 | ທ່ານປະທານາທິບໍດີ ລັດເຊຍ Vladimir Putin ແລະ ທ່ານປະທານປະເທດ ຫວຽດນາມ ໂຕ່ເລິມ ໄດ້ພົບປະກັບບັນດາອະດີດນັກສຶກສາ ຫວຽດນາມ ຢູ່ ລັດເຊຍ |
| ບັນດາລຸ້ນນັກສຶກສາ ຫວຽດນາມ ຢູ່ ລັດເຊຍ - ຂົວເຊື່ອມຕໍ່ມິດຕະພາບ |
 |
| Bộ trưởng Ngoại giao Bùi Thanh Sơn. / ທ່ານລັດຖະມົນຕີການຕ່າງປະເທດ ຫວຽດນາມ ບຸຍແທງເຊີນ. |
ນັກຂ່າວ: ເມື່ອບໍ່ດົນມານີ້, ທ່ານປະທານາທິບໍດີ ລັດເຊຍ Vladimir Putin ໄດ້ມາຢ້ຽມຢາມທາງລັດຖະກິດຢູ່ ຫວຽດນາມ. ທ່ານລັດຖະມົນຕີຊ່ວຍໃຫ້ຮູ້ຄວາມໝາຍຂອງການຢ້ຽມຢາມຄັ້ງນີ້ໄດ້ບໍ?
ທ່ານລັດຖະມົນຕີກະຊວງການຕ່າງປະເທດ ບຸຍແທງເຊີນ: ໂດຍໄດ້ຮັບຄຳເຊີນຂອງທ່ານເລຂາທິການໃຫຍ່ ພັກກອມມູນິດ ຫວຽດນາມ ຫງວຽນຝູຈ້ອງ, ທ່ານປະທານາທິບໍດີ ສະຫະພັນ ລັດເຊຍ Vladimir Putin ໄດ້ມາຢ້ຽມຢາມທາງລັດຖະກິດຢູ່ ຫວຽດນາມ ແຕ່ວັນທີ 19 – 20 ມີຖຸນາ ປີ 2024. ນີ້ແມ່ນການຢ້ຽມຢາມທີ່ມີຄວາມໝາຍສຳຄັນຫຼາຍຢ່າງ, ເຊິ່ງສາມາດຖືວ່າເປັນຈຸດພົ້ນເດັ່ນຂອງການຕ່າງປະເທດ ຫວຽດນາມ ປີ 2024 ໄດ້ສະແດງໃຫ້ເຫັນໃນບັນດາຈຸດສຸມຄື:
ໜຶ່ງແມ່ນ, ການຢ້ຽມຢາມໄດ້ຢືນຢັນນະໂຍບາຍການຕ່າງປະເທດທີ່ສະເໝີຕົ້ນສະເໝີປາຍຂອງ ຫວຽດນາມ ແມ່ນ ເອກະລາດ, ເປັນເຈົ້າຕົນເອງ, ຫັນເປັນຫຼາຍຝ່າຍ, ຫັນເປັນຫຼາຍຮູບຫຼາຍແບບການພົວພັນຕ່າງປະເທດເພື່ອສັນຕິພາບ, ມິດຕະພາບ, ການຮ່ວມມື ແລະ ພັດທະນາ, ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນຢ່າງຮອບດ້ານ, ເລິກເຊິ່ງກວ້າງຂວາງ, ເປັນມິດ, ເປັນຄູ່ຮ່ວມງານທີ່ມີຄວາມໄວ້ເນື້ອເຊື່ອໃຈ ແລະ ເປັນສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນ. ໂດຍການຕ້ອນຮັບທ່ານປະທານາທິບໍດີ Putin, ຫວຽດນາມ ຢືນຢັນວ່າ ຍາມໃດກໍ່ຖື ລັດເຊຍ ເປັນໜຶ່ງໃນບັນດາຄູ່ຮ່ວມມືສຳຄັນທີ່ສຸດຂອງຕົນ, ປາດຖະໜາຢາກເພີ່ມທະວີການພົວພັນມິດຕະພາບທີ່ເປັນມູນເຊື້ອອັນຍາວນານກັບ ລັດເຊຍ ແລະ ເຮັດໃຫ້ຂອບເຂດການພົວພັນຄູ່ຮ່ວມມືຍຸດທະສາດຮອບດ້ານເລິກເຊິ່ງກວ່າອີກ.
