| ຊຸກຍູ້ການຮ່ວມມືລະຫວ່າງຄະນະກຳມະການສັນຕິພາບຫວຽດນາມ ແລະ ຄະນະກຳມະການສັນຕິພາບ ແລະ ສາມັກຄີລາວ | |
| ຄະນະຜູ້ແທນ ຄະນະກຳມະການສັນຕິພາບຫວຽດນາມ ຢ້ຽມຢາມ ສປປ ລາວ |
ໂດຍປະຕິບັດແຜນການຮ່ວມມືລະຫວ່າງຄະນະກຳມະການສັນຕິພາບຫວຽດນາມ ແລະ ຄະນະກຳມະການສັນຕິພາບ ແລະ ສາມັກຄີລາວ, ຕອບຮັບຄຳເຊີນຂອງທ່ານ ສົມມາດ ພົນເສນາ, ຮອງປະທານສະພາແຫ່ງຊາດລາວ, ປະທານຄະນະກຳມະການສັນຕິພາບ ແລະ ສາມັກຄີລາວ, ຄະນະຜູ້ແທນຄະນະກຳມະການສັນຕິພາບຫວຽດນາມ ນຳໜ້າ ໂດຍທ່ານ ອວງຈູລຶວ, ອະດີດຮອງປະທານສະພາແຫ່ງຊາດ ຫວຽດນາມ, ປະທານຄະນະກຳມະການສັນຕິພາບຫວຽດນາມ ໄດ້ມາຢ້ຽມຢາມລາວ ແຕ່ວັນທີ 19-22 ສິງຫາ.
ເຂົ້າຮ່ວມພິທີກໍ່ຍັງມີທ່ານນາງ ຫງວຽນເຟືອງງາ, ເລຂາຄະນະພັກ, ປະທານສະຫະພັນບັນດາອົງການມິດຕະພາບຫວຽດນາມ.
 |
ໃນຂອບເຂດການຢ້ຽມຢາມ ແລະ ເຮັດວຽກຢູ່ລາວ, ຕອນເຊົ້າວັນທີ 22 ສິງຫາ, ຢູ່ນະຄອນຫຼວງວຽງຈັນ, ຄະນະໄດ້ເຂົ້າຢ້ຽມຂ່ຳນັບທ່ານ ໄຊສົມພອນ ພົມວິຫານ - ປະທານສະພາແຫ່ງຊາດລາວ.
ທ່ານ ອວງຈູລືວ ໄດ້ສະແດງຄວາມຂອບໃຈຢ່າງຈິງໃຈເຖິງ ທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ທີ່ໄດ້ສະຫຼະເວລາມາຕ້ອນຮັບຄະນະ.
ທ່ານ ອວງຈູລືວ ໄດ້ສະແດງຄວາມຊົມເຊີຍບັນດາຜົນງານອັນໃຫຍ່ຫຼວງທີ່ພັກ, ລັດ ແລະ ປະຊາຊົນລາວ ຍາດມາໄດ້ໃນພາລະກິດປົກປັກຮັກສາ, ສ້າງສາ ແລະ ພັດທະນາປະເທດລາວ; ເນັ້ນໜັກວ່າ ພັກ, ລັດ ແລະ ປະຊາຊົນຫວຽດນາມ ຮູ້ບຸນຄຸນຢ່າງເລິກເຊິ່ງຕໍ່ການໜູນຊ່ວຍອັນໃຫຍ່ຫຼວງທີ່ພັກ, ລັດ ແລະ ປະຊາຊົນລາວ ໄດ້ມອບໃຫ້ຫວຽດນາມ ໃນພາລະກິດແຫ່ງການຕໍ່ສູ້ຍາດເອົາເອກະລາດແຫ່ງຊາດ, ປົດປ່ອຍປະເທດຊາດ ໃນເມື່ອກ່ອນ, ກໍ່ຄືໃນພາລະກິດແຫ່ງການສ້າງສາ ແລະ ປົກປັກຮັກສາປະເທດຊາດໃນປະຈຸບັນນີ້.
