 |
| ບັນຍາກາດທີ່ກອງປະຊຸມ. |
ທີ່ກອງປະຊຸມ, ທ່ານພົນໂທ ຫວໍມິນເລືອງ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າຄະນະປະຕິບັດງານພິເສດລັດຖະບານ ຫວຽດນາມ ໄດ້ຊົມເຊີຍບັນດາໝາກຜົນທີ່ພັກ, ລັດ ແລະປະຊາຊົນ ລາວ ບັນລຸໄດ້ໃນໄລຍະຜ່ານມາ; ເຊື່ອໝັ້ນວ່າ ພັກ, ລັດ ແລະ ປະຊາຊົນ ລາວ ຈະສືບຕໍ່ເຂັ້ມແຂງ ແລະ ປະສົບຜົນສຳເລັດໃນການສ້າງສາປະເທດຊາດໃຫ້ນັບມື້ນັບຈະເລີນຮຸ່ງເຮືອງ ແລະ ວັດທະນາຖາວອນ.
ທ່ານພົນໂທ ຫວໍມິນເລືອງ ສະແດງຄວາມປິຕິຊົມຊື່ນເມື່ອຊຸມປີມໍ່ໆມານີ້ທີ່ການພົວພັນລະຫວ່າງ ຫວຽດນາມ ແລະ ລາວ ໄດ້ຮັບການພັດທະນາຢ່າງໝັ້ນຄົງ, ນັບມື້ນັບເລິກເຊິ່ງ ແລະ ມີປະສິດທິຜົນ. ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ແມ່ນພື້ນຖານເພື່ອການພັດທະນາ, ສ້າງທີ່ຕັ້ງບົດບາດ ແລະ ອິດທິພົນໃນເວທີສາກົນ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການພັດທະນາຂອງພາກພື້ນ ແລະ ໃນໂລກ.
ທ່ານພົນໂທ ທອງລອຍ ສີລິວົງ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບປະຊາຊົນ ລາວ, ຫົວໜ້າຄະນະປະຕິບັດງານພິເສດລັດຖະບານ ລາວ ເນັ້ນໜັກວ່າ: ພັກ, ລັດຖະບານ ແລະ ປະຊາຊົນ ລາວ ຕີລາຄາສູງພັກ, ລັດ ແລະ ປະຊາຊົນ ຫວຽດນາມ ທີ່ໄດ້ຜັນຂະຫຍາຍບັນດາເນື້ອໃນມະຕິກອງປະຊຸມໃຫຍ່ຄັ້ງທີ 13 ຂອງພັກຢ່າງມີປະສິດທິຜົນ ເປັນກຳລັງໜູນເພື່ອສູ້ຊົນ ແລະ ບັນລຸໄດ້ບັນດາຜົນງານອັນຕັ້ງໜ້າໃນການກໍ່ສ້າງ ແລະ ພັດທະນາປະເທດຊາດ.
ທ່ານພົນໂທ ທອງລອຍ ສີລິວົງ ຢືນຢັນວ່າ, ພັກ, ລັດຖະບານ, ກອງທັບ ແລະ ປະຊາຊົນ ລາວ ຍາມໃດກໍ່ຈົດຈໍາ ແລະ ຂອບໃຈການເສຍສະຫຼະເລືອດເນື້ອ, ວັດຖຸ ແລະ ຈິດໃຈອັນໃຫຍ່ຫຼວງຂອງພັກ, ລັດ, ກອງທັບ ແລະ ປະຊາຊົນ ຫວຽດນາມ ທີ່ໄດ້ຊ່ວຍເຫຼືອ ລາວ ໃນໄລຍະຕໍ່ສູ້ຍາດເອົາເອກະລາດແຫ່ງຊາດ ກໍຄືໄລຍະສ້າງສາ ແລະ ພັດທະນາປະເທດ ລາວ ໃນປັດຈຸບັນ.
