| ທີມນັກສຶກສາລາວ ໄດ້ຮັບລາງວັນທີໜຶ່ງໃນການແຂ່ງເວົ້າພາສາຫວຽດ |
| ອົບອຸ່ນອາຫານທຳອິດຂອງນັກສຶກສາລາວນາໆຊາດ ຢູ່ເຮືອນພໍ່ແມ່ປະຊາຊົນຫວຽດນາມ |
ນີ້ແມ່ນການເຄື່ອນໄຫວສະເຫຼີມສະຫຼອງ 56 ປີ ແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ກຳປູເຈຍ (24 ມິຖຸນາ 1967 – 24 ມິຖຸນາ 2023) ແລະ ຄົບຮອບ 61 ປີ ວັນສ້າງຕັ້ງການພົວພັນທາງການທູດ ຫວຽດນາມ - ລາວ (5 ກັນຍາ 1962 – 5 ກັນຍາ 2023).
ງານບຸນມີນັກສຶກສາລາວ ແລະ ກຳປູເຈຍ 72 ຄົນເຂົ້າຮ່ວມ; ໃນນັ້ນ, ມີນັກສຶກສາລາວ 7 ຄົນ ເປັນລູກລ້ຽງຂອງຊາວຫວຽດນາມ 3 ຄອບຄົວຢູ່ເມືອງ ຝູ້ຢວນ.
 |
| ງານບຸນດັ່ງກ່າວໄດ້ສ້າງສະພາບແວດລ້ອມໃຫ້ບັນດານັກສຶກສາລາວ ແລະ ກຳປູເຈຍ ທີ່ພວມຮ່ຳຮຽນຢູ່ນະຄອນ ໂຮ່ຈີມິນ ໄດ້ມີປະສົບການ, ແລກປ່ຽນ, ຊອກຮຽນຮູ້ກ່ຽວກັບຊີວິດວັດທະນະທຳຂອງຊາວ ຫວຽດນາມ. |
ກ່າວຄຳເຫັນທີ່ງານດັ່ງກ່າວໂດຍ ທ່ານ ເລ ວັນ ທູ, ຫົວໜ້າຄະນະໂຄສະນາສຶກສາ - ການພົວພັນຕ່າງປະເທດ ຄະນະກໍາມະການແນວໂຮມປະເທດຊາດຫວຽດນາມ ນະຄອນໂຮ່ຈິມິນ ກ່າວວ່າ: ໃນໄລຍະຜ່ານມານີ້, ຄະນະກຳມະການແນວໂຮມປະເທດຊາດ ຫວຽດນາມ ແລະ ບັນດາອົງການການເມືອງ-ສັງຄົມ ຂອງນະຄອນ ໂຮ່ຈີມິນ ໄດ້ຜັນຂະຫຍາຍປະຕິບັດຫຼາຍກິດຈະກໍາການເຄື່ອນໄຫວເພື່ອຍົກສູງ, ປັບປຸງຊີວິດການເປັນຢູ່ທາງດ້ານວັດຖຸ ແລະ ຈິດໃຈໃຫ້ນັກສຶກສາ ລາວ - ກຳປູເຈຍ ທີ່ຮ່ຳຮຽນຢູ່ນະຄອນ ໂຮ່ຈີມິນ, ປະກອບສ່ວນຍົກສູງຄຸນນະພາບການບຳລຸງສ້າງແຫຼ່ງຊັບພະຍາກອນມະນຸດ ລາວ - ກຳປູເຈຍ, ເພີ່ມທະວີການພົວພັນມິດຕະພາບທີ່ເປັນມູນເຊື້ອ ລະຫວ່າງ 3 ປະເທດ ຫວຽດນາມ - ລາວ - ກຳປູເຈຍ.
ທ່ານ ເລ ວັນ ທູ ໃຫ້ຮູ້ວ່າ: ປະຈຸບັນ, ມີຊາວຫວຽດນາມ 67 ຄອບຄົວ, ນັກສຶກສາລາວ 91 ຄົນ ແລະ ນັກສຶກສາກຳປູເຈຍ 14 ຄົນ ເຂົ້າຮ່ວມໂຄງການ “ຄອບຄົວຫວຽດນາມ ກັບນັກສຶກສາລາວ ແລະ ກຳປູເຈຍ ທີ່ພວມຮ່ຳຮຽນຢູ່ນະຄອນໂຮ່ຈີມິນ”. ຜ່ານການປະຕິບັດໂຄງການປີ 2023, ທັງຈຳນວນຄອບຄົວ ແລະ ນັກສຶກສາ ລ້ວນແຕ່ເພີ່ມຂຶ້ນທົບ 2 ເທົ່າເມື່ອທຽບໃສ່ປີ 2022. ສິ່ງດັ່ງກ່າວສະແດງໃຫ້ເຫັນຄວາມດຶງດູດຂອງໂຄງການ ກໍ່ຄືຄວາມມຸ່ງມາດປາດຖະໜາຂອງນັກສຶກສາລາວ, ກຳປູເຈຍ ໄດ້ລົງຕົວຈິງໃນການດໍາລົງຊີວິດ, ວັດທະນະທຳຊຸມຊົນ ແລະ ຊີວິດການເປັນຢູ່ຂອງຄອບຄົວຊາວຫວຽດນາມ.
