 | ສະຫະພັນບັນດາອົງການມິດຕະພາບນະຄອນ ຫາຍຟ່ອງ: ມີຫຼາຍໝາກຜົນຢ່າງຕັ້ງໜ້າ ໃນວຽກງານດ້ານການທູດປະຊາຊົນ |
| ສະຫະພັນບັນດາອົງການມິດຕະພາບຫວຽດນາມ ແລະ ສະພາສັນຕິພາບໂລກ ສືບຕໍ່ຮ່ວມມືເພື່ອສັນຕິພາບ |
ການທູດປະຊາຊົນແມ່ນໜຶ່ງໃນ 3 ເສົາຄ້ຳຂອງການທູດ ຫວຽດນາມ. ປະຊາຊົນສອງປະເທດແມ່ນປັດໄຈທີ່ໝັ້ນຄົງຂອງສາຍພົວພັນມິດຕະພາບທີ່ເປັນມູນເຊື້ອ, ຄວາມໝັ້ນຄົງເຂັ້ມແຂງ ແລະ ການພົວພັນແບບພິເສດລະຫວ່າງ ຫວຽດນາມ ແລະ ລັດເຊຍ ທີ່ມີມາແຕ່ດົນນານ.
ໃນການໂອ້ລົມສົນທະນາກັບ Sputnik ເມື່ອບໍ່ດົນມານີ້, ທ່ານ ຟານແອ່ງເຊີນ, ປະທານສະຫະພັນບັນດາອົງການມິດຕະພາບ ຫວຽດນາມ (VUFO), ໄດ້ແບ່ງປັນທັດສະນະ ແລະ ບົດຮຽນກ່ຽວກັບການພົວພັນທາງການທູດລະຫວ່າງປະຊາຊົນໃນການຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ.
 |
| ທ່ານ ຟານແອ່ງເຊີນ, ປະທານສະຫະພັນບັນດາອົງການມິດຕະພາບ ຫວຽດນາມ. |
ຝ່າຍນັກການທູດ "ໄມ້ໄຜ່": ຢຶດໝັ້ນ ແລະ ມີໄຫວພິບ
ກ່ອນອື່ນໝົດ, ທ່ານ ຟານແອ່ງເຊີນ ປະທານສະຫະພັນບັນດາອົງການມິດຕະພາບ ຫວຽດນາມ ໄດ້ກ່າວຢ່າງຈະແຈ້ງກ່ຽວກັບຝ່າຍນັກການທູດໄມ້ໄຜ່ ຫວຽດນາມ ໂດຍສະແດງອອກໃນ 2 ລັກສະນະຕົ້ນຕໍຄື: ຢຶດໝັ້ນໃນບັນດາເປົ້າໝາຍ ແລະ ຫຼັກການ, ມີໄຫວພິບໃນຍຸດທະສາດ, ວິທີການເຂົ້າເຖິງ ແລະ ການຈັດຕັ້ງປະຕິບັດ.
ໃນນັ້ນ, ເປົ້າໝາຍໃຫຍ່ທີ່ສຸດແມ່ນຄວາມເປັນເອກະລາດແຫ່ງຊາດ ແລະ ສັງຄົມນິຍົມ, ໂດຍກຳເນີດຈາກອຸດົມການທາງການທູດ ໂຮ່ຈີມິນ. ຝ່າຍນັກການທູດໄມ້ໄຜ່ໄດ້ກຳເນີດຂຶ້ນດ້ວຍຈິດໃຈທີ່ຢຶດໝັ້ນໃນການຕໍ່ສູ້ເພື່ອເອກະລາດແຫ່ງຊາດ ແລະ ເປັນເຈົ້າຕົນເອງ ຕິດພັນກັບຄວາມສາມັກຄີສາກົນ, ສັນຕິພາບ, ມິດຕະພາບ, ການຫັນເປັນຫຼາຍຝ່າຍ ແລະ ຄວາມຫຼາກຫຼາຍຂອງການພົວພັນສາກົນ.
