 | ກະຊວງບັນຊາທະຫານ ແຂວງບິ່ງດິ້ງ ໄດ້ມາຢ້ຽມຢາມ, ອວຍພອນປີໃໝ່ ແລະ ກວດພະຍາດຢູ່ລາວ |
| ໜູນຊ່ວຍນັກສຶກສາມະຫາວິທະຍາໄລ ໄທຫງວຽນ ໄປຝຶກງານ ແລະ ເຮັດວຽກຢູ່ ຍີ່ປຸ່ນ |
ໃນຂອບເຂດໂຄງການຮ່ວມມືລະຫວ່າງຄະນະກວດກາສູນກາງ ພັກ ປະຊາຊົນ ປະຕິວັດລາວ, ອົງການກວດກາແຫ່ງລັດ ສາທາລະນະລັດ ປະຊາທິປະໄຕ ປະຊາຊົນ ລາວ ແລະ ຄະນະກວດກາສູນກາງພັກ ແລະ ອົງການກວດກາແຫ່ງລັດ ຫວຽດນາມ, ຄະນະຜູ້ແທນຂັ້ນສູງຄະນະກວດກາສູນກາງພັກ ແລະ ອົງການກວດກາແຫ່ງລັດ ລາວ ລວມມີ 10 ທ່ານ ໂດຍສະຫາຍ ຄຳພັນ ພົມມະທັດ, ກຳມະການກົມການເມືອງ, ເລຂາທິການສູນກາງພັກ, ປະທານຄະນະກວດກາສູນກາງ, ຫົວໜ້າຄະນະກຳມະການຕ້ານການສໍ້ລາດບັງຫຼວງສູນກາງ, ຫົວໜ້າອົງການກວດກາແຫ່ງລັດ ລາວ ໃນຖານະເປັນຫົວໜ້າຄະນະ ໄດ້ເດີນທາງມາຢ້ຽມຢາມ ຫວຽດນາມ ແຕ່ວັນທີ 2-8 ມິຖຸນາ ປີ 2024.
ວັນທີ 7 ມິຖຸນາ ປີ 2024, ສະຫາຍ ຄຳພັນ ພົມມະທັດ ພ້ອມດ້ວຍກົງສຸນໃຫຍ່ລາວ ປະຈຳນະຄອນ ໂຮ່ຈີມິນ ແລະ ຄະນະປະຕິບັດງານ ໄດ້ໄປຢ້ຽມຢາມ ແລະ ຮັບຟັງການລາຍງານການເຄື່ອນໄຫວຂອງບໍລິສັດອາຍແກັສ ຫວຽດນາມ (PV GAS). ເຂົ້າຮ່ວມການເຮັດວຽກກັບຄະນະ, ຝ່າຍຄະນະກວດກາສູນກາງ ຫວຽດນາມ, ມີສະຫາຍ ເຈິນຫວຽດຮ່າ, ຫົວໜ້າກົມ 7; ສຳລັບອົງການກວດກາແຫ່ງລັດ ຫວຽດນາມ ມີສະຫາຍ ໂດ໊ຈຸງກ່ຽນ , ຮອງຫົວໜ້າກົມຮ່ວມມືສາກົນ, ພ້ອມດ້ວຍບັນດາຜູ້ຕາງໜ້າການນຳວິຊາສະເພາະທີ່ກ່ຽວຂ້ອງ.
ສະຫາຍ ຫງວຽນແທ່ງບິ່ງ, ເລຂາຄະນະພັກ, ປະທານສະພາບໍລິຫານ PV GAS; ສະຫາຍ ຟ້າມວັນຟອງ, ຮອງເລຂາຄະນະພັກ, ຜູ້ອຳນວຍການໃຫຍ່; ບັນດາສະຫາຍຄະນະປະຈຳພັກ, ສະມາຊິກສະພາບໍລິຫານ PV GAS, ແລະ ຄະນະອຳນວຍການໃຫຍ່; ຜູ້ຕາງໜ້າບັນດາການນຳຂອງບັນດາຄະນະວິຊາສະເພາະ ກໍ່ໄດ້ໃຫ້ການຕ້ອນຮັບ ແລະ ເຮັດວຽກກັບຄະນະ.
