| ສ້າງການຮ່ວມທຶນ ຫວຽດນາມ-ລາວ ເພື່ອສຶກສາ ແລະ ກໍ່ສ້າງເສັ້ນທາງລົດໄຟ ວຽງຈັນ-ຫວູງອ່າງ | |
| ການຮ່ວມມື CLMV - ຊອກຫາມາດຕະການຟື້ນຟູເສດຖະກິດ |
ຕອນບ່າຍວັນທີ 2 ຕຸລາ 2023, ທີ່ສໍານັກງານກະຊວງແຜນການ ແລະການລົງທຶນຫວຽດນາມ, ທ່ານ ເຈິ່ນກວກເຟືອງ ຮອງລັດຖະມົນຕີກະຊວງແຜນການ ແລະການລົງທຶນຫວຽດນາມ ໄດ້ໃຫ້ການຕ້ອນຮັບທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ຫວຽດນາມ ເຂົ້າຢ້ຽມອໍາລາເນື່ອງໃນໂອກາດສິ້ນສຸດອາຍຸການປະຕິບັດງານຢູ່ຫວຽດນາມ.
ທີ່ການຕ້ອນຮັບ, ທ່ານຮອງລັດຖະມົນຕີ ເຈິ່ນກວກເຟືອງ ໄດ້ສະແດງຄວາມຊົມເຊີຍທ່ານເອກອັກຄະລັດຖະທູດ ແສງເພັດ ຮຸ່ງບຸນຍວງ ທີ່ໄດ້ປະສົບຜົນສໍາເລັດໃນການປະຕິບັດໜ້າທີ່ວຽກງານທາງການທູດຢູ່ຫວຽດນາມ, ຕີລາຄາສູງຕໍ່ການປະກອບສ່ວນທີ່ສຳຄັນ, ມີປະສິດທິຜົນຂອງສະຫາຍເອກອັກຄະລັດຖະທູດ ໃນການຊຸກຍູ້ການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ຫວຽດນາມ - ລາວ.
ພິເສດ, ປີ 2022 ແມ່ນປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ, ເນື່ອງໃນໂອກາດສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະການຮ່ວມມື ຫວຽດນາມ - ລາວ, ສະຫາຍເອກອັກຄະລັດຖະທູດ ແລະສະຖານທູດລາວ ໄດ້ສົມທົບກັບບັນດາອົງການຂອງຫວຽດນາມ ຢ່າງແໜ້ນແຟ້ນເພື່ອຈັດຕັ້ງການເຄື່ອນໄຫວສະເຫຼີມສະຫຼອງ, ທັງດ້ານການເມືອງ, ເສດຖະກິດ, ວັດທະນະທຳ ແລະສັງຄົມຢ່າງສຳເລັດຜົນ.
ທ່ານຮອງລັດຖະມົນຕີ ເຈິ່ນກວກເຟືອງ ຢືນຢັນວ່າ ຫວຽດນາມ ຈະສືບຕໍ່ແບ່ງປັນປະສົບການ, ໜູນຊ່ວຍລາວ ໃນການບຳລຸງສ້າງພະນັກງານຄຸ້ມຄອງເສດຖະກິດມະຫາພາກ; ພ້ອມທັງຫວັງວ່າ ໃນຖານະຕໍາແໜ່ງໃໝ່ ສະຫາຍເອກອັກຄະລັດຖະທູດ ກໍ່ຈະສືບຕໍ່ປະກອບສ່ວນເຂົ້າໃນການພັດທະນານ້ຳໃຈມິດຕະພາບທີ່ດີງາມ ແລະການພົວພັນແບບພິເສດຫວຽດນາມ - ລາວ .
 |
| ທ່ານຮອງລັດຖະມົນຕີ ເຈິ່ນກວກເຟືອງ ແລະ ທ່ານເອກອັກຄະລັດຖະທູດ ແສງເພັດ ຮຸ່ງບຸນຍວງ ທີ່ການຕ້ອນຮັບ. ພາບ: mpi.gov.vn |
ທ່ານເອກອັກຄະລັດຖະທູດ ແສງເພັດ ຮຸ່ງບຸນຍວງ ໄດ້ສະແດງຄວາມຂອບອົກຂອບໃຈຕໍ່ນ້ຳໃຈທີ່ຈິງໃຈຂອງພັກ, ລັດຖະບານ, ລັດ ແລະປະຊາຊົນ ຫວຽດນາມ, ການຮ່ວມມືຢ່າງມີປະສິດທິຜົນ, ແໜ້ນແຟ້ນຂອງກະຊວງແຜນການ ແລະການລົງທຶນ, ຄະນະກຳມະການຮ່ວມມື ຫວຽດນາມ - ລາວ ທີ່ມີຕໍ່ກັບພັກ, ລັດ ແລະປະຊາຊົນລາວ ເວົ້າລວມ ແລະກັບສະຫາຍເອກອັກຄະລັດຖະທູດ ເວົ້າສະເພາະ, ເຊິ່ງໄດ້ຊ່ວຍໃຫ້ສະຫາຍເອກອັກຄະລັດຖະທູດປະສົບຜົນສໍາເລັດໃນການປະຕິບັດໜ້າທີ່ໃນອາຍຸການຜ່ານມາ.
ທ່ານເອກອັກຄະລັດຖະທູດ ແສງເພັດ ຮຸ່ງບຸນຍວງ ໄດ້ຕີລາຄາສູງໝາກຜົນແຫ່ງການຮ່ວມມືຢ່າງມີປະສິດທິຜົນລະຫວ່າງຄະນະກຳມະການຮ່ວມມືສອງປະເທດ ຫວຽດນາມ - ລາວ, ລາວ - ຫວຽດນາມ. ໃນສະພາບການໂລກ ປະສົບກັບຄວາມຫຍຸ້ງຍາກຫຼາຍຢ່າງ, ການພົວພັນທີ່ເປັນມູນເຊື້ອລະຫວ່າງສອງປະເທດຍັງໄດ້ຮັບການປັບປຸງດ້ວຍບັນດາການຢ້ຽມຢາມຂັ້ນສູງເຊິ່ງກັນແລະກັນ, ບັນດາວິສາຫະກິດຫວຽດນາມ ລົງທຶນຢູ່ລາວ ນັບມື້ນັບສູງ, ການພົບປະແລກປ່ຽນປະຊາຊົນລະຫວ່າງສອງປະເທດໄດ້ຮັບການເພີ່ມທະວີ; ຫຼາຍໂຄງການໄດ້ຈັດຕັ້ງ, ຜັນຂະຫຍາຍ ນໍາເອົາປະສິດທິຜົນ ແລະຜົນປະໂຫຍດອັນແທດຈິງມາໃຫ້ແກ່ການພັດທະນາເສດຖະກິດ-ສັງຄົມ ຂອງລາວ. ພ້ອມດຽວກັນນັ້ນ ສະຫາຍ ຍັງເນັ້ນໜັກວ່າ ບໍ່ວ່າຈະດຳລົງຕຳແໜ່ງໃດກໍຕາມ, ກໍ່ຈະສືບຕໍ່ມານະພະຍາຍາມປະກອບສ່ວນ, ເພີ່ມພູນຄູນສ້າງໃຫ້ແກ່ສາຍພົວພັນລະຫວ່າງສອງປະເທດ.