ສອງແມ່ນ, ການຢ້ຽມຢາມໄດ້ດຳເນີນໄປໃນສະພາບການທີ່ 2 ປະເທດສະເຫຼີມສະຫຼອງ 30 ປີແຫ່ງວັນລົງນາມໃນສົນທິສັນຍາກ່ຽວກັບຫຼັກການພື້ນຖານການພົວພັນມິດຕະພາບ ຫວຽດນາມ - ລັດເຊຍ (ວັນທີ 16 ມິຖຸນາ ປີ 1994 – ວັນທີ 16 ມິຖຸນາ ປີ 2024), ກ້າວເຂົ້າສູ່ສະເຫຼີມສະຫຼອງ 75 ປີວັນສ້າງຕັ້ງການພົວພັນທາງການທູດ (ວັນທີ 30 ມັງກອນ ປີ 1950 – ວັນທີ 30 ມັງກອນ ປີ 2025) ແມ່ນໂອກາດເພື່ອໃຫ້ສອງຝ່າຍຕີລາຄາບັນດາໝາກຜົນທີ່ບັນລຸໄດ້ ແລະ ກຳນົດທິດທາງ ເພື່ອນຳການພົວພັນຮ່ວມມື ແລະ ການພົວພັນຄູ່ຮ່ວມມື ຫວຽດນາມ - ລັດເຊຍ ໃນໄລຍະຈະມາເຖິງ ພັດທະນາຢ່າງຮອບດ້ານ, ມີປະສິດທິຜົນ ແລະ ແທດຈິງກວ່າອີກ.
ສາມແມ່ນ, ການຢ້ຽມຢາມສະແດງໃຫ້ເຫັນຄວາມສຳຄັນຂອງ ຫວຽດນາມ ໃນການຜັນຂະຫຍາຍນະໂຍບາຍການຕ່າງປະເທດທາງທິດຕາເວັນອອກຂອງ ລັດເຊຍ. ໃນຫຼາຍກວ່າ 2 ທົດສະວັດໃນການນຳພາສະຫະພັນ ລັດເຊຍ, ນີ້ແມ່ນຄັ້ງທີ 5 ທີ່ປະທານາທິບໍດີ ລັດເຊຍ Vladimir Putin ມາຢ້ຽມຢາມ ຫວຽດນາມ, ພ້ອມກັນນັ້ນ ກໍ່ແມ່ນການຢ້ຽມຢາມຕ່າງປະເທດຄັ້ງທຳອິດຂອງ ທ່ານ ພາຍຫຼັງທີ່ໄດ້ຮັບເລືອກຕັ້ງເປັນປະທານາທິບໍດີສະໄໝທີ 5 ໃນເດືອນ ມີນາ ປີ 2024. ບັນດາການຢ້ຽມຢາມຂອງທ່ານປະທານາທິບໍດີ Vladimir Putin ໄດ້ສ້າງຂີດໝາຍອັນເດັ່ນຊັດ ແລະ ປະກອບສ່ວນເຂົ້າໃນການສ້າງພື້ນຖານອັນສຳຄັນໃຫ້ແກ່ການພັດທະນາຂອງການພົວພັນ ຫວຽດນາມ - ສະຫະພັນ ລັດເຊຍ, ໃນນັ້ນມີການລິເລີ່ມ ແລະ ໜູນຊ່ວຍສ້າງຕັ້ງການພົວພັນຄູ່ຮ່ວມມືຍຸດທະສາດ ຫວຽດນາມ - ສະຫະພັນ ລັດເຊຍ ປີ 2001 ແລະ ໄດ້ຍົກລະດັບເປັນຄູ່ຮ່ວມມືຍຸດທະສາດຮອບດ້ານໃນປີ 2012.