 |
| ຕ້ອນຮັບຄະນະກວດກາແຫ່ງລັດ ສປປ ລາວ ທີ່ມາຢ້ຽມຢາມ ແລະ ເຮັດວຽກຢູ່ PV GAS |
ກ່າວຄຳປາໄສທີ່ກອງປະຊຸມ, ບັນດາການນຳ PV GAS ໄດ້ສະແດງຄວາມປິຕິຊົມຊື່ນ ແລະ ເປັນກຽດທີ່ໄດ້ໃຫ້ການຕ້ອນຮັບ ແລະ ເຮັດວຽກຮ່ວມກັບສະຫາຍ ຄຳພັນ ພົມມະທັດ ພ້ອມດ້ວຍຄະນະ. PV GAS ກໍ່ໄດ້ລາຍງານກ່ຽວກັບຂະບວນການສ້າງຕັ້ງ, ພັດທະນາ ແລະ ບັນດາຜົນງານພົ້ນເດັ່ນ - ນຳພາຂະແໜງການອຸດສາຫະກຳອາຍແກັສ ໃນໄລຍະ 34 ປີຜ່ານມາ, ປະກອບສ່ວນຢ່າງມີປະສິດທິຜົນໃຫ້ແກ່ຂະແໜງການອຸດສາຫະກຳນ້ຳມັນ ແລະ ອາຍແກັສ ຫວຽດນາມ ແລະ ໃຫ້ແກ່ປະເທດຫວຽດນາມ.
PV GAS ເປັນກຽດທີ່ໄດ້ຕາງໜ້າໃຫ້ປະຊາຄົມວິສາຫະກິດ ຫວຽດນາມ ຈັດຕັ້ງການແລກປ່ຽນກ່ຽວກັບວຽກງານກວດກາ ແລະ ລາຍງານສະພາບຕົວຈິງຂອງການເຄື່ອນໄຫວກວດກາ ແລະ ຄວບຄຸມຢູ່ພາຍໃນບັນດາວິສາຫະກິດ. PV GAS ຢືນຢັນວ່າ ຍາມໃດກໍ່ຍົກສູງວຽກງານກວດກາ ແລະ ຮັບປະກັນຄວາມໂປ່ງໃສເພື່ອພັດທະນາແບບຍືນຍົງ. ຄະນະບໍລິຫານງານຂອງ PV GAS ຢືນຢັນວ່າ: ບັນດາໂອກາດທີ່ໄດ້ພົບປະ ແລະ ດຳເນີນການຄົ້ນຄວ້າດ້ານວິຊາສະເພາະກັບອົງການກວດກາ ແມ່ນໂອກາດເພື່ອໃຫ້ PV GAS ໄດ້ແລກປ່ຽນ ແລະ ຖອດຖອນບົດຮຽນເພື່ອປັບປຸງລະບົບການຄຸ້ມຄອງພາຍໃນ, ປະກອບສ່ວນສືບຕໍ່ຢັ້ງຢືນຖານະບົດບາດເປັນວິສາຫະກິດອັນດັບໜຶ່ງຂອງຂະແໜງການອຸດສາຫະກໍານ້ຳມັນ ແລະ ອາຍແກັສ, ກໍ່ຄືການພັດທະນາຍີ່ຫໍ້ຂອງຕົນໃນພາກພື້ນ ແລະ ໃນໂລກ. ການນໍາ PV GAS ຍັງໄດ້ແບ່ງປັນການກຳນົດທິດທາງການລົງທຶນໃນເຂດພາກກາງຕອນເໜືອ, ຄວາມສາມາດໃນການເຊື່ອມຕໍ່ພື້ນຖານໂຄງລ່າງ ກໍ່ຄືການຂະຫຍາຍທ້ອງຕະຫຼາດຢູ່ ລາວ; ພ້ອມກັນນັ້ນ, ສະຫາຍຍັງໄດ້ສະແດງຄວາມປາຖະໜາຢາກໄດ້ຮັບການສະໜັບສະໜູນຢ່າງແຮງຈາກລັດຖະບານ ລາວ ເພື່ອຜັນຂະຫຍາຍບັນດາການເຄື່ອນໄຫວທຸລະກິດຢູ່ ລາວ ໃນໄລຍະຈະມາເຖິງ.
