ສ້າງເງື່ອນໄຂ ເພື່ອຊາວຫວຽດນາມ ອາໄສຢູ່ຕ່າງປະເທດລົງທຶນຢ່າງແຮງກວ່າອີກໃນຂົງເຂດເຮືອນຢູ່ ແລະ ອະສັງຫາລິມະຊັບຢູ່ ຫວຽດນາມ

11:46 | 30/03/2024

ຍສໝ - ວັນທີ 26 ມີນາ 2024, ຄະນະກຳມະການແຫ່ງລັດກ່ຽວກັບຊາວ ຫວຽດນາມ ອາໄສຢູ່ຕ່າງປະເທດ - ກະຊວງການຕ່າງປະເທດ ຫວຽດນາມ ໄດ້ສົມທົບກັບກຳມາທິການເສດຖະກິດ ສະພາແຫ່ງຊາດ, ກະຊວງກໍ່ສ້າງ ແລະ ກະຊວງຊັບພະຍາກອນ ແລະ ສິ່ງແວດລ້ອມ ຫວຽດນາມ ເປັນປະທານຮ່ວມຈັດຕັ້ງກອງປະຊຸມໂຄສະນາ, ເຜີຍແຜ່ເນື້ອໃນທີ່ກ່ຽວຂ້ອງເຖິງຊາວ ຫວຽດນາມ ອາໄສຢູ່ຕ່າງປະເທດໃນກົດໝາຍວ່າດ້ວຍທີ່ດິນ, ກົດໝາຍວ່າດ້ວຍເຮືອນຢູ່ ແລະ ກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບ (ກອງປະຊຸມ).

	ດານັງ ຈະໜູນຊ່ວຍ, ສ້າງທຸກເງື່ອນໄຂໃຫ້ບັນດາວິສາຫະກິດ ແລະ ນັກລົງທຶນ ຝະລັ່ງ
	ຫວຽດນາມ - ກຣົວຊີ ຊຸກຍູ້ການຮ່ວມມືໃນຂົງເຂດແຮງງານ ແລະ ບຳລຸງສ້າງວິຊາຊີບ

ກອງປະຊຸມເພື່ອເຜີຍແຜ່ ແລະ ແນະນຳບັນດາເນື້ອໃນກ່ຽວກັບຊາວຫວຽດນາມ ອາໄສຢູ່ຕ່າງປະເທດໃນກົດໝາຍວ່າດ້ວຍເຮືອນຢູ່, ກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບ ແລະ ກົດໝາຍວ່າດ້ວຍທີ່ດິນຂອງສະພາແຫ່ງຊາດ ຊຸດທີ XV ໂດຍຜ່ານກອງປະຊຸມ ສະໄໝສາມັນເທື່ອທີ 6 (ພະຈິກ 2023) ແລະ ກອງປະຊຸມວິສາມັນຄັ້ງທີ 5 (ວັນທີ 18 ມັງກອນ 2024). ກອງປະຊຸມໄດ້ຈັດຕັ້ງສົມທົບລະຫວ່າງແບບເຊິ່ງໜ້າ ແລະ ທາງໄກ ດ້ວຍການເຂົ້າຮ່ວມຂອງຜູ້ແທນ 500 ກວ່າທ່ານຢູ່ສຳນັກງານຄະນະກຳມະການແຫ່ງລັດກ່ຽວກັບຊາວ ຫວຽດນາມ ອາໄສຢູ່ຕ່າງປະເທດແລະ 50 ກວ່າຈຸດເຊື່ອມຕໍ່ຖ່າຍທອດສົດ ທັງຢູ່ພາຍໃນ ແລະ ຕ່າງປະເທດ ແລະ ອອກອາກາດໃນສື່ສັງຄົມອອນລາຍ ເພື່ອໃຫ້ປະຊາຊົນໃນທົ່ວໂລກໄດ້ຕິດຕາມ.