ຕາມທ່ານ ຟານແອ່ງເຊີນ ແລ້ວ, ຝ່າຍນັກການທູດໄມ້ໄຜ່ ໄດ້ຮັບການເຊື່ອມຊຶນເຂົ້າໃນເສົາຄ້ຳການທູດຂອງ ຫວຽດນາມ ທັງໝົດ 3 ເສົາຄ້ຳຄື: ການພົວພັນຕ່າງປະເທດຂອງພັກ, ການທູດແຫ່ງລັດ ແລະ ການທູດປະຊາຊົນ. ແຕ່ວ່າ, ການທູດປະຊາຊົນ ຍັງຕ້ອງສະແດງໃຫ້ເຫັນຄວາມມີໄຫວພິບຫຼາຍກວ່າເກົ່າ, ໂດຍສະເພາະແມ່ນສະພາບການສາກົນທີ່ມີການປ່ຽນແປງຕະຫຼອດດ້ວຍຫຼາຍປັດໄຈທີ່ສັບສົນ ແລະ ບໍ່ສາມາດຄາດຄະເນໄດ້.
ທ່ານ ເຊີນ ແບ່ງປັນວ່າ “ພວກຂ້າພະເຈົ້າມານະພະຍາຍາມຊອກຫາຈຸດທີ່ຄ້າຍຄືກັນໃນການພົວພັນຄູ່ຮ່ວມມືຄື ຮັກຫອມສັນຕິພາບ, ຕໍ່ສູ້ເພື່ອສັນຕິພາບ, ຮັກຄວາມຍຸຕິທຳ ແລະ ຊອບທຳ. ສິ່ງສຳຄັນກວ່ານັ້ນ, ພວກຂ້າພະເຈົ້າຮູ້ບຸນຄຸນບັນດານ້ຳໃຈຂອງເພື່ອນມິດສາກົນ ແລະ ບັນດາປະຊາຊົນຜູ້ທີ່ກ້າວໜ້າໃນໂລກ ທີ່ໄດ້ໜູນຊ່ວຍ ຫວຽດນາມ ໃນການພາລະກິດແຫ່ງການຕໍ່ສູ້ຍາດເອົາເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ”.
ການທູດປະຊາຊົນໃນການຊຸກຍູ້ການພົວພັນ ຫວຽດນາມ - ລັດເຊຍ
ເມື່ອເບິ່ງຈຸດທີ່ເປັນເອກະລັກສະເພາະຂອງການທູດປະຊາຊົນໃນການຊຸກຍູ້ການພົວພັນລະຫວ່າງ ຫວຽດນາມ - ລັດເຊຍ, ທ່ານ ຟານແອ່ງເຊີນ ໄດ້ກ່າວເຖິງ 3 ປັດໄຈຕົ້ນຕໍຄື: ເຈົ້າກຳ, ເປົ້າໝາຍ ແລະ ວິທີການເຂົ້າເຖິງ.
ສຳລັບເຈົ້າກຳ, ຖ້າຫາກວຽກງານການພົວພັນຕ່າງປະເທດຂອງພັກໄດ້ຮັບການປະຕິບັດໂດຍຄະນະພົວພັນຕ່າງປະເທດສູນກາງພັກ, ການທູດແຫ່ງລັດໂດຍກະຊວງການຕ່າງປະເທດ ແລະ ກຳມາທິການການຕ່າງປະເທດສະພາແຫ່ງຊາດເປັນປະທານ, ການຕ່າງປະເທດຂອງປະຊາຊົນແມ່ນການເຂົ້າຮ່ວມຢ່າງກວ້າງຂວາງຂອງແນວໂຮມປະເທດຊາດ ຫວຽດນາມ, ບັນດາອົງການຈັດຕັ້ງການເມືອງ - ສັງຄົມ, ອົງການຈັດຕັ້ງປະຊາຊົນ ແລະ ປະຊາຊົນ ຫວຽດນາມ ທົ່ວໄປ. ອົງການຮັບຜິດຊອບໂດຍສະເພາະທີ່ມີບົດບາດເປັນຫຼັກແຫຼ່ງແມ່ນສະຫະພັນບັນດາອົງການມິດຕະພາບ ຫວຽດນາມ (VUFO).
ສຳລັບເປົ້າໝາຍ, ທ່ານ ເຊີນ ໃຫ້ຮູ້ວ່າ VUFO ບໍ່ພຽງແຕ່ຮັກສາການພົວພັນກັບບັນດາອົງການທີ່ທຽບເທົ່າຢູ່ບັນດາປະເທດເທົ່ານັ້ນ ຫາກຍັງພົວພັນກັບບັນດາມະຫາວິທະຍາໄລ, ສະຖາບັນຄົ້ນຄ້ວາ, ບັນດາອົງການທີ່ປຶກສາດ້ານນະໂຍບາຍ, ບັນດາກອງທຶນ, ບັນດາວິສາຫະກິດ, ບັນດາອົງການຕ່າງປະເທດທີ່ບໍ່ຂຶ້ນກັບລັດຖະບານ ທີ່ກຳລັງເຄື່ອນໄຫວຢູ່ ຫວຽດນາມ, ລວມທັງບັນດານັກການເມືອງ, ປັນຍາຊົນຕ່າງປະເທດ .