ສີ່ແມ່ນ, ສອງຝ່າຍໄດ້ອອກ “ຖະແຫຼງການຮ່ວມລະຫວ່າງ ສາທາລະນະລັດ ສັງຄົມນິຍົມ ຫວຽດນາມ ແລະ ສະຫະພັນ ລັດເຊຍ ກ່ຽວກັບການລົງເລິກການພົວພັນຄູ່ຮ່ວມມືຍຸດທະສາດຮອບດ້ານ ບົນພື້ນຖານ 30 ປີແຫ່ງຜົນສຳເລັດໃນການປະຕິບັດສົນທິສັນຍາກ່ຽວກັບບັນດາຫຼັກການພື້ນຖານຂອງການພົວພັນມິດຕະພາບ ຫວຽດນາມ - ລັດເຊຍ”. ສະແດງໃຫ້ເຫັນຄວາມຕັດສິນໃຈຂອງການນຳ ແລະ ປະຊາຊົນສອງປະເທດ ເພື່ອເຮັດໃຫ້ການຮ່ວມມືລະຫວ່າງສອງຝ່າຍນັບມື້ນັບມີປະສິດທິຜົນ ແລະ ແທດຈິງໃນທຸກຂົງເຂດ, ສົມກັບລະດັບຄູ່ຮ່ວມມືຍຸດທະສາດຮອບດ້ານ, ຕອບສະໜອງຄວາມຮຽກຮ້ອງຕ້ອງການ ແລະ ຜົນປະໂຫຍດຂອງປະຊາຊົນສອງປະເທດ, ປະກອບສ່ວນເຂົ້າໃນສັນຕິພາບ, ການຮ່ວມມື ແລະ ການພັດທະນາຢູ່ພາກພື້ນ ແລະ ໃນໂລກ.
ນັກຂ່າວ: ຂໍຮຽນທ່ານລັດຖະມົນຕີສາມາດໃຫ້ຮູ້ກ່ຽວກັບບັນດາໝາກຜົນອັນພົ້ນເດັ່ນທີ່ສອງຝ່າຍບັນລຸໄດ້ໃນຂອບເຂດການຢ້ຽມຢາມໄດ້ບໍ່?
ທ່ານລັດຖະມົນຕີການຕ່າງປະເທດ ບຸຍແທງເຊີນ: ສາມາດເວົ້າໄດ້ວ່າ ການຢ້ຽມຢາມຂອງທ່ານປະທານາທິບໍດີ ລັດເຊຍ Vladimir Putin ໄດ້ສ້າງກຳລັງແຮງໃໝ່ໃຫ້ແກ່ການຮ່ວມມືຫຼາຍດ້ານລະຫວ່າງ ຫວຽດນາມ - ລັດເຊຍ. ຜ່ານຖະແຫຼງການຮ່ວມ, ເອກະສານການຮ່ວມມື 11 ສະບັບໄດ້ຮັບການລົງນາມ ແລະ ບັນດາການພົບປະ, ແລກປ່ຽນລະຫວ່າງການນຳຂັ້ນສູງຂອງສອງປະເທດ, 2 ຝ່າຍໄດ້ເຫັນດີເປັນເອກະພາບກ່ຽວກັບບັນດາທິດທາງໃຫຍ່ ເພື່ອແນ່ໃສ່ເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ ເລິກເຊິ່ງກວ່າ ໃນບັນດາດ້ານຄື:
ໜຶ່ງແມ່ນ, ເພີ່ມທະວີການໂອ້ລົມສົນທະນາ, ການພົບປະລະຫວ່າງຂັ້ນສູງ ແລະ ທຸກຂັ້ນ ແລະ ທຸກຊ່ອງທາງ; ຜັນຂະຫຍາຍກົນໄກການຮ່ວມມືຢ່າງມີປະສິດທິຜົນ ເພື່ອຊຸກຍູ້ການຮ່ວມມືໃນທຸກຂົງເຂດ; ສືບຕໍ່ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຫຼາຍຝ່າຍ, ພິເສດແມ່ນ ສະຫະປະຊາຊາດ, APEC, ບັນດາກົນໄກການຮ່ວມມື ອາຊຽນ - ລັດເຊຍ… ລັດເຊຍ ຢືນຢັນການສະໜັບສະໜູນໃຫ້ ຫວຽດນາມ ເປັນເຈົ້າພາບ ປີ APEC 2027 ແລະ ພ້ອມແລ້ວທີ່ຈະສົມທົບກັບ ຫວຽດນາມ ຈັດຕັ້ງເຫດການສໍາຄັນນີ້ໃຫ້ປະສົບຜົນສໍາເລັດ; ສືບຕໍ່ສະໜັບສະໜູນບົດບາດໃຈກາງຂອງ ອາຊຽນ ໃນໂຄງປະກອບພາກພື້ນ.