ສະຫາຍ ຄຳພັນ ພົມມະທັດ ໄດ້ກ່າວຄຳຂອບໃຈຕໍ່ການນຳ, ພະນັກງານ-ລັດຖະກອນຂອງ ບໍລິສັດ PV GAS ທີ່ໄດ້ໃຫ້ການຕ້ອນຮັບສະຫາຍ ແລະ ຄະນະຢ່າງລອບຄອບ, ສົມກຽດ ແລະ ຈິງໃຈ, ເຕັມໄປດ້ວຍນ້ຳໃຈມິດສະຫາຍ; ຊົມເຊີຍບັນດາຜົນງານດີເດັ່ນ ແລະ ການປະກອບສ່ວນທີ່ດີຂອງ PV GAS ໃຫ້ແກ່ປະເທດ ຫວຽດນາມ; ທ່ານ ຍັງສະແດງຄວາມປາດຖະໜາວ່າ ບໍລິສັດ PV GAS ສືບຕໍ່ເອົາໃຈໃສ່ ແລະ ຕັ້ງໝັ້ນຊອກຫາຄູ່ຮ່ວມມືທີ່ເໝາະສົມ ເພື່ອເປີດກວ້າງການດຳເນີນທຸລະກິດເຂົ້າສູ່ທ້ອງຕະຫຼາດຂອງ ລາວ, ນຳເອົາຜະລິດຕະພັນຈາກສາງ ຫວູງອ່າງ ມາສູ່ປະເທດອ້າຍນ້ອງ ລາວ, ປະກອບສ່ວນຊຸກຍູ້ເສດຖະກິດ ລາວ, ບົນຈິດໃຈຮ່ວມມືອັນດີງາມ ເປັນທັງມິດສະຫາຍ ແລະ ອ້າຍນ້ອງ.
ໃນດ້ານກົນໄກ ແລະ ນະໂຍບາຍສ້າງແລວທາງທີ່ເໝາະສົມໃນການຮ່ວມມື ແລະ ຈຳໜ່າຍຜະລິດຕະພັນອາຍແກັສ, ສະຫາຍ ຄຳພັນ ພົມມະທັດ ໃຫ້ຮູ້ວ່າ ພ້ອມແລ້ວທີ່ຈະຮັບຟັງ ແລະ ມີຄຳເຫັນສະເໜີໃຫ້ເໝາະສົມເພື່ອສະໜັບສະໜູນ ແລະ ສ້າງເງື່ອນໄຂໃຫ້ແກ່ການພັດທະນາທ້ອງຕະຫຼາດ. ຄະນະຜູ້ແທນຂັ້ນສູງອົງການກວດກາແຫ່ງລັດ ລາວ ຍັງເນັ້ນໜັກວ່າ: ໂຄງການສຶກສາ ແລະ ຄົ້ນຄ້ວາຕົວຈິງຢູ່ ຫວຽດນາມ ຈະແມ່ນປະສົບການນຳໃຊ້ໃນການປະຕິບັດວຽກງານຢູ່ປະເທດ ລາວ. ຜົນໄດ້ຮັບຂອງການເດີນທາງປະຕິບັດງານຄັ້ງນີ້ຈະໄດ້ຮັບການລາຍງານໃຫ້ລັດຖະບານ ລາວ ກັບບັນດາບົດຮຽນເຊິ່ງຈະໄດ້ເຜີຍແຜ່ຢ່າງກວ້າງຂວາງໃນຂະແໜງການ.
 |
| ສະຫາຍ ຄຳພັນ ພົມມະທັດ ກ່າວຂອບໃຈ PV GAS ທີ່ໃຫ້ການຕ້ອນຮັບຢ່າງສຸດອົກສຸດໃຈ |
ຜູ້ຕາງໜ້າອົງການກວດກາແຫ່ງລັດ ຫວຽດນາມ ກໍ່ຢັ້ງຢືນວ່າ: ໂຄງການຮ່ວມມືກັບເພື່ອນຮ່ວມງານ ລາວ ໄດ້ຜ່ານຫຼາຍປີໃນການສົມທົບກັບບັນດາກອງປະຊຸມ, ພົບປະ, ແລກປ່ຽນ, ຈັດຕັ້ງການຝຶກຊ້ອມ ແລະ ການໄປລົງຕົວຈິງເພື່ອບັນລຸໄດ້ໝາກຜົນອັນດີງາມ. ການຢ້ຽມຢາມ, ເຮັດວຽກ ແລະ ແລກປ່ຽນບັນດາເນື້ອໃນດ້ານວິຊາສະເພາະຢູ່ PV GAS ໄດ້ປະກອບສ່ວນຮັດແໜ້ນສາຍພົວພັນສາມັກຄີ, ພ້ອມທັງເພີ່ມປະສົບການອັນລ້ຳຄ່າ ເພື່ອປັບປຸງການຄຸ້ມຄອງ ແລະ ພັດທະນາປະຊາຄົມວິສາຫະກິດສອງປະເທດ; ປະກອບສ່ວນຍົກສູງປະສິດທິຜົນຂອງການເຄື່ອນໄຫວຄຸ້ມຄອງ, ຮັກສາຜົນປະໂຫຍດຂອງລັດ, ສິດ ແລະ ຜົນປະໂຫຍດອັນຊອບທຳຂອງວິສາຫະກິດ.