ທ່ານ ເຊີນ ໃຫ້ຮູ້ວ່າ "ສຳລັບ ລັດເຊຍ, ພວກຂ້າພະເຈົ້າມີຄູ່ຮ່ວມມືຫຼາຍເຊັ່ນ: ສະມາຄົມລັດເຊຍເພື່ອການຮ່ວມມືສາກົນ (RAMS), ກອງທຶນສາກົນເພື່ອເສັ້ນທາງສັນຕິພາບ, ຄະນະກໍາມະການການຕ່າງປະເທດ St. Petersburg, ອົງການການຮ່ວມມື ສະຫະພັນ ລັດເຊຍ Rossotrudnichestvo, ໂຮງຮຽນວິທະຍາໄລ, ສະຖາບັນຄົ້ນຄວ້າ, ອຳນາດການປົກຄອງທ້ອງຖິ່ນ ແລະ ບັນດາວິສາຫະກິດ. ນີ້ແມ່ນເຄືອຂ່າຍຄູ່ຮ່ວມມືທີ່ກວ້າງໃຫຍ່ຄຽງຂ້າງບັນດາຄູ່ຮ່ວມມືດັ້ງເດີມຄື: ສະມາຄົມມິດຕະພາບ ລັດເຊຍ - ຫວຽດນາມ.
ສຳລັບວິທີການເຂົ້າເຖິງ, ທ່ານ ຟານແອ່ງເຊີນ ປະທານສະຫະພັນບັນດາອົງການມິດຕະພາບ ຫວຽດນາມ ເນັ້ນໜັກວ່າ: ລັກສະນະມີໄຫວພິບແມ່ນລັກສະນະພິເສດສະເພາະຂອງການທູດປະຊາຊົນ, ເພື່ອຕອບສະໜອງການຜັນແປຢ່າງສັບສົນຂອງສະຖານະການໃນພາກພື້ນ ແລະ ໂລກ. ພ້ອມກັນນັ້ນ, ທາງເລືອກຂອງວິທີການເຂົ້າເຖິງທີ່ມີຄວາມແຕກຕ່າງກັນ ກໍ່ຍັງຂຶ້ນກັບແຕ່ລະເປົ້າໝາຍສະເພາະ. ເຖິງຢ່າງໃດກໍຕາມ, ຈຸດຮ່ວມກັນແມ່ນເພື່ອຊອກຫາຄ່ານິຍົມທີ່ເປັນເອກະພາບກັນເຊັ່ນ: ຮັກຫອມສັນຕິພາບ, ຄວາມຍຸດຕິທໍາ, ຄວາມຊອບທໍາ ແລະ ການຕໍ່ສູ້ເພື່ອບັນດາຄຸນຄ່າເຫຼົ່ານັ້ນ.
 |
| ສະຫະພັນໄດ້ສົມທົບກັບສະຖານທູດ ສະຫະພັນ ລັດເຊຍ ປະຈຳ ຫວຽດນາມ ຈັດຕັ້ງການແລກປ່ຽນຂໍ້ມູນຂ່າວສານກ່ຽວກັບສະພາບການຢູ່ ລັດເຊຍ ແລະ ການຮ່ວມມືລະຫວ່າງ 2 ປະເທດ. |
ຂີດໝາຍປະຫວັດສາດ ແລະ ຄວາມສາມັກຄີພິເສດ
ເມື່ອຕີລາຄາຄວາມຫຼາກຫຼາຍ ແລະ ຄວາມເລິກເຊິ່ງຂອງການເຄື່ອນໄຫວການທູດປະຊາຊົນໃນການຊຸກຍູ້ການພົວພັນ ຫວຽດນາມ - ລັດເຊຍ, ທ່ານ ຟານແອ່ງເຊີນ ຢືນຢັນວ່າ ນີ້ແມ່ນສາຍພົວພັນພິເສດທີ່ໄດ້ຜ່ານຜ່າການທົດສອບຂອງການເວລາ ແລະ ໄດ້ຮັບການຮັກສາ ແລະ ເພີ່ມພູນຄູນສ້າງຈາກບັນດາລຸ້ນຜູ້ນຳ ແລະ ປະຊາຊົນສອງປະເທດ.