ສອງແມ່ນ, ຢືນຢັນວ່າ ການຮ່ວມມືດ້ານເສດຖະກິດສືບຕໍ່ແມ່ນເສົາຄ້ຳ ແລະ ຈຸດສຸມຂອງການຮ່ວມມືຫຼາຍດ້ານລະຫວ່າງ 2 ປະເທດ. 2 ຝ່າຍຈະສົມທົບກັນຜ່ານຜ່າຄວາມຫຍຸ້ງຍາກ ແລະ ເຫັນດີເປັນເອກະພາບມາດຕະການແກ້ໄຂເພື່ອຍົກສູງປະສິດທິຜົນການຮ່ວມມື; ຍົກສູງປະສິດທິຜົນການເຄື່ອນໄຫວຂອງບັນດາກົນໄກການຮ່ວມມືສອງຝ່າຍ, ພິເສດແມ່ນຄະນະກຳມະການລະຫວ່າງລັດຖະບານກ່ຽວກັບການຮ່ວມມືດ້ານເສດຖະກິດ - ການຄ້າ ແລະ ວິທະຍາສາດ - ເຕັກນິກ; ເຫັນດີເປັນເອກະພາບ ແລະ ຜັນຂະຫຍາຍແຜນການສັງລວມການພັດທະນາການຮ່ວມມື ຫວຽດນາມ - ລັດເຊຍ ຮອດ ປີ 2030 ໂດຍໄວ. 2 ຝ່າຍຈະສົມທົບກັນຂຸດຄົ້ນບັນດາທ່າໄດ້ປຽບຂອງສົນທິສັນຍາການຄ້າເສລີ ຫວຽດນາມ - ສະຫະພັນເສດຖະກິດ ອາຊີ - ເອີລົບ ໃຫ້ຫຼາຍສຸດ, ສືບຕໍ່ລົບລ້າງສິ່ງກີດຂວາງດ້ານການຄ້າ, ສ້າງຄວາມສະດວກໃຫ້ແກ່ການຄ້າສອງຝ່າຍ; ເປີດກວ້າງການເຂົ້າເຖິງທ້ອງຕະຫລາດ ລັດເຊຍ ເພື່ອສົ່ງອອກສິນຄ້າອຸປະໂພກ, ຜະລິດຕະພັນກະເສດ ແລະ ສິນທະເລຂອງ ຫວຽດນາມ; ຊຸກຍູ້ການຮ່ວມມືດ້ານການລົງທຶນ, ໂດຍສະເພາະແມ່ນພື້ນຖານໂຄງລ່າງ ແລະ ພະລັງງານ.