ບັນດາຜູ້ແທນໄດ້ສຸມໃສ່ຄົ້ນຄວ້າ ແລະ ປຶກສາຫາລືກ່ຽວກັບບັນດາການເຄື່ອນໄຫວຄວບຄຸມພາຍໃນຂອງວິສາຫະກິດ; ກຳນົດ ແລະ ວິເຄາະສິ່ງທ້າທາຍ, ໂດຍຜ່ານນັ້ນ ກໍ່ຊີ້ແຈ້ງບັນດາບັນຫາ ແລະ ອຸປະສັກທີ່ມີຢູ່ ແລະ ສະເໜີບັນດາວິທີຈຸດສຸມ ເພື່ອກຳນົດທິດໃຫ້ບັນດາວິສາຫະກິດໄປຕາມຍຸດທະສາດແຫ່ງຊາດ, ພ້ອມທັງສ້າງເງື່ອນໄຂໃຫ້ວິສາຫະກິດມີຫົວຄິດປະດິດສ້າງ, ປ່ຽນແປງໃໝ່ ແລະ ພັດທະນາ.
ຄະນະຜູ້ແທນຂັ້ນສູງອົງການກວດກາແຫ່ງລັດ ລາວ ແລະ ອົງການກວດກາແຫ່ງລັດ ຫວຽດນາມ ໄດ້ ໄປຢ້ຽມຢາມສູນຈຳໜ່າຍອາຍແກັສ ຝູໝີ ຂອງ PV GAS. ການຢ້ຽມຢາມ ແລະ ເຮັດວຽກຂອງຄະນະຄັ້ງນີ້ ໄດ້ເຮັດໃຫ້ບັນດາການນຳ ແລະ ຜູ້ອອກແຮງງານຂອງ PV GAS ໄດ້ຮູ້ສຶກອົບອຸ່ນເຖິງນ້ຳໃຈມິດສະຫາຍ ແລະ ຄວາມສະໜິດຕິດພັນລະຫວ່າງອ້າຍນ້ອງ ຫວຽດນາມ ແລະ ລາວ. ເຊື່ອໝັ້ນຢ່າງເລິກເຊິ່ງວ່າ, ການພົວພັນ “ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ” ລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຈະຂຽວສົດງົດງາມ ແລະ ຍືນຍົງຕະຫຼອດໄປ , ການພົວພັນລະຫວ່າງສອງປະເທດຈະນັບມື້ນັບດີງາມກວ່າ.
 | ຄະນະປະຕິບັດງານ VUFO ຢ້ຽມຢາມ ແລະ ເຮັດວຽກຢູ່ ຍີ່ປຸ່ນ ຍສໝ - ໃນລະຫວ່າງວັນທີ 21-23 ພະຈິກ 2023, ຄະນະປະຕິບັດງານຂອງສະຫະພັນບັນດາອົງການມິດຕະພາບຫວຽດນາມ (VUFO) ໂດຍທ່ານປະທານ ຟານແອງເຊີນ ນຳໜ້າ ໄດ້ໄປຢ້ຽມຢາມ ແລະ ເຮັດວຽກຢູ່ ຍີ່ປຸ່ນ. |
 | PV GAS ເຮັດວຽກຢູ່ລາວ ແລະ ພົບປະກັບບັນດາບໍລິສັດດຳເນີນທຸລະກິດ LPG ໃນຕະຫຼາດລາວ ຍສໝ - ໃນການເຮັດວຽກກັບສະມາຄົມນ້ຳມັນເຊື້ອໄຟ ແລະ ອາຍແກັສລາວ (LFGA) ນຳໂດຍທ່ານ ທອງທຳມະລາດ, ເລຂາສະມາຄົມ PV GAS ໄດ້ແນະນຳວິສັດການກໍ່ສ້າງ ແລະ ພັດທະນາ, ການວາງແຜນກຳນົດທິດທາງຍຸດທະສາດດຳເນີນທຸລະກິດ LPG ຂອງ PV GAS. |
ມິງດຶກ