 |
| ທ່ານພົນໂທ ຫວໍມິນເລືອງ (ຂວາ) ຮອງລັດຖະມົນຕີກະຊວງປ້ອງກັນປະເທດ, ຫົວໜ້າຄະນະປະຕິບັດງານພິເສດລັດຖະບານ ຫວຽດນາມ ແລະ ທ່ານພົນໂທ ທອງລອຍ ສີລິວົງ (ຊ້າຍ), ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບປະຊາຊົນ ລາວ, ຫົວໜ້າຄະນະປະຕິບັດງານພິເສດລັດຖະບານ ລາວ ໄດ້ລົງນາມໃນ ແລະ ແລກປ່ຽນບົດບັນທຶກກອງປະຊຸມ. |
ທີ່ກອງປະຊຸມ, ທັງສອງຝ່າຍໄດ້ຕີລາຄາສູງບັນດາໝາກຜົນທີ່ບັນລຸໄດ້ຕາມເນື້ອໃນຂອງກອງປະຊຸມຄັ້ງທີ XXVIII. ໃນຂະນະທີ່ຂໍ້ມູນກ່ຽວກັບສະຖານທີ່ຝັງສົບຂອງນັກຮົບເສຍສະຫຼະຊີວິດເພື່ອຊາດນັບມື້ນັບຫຍຸ້ງຍາກ, ແຕ່ວຽກງານຊອກຫາ, ທ້ອນໂຮມອັດຖິຂອງທະຫານອາສາສະໝັກ ແລະ ນັກຊ່ຽວຊານ ຫວຽດນາມ ທີ່ເສຍສະລະຊີວິດຢູ່ ລາວ ໃນສະໄໝສົງຄາມ ກໍ່ພວມໄດ້ຮັບການປະຕິບັດຢ່າງແໜ້ນແຟ້ນ ແລະ ມີປະສິດທິຜົນ. ໃນລະດູແລ້ງ ປີ 2023 – 2024, ບັນດາໜ່ວຍງານທ້ອນໂຮມຂອງ ຫວຽດນາມ ໄດ້ຄົ້ນຫາ ແລະ ທ້ອນໂຮມອັດຖິຂອງນັກຮົບເສຍສະຫຼະຊີວິດເພື່ອຊາດຢູ່ ລາວ 184 ອັດຖິ (ມີ 9 ອັດຖິຂອງນັກຮົບເສຍສະຫຼະຊີວິດເພື່ອຊາດທີ່ໄດ້ຮັບການຢັ້ງຢືນຊື່ ແລະ ນາມສະກຸນ, ບ້ານເກີດ).
ຄະນະປະຕິບັດງານພິເສດລັດຖະບານ ແລະ ອຳນາດການປົກຄອງທຸກຂັ້ນຂອງສອງປະເທດໄດ້ສົມທົບກັນຢ່າງແໜ້ນແຟ້ນເປັນປະຈຳ ແລະ ແກ້ໄຂຄວາມຫຍຸ້ງຍາກໃນການຈັດຕັ້ງ ແລະ ປະຕິບັດໜ້າທີ່ຊອກຫາ ແລະ ທ້ອນໂຮມອັດຖິນັກຮົບເສຍສະຫຼະຊີວິດເພື່ອຊາດຢູ່ ລາວ ກັບຄືນເມືອ ຫວຽດນາມ ຢ່າງທັນການ. ຝ່າຍ ລາວ ສະໜັບສະໜູນ ແລະ ໜູນຊ່ວຍບັນດາໜ່ວຍງານທ້ອນໂຮມຂອງ ຫວຽດນາມ ເປັນປະຈຳໃນທຸກການເຄື່ອນໄຫວ; ໂຄສະນາເຜີຍແຜ່ຢ່າງຕັ້ງໜ້າ, ຂົນຂວາຍປະຊາຊົນຈາກທຸກຊັ້ນຄົນເພື່ອສະໜອງຂໍ້ມູນຂ່າວສານກ່ຽວກັບສະຖານທີ່ຝັງສົບຂອງບັນດານັກຮົບອາສາສະໝັກ ແລະ ນັກຊ່ຽວຊານ ຫວຽດນາມ ທີ່ເສຍສະຫຼະຊີວິດຢູ່ ລາວ ໃນສະໄໝສົງຄາມ.
2 ຝ່າຍເຫັນດີເປັນເອກະພາບວ່າ, ຄະນະປະຕິບັດງານພິເສດລັດຖະບານ ແລະ ອຳນາດການປົກຄອງທຸກຂັ້ນຂອງສອງປະເທດຕ້ອງສົມທົບກັນຢ່າງແໜ້ນແຟ້ນກ່ວາອີກ ແລະ ຊີ້ນຳຍູ້ແຮງວຽກງານໂຄສະນາເຜີຍແຜ່, ຂົນຂວາຍປະຊາຊົນທຸກຊັ້ນວັນນະຂອງ 2 ປະເທດເພື່ອສະໜອງຂໍ້ມູນກ່ຽວກັບບັນດານັກຮົບເສຍສະຫຼະຊີວິດເພື່ອຊາດ, ຂຸມຝັງສົບ, ຍົກສູງປະສິດທິຜົນການຊອກຫາ, ທ້ອນໂຮມ ແລະ ສົ່ງອັດຖິນັກຮົບເສຍສະຫຼະຊີວິດເພື່ອຊາດກັບຄືນບ້ານເກີດເມືອງນອນ ໃນໄລຍະຈະມາເຖິງ.
