ປະທານປະເທດ ລາວ: ແຂວງຫລວງພະບາງຕ້ອງກ່່ານຊຸຸກຍູ້ພັດທະນາເສດຖະກິດຕາມທ່າແຮງ

	ປະທານປະເທດ ແຫ່ງ ສປປ ລາວ ຢ້ຽມຢາມ ລັດຖະກິດ ຣາຊະອານາຈັກ ກຳປູເຈຍ
	ປະທານປະເທດ ຫວໍວັນເຖືອງ ສິ້ນສຸດການຢ້ຽມຢາມ ສປປ.ລາວ ຢ່າງເປັນທາງການ

ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ວັນທີ 6 ຕຸລາ 2013 ນີ້, ທ່ານ ທອງລຸນ ສີສຸລິດ ປະທານປະເທດ ພ້ອມຄະນະ ລົງຢ້ຽມຢາມ ແລະພົບ ປະໂອ້ລົມ ປະຊາຊົນບ້ານບວມອໍ້ ເມືອງຊຽງເງິນ ແຂວງຫລວງພະບາງ ໂດຍທ່ານເນັ້ນໃຫ້ປະຊາຊົນ ພ້ອມກັນເສີມຂະຫຍາຍຄວາມສາມັກຄີພາຍໃນບ້ານ, ພ້ອມກັນພັດທະ ນາເສດະກິດ ຕາມທ່າແຮງ ເປັນຕົ້ນ ການປູກຝັງ-ລ້ຽງສັດ ແລະ ຜະລິດຫັດຖະກຳ ໃຫ້ເປັນສິນຄ້ານັບມື້ຫລາຍຂຶ້ນ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງເມືອງ-ຂອງແຂວງ ໃຫ້ມີຄວາມເຂັ້ມແຂງ.

ໂອກາດນີ້, ທ່ານປະທານປະເທດ ພ້ອມຄະນະ ກໍໄດ້ຮັບຟັງການລາຍງານສະພາບຂອງບ້ານໂດຍຫຍໍ້ວ່າ: ບ້ານບວມອໍ້ ເປັນບ້ານຈັດສັນໃໝ່ ເນື່ອງຈາກບ້ານເກົ່າ ເປັນຈຸດທີ່ຖືກຜົນກະທົບຈາກການກໍ່ສ້າງເສັ້ນທາງລົດໄຟລາວ-ຈີນ ມີປະຊາຊົນທີ່ຖືກຜົນກະທົບ ຕ້ອງຍົກຍ້າຍອອກໄປຕັ້ງພູມລຳເນົາໃໝ່ຈຳນວນ 107 ຄອບຄົວ, ສຳລັບການແກ້ໄຂຜົນກະທົບດ້ານທີ່ພັກອາໄສ ໃຫ້ແກ່ປະຊາຊົນ ແມ່ນໄດ້ຮັບທຶນຊ່ວຍເຫລືອລ້າຈາກ ສປ ຈີນ ໃນການກໍ່ສ້າງ. ຜ່ານການຄົ້ນຄວ້າ-ຄັດເລືອກ ໄດ້ນຳໃຊ້ເນື້ອທີ່ດິນຫລາຍກວ່າ 23 ເຮັກຕາ, ກໍ່ສ້າງເຮືອນ 3 ປະເພດຄື: ຂະໜາດໃຫຍ່ 13 ຫລັງ, ກາງ 68 ຫລັງ ແລະ ຂະໜາດນ້ອຍ 26 ຫລັງ. ນອກນີ້, ໄດ້ກໍ່ສ້າງໂຮງຮຽນປະຖົມ 1 ຫລັງ, ອະນຸບານ 1 ຫລັງ, ຫ້ອງການບ້ານ 1 ຫລັງ, ສຸກສາລາ 1 ຫລັງ ແລະ ສິ່ງອຳນວຍຄວາມສະດວກ ເປັນຕົ້ນ ເສັ້ນທາງ, ລະບົບໄຟຟ້າ ແລະ ນ້ຳລິນ ລວມມູນຄ່າການກໍ່ສ້າງທັງໝົດ 70 ລ້ານກວ່າຢວນ, ເລີ່ມລົງມືກໍ່ສ້າງແຕ່ວັນທີ 26 ກໍລະກົດ 2021, ມາຮອດປັດຈຸບັນ ການກໍ່ສ້າງໄດ້ສຳເລັດ ແລະ ໄດ້ຍົກຍ້າຍປະຊາຊົນເຂົ້າຢູ່ສຳເລັດ ໃນວັນທີ 14 ພຶດສະພາ 2022. ຈາກນັ້ນ, ໄດ້ມີພິທີມອບ-ຮັບຢ່າງເປັນທາງການໃນວັນທີ 29 ທັນວາ 2022 ເຊິ່ງຄະນະຮັບຜິດຊອບຂອງແຂວງ, ຂອງເມືອງ, ສົມທົບກັບອົງການປົກຄອງບ້ານ ພ້ອມດ້ວຍປະຊາຊົນ ໄດ້ດຳເນີນການຈົກສະຫລາກ ແລະ ມອບໃຫ້ປະຊາຊົນ ຜູ້ເປັນເຈົ້າຂອງເຮືອນແຕ່ລະຫລັງ ປົກປັກຮັກສາ, ຄຸ້ມຄອງ-ນຳໃຊ້ດ້ວຍຄວາມເພີ່ງພໍໃຈ ແລະ ມີຄວາມສະຫງົບເປັນຢ່າງດີ.

ໂອກາດການຢ້ຽມຢາມ ແລະ ເຮັດວຽກຢູ່ເມືອງຊຽງເງິນຄັ້ງນີ້, ທ່ານປະທານປະເທດ ທອງລຸນ ສີສຸລິດ ໄດ້ໄປຢ້ຽມຢາມພື້ນຖານໂຄງລ່າງຂອງບ້ານບວມອໍ້ ແລະ ໂອ້ລົມພະນັກງານຫລັກແຫລ່ງຂອງເມືອງຊຽງເງິນ ຕື່ມອີກ.