ທ່ານ ເລ ວັນ ທູ ເນັ້ນໜັກວ່າ “ດ້ວຍຄວາມຮັກແພງ, ຄວາມເອົາໃຈໃສ່ເບິ່ງແຍງດູແລຂອງບັນດາສະມາຊິກໃນຄອບຄົວຊາວຫວຽດນາມ, ບັນດານ້ອງໆນັກຮຽນລາວ ແລະ ກຳປູເຈຍ ກໍ່ໄດ້ສຳຜັດ ແລະ ດຳລົງຊີວິດປະຈຳວັນ ດ້ວຍອາຫານເອກະລັກພື້ນເມືອງຂອງຄອບຄົວຫວຽດນາມ; ຮຽນພາສາຫວຽດນາມ ເພື່ອສື່ສານກັບຄອບຄົວ; ໄປຢ້ຽມຢາມ ແລະ ພັກຜ່ອນກັບຄອບຄົວ;... ດ້ວຍເຫດນັ້ນ, ໄດ້ຊ່ວຍໃຫ້ເຂົາເຈົ້າມີຄວາມໝັ້ນໃຈ ແລະ ອຸ່ນອ່ຽນທຸ່ນທ່ຽງໃນການສຶກສາຮ່ຳຮຽນຢູ່ນະຄອນ ໂຮ່ຈີມິນ ດ້ວຍແນວຄິດດຸໝັ່ນ, ຂະຫຍັນ, ມີຄວາມເຂົ້າໃຈຢ່າງເລິກກວ່າເກົ່າຕໍ່ກັບວັດທະນະທຳພື້ນເມືອງຂອງຄົນຫວຽດນາມ, ຂອງປະເທດຫວຽດນາມ ແລະ ນະຄອນໂຮ່ຈິມິນ”.
 |
| ຄະນະກຳມະການສູນກາງແນວໂຮມປະເທດຊາດຫວຽດນາມ ເມືອງ ຟູ້ຢວນ ໄດ້ມອບທຶນສຶກສາ 14 ທຶນ ມີມູນຄ່າ 1 ລ້ານດົ່ງ/ທຶນ ໃຫ້ນັກສຶກສາ ລາວ - ກຳປູເຈຍ. |
ໃນງານຄັ້ງນີ້ ລວມມີບັນດາການເຄື່ອນໄຫວແລກປ່ຽນວັດທະນະທຳ, ສິລະປະ, ອາຫານການກິນ ແລະ ພົບປະແລກປ່ຽນກັບນັກສຶກສາຍິງ ລາວ ແລະ ກຳປູເຈຍ. ພິເສດ, ຈຸດພົ້ນເດັ່ນແມ່ນລາຍການສິລະປະ, ແລກປ່ຽນວັດທະນະທຳ ແລະ ການປຸງແຕ່ງອາຫານ. ດ້ວຍຫຼາຍລາຍການສະແດງສິລະປະດົນຕີທີ່ເຂັ້ມຂຸ້ນໄປດ້ວຍສີສັນວັດທະນະທຳຂອງຊາດ ຫວຽດນາມ - ລາວ - ກຳປູເຈຍ ກໍ່ຄືບັນດາລົດຊາດ ແລະ ກິ່ນຫອມຂອງອາຫານທີ່ມີລັກສະນະພິເສດສະເພາະຂອງ 3 ປະເທດນັ້ນ, ບັນດາພະນັກງານ, ກຸ່ມສະມາຊິກ ແລະ ນັກສຶກສາ ລາວ - ກຳປູເຈຍ ກໍ່ໄດ້ນຳມາໃນງານບຸນເພື່ອໃຫ້ມີຫຼາຍສີສັນ, ບັນຍາກາດທີ່ຟົດຟື້ນ, ສະໜິດຕິດພັນກັນອີກ.
ໃນໂອກາດດັ່ງກ່າວ, ຄະນະກຳມະການ ແນວໂຮມປະເທດຊາດຫວຽດນາມ ເມືອງ ຟູ້ຢວນ ກໍ່ໄດ້ມອບທຶນການສຶກສາ 14 ທຶນ, ມີມູນຄ່າ 1 ລ້ານດົ່ງ/ທຶນ ໃຫ້ບັນດານັກສຶກສາ ລາວ - ກຳປູເຈຍ ແລະ ໄດ້ມອບຂອງທີ່ລະນຶກໃຫ້ບັນດາຜູ້ເຂົ້າຮ່ວມລາຍການ.
 |
| ມອບຊຸດເສື້ອຍາວຫວຽດນາມ ໃຫ້ແກ່ນັກສຶກສາ ລາວ ແລະ ກຳປູເຈຍ. |
ງານດັ່ງກ່າວ ໄດ້ສ້າງສະພາບແວດລ້ອມເພີ່ມເຕີມໃຫ້ບັນດານັກສຶກສາ ລາວ ແລະ ກຳປູເຈຍ ທີ່ພວມຮ່ຳຮຽນຢູ່ນະຄອນ ໂຮ່ຈີມິນ ໄດ້ສຳຜັດ, ພົບປະແລກປ່ຽນ, ຊອກຮູ້ກ່ຽວກັບຊີວິດວັດທະນະທຳຂອງຄົນຫວຽດນາມ; ຜ່ານນັ້ນ ກໍ່ຍັງໄດ້ຕິດພັນທາງດ້ານຈິດໃຈ, ປະກອບສ່ວນຊ່ວຍເຫຼືອຊີວິດການເປັນຢູ່ທາງດ້ານວັດຖຸ ແລະ ຈິດໃຈໃຫ້ບັນດານັກສຶກສາຕ່າງປະເທດ; ປະກອບສ່ວນປະຕິບັດລາຍການ “ຄອບຄົວຫວຽດນາມ ກັບນັກສຶກສາ ລາວ ແລະ ກຳປູເຈຍ ທີ່ພວມຮ່ຳຮຽນຢູ່ນະຄອນ ໂຮ່ຈີມິນ” ໄລຍະປີ 2021 – 2025 ຢ່າງມີປະສິດທິຜົນ.
ອານຸໄຊ ສະຫວັດ
