| ອິດສະຣາແອນ ໜູນຊ່ວຍ ຫວຽດນາມ ໃນການຕ້ານພະຍາດ COVID-19 | |
| ຍີ່ປຸ່ນ ໜຸນຊ່ວຍ ວັກຊີນ COVID-19 ໃຫ້ແກ່ຫວຽດນາມ ເພີ່ມອີກ |
ກົນໄກຮ່ວມມື CLMV ໄດ້ຮັບການສ້າງຕັ້ງຂຶ້ນແຕ່ປີ 2003. ນີ້ແມ່ນໜຶ່ງໃນບັນດາຄວາມມານະພະຍາຍາມຮັບມືກັບຄວາມຕ້ອງການພາວະວິໄສຂອງການເຊື່ອມໂຍງອະນຸພາກພື້ນ ແມ່ນ້ຳຂອງ ແລະ ອາຊຽນ. ການຮ່ວມມື CLMV ໄດ້ເລີ່ມມາຈາກແນວຄວາມຄິດຮັດແຄບໄລຍະຫ່າງພັດທະນາ ແນໃສ່ຊຸກຍູ້ການເຊື່ອມໂຍງຂອງບັນດາປະເທດ CLMV ເຂົ້າໃນວິວັດທະນາການພັດທະນາລວມຂອງພາກພື້ນ.
 |
| ກອງປະຊຸມລັດຖະມົນຕີເສດຖະກິດ ບັນດາປະເທດ ກຳປູເຈຍ - ລາວ - ມຽນມາ - ຫວຽດນາມ ຄັ້ງທີ 13 (CLMV EMM 13) ຫາກໍດຳເນີນຫວ່າງມໍ່ໆມານີ້ ຕາມຮູບການທາງອອນລາຍ ໂດຍ ມຽນມາ ເປັນປະທານ. ພາບ: vneconomy.vn |
ການຮ່ວມມື CLMV ແນໃສ່ເສີມຂະຫຍາຍທ່າໄດ້ປຽບ, ຄວາມສາມາດບົ່ມຊ້ອນຮ່ວມມືຂອງບັນດາປະເທດ CLMV ທີ່ມີຢູ່ແລ້ວ, ພ້ອມທັງແມ່ນຊ່ອງຮຽກຮ້ອງການໜູນຊ່ວຍຂອງບັນດາປະເທດ ອາຊຽນ ອື່ນ ແລະ ບັນດາຄູ່ຮ່ວມມືພັດທະນາ ໃຫ້ແກ່ບັນດາປະເທດ CLMV.
ການຮ່ວມມື CLMV ກໍແມ່ນເວທີປາໄສເພື່ອໃຫ້ບັນດາປະເທດ CLMV ສົມທົບຫຼັກໝັ້ນປະກອບສ່ວນປົກປ້ອງຜົນປະໂຫຍດຂອງບັນດາປະເທດດັ່ງກ່າວ ໃນວິວັດທະນາການເຊື່ອມຕໍ່ເສດຖະກິດ ອາຊຽນ, ກໍຄື ລະຫວ່າງ ອາຊຽນ ກັບຄູ່ຮ່ວມມືອື່ນໆ (ຈີນ, ຍີ່ປຸ່ນ, ສ.ເກົາຫຼີ). 6 ຂົງເຂດຮ່ວມມືຂອງ CLMV, ລວມມີ: ການຄ້າ ແລະ ການລົງທຶນ; ກະສິກຳ; ອຸດສາຫະກຳ ແລະ ພະລັງງານ; ການຄົມມະນາຄົມ; ການທ່ອງທ່ຽວ; ພັດທະນາແຫຼ່ງຊັບພະຍາກອນມະນຸດ.
ໜຶ່ງໃນບັນດາເນື້ອໃນຫຼັກໆ ເຊິ່ງລັດຖະມົນຕີເສດຖະກິດ 4 ປະເທດ CLMV ຈະນຳມາປຶກສາຫາລືໃນກອງປະຊຸມຄັ້ງນີ້ ແມ່ນແຜນການຟື້ນຟູເສດຖະກິດພາຍຫຼັງໂລກລະບາດໂຄວິດ - 19 ແລະ ບາດກ້າວຕໍ່ໄປເພື່ອຊຸກຍູ້ການຄ້າ, ການລົງທຶນ, ເພີ່ມທະວີການເຊື່ອມຕໍ່ລະຫວ່າງບັນດາປະເທດ CLMV.