ສ້າງເງື່ອນໄຂ ເພື່ອຊາວຫວຽດນາມ ອາໄສຢູ່ຕ່າງປະເທດລົງທຶນຢ່າງເຂັ້ມແຂງກວ່າອີກໃນຂົງເຂດເຮືອນຢູ່ ແລະ ອະສັງຫາລິມະຊັບຢູ່ ຫວຽດນາມ

ບັນຍາກາດທີ່ກອງປະຊຸມ

ກອງປະຊຸມໄດ້ຮັບຟັງຜູ້ແທນກຳມາທິການເສດຖະກິດສະພາແຫ່ງຊາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງກໍ່ສ້າງ ແນະນຳບັນດາບັນດາຈຸດໃໝ່ໃນເນື້ອໃນກົດໝາຍວ່າດ້ວຍທີ່ດິນ, ເຮຶອນຢູ່ ແລະ ອະສັງຫາລິມະຊັບທີ່ກ່ຽວຂ້ອງໂດຍກົງກັບປະຊາຄົມຊາວ ຫວຽດນາມ ຢູ່ຕ່າງປະເທດ. ຕາມນັ້ນແລ້ວ, ດ້ວຍບັນດາລະບຽບການໃໝ່ນີ້, ສິດຂອງຊາວ ຫວຽດນາມ ອາໄສຢູ່ຕ່າງປະເທດ ລວມມີຄົນມີສັນຊາດ ຫວຽດນາມ ແລະ ຊາວ ຫວຽດນາມ ທີ່ໄດ້ຮັບການກຳນົດເປັນລະອຽດ, ຊັດເຈນ ແລະ ກວ້າງຂວາງກວ່າອີກ.

ກ່າວຄຳປາໄສຢູ່ບັນດາຈຸດເຊື່ອມຕໍ່ຖ່າຍທອດສົດ, ຊາວຫວຽດນາມ ອາໄສຢູ່ຕ່າງປະເທດ ໄດ້ຕີລາຄາສູງຄະນະກຳມະການແຫ່ງລັດກ່ຽວກັບຊາວ ຫວຽດນາມ ອາໄສຢູ່ຕ່າງປະເທດ ທີ່ໄດ້ເປັນປະທານ, ສົມທົບກັບບັນດາອົງການຮຽບຮຽງ ແລະ ກວດກາບັນດາຮ່າງກົດໝາຍດັ່ງກ່າວ ເພື່ອເຜີຍແຜ່ບັນດາເນື້ອໃນໃໝ່ໃຫ້ປະຊາຊົນຢ່າງທັນການ. ພ້ອມກັນນັ້ນ, ທ່ານຍັງໄດ້ສະແດງຄວາມຂອບໃຈຕໍ່ບັນດາອົງການຮຽບຮຽງ ແລະ ກວດກາບັນດາຮ່າງກົດໝາຍດັ່ງກ່າວໃຫ້ໄດ້ຮັບການຮັບເອົາ, ຮັບຮູ້ ແລະ ສ່ອງແສງເຖິງຄວາມມຸ່ງມາດປາຖະໜາ, ຄຳເຫັນປະກອບຂອງປະຊາຊົນໃນຂະບວນການສ້າງສາກົດໝາຍໃນເນື້ອໃນຂອງບັນດາກົດໝາຍທີ່ກ່າວມານີ້. ປະຊາຊົນຢືນຢັນວ່າ ດ້ວຍບັນດາຈຸດໝາຍໃໝ່ຂອງກົດໝາຍ, ສິດຂອງຊາວ ຫວຽດນາມ ຢູ່ຕ່າງປະເທດໃນຂົງເຂດທີ່ດິນ, ເຮືອນຢູ່ ແລະ ການດຳເນີນທຸລະກິດອະສັງຫາລິມະຊັບ ຈະໄດ້ຮັບການເປີດກ້ວາງກວ່າອີກ, ສະແດງໃຫ້ເຫັນຄວາມເອົາໃຈໃສ່ຂອງພັກ, ລັດ, ສະພາແຫ່ງຊາດ ສຳລັບປະຊາຊົນ. ປະຊາຊົນກໍ່ຫວັງວ່າ ບັນດາເອກະສານແນະນໍາ ຈະສືບຕໍ່ກຳນົດລະອຽດບັນດາເນື້ອໃນດັ່ງກ່າວ ເພື່ອສ້າງເງື່ອນໄຂໃຫ້ປະຊາຊົນລົງທຶນຢູ່ພາຍໃນປະເທດຢ່າງເຂັ້ມແຂງກວ່າໃນຂົງເຂດເຮືອນຢູ່ ແລະ ອະສັງຫາລິມະຊັບ.