2 ຝ່າຍໄດ້ເຫັນດີເປັນເອກະພາບວ່າ, ໃນໂຄງການຮ່ວມມືລະດູແລ້ງ ປີ 2024 – 2025 ຈະສືບຕໍ່ສົມທົບກັນຊີ້ນຳໃນການຊອກຫາ, ທ້ອນໂຮມ ແລະ ສົ່ງອັດຖິຂອງທະຫານອາສາສະໝັກ ແລະ ນັກຊ່ຽວຊານ ຫວຽດນາມ ທີ່ເສຍສະລະຊີວິດຢູ່ ລາວ ໃນສະໄໝສົງຄາມກັບຄືນບ້ານເກີດເມືອງນອນ ຈົນເຖິງເວລາບໍ່ມີຂໍ້ມູນເພີ່ມເຕີມກ່ຽວກັບບ່ອນຝັງສົບຂອງນັກຮົບເສຍສະຫຼະຊີວິດເພື່ອຊາດຢູ່ ລາວ. ພ້ອມກັນນັ້ນ, ກໍ່ຍູ້ແຮງການໂຄສະນາເຜີຍແຜ່, ຂົນຂວາຍປະຊາຊົນ 2 ປະເທດສະໜອງຂໍ້ມູນກ່ຽວກັບນັກຮົບເສຍສະຫຼະຊີວິດເພື່ອຊາດ, ຂຸມຝັງສົບຂອງບັນດານັກຮົບອາສາສະໝັກ ແລະ ນັກຊ່ຽວຊານ ຫວຽດນາມ ທີ່ເສຍສະຫຼະຊີວິດຢູ່ ລາວ ໃນສະໄໝສົງຄາມ.
ຄະນະປະຕິບັດງານພິເສດ ແລະ ກອງບັນຊາການທະຫານຂັ້ນແຂວງຂອງສອງຝ່າຍ ຕ້ອງມີການແລກປ່ຽນ, ຖອດຖອນບົດຮຽນ, ເອົາໃຈໃສ່ຊີ້ນໍາ - ນໍາພາ, ຍູ້ແຮງວຽກງານຊອກຫາ ແລະ ທ້ອນໂຮມອັດຖິນັກຮົບເສຍສະຫຼະຊີວິດເພື່ອຊາດໃນບໍລິເວນຢ່າງເປັນປະຈໍາ; ເພີ່ມທະວີການສົມທົບກັນກວດກາ, ຕີລາຄາໝາກຜົນ, ຍ້ອງຍໍ ແລະ ມອບລາງວັນຢ່າງທັນການໃຫ້ແກ່ບັນດາອົງການຈັດຕັ້ງ, ບຸກຄົນທີ່ມີຜົນງານດີເດັ່ນໃນການປະຕິບັດໜ້າທີ່ວຽກງານຊອກຫາ ແລະ ທ້ອນໂຮມອັດຖິນັກຮົບເສຍສະຫຼະຊີວິດເພື່ອຊາດ.
2 ຝ່າຍໄດ້ຊີ້ນຳໃຫ້ບັນດາອົງການປະຈຳຂອງແຕ່ລະຝ່າຍຕັ້ງໜ້າເປັນເສນາທິການ, ສະເໜີບັນດາເນື້ອໃນ ແລະ ວິທີການແກ້ໄຂ ເພື່ອແນໃສ່ຍູ້ແຮງການຊອກຫາ ແລະ ທ້ອນໂຮມອັດຖິນັກຮົບເສຍສະຫຼະຊີວິດເພື່ອຊາດ; ເພີ່ມທະວີການແລກປ່ຽນຄະນະຜູ້ແທນ, ສົມທົບກັນກວດກາ, ເກັບກໍາຂໍ້ມູກ່ຽວກັບນັກຮົບເສຍສະຫຼະຊີວິດເພື່ອຊາດ, ຂຸມຝັງສົບຂອງບັນດານັກຮົບອາສາສະໝັກ ແລະ ນັກຊ່ຽວຊານ ຫວຽດນາມ ທີ່ເສຍສະຫຼະຊີວິດຢູ່ ລາວ; ສຳຫຼວດ, ກວດກາ ແລະ ຕີລາຄາບັນດາໝາກຜົນແຫ່ງການສົມທົບກັນຂອງຄະນະປະຕິບັດງານພິເສດຂອງບັນດາທ້ອງຖິ່ນສອງປະເທດ ແລະ ບັນດາກຳລັງຊອກຫາ, ທ້ອນໂຮມອັດຖິນັກຮົບເສຍສະຫຼະຊີວິດເພື່ອຊາດ.
