຫວຽດນາມ ແລະ ຫວຽດນາມ ຈະສືບຕໍ່ປະຕິບັດນະໂຍບາຍແນວທາງການຕ່າງປະເທດເອກະລາດ, ເປັນເຈົ້າຕົນເອງ, ຫັນເປັນຫຼາຍຝ່າຍ, ຫັນເປັນຫຼາຍຮູບຫຼາຍແບບ, ເປັນເພື່ອນມິດ, ຄູ່ຮ່ວມມືທີ່ໄວ້ເນື້ອເຊື່ອໃຈ, ເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບໃນປະຊາຄົມສາກົນຢ່າງແນ່ວແນ່, ໃນນັ້ນມີ ອາເມລິກາ ແມ່ນຄູ່ຮ່ວມມືທີ່ມີລະດັບຄວາມສຳຄັນຍຸດທະສາດ, ແລະ ສະແດງຄວາມເຊື່ອໝັ້ນວ່າ ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ອາເມລິກາ ຈະສືບຕໍ່ຮັກສາທ່າພັດທະນາຢ່າງໝັ້ນຄົງ, ຍາວນານ ເພື່ແຜົນປະໂຫຍດ ແລະ ຄວາມປາດຖະໜາຂອງປະຊາຊົນສອງປະເທດ.
ເພື່ອສືບຕໍ່ຮັກສາທ່າພັດທະນາຢ່າງໝັ້ນຄົງ, ມີປະສິດທິຜົນຂອງຂອບເຂດການພົວພັນໃໝ່ ແລະ ມຸ່ງໄປເຖິງການສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ອາເມລິກາ ໃນປີ 2025, ການນຳສອງທ່ານ ໄດ້ເຫັນດີເປັນເອກະພາບສືບຕໍ່ສົມທົບກັນຢ່າງແໜ້ນແຟ້ນ ເພື່ອຜັນຂະຫຍາຍຖະແຫຼງການຮ່ວມ ຫວຽດນາມ - ອາເມລິກາ ໃນປີ 2023 ຢ່າງມີປະສິດທິຜົນ, ໃນນັ້ນ ເພີ່ມທະວີການພົບປະ, ແລກປ່ຽນລະຫວ່າງທຸກຂັ້ນ, ພິເສດແມ່ນຂັ້ນສູງ, ສຸມໃສ່ຊຸກຍູ້ການຮ່ວມມືດ້ານເສດຖະກິດ - ການຄ້າ - ການລົງທຶນ, ເຕັກໂນໂລຢີສູງ, ການຮ່ວມມືເຄິ່ງຊັກນຳໄຟຟ້າ, ເສີມຂະຫຍາຍຄວາມສາມາດບົ່ມຊ້ອນຮ່ວມມືໃນຂົງເຂດບຳລຸງສ້າງແຫຼ່ງຊັບພະຍາກອນມະນຸດທີ່ມີຄຸນນະພາບສູງ, ຖືວ່ານີ້ແມ່ນຈຸດສຸມ ແລະ ຂອດບຸກທະລຸໃນການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ອາເມລິກາ.
ກ່ຽວກັບບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ, ການນຳສອງທ່ານ ໄດ້ເຫັນດີເປັນເອກະພາບຈະສືບຕໍ່ເພີ່ມທະວີການຮ່ວມມືຢູ່ບັນດາເວທີປາໄສພາກພື້ນ ແລະ ສາກົນ, ໃນນັ້ນມີຂອບເຂດ ອາຊຽນ, ຄູ່ຮ່ວມມືແມ່ນ້ຳຂອງ - ອາເມລິກາ, APEC, ສະຫະປະຊາຊາດ... ປະກອບສ່ວນເຂົ້າໃນການຊຸກຍູ້ການສົນທະນາ, ສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາຢູ່ພາກພື້ນ ແລະ ໃນໂລກ.
 |
| ທ່ານປະທານາທິບໍດີ ອາເມເລິກາ Joe Biden ກ່າວຄຳປາໄສ. (ພາບ: TTXVN) |
ທ່ານປະທານາທິບໍດີ Biden ຢືນຢັນວ່າ ອາເມລິກາ ໃຫ້ຄຳໝັ້ນສັນຍາຊຸກຍູ້ສັນຕິພາບ, ສະຖຽນລະພາບ ແລະ ຄວາມວັດທະນາຖາວອນຢູ່ພາກພື້ນມະຫາສະໝຸດ ອິນເດຍ - ປາຊີຟິກ, ຖືບົດບາດໃຈກາງຂອງອາຊຽນ ເປັນສຳຄັນ; ສະໜັບສະໜູນ ຫວຽດນາມ ມີບົດບາດນັບມື້ນັບສຳຄັນກ່ວາໃນພາກພື້ນ ແລະ ສາກົນ; ແບ່ງປັນຄວາມປາດຖະໜາຢາກສົມທົບກັນຢ່າງແໜ້ນແຟ້ນກັບ ຫວຽດນາມ ໃນການຮັກສາສັນຕິພາບ, ສະຖຽນລະພາບ, ການຮ່ວມມື, ຍົກສູງກົດໝາຍສາກົນ, ຮັບປະກັນບັນດາສິດເສລີພາບໃນການເດີນເຮືອ, ການບິນຢູ່ທະເລຕາເວັນອອກ, ຕ້ານການປ່ຽນແປງຂອງດິນຟ້າອາກາດ ແລະ ແກ້ໄຂບັນດາບັນຫາລວມຂອງພາກພື້ນ ແລະ ສາກົນ.
 | ຍສໝ - ຕອນເຊົ້າວັນທີ 21 ກັນຍາ, ສະຫາຍ ເລຂາທິການໃຫຍ່, ປະທານປະເທດ ໂຕເລີມ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງຫວຽດນາມ ໄດ້ເດີນທາງອອກຈາກຮ່າໂນ້ຍ ໄປເຂົ້າຮ່ວມກອງປະຊຸມສຸດຍອດອະນາຄົດ, ສະມັດຊາໃຫຍ່ສະຫະປະຊາຊາດ ຊຸດທີ 79, ເຮັດວຽກຢູ່ອາເມລິກາ ແລະ ໄປຢ້ຽມຢາມທາງລັດຖະກິດກູບາ ຕາມຄຳເຊີນຂອງສະຫາຍເລຂາຜູ້ທີໜຶ່ງຄະນະບໍລິຫານງານສູນກາງພັກກອມມູນິດກູບາ, ປະທານປະເທດສາທາລະນະລັດ ກູບາ Miguel Diaz ... |
 | ຫວຽດນາມ - ອາເມລິກາ ໃຫ້ບຸລິມະສິດຮ່ວມມືແກ້ໄຂຜົນຮ້າຍຢ້ອນຫຼັງຈາກສົງຄາມ ຍສໝ - 2 ຝ່າຍໄດ້ເຫັນດີຊຸກຍູ້ການພົບປະແລກປ່ຽນຂັ້ນສູງ ແລະຮັກສາບັນດາກົນໄກສົນທະນາ ແລະປຶກສາຫາລືທີ່ມີຢູ່ເພື່ອແນໃສ່ເພີ່ມທະວີຄວາມເຂົ້າໃຈ ແລະຄວາມໄວ້ເນື້ອເຊື່ອໃຈເຊິ່ງກັນ ແລະກັນ, ພ້ອມທັງກຳນົດບັນດາຂົງເຂດຮ່ວມມືໃຫ້ເໝາະສົມກັບຄວາມຕ້ອງການ ແລະຄວາມສາມາດຂອງແຕ່ລະຝ່າຍ. |
ມີງດຶກ