ກ່າວຄຳປາໄສທີ່ກອງປະຊຸມ, ທ່ານຮອງລັດຖະມົນຕີ, ຫົວໜ້າຄະນະກຳມະການແຫ່ງລັດກ່ຽວກັບຊາວ ຫວຽດນາມ ອາໄສຢູ່ຕ່າງປະເທດ ນາງ ເລທິທູຮັ່ງ ເນັ້ນໜັກວ່າ ກອງປະຊຸມ ໄດ້ຈັດຕັ້ງໃນວັນທີ 26 ມີນາ, ແມ່ນວັນຄົບຮອບ 20 ປີແຫ່ງວັນສ້າງມະຕິເລກທີ 36 ຂອງກົມການເມືອງກ່ຽວກັບການວຽກງານຊາວ ຫວຽດນາມ ຢູ່ຕ່າງປະເທດ, ສະແດງໃຫ້ເຫັນຄວາມຖືວຽກງານຊາວ ຫວຽດນາມ ຢູ່ຕ່າງປະເທດເປັນສຳຄັນ. ເພື່ອຜັນຂະຫຍາຍມະຕິເລກທີ 36, ຄຳສັ່ງເລກທີ 45 ແລະ ຂໍ້ສະຫຼຸບເລກທີ 12, ໃນໄລຍະມໍ່ໆມານີ້, ກະຊວງການຕ່າງປະເທດ, ກຳມະການແຫ່ງລັດກ່ຽວກັບຊາວ ຫວຽດນາມ ອາໄສຢູ່ຕ່າງປະເທດ ໄດ້ຕັ້ງໜ້າຄົ້ນຄວ້າ, ເປັນເສນາທິການ ແລະ ສະເໜີປັບປຸງບັນດານະໂຍບາຍກົດໝາຍທີ່ກ່ຽວຂ້ອງເຖິງຊາວ ຫວຽດນາມ ອາໄສຢູ່ຕ່າງປະເທດ, ພິເສດແມ່ນກົດໝາຍວ່າດ້ວຍທີ່ດິນ, ກົດໝາຍວ່າດ້ວຍເຮືອນຢູ່, ກົດໝາຍວ່າດ້ວຍການດຳເນີນທຸລະກິດອະສັງຫາລິມະຊັບ.

ທ່ານນາງ ເລທິທູຮັ່ງ ປາດຖະໜາວ່າ ຈະສືບຕໍ່ໄດ້ຮັບການປະກອບສ່ວນຈາກປະຊາຊົນໃນຂະບວນການຜັນຂະຫຍາຍກົດໝາຍດັ່ງກ່າວ ກໍ່ຄືສະເໜີໃຫ້ບັນດາອົງການທີ່ກ່ຽວຂ້ອງຮັບຮູ້ບັນດາຄຳສະເໜີຂອງປະຊາຊົນ ເພື່ອສືບຕໍ່ຫັນເປັນລະບອບລະບຽບການບັນດາແຜນນະໂຍບາຍຂອງພັກ ກໍ່ຄືບັນດາຂໍ້ກຳນົດຂອງກົດໝາຍ ເພື່ອນຳເອົາກົດໝາຍເຂົ້າມາໃຊ້ໃນຊີວິດ.

ມິງດຶກ