ປີ 2021 ເຖິງວ່າຖືກຜົນກະທົບຈາກໂລກລະບາດໂຄວິດ - 19 ກໍຕາມ, ແຕ່ການຄ້າ ແລະ ການລົງທຶນໃນພາກພື້ນ CLMV ຍັງຮັກສາທ່າເຕີບໂຕໃນປີ 2020 ແລະ ຊຸມເດືອນຕົ້ນປີ 2021, ປະກອບສ່ວນເຂົ້າໃນການເຕີບໂຕລວມຂອງພາກພື້ນ ອາຊຽນ.
ທີ່ກອງປະຊຸມ, ລັດຖະມົນຕີເສດຖະກິດບັນດາປະເທດ CLMV ໄດ້ແບ່ງປັນຂໍ້ມູນ, ບົດຮຽນກ່ຽວກັບນະໂຍບາຍ, ມາດຕະການຕ່າງໆເພື່ອຮັບມືກັບໂລກລະບາດ ແລະ ຟື້ນຟູເສດຖະກິດຂອງປະເທດຕົນ, ສະເໜີບັນດາມາດຕະການເພື່ອຊຸກຍູ້ການຮ່ວມມືດ້ານການຄ້າ, ການລົງທຶນ ແລະ ເພີ່ມທະວີການເຊື່ອມຕໍ່ລະຫວ່າງບັນດາປະເທດ CLMV. ບັນດາປະເທດ CLMV ຈະສືບຕໍ່ເອື້ອອຳນວຍຄວາມສະດວກແກ່ການເຄື່ອນໄຫວນຳເຂົ້າ - ສົ່ງອອກຂອງກັນ, ພິເສດແມ່ນການເຄື່ອນໄຫວແຈ້ງພາສີຢູ່ດ່ານຊາຍແດນແຫ່ງຕ່າງໆຂອງເຂດຊາຍແດນ; ສົ່ງເສີມການເພີ່ມທະວີການຮ່ວມສຳພັນລະຫວ່າງວິສາຫະກິດບັນດາປະເທດ CLMV ໃນບັນດາຂົງເຂດປຸງແຕ່ງ, ສົ່ງອອກຜະລິດຕະພັນກະສິກຳ, ສະບຽງອາຫານ ແນໃສ່ສ້າງລະບົບສະໜອງໃນພາກພື້ນ ໂດຍ CLMV ເປັນເສົາຄ້ຳຕົ້ນຕໍ. ບັນດາປະເທດ CLMV ກໍເຫັນດີເພີ່ມທະວີການເຊື່ອມຕໍ່ກັບບັນດາເປົ້າໝາຍຂອງແຜນການສັງລວມການເຊື່ອມຕໍ່ ອາຊຽນ ຮອດປີ 2025.
ໄລຍະຜ່ານມາ, ບັນດາປະເທດ CLMV ໄດ້ຜັນຂະຫຍາຍແຜນການກະທຳຮ່ວມມືເສດຖະກິດ CLMV, ສົມທົບກັນຢ່າງແໜ້ນແຟ້ນໃນບັນດາການເຄື່ອນໄຫວຊຸກຍູ້ການຄ້າ ເປັນຕົ້ນແມ່ນ ຈັດງານຕະຫຼາດນັດ, ງານວາງສະແດງ, ການສົ່ງເສີມການຄ້າ, ການລົງທຶນ, ໜູນຊ່ວຍບັນດາວິສາຫະກິດຂະໜາດກາງ ແລະ ນ້ອຍ, ຈຸລະວິສາຫະກິດ ຜ່ານການເຊື່ອມຕໍ່ “B2B Matching” (ເຊື່ອມຕໍ່ວິສາຫະກິດກັບວິສາຫະກິດ)…
ໃນສະພາບການພາກພື້ນພວມມານະພະຍາຍາມຟື້ນຟູພາຍຫຼັງໂລກລະບາດໂຄວິດ - 19, ພ້ອມກັບການໃຫ້ບູລິມະສິດສັກວັກຊິນກັນພະຍາດໂຄວິ - 19 ນັ້ນ, ການສືບຕໍ່ຊຸກຍູ້ ແລະ ຮັກສາການຮ່ວມມື CLMV ຢ່າງມີປະສິດທິຜົນ ຈະຊ່ວຍຮັດແຄບຊ່ອງຫວ່າງພັດທະນາລະຫວ່າງບັນດາປະເທດສະມາຊິກ, ຊຸກຍູ້ວິວັດທະນາການຟື້ນຟູເສດຖະກິດລວມໃນ ອາຊຽນ.
ໄຊພອນ
