ຕອນເຊົ້າວັນທີ 14 ພະຈິກ, ຢູ່ກອງພັນໃຫຍ່ 741, ກອງບັນຊາການທະຫານແຂວງດ້ຽນບຽນ ໄດ້ຈັດພິທີເປີດຊຸດຝຶກອົບຮົມວຽກງານກູ້ຊີບ, ກູ້ໄພພິບັດທຳມະຊາດໃຫ້ແກ່ພະນັກງານ ຂຶ້ນກັບກອງບັນຊາການທະຫານແຂວງຫຼວງພະບາງ, ລາວ 20 ຄົນ.
ນີ້ແມ່ນການເຄື່ອນໄຫວທີ່ປະຕິບັດຕາມແຜນນະໂຍບາຍການຮ່ວມມືສາກົນໃນວຽກງານກູ້ຊີບ, ກູ້ໄພພິບັດທຳມະຊາດ, ພ້ອມທັງຍົກສູງນໍ້າໃຈສາມັກຄີ, ຮ່ວມມື, ມິດຕະພາບລະຫວ່າງແຂວງດ້ຽນບຽນ ແລະຫຼວງພະບາງ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຫວຽດນາມ-ລາວ.
 |
| ບັນຍາກາດທີ່ພິທີເປີດ. ພາບ: qdnd.vn |
ໃນໄລຍະຝຶກອົບຮົມ 1 ອາທິດ, ບັນດາພະນັກງານຂອງລາວ ຈະໄດ້ຮັບການແນະນຳກ່ຽວກັບມູນເຊື້ອ, ສາຍພົວພັນຮ່ວມມືລະຫວ່າງສອງພັກ, ສອງລັດ, ສອງກອງທັບຫວຽດນາມ-ລາວ; ວິທີການສ້າງແຜນການຮັບມືກັບໄພພິບັດທຳມະຊາດ, ອຸບັດຕິເຫດ ແລະການຊອກຫາກູ້ຊີບ, ກູ້ໄພ; ແນະນຳກ່ຽວກັບເອກະສານຝຶກຊ້ອມການຮັບມືກັບພະຍຸ, ໄພນໍ້າຖ້ວມ (ໄຟໄໝ້ປ່າ) ແລະການຊອກຫາກູ້ໄພຢູ່ຂັ້ນເມືອງ, ຕາແສງ... ຄຽງຂ້າງນັ້ນ, ບັນດາພະນັກງານຂອງລາວ ຍັງຈະໄດ້ໄປຢ້ຽມຊົມປູຊະນີຍະສະຖານປະຫວັດສາດຈຳນວນໜຶ່ງຢູ່ນະຄອນດ້ຽນບຽນຝູ.
ກ່າວຄຳເຫັນທີ່ພິທີເປີດ, ສະຫາຍພັນເອກພິເສດ ລ້າຍແມ້ັ້ງຮຸ່ງ, ຮອງຫົວໜ້າການທະຫານ, ຫົວໜ້າເສນາທິການກອງບັນຊາການທະຫານແຂວງດ້ຽນບຽນ ໄດ້ຮຽກຮ້ອງໃຫ້ຄະນະຈັດຕັ້ງຮັບປະກັນທຸກດ້ານໃຫ້ແກ່ຊຸດຝຶກອົບຮົມເປັນຢ່າງດີ; ນັກຮຽນການທະຫານຕ້ອງປະຕິບັດຂໍ້ກຳນົດຂອງຄະນະຈັດຕັ້ງຢ່າງເຂັ້ມງວດ, ຍົກສູງບົດບາດ, ຄວາມຮັບຜິດຊອບ, ແກ້ໄຂທຸກຄວາມຫຍຸ້ງຍາກ, ພິເສດແມ່ນບັນຫາດ້ານພາສາໃນການດໍາລົງຊີວິດ, ຮໍ່າຮຽນ; ຕັ້ງໜ້າຄົ້ນຄວ້າ, ກໍາແໜ້ນຫຼັກການທິດສະດີທີ່ເປັນພື້ນຖານເພື່ອນໍາໃຊ້ເຂົ້າໃນເງື່ອນໄຂລະອຽດຂອງແຕ່ລະກົມກອງ. ພ້ອມກັນນັ້ນ, ເສີມຂະຫຍາຍລັກສະນະທີ່ຂະຫຍັນຂັນເຄື່ອນ, ປະດິດຄິດສ້າງ, ຄວາມສາມາດຮຽນດ້ວຍຕົນເອງ, ຄົ້ນຄວ້າຕົນເອງຂອງພະນັກງານ, ຍົກສູງນໍ້າໃຈສາມັກຄີ, ຊ່ວຍເຫຼືອເຊິ່ງກັນ ແລະກັນໃນການຮໍ່າຮຽນ, ຝຶກຝົນຫຼໍ່ຫຼອມ.
ສະຫາຍພັນໂທ ພັນມະຫາ ສຸວັນນະຈັກ, ຫົວໜ້າພະແນກແຜນການ, ຫ້ອງພະລາທິການ (ກອງບັນຊາການທະຫານແຂວງຫຼວງພະບາງ) ຕາງໜ້າໃຫ້ນັກຮຽນການທະຫານ 20 ຄົນ ທີ່ເຂົ້າຮ່ວມຊຸດຝຶກອົບຮົມ ສະແດງຄວາມຂອບໃຈຢ່າງຈິງໃຈມາຍັງຄະນະພັກ, ກອງບັນຊາການທະຫານແຂວງດ້ຽນບຽນ ທີ່ໄດ້ຊ່ວຍເຫຼືອ, ສ້າງເງື່ອນໄຂໃຫ້ນັກຮຽນການທະຫານ ທີ່ມາເຂົ້າຮ່ວມຊຸດຝຶກອົບຮົມຄັ້ງນີ້. ພ້ອມທັງໃຫ້ຄຳໝັ້ນສັນຍາວ່າຈະປະຕິບັດທຸກລະບອບ, ຂໍ້ກຳນົດຂອງຄະນະຈັດຕັ້ງຊຸດອົບຮົມວາງອອກຢ່າງເຂັ້ມງວດ, ພະຍາຍາມຕັ້ງໃຈຄົ້ນຄວ້າຮ່ຳຮຽນ, ຮັບເອົາຄວາມຮູ້, ເນື້ອໃນຂອງບົດຮຽນເພື່ອໃຫ້ໄດ້ໝາກຜົນສູງທີ່ສຸດ.
ບູນມີ