ສາມແມ່ນ, ເປີດກວ້າງການຮ່ວມມືດ້ານປ້ອງກັນຊາດ - ປ້ອງກັນຄວາມສະຫງົບ ເພື່ອຕອບສະໜອງບັນດາສິ່ງທ້າທາຍດ້ານຄວາມໝັ້ນຄົງແບບໃໝ່ ແລະ ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຫຼາຍຝ່າຍກ່ຽວກັບການປ້ອງກັນຊາດ - ປ້ອງກັນຄວາມສະຫງົບ, ພິເສດແມ່ນບັນດາກົນໄກຂອງ ອາຊຽນ ເຊັ່ນ: ເວທີປາໄສພາກພື້ນ ອາຊຽນ (ARF), ກອງປະຊຸມຂັ້ນສູງ ອາຊີຕາເວັນອອກ (EAS), ກອງປະຊຸມລັດຖະມົນຕີປ້ອງກັນປະເທດ ອາຊຽນ ເປີດກວ້າງ (ADMM+), ປະກອບສ່ວນເຂົ້າໃນສັນຕິພາບ, ສະຖຽນລະພາບ, ຄວາມສະຫງົບ, ຄວາມປອດໄພໃນພາກພື້ນ ອາຊີ - ປາຊີຟິກ ແລະ ໃນໂລກ.
ສີ່ແມ່ນ, ຍູ້ແຮງການຮ່ວມມືດ້ານການສຶກສາ - ບຳລຸງສ້າງ, ວິທະຍາສາດ - ເຕັກໂນໂລຊີ, ການທ່ອງທ່ຽວ, ແຮງງານ, ວັດທະນະທຳ, ສິລະປະ, ກິລາ, ການຮ່ວມມືທ້ອງຖິ່ນ, ການພົບປະແລກປ່ຽນປະຊາຊົນ ແລະ ການສຶກສາລຸ້ນໜຸ່ມ... ເພື່ອເສີມຂະຫຍາຍພື້ນຖານມະນຸດສະທຳທີ່ໝັ້ນຄົງໃຫ້ແກ່ການພົວພັນຄູ່ຮ່ວມມືຍຸດທະສາດຮອບດ້ານ. ໃນຂອບເຂດການຢ້ຽມຢາມ, ສອງຝ່າຍໄດ້ລົງນາມເອກະສານຮ່ວມມື 11 ສະບັບລະຫວ່າງບັນດາກະຊວງ, ຂະແໜງການ ແລະ ວິສາຫະກິດຂອງສອງປະເທດ, ສ້າງແຮງຜັກດັນຊຸກຍູ້ການພົວພັນສອງຝ່າຍ. 2 ຝ່າຍເຫັນດີເປັນເອກະພາບສືບຕໍ່ສ້າງເງື່ອນໄຂສະດວກໃຫ້ຊາວ ຫວຽດນາມ ອາໄສຢູ່ ລັດເຊຍ ແລະ ຊາວ ລັດເຊຍ ຢູ່ ຫວຽດນາມ ໄດ້ດຳລົງຊີວິດ, ຮ່ຳຮຽນສຶກສາ ແລະ ເຮັດວຽກຢ່າງໝັ້ນຄົງ, ເປັນຂົວເຊື່ອມຕໍ່ມິດຕະພາບລະຫວ່າງສອງປະເທດ.