ທ່ານຫົວໜ້າ VUFO ເນັ້ນໜັກວ່າ ບັນດາບາດກ້າວບຸກທະລຸທີ່ສຳຄັນໃນປະຫວັດສາດການພົວພັນລະຫວ່າງ 2 ປະເທດ ໄດ້ວາງພື້ນຖານອັນໜັກແໜ້ນໃຫ້ແກ່ບັນດາການເຄື່ອນໄຫວທາງການທູດປະຊາຊົນ ຫວຽດນາມ - ລັດເຊຍ ໃນປະຈຸບັນ.
ທ່ານ ເຊີນ ໄດ້ຢ້ຳຄືນວ່າ “ປີ 1950, ຫວຽດນາມ ແລະ ໂຊວຽດ ໄດ້ສ້າງຕັ້ງການພົວພັນທາງການທູດຢ່າງເປັນທາງການ. ປີ 1994, ຫວຽດນາມ ແລະ ສະຫະພັນ ລັດເຊຍ ໄດ້ລົງນາມໃນ “ສົນທິສັນຍາກ່ຽວກັບຫຼັກການພື້ນຖານການພົວພັນມິດຕະພາບທີ່ເປັນມູນເຊື້ອລະຫວ່າງ ສາທາລະນະລັດ ສັງຄົມນິຍົມ ຫວຽດນາມ ແລະ ສະຫະພັນ ລັດເຊຍ”. ປີນີ້ແມ່ນຄົບຮອບ 30 ປີຂອງເຫດການສໍາຄັນນັ້ນ. ໃນວັນທີ 30 ມິຖຸນາ ປີ 2023, ນະຄອນ St. Petersburg ຂອງ ລັດເຊຍ ກໍ່ໄດ້ເປີດສະຫຼອງອະນຸສາວະລີປະທານ ໂຮ່ຈີມິນ ຢູ່ສະໜາມຫຼວງສູນກາງ ເນື່ອງໃນໂອກາດສະເຫຼີມສະຫຼອງ 100 ປີແຫ່ງວັນປະທານ ໂຮ່ຈີມິນ ເດີນທາງມາເຖິງ Petrograd (St. Petersburg ໃນປະຈຸບັນ)”.
ທ່ານຫົວໜ້າ VUFO ກໍ່ແບ່ງປັນວ່າ, ບັນດາການເຄື່ອນໄຫວດ້ານການເມືອງ ແລະ ການທູດຂອງຄະນະຜູ້ແທນຂັ້ນສູງ ຫວຽດນາມ ທີ່ມາ ລັດເຊຍ ລ້ວນແຕ່ມີການພົບປະກັບບັນດາອົງການປະຊາຊົນຂອງ ສະຫະພັນ ລັດເຊຍ ແລະ ປະຊາຄົມຊາວ ຫວຽດນາມ ທີ່ກຳລັງອາໄສ, ສຶກສາຮ່ຳຮຽນ ແລະ ເຮັດວຽກຢູ່ທີ່ນີ້.
ທ່ານ ເຊີນ ປາດຖະໜາວ່າ ບັນດາເຫດການທີ່ຄ້າຍຄືກັນຈະສືບຕໍ່ດຳເນີນໃນໄລຍະຈະມາເຖິງຄື ການໄປຢ້ຽມຢາມ ຫວຽດນາມ ໃນໄລຍະຈະມາເຖິງຂອງທ່ານປະທານາທິບໍດີ ລັດເຊຍ Vladimir Putin.
ໄລຍະທາງອັນຍາວນານຂອງການພົວພັນທາງການທູດເກືອບ 75 ປີໄດ້ຢືນຢັນການພົວພັນອັນສະໜິດສະໜົມລະຫວ່າງປະຊາຊົນສອງປະເທດ. ທ່ານ ເຊີນ ເນັ້ນວ່າ:
“ຢູ່ ຫວຽດນາມ, ມີຫຼາຍຄົນທີ່ຮັກແພງອະດີດ ສະຫະພາບ ໂຊວຽດ ແລະ ລັດເຊຍ ໃນປະຈຸບັນ, ນັ້ນແມ່ນຫຼັກຖານທີ່ສະແດງໃຫ້ເຫັນການພົວພັນທີ່ຜ່ານຜ່າການທົດສອບຂອງການເວລາ, ໄດ້ຮັບການເພີ່ມພູນຄູນສ້າງ ແລະ ເສີມຂະຫຍາຍຈາກການນຳຫຼາຍລຸ້ນຄົນ ແລະ ປະຊາຊົນສອງປະເທດ”.
