ວັນທີ 25 ມັງກອນ, ຄະນະປະຕິບັດງານຂອງກອງບັນຊາການ ປກສ ແຂວງຄໍາມ່ວນ ນໍາໂດຍທ່ານພັນເອກ ຄໍາສິງ ນົນທະສອນ ຮອງຫົວໜ້າກອງບັນຊາການ ປກສ ແຂວງຄຳມ່ວນ ໄດ້ມາຢ້ຽມຢາມ, ມອບຂອງຂວັນ, ອວຍພອນປີໃໝ່ພະນັກງານ, ນັກຮົບ ກອງບັນຊາການຕໍາຫຼວດແຂວງ ກວາງບິ່ງ.
ທີ່ການພົບປະ, ການນຳຕຳຫຼວດຂອງສອງແຂວງໄດ້ແລກປ່ຽນບາງຂໍ້ມູນກ່ຽວກັບສະພາບເສດຖະກິດ - ສັງຄົມ, ຄວາມໝັ້ນຄົງ, ຄວາມເປັນລະບຽບຮຽບຮ້ອຍຢູ່ເຂດຊາຍແດນຫວຽດນາມ - ລາວ; ພ້ອມທັງ, ເຫັນດີເປັນເອກະພາບຕັດສິນໃຈປະຕິບັດວຽກງານຮັບປະກັນຄວາມໝັ້ນຄົງແຫ່ງຊາດ, ຮັກສາຄວາມເປັນລະບຽບຮຽບຮ້ອຍທາງສັງຄົມ, ພິເສດແມ່ນວຽກງານປ້ອງກັນ, ຕ້ານອາດຊະຍາກຳຢາເສບຕິດຂ້າມຊາດຢ່າງມີປະສິດທິຜົນ; ສືບຕໍ່ຮັບປະກັນສິດ ແລະຜົນປະໂຫຍດອັນຊອບທຳຂອງປະຊາຊົນເມື່ອໄປມາ ແລະພົບປະແລກປ່ຽນຢູ່ເຂດຊາຍແດນ.
 |
| ກອງບັນຊາການ ປກສ ແຂວງຄຳມ່ວນ ອວຍພອນປີໃໝ່ພະນັກງານ, ນັກຮົບກອງບັນຊາການຕຳຫຼວດແຂວງ ກວາງບິ່ງ. ພາບ: congan.quangbinh.gov.vn |
ເນື່ອງໃນໂອກາດບຸນປີໃໝ່ປະຈໍາຊາດຂອງຫວຽດນາມ, ໃນນາມການນຳກອງບັນຊາການ ປກສ ແຂວງຄຳມ່ວນ, ທ່ານພັນເອກ ຄໍາສິງ ນົນທະສອນ ໄດ້ສົ່ງຄຳອວຍພອນເຖິງພະນັກງານ, ນັກຮົບກອງບັນຊາການຕຳຫຼວດແຂວງ ກວາງບິ່ງ ປີໃໝ່ມີສຸຂະພາບເຂັ້ມແຂງ ແລະປະສົບຜົນສຳເລັດໃນທຸກໜ້າທີ່ວຽກງານ.
ທ່ານພັນເອກພິເສດ ເຈິ່ນກວາງຮ໊ຽວ, ຮອງຫົວໜ້າກອງບັນຊາການຕຳຫຼວດ ແຂວງກວາງບິ່ງ ໄດ້ສະແດງຄວາມຂອບໃຈຢ່າງຈິງໃຈຕໍ່ການນຳ ແລະພະນັກງານ-ນັກຮົບກອງບັນຊາການປ້ອງກັນຄວາມສະຫງົບແຂວງ ຄຳມ່ວນ; ພ້ອມທັງ ປາດຖະໜາວ່າກອງບັນຊາການຕໍາຫຼວດແຂວງກວາງບິ່ງ ແລະ ກອງບັນຊາການປ້ອງກັນຄວາມສະຫງົບແຂວງຄຳມ່ວນ ຈະສືບຕໍ່ເສີມຂະຫຍາຍມູນເຊື້ອ, ປະຕິບັດວຽກງານຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍຢູ່ເຂດຊາຍແດນ ກໍ່ຄືບັນດາເນື້ອໃນຂອງບົດບັນທຶກຊ່ວຍຈຳການຮ່ວມມືລະຫວ່າງກະຊວງຕຳຫຼວດຫວຽດນາມ ແລະກະຊວງປ້ອງກັນຄວາມສະຫງົບລາວ, ແລະລະຫວ່າງກອງບັນຊາການຕຳຫຼວດແຂວງກວາງບິ່ງ ແລະກອງບັນຊາການປ້ອງກັນຄວາມສະຫງົບແຂວງຄຳມ່ວນ.
ຕາງໜ້າການນຳກອງບັນຊາການ ຕຳຫຼວດ ແຂວງກວາງບິ່ງ, ທ່ານພັນເອກພິເສດ ເຈິ່ນກວາງຮ໊ຽວ ໄດ້ສົ່ງຄຳອວຍພອນເຖິງພະນັກງານ, ນັກຮົບ, ກອງບັນຊາການ ປກສ ແຂວງ ຄຳມ່ວນ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ, ອວຍພອນໃຫ້ພົວພັນອັນດີງາມ ລະຫວ່າງ 2 ແຂວງນັບມື້ນັບພັດທະນາ.
ສົມເພັດ
