| ສ.ເກົາຫຼີ ຍູ້ແຮງນະໂຍບາຍດຶງດູດນັກສຶກສາສາກົນ | |
| ງານພົບປະແລກປ່ຽນວັດທະນະທຳ ຫວຽດນາມ - ສ .ເກົາຫຼີ ສະເຫຼີມສະຫຼອງລະດູບານໃໝ່ ປີມະໂລງ 2024 |
ໂດຍຕີລາຄາສູງບັນດາຄວາມມານະພະຍາຍາມຂອງທ່ານເອກອັກຄະລັດຖະທູດ ແລະ ສະຖານທູດ ສ.ເກົາຫຼີ ໃນການຊຸກຍູ້ການພົວພັນສອງຝ່າຍ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ສະແດງຄວາມຊົມເຊີຍທີ່ສອງປະເທດໄດ້ກາຍເປັນຄູ່ຮ່ວມມືສຳຄັນແຖວໜ້າຂອງກັນ; ຢືນຢັນວ່າ ລັດຖະບານ ຫວຽດນາມ ຈະຮ່ວມເດີນທາງ, ໜູນຊ່ວຍຢ່າງຕັ້ງໜ້າ ເພື່ອໃຫ້ທ່ານເອກອັກຄະລັດຖະທູດປະຕິບັດໜ້າທີ່ຂອງຕົນຢ່າງສຳເລັດຜົນ.
ທ່ານນາຍົກລັດຖະມົນຕີ ຫວຽດນາມ ກ່າວວ່າ ສອງຝ່າຍຕ້ອງເພີ່ມທະວີການພົວພັນດ້ານການເມືອງ ແລະ ການຮ່ວມມືໃນຂົງເຂດພັດທະນາໃຫ້ເໝາະສົມກັບການພົວພັນຄູ່ຮ່ວມມືຍຸດທະສາດຮອບດ້ານ, ໃນນັ້ນ ມີການຮັກສາບັນດາການຢ້ຽມຢາມ, ການພົບປະຂັ້ນສູງ ແລະ ບັນດາຂັ້ນດ້ວຍຫຼາຍຮູບແບບຢ່າງມີໄຫວພິບເປັນປະຈຳ; ຮັກສາບັນດາກົນໄກຮ່ວມມືທີ່ມີຢູ່ແລ້ວ ກໍຄືປະຕິບັດ “ໂຄງການກະທຳກ່ຽວກັບການຜັນຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສ.ເກົາຫຼີ” ຢ່າງມີປະສິດທິຜົນ.
 |
| ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ຕ້ອນຮັບທ່ານ Choi Young Sam, ເອກອັກຄະລັດຖະທູດ ສ.ເກົາຫຼີ ປະຈຳ ຫວຽດນາມ. (ທີ່ມາ: TTXVN) |
ກ່ຽວກັບການຮ່ວມມືດ້ານເສດຖະກິດ - ການຄ້າ, ທ່ານນາຍົກລັດຖະມົນຕີ ຫວຽດນາມ ສະເໜີໃຫ້ສອງຝ່າຍສືບຕໍ່ຊຸກຍູ້ການຮ່ວມມືດ້ານການຄ້າໃຫ້ພັດທະນາຢ່າງໝັ້ນຄົງຕາມທິດດຸນດ່ຽງ, ຍືນຍົງ; ສົ່ງເສີມໃຫ້ບັນດາວິສາຫະກິດ ສ.ເກົາຫຼີ ສືບຕໍ່ເປີດກ້ວາງຂະແໜງການລົງທຶນ, ໃນນັ້ນ ສຸມໃສ່ບັນດາຂົງເຂດທີ່ ສ.ເກົາຫຼີ ມີທ່າແຮງຄື ອຸດສາຫະກຳວັດທະນະທຳ, ເອເລັກໂຕນິກ, ຕໍ່ກຳປັ່ນ ແລະ ບັນດາຂົງເຂດພົ້ນເດັ່ນໃໝ່ຄື ເຄິ່ງຊັກນຳໄຟຟ້າ, AI....; ສ້າງສູນຄົ້ນຄວ້າ ແລະ ພັດທະນາ (R&D) ແລະ ຖ່າຍທອດເຕັກໂນໂລຢີໃຫ້ ຫວຽດນາມ.
ທ່ານເອກອັກຄະລັດຖະທູດ ສ.ເກົາຫຼີ Choi Young Sam ໄດ້ສະແດງຄວາມເປັນກຽດທີ່ໄດ້ຮັບໜ້າທີ່ຢູ່ ຫວຽດນາມ, ພິເສດແມ່ນໃນສະຖານະການທີ່ການພົວພັນລະຫວ່າງ 2 ປະເທດມີຄວາມສາມາດບົ່ມຊ້ອນໃນການຮ່ວມມືຫຼາຍກ່ວາອີກ ພາຍຫຼັງທີ່ໄດ້ຮັບການຍົກລະດັບຂຶ້ນເປັນຄູ່ຮ່ວມມືຍຸດທະສາດຮອບດ້ານ.
ໂດຍຕີລາຄາສູງບັນດາຄວາມຄືບໜ້າໃນການພົວພັນລະຫວ່າງສອງປະເທດໃນໄລຍະມໍ່ໆມານີ້, ທ່ານເອກອັກຄະລັດຖະທູດ ຢືນຢັນວ່າ ລັດຖະບານ ສ.ເກົາຫຼີ ຖື ຫວຽດນາມ ແມ່ນທິດບຸລິມະສິດໃນບັນດາການພົວພັນຕ່າງປະເທດຂອງ ສ.ເກົາຫຼີ ໃນປະຈຸບັນ, ປາດຖະໜາຢາກຊຸກຍູ້ການພົວພັນ 2 ຝ່າຍກັບ ຫວຽດນາມ ຢ່າງແທດຈິງກ່ວາອີກ ແລະ ກໍໄດ້ສະແດງຄວາມເຫັນດີເປັນເອກະພາບກ່ຽວກັບບັນດາທິດທາງຮ່ວມມືທີ່ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ກ່າວ, ພິເສດແມ່ນການຮັກສາການແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນ, ເພີ່ມທະວີການຮ່ວມມືໃນບັນດາຂົງເຂດ.