ທ່ານປະທານ VUFO ກໍ່ໄດ້ກ່າວເຖິງການພັດທະນາການຮ່ວມມືໃໝ່, ໃນນັ້ນ ສະມາຄົມມິດຕະພາບ ຫວຽດນາມ - ລັດເຊຍ ຫາກໍ່ໄດ້ລົງນາມໃນສັນຍາຮ່ວມມືໄລຍະ 2024 – 2029 ກັບມະຫາວິທະຍາໄລສ້າງຄູແຫ່ງຊາດ ລັດເຊຍ ທີ່ມີຊື່ວ່າ A.I. Herzen ກ່ຽວກັບການຊຸກຍູ້ການຮ່ວມມືໃນການພົບປະແລກປ່ຽນປະຊາຊົນ, ເຜີຍແຜ່ ແລະ ໂຄສະນາວັດທະນະທຳ, ພາສາ ລັດເຊຍ ຢູ່ ຫວຽດນາມ ແລະ ພາສາ, ວັດທະນະທຳ ຫວຽດນາມ ຢູ່ ລັດເຊຍ.
ໃນເວລາຈະມາເຖິງນີ້, VUFO ກໍ່ຈະສ້າງການພົວພັນຮ່ວມມືກັບບັນດາມະຫາວິທະຍາໄລທີ່ມີຊື່ສຽງຂອງລັດເຊຍ ເຊັ່ນ: ມະຫາວິທະຍາໄລສັງລວມແຫ່ງຊາດ St. Petersburg (SPbSU), ສະຖາບັນການພົວພັນຕ່າງປະເທດແຫ່ງຊາດ Moskva (MGIMO) ແລະ ມະຫາວິທະຍາໄລສັງລວມແຫ່ງຊາດ Moskva ທີ່ມີຊື່ວ່າ M.V. Lomonosov (MGU) ຂອງ ລັດເຊຍ.
ວິໄສທັດມຸ່ງໄປສູ່ອະນາຄົດ
ສຳລັບບັນດາການເຄື່ອນໄຫວທາງການທູດລະຫວ່າງປະຊາຊົນສອງປະເທດ, ທ່ານ ຟານແອ່ງເຊີນ ປະທານສະຫະພັນບັນດາອົງການມິດຕະພາບ ຫວຽດນາມ ໄດ້ຕີລາຄາວ່າ ນີ້ແມ່ນຂະບວນການເຄື່ອນໄຫວທີ່ຂະຫຍັນຂັນເຂື່ອນ, ອຸດົມສົມບູນ ແລະ ເລິກເຊິ່ງ. ທ່ານໄດ້ນັບອອກມາບັນດາການເຄື່ອນໄຫວຄື: ການຈັດຕັ້ງບັນດາເຫດການການເມືອງ ແລະ ການທູດ ເນື່ອງໃນໂອກາດສະເຫຼີມສະຫຼອງບັນດາເຫດການສຳຄັນໃນການພົວພັນ ຫວຽດນາມ - ລັດເຊຍ ແລະ ບັນດາວັນບຸນປະເພນີຂອງ 2 ປະເທດ; ການພົບປະລະຫວ່າງການນຳຂັ້ນສູງ ແລະ ວົງຄະນະຍາດປະຊາຄົມຊາວ ຫວຽດນາມ ຢູ່ ສະຫະພັນ ລັດເຊຍ; ເປັນຂົວຕໍ່ຊຸກຍູ້ການແຮກສ່ຽວລະຫວ່າງບັນດາທ້ອງຖິ່ນຂອງສອງປະເທດ.
ທ່ານ ເຊີນ ເນັ້ນໜັກວ່າ: “ບັນດາການເຄື່ອນໄຫວບົນຊ່ອງທາງປະຊາຊົນລະຫວ່າງ 2 ປະເທດມີຄວາມໝາຍເລິກເຊິ່ງໃນສະພາບການໂລກທີ່ຜັນແປຫຼາຍຢ່າງ, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈລະຫວ່າງປະຊາຊົນ 2 ປະເທດ, ຊຸກຍູ້ຄວາມໄວ້ເນື້ອເຊື່ອໃຈດ້ານການເມືອງລະຫວ່າງ 2 ປະເທດ”.