ຫ້າແມ່ນ, ການນຳຂັ້ນສູງຂອງສອງປະເທດມີການແລກປ່ຽນຢ່າງກົງໄປກົງມາ ແລະ ໄວ້ເນື້ອເຊື່ອໃຈໃນບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ. ຕາມນັ້ນແລ້ວ, 2 ຝ່າຍຢືນຢັນຈະສະໜັບສະໜູນລະບົບການພົວພັນສາກົນທີ່ຍຸຕິທຳ, ບົນພື້ນຖານກົດໝາຍສາກົນ ແລະ ກົດບັດ ສະຫະປະຊາຊາດ, ໂດຍສະເພາະແມ່ນການແກ້ໄຂການຂັດແຍ້ງກັນໂດຍສັນຕິວິທີ, ໂດຍບໍ່ມີການນາບຂູ່ ຫຼື ໃຊ້ກຳລັງຮຸນແຮງ, ບໍ່ແຊກແຊງເຂົ້າວຽກງານພາຍໃນເຊິ່ງກັນ ແລະ ກັນ. ກ່ຽວກັບບັນຫາທະເລຕາເວັນອອກ, 2 ຝ່າຍສະໜັບສະໜູນການຮັບປະກັນຄວາມສະຫງົບ, ຄວາມປອດໄພ, ຄວາມເສລີໃນການເດີນເຮືອ ແລະ ການບິນ; ຫ້າມໃຊ້ກຳລັງຮຸນແຮງ ຫຼື ນາບຂູ່ນຳໃຊ້ກຳລັງຮຸນແຮງ, ແກ້ໄຂການຂັດແຍ່ງກັນໂດຍສັນຕິວິທີຕາມຫຼັກການຂອງກົດບັດ ສະຫະປະຊາຊາດ ແລະ ກົດໝາຍສາກົນ, ພິເສດແມ່ນສົນທິສັນຍາຂອງ ສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ (UNCLOS) ປີ 1982; ສະໜັບສະໜູນການປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ບັນລຸໄດ້ກົດແຫ່ງການປະພຶດຢູ່ ທະເລຕາເວັນອອກ (COC) ໂດຍໄວ.
ການຢ້ຽມຢາມທາງລັດຖະກິດຢູ່ ຫວຽດນາມ ຂອງທ່ານປະທານາທິບໍດີ ລັດເຊຍ Vladimir Putin ໄດ້ປະສົບຜົນສຳເລັດຢ່າງຈົບງາມ.
ນັກຂ່າວ: ຂໍຂອບໃຈທ່ານລັດຖະມົນຕີ.
 | ສະຫະພັນບັນດາອົງການມິດຕະພາບ ຫວຽດນາມ, ແຂວງ ລາວກາຍ ແລກປ່ຽນບັນດາເນື້ອໃນການຮ່ວມມືດ້ານການທູດປະຊາຊົນ ຍສໝ - ວັນທີ 12 ມິຖຸນາ 2024, ຢູ່ຮ່າໂນ້ຍ, ທ່ານປະທານສະຫະພັນບັນດາອົງການມິດຕະພາບ ຫວຽດນາມ ຟານແອງເຊີນ ໄດ້ຕ້ອນຮັບ ແລະ ເຮັດວຽກກັບຄະນະປະຕິບັດງານແຂວງ ລາວກາຍ ໂດຍທ່ານປະທານຄະນະກຳມະການປະຊາຊົນແຂວງ ລາວກາຍ ຈິ້ງຊວນເຈື່ອງ ເປັນຫົວໜ້າຄະນະ. ເຂົ້າຮ່ວມພ້ອມກັນກັບຄະນະ ມີການນຳສະຫະພັນບັນດາອົງການມິດຕະພາບແຂວງ ລາວກາຍ ແລະ ຜູ້ຕາງໜ້າບັນດາພະແນກ, ຂະແໜງການຂອງແຂວງ. |
 | ການທູດປະຊາຊົນ - ກຸນແຈຄຳທີ່ຜູກພັນສາຍພົວພັນມິດຕະພາບລະຫວ່າງ ຫວຽດນາມ ແລະ ສະຫະພັນ ລັດເຊຍ ຍສໝ - ໃນສະພາບການຜັນແປຢ່າງສັບສົນໃນໂລກ ແລະ ພາກພື້ນ, ການປົກປັກຮັກສາ ແລະ ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ ບໍ່ພຽງແຕ່ໄດ້ຮັບການຜັນຂະຫຍາຍຜ່ານບັນດາຊ່ອງທາງການເມືອງລະດັບສູງ, ການທູດແຫ່ງລັດ ເທົ່ານັ້ນ ຫາກຍັງດຳເນີນຜ່ານບັນດາຊ່ອງທາງການທູດປະຊາຊົນອີກດ້ວຍ. |
ມິງດຶກ