ຄຽງຂ້າງນັ້ນ, ສອງຝ່າຍກໍ່ສົມທົບກັນຢ່າງແໜ້ນແຟ້ນ ແລະ ຊີ້ນຳບັນດາອົງການທີ່ກ່ຽວຂ້ອງ ເພື່ອຊີ້ນຳບັນດາທ້ອງຖິ່ນທີ່ມີອະນຸສອນສະຖານ “ນ້ຳໃຈສາມັກຄີຮ່ວມສຳພັນສູ້ຮົບ ຫວຽດນາມ - ລາວ” ແຫ່ງໃໝ່ ໃຫ້ໄດ້ຮັບການກໍ່ສ້າງ, ສ້ອມແປງ, ບູລະນະ ເພື່ອການຄຸ້ມຄອງ ແລະ ນຳໃຊ້ຕາມລະບຽບການຂອງລັດຖະບານ ແລະ ຮີດຄອງປະເພນີຂອງປະຊາຊົນ ລາວ; ຕັ້ງໜ້າໂຄສະນາເຜີຍແຜ່ນ້ຳໃຈສາມັກຄີ, ການຮ່ວມສຳພັນສູ້ຮົບຂອງກອງທັບ ແລະ ປະຊາຊົນ ຫວຽດນາມ - ລາວ; ຈັດຕັ້ງ ແລະ ຮັບໃຊ້ບັນດາກຸ່ມພາຍໃນ ແລະ ຕ່າງປະເທດທີ່ມາຢ້ຽມຢາມອະນຸສາວະລີໃຫ້ເປັນຢ່າງດີ. ໂດຍຜ່ານນັ້ນ, ກໍ່ປະກອບສ່ວນຮັດແໜ້ນສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ - ລາວ.
 | ຫວຽດນາມ - ລາວ: ກໍ່ສ້າງອຸດົມການຮ່ວມກັນ: ການຮ່ວມມືດ້ານອຸດົມຄະຕິ ແລະ ທິດສະດີ ແລະ ກໍ່ສ້າງພັກແມ່ນຫຼັກໝັ້ນຂອງການພົວພັນທາງການເມືອງ ຫວຽດນາມ - ລາວ. ຍສໝ - ນັ້ນແມ່ນເນື້ອໃນຈິດໃຈຕົ້ນຕໍໃນການໃຫ້ສຳພາດຕໍ່ວາລະສານ ຍຸກສະໄໝ ໂດຍທ່ານຮອງສາດສະດາຈານ, ປະລິນຍາເອກ, ຮອງປະທານສະພາທິດສະດີສູນກາງ, ທ່ານ ຟ້າມວັນລີງ ກ່ຽວກັບການພົວພັນ ຫວຽດນາມ - ລາວ ໃນການຮ່ວມມືກໍ່ສ້າງພື້ນຖານອຸດົມການ ແລະ ກໍ່ສ້າງພັກ. |
 | ຊາວໜຸ່ມຫວຽດນາມ ແລະ ລາວ ມ່ວນຊື່ນຢູ່ເຂດຊາຍແດນ ຍສໝ - ໃນວັນທີ 23 ກັນຍາ, ຄ້າຍທະຫານຊາຍແດນເຮື໊ອງເລິບ (ທະຫານຊາຍແດນແຂວງກວ໋າງຈິ) ໄດ້ຈັດຕັ້ງລາຍການ “ເຍົາວະຊົນ ຫວຽດນາມ-ລາວ ຫຼິ້ນບຸນໄຫວ້ພະຈັນຢູ່ເຂດຊາຍແດນ ຄັ້ງທີ 2” ໃຫ້ຊາວໜຸ່ມ, ເຍົາວະຊົນອະນຸຊົນໂຮງຮຽນປະຖົມ-ໂຮງຮຽນມັດທະຍົມຕອນຕົ້ນຕາແສງເຮື໊ອງເລິບ, ເຮື໊ອງຫວຽດ (ເມືອງເຮື໊ອງຮ໊ວາ, ແຂວງກວ໋າງຈິ) ແລະໂຮງຮຽນປະຖົມ-ໂຮງຮຽນມັດທະຍົມຕອນຕົ້ນບ້ານອາເວຍ, ເມືອງເຊໂປນ, ແຂວງສະຫວັນນະເຂດ, ປະເທດລາວ. |
ມິງດຶກ