ໃນການໂອ້ລົມສົນທະນາ, ທ່ານ ຟານແອ່ງເຊີນ ໄດ້ສະແດງຄວາມເຊື່ອໝັ້ນຕໍ່ແງ່ຫວັງອະນາຄົດອັນສົດໃສຂອງການພົວພັນ ຫວຽດນາມ - ລັດເຊຍ ບົນຊ່ອງທາງປະຊາຊົນ ໃນສະພາບການທີ່ສອງປະເທດມຸ່ງໄປເຖິງການສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດໃນປີ 2025.
ທ່ານ ເຊີນ ໃຫ້ຮູ້ວ່າ: “VUFO ພວມປຶກສາຫາລື ແລະ ເຫັນດີເປັນເອກະພາບກັບບັນດາຄູ່ຮ່ວມມືຂອງ ລັດເຊຍ ເພື່ອຈັດຕັ້ງເວທີປາໄສປະຊາຊົນ ຫວຽດນາມ - ລັດເຊຍ ຄັ້ງທຳອິດໃນປີ 2025 ເນື່ອງໃນໂອກາດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ ແລະ ອະດີດສະຫະພາບ ໂຊວຽດ/ສະຫະພັນ ລັດເຊຍ ປະຈຸບັນ (ວັນທີ 30 ມັງກອນ ປີ 1950 - ວັນທີ 30 ມັງກອນ ປີ 2025). ຫຼັງຈາກນັ້ນ, ເວທີປາໄສຈະຈັດຂຶ້ນປະຈຳປີຢູ່ ຫວຽດນາມ ຫຼື ລັດເຊຍ”.
ເຫດການນີ້ໃຫ້ຄຳໝັ້ນສັນຍາຈະກາຍເປັນໂອກາດເພື່ອໃຫ້ສອງຝ່າຍຊຸກຍູ້ການພົບປະແລກປ່ຽນ ເພື່ອແນໃສ່ເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບທີ່ເປັນມູນເຊື້ອລະຫວ່າງປະຊາຊົນ 2 ປະເທດ, ພ້ອມທັງສ້າງບາດກ້າວໃໝ່ໃນການຮ່ວມມືໃນຫຼາຍຂົງເຂດ.
ບັນດາຄວາມມານະພະຍາຍາມໃນການຊຸກຍູ້ການຮ່ວມມືປະຊາຊົນທີ່ກ່າວມາຂ້າງເທິງນີ້, ກຳລັງ ແລະ ຈະປະກອບສ່ວນເຂົ້າໃນການເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ ໃຫ້ເລິກເຊິ່ງກ່ວາອີກ.
 | ສະຖານທູດລາວ ປະຈຳ ລັດເຊຍ ອວຍພອນປີໃໝ່ ຫວຽດນາມ ປີມະໂລງ 2024 ຍສໝ - ປີ 2023, ສາຍພົວພັນແບບພິເສດ ຫວຽດນາມ - ລາວ ເວົ້າລວມ, ກໍ່ຄືສາຍພົວພັນ ລະຫວ່າງ ສອງສະຖານທູດ ຫວຽດນາມ ແລະ ລາວ ເວົ້າສະເພາະ, ໄດ້ມີການພັດທະນາເປັນຢ່າງດີ. |
 | ສະຫະພັນແມ່ຍິງແຂວງ ອານຢາງ “ໄປຄຽງຄູ່ກັບແມ່ຍິງຊາຍແດນ” ຍສໝ - ຕອນເຊົ້າວັນທີ 7 ຕຸລາ, ຄະນະປະຕິບັດງານກອງບັນຊາການທະຫານຊາຍແດນແຂວງ ອານຢາງ, ແຂວງ ອານຢາງ ໄດ້ສົມທົບກັບສະຫະພັນແມ່ຍິງແຂວງ ອານຢາງ, ແຂວງ ໂສກຈັງ ຈັດຕັ້ງການເຄື່ອນໄຫວອາສາສະໝັກຢູ່ 2 ຕາແສງຊາຍແດນ ຟູ໋ໂຮ່ຍ, ເຍີນໂຮ່ຍ (ເມືອງອານຝູ, ແຂວງອານຢາງ). |
ມິງດຶກ