ທ່ານເອກອັກຄະລັດຖະທູດ Choi Young Sam ປາດຖະໜາວ່າ ລັດຖະບານ ຫວຽດນາມ ຈະສືບຕໍ່ເອົາໃຈໃສ່, ສ້າງເງື່ອນໄຂສະດວກໃຫ້ບັນດາວິສາຫະກິດ ສ.ເກົາຫຼີ ເວົ້າສະເພາະ ແລະ ພົນລະເມືອງ ສ.ເກົາຫຼີ ເວົ້າລວມ ໃຫ້ປະສົບຜົນສຳເລັດໃນການດຳເນີນທຸລະກິດ, ດຳລົງຊີວິດຢ່າງໝັ້ນຄົງຢູ່ ຫວຽດນາມ, ຜ່ານນັ້ນ ກໍປະກອບສ່ວນຊຸກຍູ້ການຮ່ວມມືລະຫວ່າງ 2 ປະເທດ, ພິເສດແມ່ນດ້ານເສດຖະກິດ ແລະ ການພົບປະແລກປ່ຽນປະຊາຊົນ.
ກ່ຽວກັບເລື່ອງນີ້, ທ່ານນາຍົກລັດຖະມົນຕີ ຫວຽດນາມ ເນັ້ນໜັກວ່າ ບັນດາອົງການລັດຖະບານ ແລະ ທ້ອງຖິ່ນ ຫວຽດນາມ ຍາມໃດກໍ່ພ້ອມແລ້ວທີ່ຈະແລກປ່ຽນ, ຮັບຟັງຄຳເຫັນເພື່ອພ້ອມກັບຝ່າຍ ສ.ເກົາຫຼີ ຍົກອອກບັນດາການແກ້ໄຂຜັນຂະຫຍາຍບັນດາເປົ້າໝາຍລວມຢ່າງມີປະສິດທິຜົນທີ່ສຸດ, ບັນລຸໄດ້ຜົນປະໂຫຍດຂອງທັງສອງຝ່າຍໃນທາງດ້ານຈິດໃຈ ແລະ ການແບ່ງປັນ.
ທ່ານນາຍົກລັດຖະມົນຕີ ຫວຽດນາມ ກໍ່ສະເໜີໃຫ້ຝ່າຍ ສ.ເກົາຫຼີ ສືບຕໍ່ເປີດກ້ວາງການພົບປະແລກປ່ຽນປະຊາຊົນ; ເພີ່ມທະວີການຮ່ວມມືດ້ານການທ່ອງທ່ຽວ; ໜູນຊ່ວຍການບຳລຸງສ້າງ ແລະ ເພີ່ມທະວີການຮັບເອົາແຮງງານທີ່ຄຸນນະພາບສູງຂອງ ຫວຽດນາມ. ທ່ານນາຍົກລັດຖະມົນຕີ ປາດຖະໜາວ່າ ລັດຖະບານ ສ.ເກົາຫຼີ ຈະສືບຕໍ່ໜູນຊ່ວຍປະຊາຄົມຊາວ ຫວຽດນາມ ໃຫ້ມີຄວາມອຸ່ນອ່ຽນໃຈໃນການດຳລົງຊີວິດ, ຮ່ຳຮຽນ ແລະ ເຮັດວຽກຢູ່ ສ.ເກົາຫຼີ ຢ່າງຍາວນານ.
ທ່ານນາຍົກລັດຖະມົນຕີ ຫວຽດນາມ ສະເໜີໃຫ້ 2 ຝ່າຍເພີ່ມທະວີການຮ່ວມມືໃນບັນດາເວທີປາໄສພາກພື້ນ ແລະ ສາກົນ, ໃນນັ້ນ ກໍມີການສະເໜີໃຫ້ ສ.ເກົາຫຼີ ໜູນຊ່ວຍ ຫວຽດນາມ ຈັດຕັ້ງກອງປະຊຸມສຸດຍອດຄູ່ຮ່ວມມືເພື່ອການເຕີບໂຕສີຂຽວ ແລະ ເປົ້າໝາຍທົ່ວໂລກ 2030 (P4G) ໃນປີ 2025 ຢ່າງສຳເລັດຜົນ.
ທ່ານເອກອັກຄະລັດຖະທູດ Choi Young Sam ໄດ້ເຫັນດີເປັນເອກະພາບກັບບັນດາຄຳເຫັນຂອງທ່ານນາຍົກລັດຖະມົນຕີ ຫວຽດນາມ ຟ້າມມິຈິງ; ສະແດງຄວາມຂອບອົກຂອບໃຈຕໍ່ຄວາມເອົາໃຈໃສ່ຂອງທ່ານນາຍົກລັດຖະມົນຕີ ເວົ້າສະເພາະ ແລະ ລັດຖະບານ ຫວຽດນາມ ເວົ້າລວມ; ຢືນຢັນຈະມານະພະຍາຍາມຈົນສຸດຄວາມສາມາດຂອງຕົນ ເພື່ອປະກອບສ່ວນເຂົ້າໃນການພັດທະນາຂອງການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສ.ເກົາຫຼີ ໃນອາຍຸການຢູ່ ຫວຽດນາມ.
ມິງດຶກ
