ສະຖານທູດຫວຽດນາມ ປະຈຳລາວ ໄດ້ຈັດພິທີສະເຫຼີມສະຫຼອງ 130 ປີແຫ່ງວັນເກີດ ຂອງປະທານໂຮ່ຈີມິນ
	ສະຖານທູດຫວຽດນາມ ປະຈຳລາວ ໄດ້ຮຽກຮ້ອງໃຫ້ພົນລະເມືອງ ປະຕິບັດຄຳສັງກ່ຽວກັບການສະກັດກັ້ນພະຍາດ Covid-19

ຕອນເຊົ້າວັນທີ 10 ພະຈິກ, ຢູ່ນະຄອນຫຼວງວຽງຈັນ (ລາວ), ຄະນະປະຕິບັດງານແຂວງ ຕວຽນກວາງ ນຳໂດຍສະຫາຍນາງ ເລທິກິມຢຸງ, ເລຂາປະຈຳພັກແຂວງ, ປະທານສະພາປະຊາຊົນແຂວງ ຕງຽນກວາງ ເປັນຫົວໜ້າຄະນະ ໄດ້ໄປຢ້ຽມຢາມ ແລະເຮັດວຽກກັບສະຖານທູດຫວຽດນາມ ປະຈໍາລາວ.

ສະຫາຍນາງ ເລທິກິມຢຸງ ແລກປ່ຽນກັບທ່ານເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສປປ ລາວ ຫງວຽນບ໋າຮຸ່ງ. ພາບ: tuyenquang.dcs.vn

ທີ່ການຕ້ອນຮັບ ແລະເຮັດວຽກກັບຄະນະມີ ທ່ານ ຫງວຽນບ໋າຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳລາວ.

ທີ່ການເຮັດວຽກ, ສະຫາຍນາງ ເລທິກິມຢຸງ ໄດ້ແຈ້ງໃຫ້ຊາບໂດຍສັງເຂບກ່ຽວກັບສະພາບການເສດຖະກິດ - ສັງຄົມ ແລະແນະນຳຄວາມສາມາດບົ່ມຊ້ອນ, ທ່າແຮງຂອງແຂວງ.

ແຂວງ ຕວຽນກວາງ ຮູ້ສຶກເປັນກຽດ ແລະພາກພູມໃຈທີ່ໄດ້ເປັນສະຖານທີ່ຈັດຕັ້ງບັນດາເຫດການສຳຄັນຂອງການປະຕິວັດລາວ ແລະການເຄື່ອນໄຫວຂອງສະເດັດເຈົ້າສຸພານຸວົງ, ປະທານ ໄກສອນ ພົມວິຫານ ແລະບັນດາພະນັກງານການປະຕິວັດລາວ. ນີ້ແມ່ນບັນດາພະຍານຫຼັກຖານທີ່ມີຊີວິດຊີວາກ່ຽວກັບນ້ຳໃຈສາມັກຄີບໍລິສຸດຜຸດຜ່ອງ, ສາຍພົວພັນແບບພິເສດອັນເລິກເຊິ່ງລະຫວ່າງການປະຕິວັດຫວຽດນາມ ແລະການປະຕິວັດລາວ ແລະ ລະຫວ່າງປະຊາຊົນສອງປະເທດຫວຽດນາມ - ລາວ.

ໃນຊຸມປີຜ່ານມາ, ແຂວງ ຕວຽນກວາງ ໄດ້ປັບປຸງ ແລະຊຸກຍູ້ການພົວພັນຮ່ວມມືມິດຕະພາບທີ່ເປັນມູນເຊື້ອກັບບັນດາທ້ອງຖິ່ນຂອງລາວຢ່າງບໍ່ຢຸດຢັ້ງ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ - ລາວ. ສະຫາຍ ຫວັງວ່າ ສະຖານທູດຈະແນະນໍາ, ໂຄສະນາເຜີຍແຜ່ທ່າແຮງ, ຄວາມສາມາດບົ່ມຊ້ອນຂອງແຂວງ ຕວຽນກວາງ ເພື່ອແນໃສ່ດຶງດູດນັກລົງທຶນລາວ ເຂົ້າມາຊອກຮູ້ ແລະຮ່ວມມືລົງທຶນ ຢູ່ແຂວງ ຕວຽນກວາງ; ແນະນຳກາລະໂອກາດຮ່ວມມືລົງທຶນຢູ່ລາວ ໃຫ້ບັນດາວິສາຫະກິດແຂວງ ຕວຽນກວາງ.

ຄະນະປະຕິບັດງານແຂວງ ຕວຽນກວາງ ແລະທ່ານເອກອັກຄະລັດຖະທູດ ຫງວຽນບ໋າຮຸ່ງ ຖ່າຍຮູບລວມກັບພະນັກງານ, ລັດຖະກອນສະຖານທູດຫວຽດນາມ ປະຈໍາລາວ. ພາບ: tuyenquang.dcs.vn

ພ້ອມກັນນັ້ນ, ກໍ່ໜູນຊ່ວຍການເຊື່ອມຕໍ່ ແລະຊຸກຍູ້ການເປີດກວ້າງການຮ່ວມມືໃນບັນດາຂົງເຂດ: ພົບປະແລກປ່ຽນວັດທະນະທຳ, ພົບປະແລກປ່ຽນປະຊາຊົນ, ການທ່ອງທ່ຽວລະຫວ່າງແຂວງ ຕວຽນກວາງ ກັບບັນດາທ້ອງຖິ່ນຂອງລາວ, ປະກອບສ່ວນເພີ່ມທະວີການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງ ຫວຽດນາມ ແລະ ລາວ.

ທ່ານເອກອັກຄະລັດຖະທູດ ຫງວຽນບ໋າຮຸ່ງ ໄດ້ເຫັນດີກັບຄຳເຫັນສະເໜີຂອງຄະນະປະຕິບັດງານ. ພ້ອມທັງຢືນຢັນຈະສືບຕໍ່ຕິດຕາມ ແລະຊຸກຍູ້ການຮ່ວມມືລະຫວ່າງແຂວງ ຕວຽນກວາງ ກັບບັນດາທ້ອງຖິ່ນຂອງລາວ. ທ່ານເອກອັກຄະລັດຖະທູດ ສະເໜີໃຫ້ແຂວງ ສືບຕໍ່ເອົາໃຈໃສ່ເຖິງວຽກງານກໍ່ສ້າງ ແລະບຳລຸງນັກຮຽນ, ນັກສຶກສາ ແລະພະນັກງານຂອງປະເທດເພື່ອນລາວ. ຈາກນັ້ນ ກໍ່ປະກອບສ່ວນຮັກສາ ແລະເພີ່ມພູນຄູນສ້າງສາຍພົວພັນອັນສະໜິດຕິດພັນລະຫວ່າງປະຊາຊົນລາວ ອ້າຍນ້ອງ ກັບປະຊາຊົນ ຫວຽດນາມ.