 |
ໂດຍລາຍງານຕໍ່ທ່ານປະທານສະພາແຫ່ງຊາດລາວ ກ່ຽວກັບໝາກຜົນການເຈລະຈາຜ່ານມາລະຫວ່າງ 2 ຄະນະກຳມະການສັນຕິພາບ, ທ່ານ ອວງຈູລືວ ໃຫ້ຮູ້ວ່າ ໃນໄລຍະຈະມາເຖິງ, 2 ຝ່າຍຈະເພີ່ມທະວີການສົມທົບ ແລະ ສະໜັບສະໜູນເຊິ່ງກັນ ແລະ ກັນໃນບັນດາການເຄື່ອນໄຫວການທູດປະຊາຊົນຫຼາຍຝ່າຍ, ໂດຍສະເພາະແມ່ນການເຄື່ອນໄຫວຂອງສະພາສັນຕິພາບໂລກ; ໜູນຊ່ວຍການຝຶກອົບຮົມ, ຍົກສູງລະດັບວິຊາສະເພາະໃຫ້ແກ່ພະນັກງານທີ່ເຂົ້າຮ່ວມວຽກງານການທູດປະຊາຊົນ; ແລກປ່ຽນປະສົບການກ່ຽວກັບວຽກງານຂອງສອງຝ່າຍ…
ທ່ານປະທານສະພາແຫ່ງຊາດ ໄຊສົມພອນ ພົມວິຫານ ຕ້ອນຮັບຄະນະຜູ້ແທນຄະນະກຳມະການສັນຕິພາບຫວຽດນາມ ທີ່ມາຢ້ຽມຢາມ ແລະ ເຮັດວຽກຢູ່ ລາວ.
ທ່ານໄດ້ຕີລາຄາສູງໝາກຜົນການເຈລະຈາ ລະຫວ່າງຄະນະກຳມະການສັນຕິພາບຂອງສອງປະເທດ, ແລະ ຢືນຢັນວ່າ ການຢ້ຽມຢາມ ແລະ ການຮ່ວມມືລະຫວ່າງ 2 ຄະນະ ໄດ້ປະກອບສ່ວນຊຸກຍູ້ການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ, ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ແລະ ລາວ-ຫວຽດນາມ.
ກ່ອນໜ້ານັ້ນ, ວັນທີ 21 ສິງຫາ, ຄະນະຜູ້ແທນຄະນະກຳມະການສັນຕິພາບຫວຽດນາມ ໄດ້ມີການເຈລະຈາກັບຄະນະກຳມະການສັນຕິພາບ ແລະ ສາມັກຄີຂອງລາວ ແລະ ເຂົ້າຮ່ວມກອງປະຊຸມສຳມະນາກ່ຽວກັບການທູດປະຊາຊົນ.
ທີ່ການເຈລະຈາ, 2 ຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການພັດທະນາເສດຖະກິດ - ສັງຄົມຂອງແຕ່ລະປະເທດ, ການເຄື່ອນໄຫວຂອງສອງຄະນະ, ໄດ້ແລກປ່ຽນຂໍ້ມູນຂ່າວສານກ່ຽວກັບສະພາບການພາກພື້ນ ແລະ ໂລກ.
2 ຄະນະ ຢືນຢັນຈະສືບຕໍ່ສົມທົບກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນ ແລະ ກັນ ເພື່ອຊຸກຍູ້ການແລກປ່ຽນ ແລະ ການຮ່ວມມືລະຫວ່າງປະຊາຊົນສອງປະເທດ, ເພີ່ມທະວີການສຶກສາສັນຕິພາບ ແລະ ຕ້ານສົງຄາມ, ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຫຼາຍຝ່າຍສາກົນ, ຊຸກຍູ້ສັນຕິພາບ, ການຮ່ວມມື ແລະ ການພັດທະນາ.
ທີ່ກອງປະຊຸມສຳມະນາກ່ຽວກັບການທູດປະຊາຊົນ, ທ່ານນາງ ຫງວຽນເຟືອງງາ, ປະທານສະຫະພັນບັນດາອົງການມິດຕະພາບຫວຽດນາມ ໄດ້ແຈ້ງໃຫ້ຊາບກ່ຽວກັບແນວຄິດການທູດຂອງ ໂຮ່ຈີມິນ, ລະບົບທັດສະນະຂອງພັກກອມມູນິດຫວຽດນາມ ກ່ຽວກັບການທູດປະຊາຊົນ ແລະ ແບ່ງປັນປະສົບການໃນການເຄື່ອນໄຫວການທູດປະຊາຊົນຫວຽດນາມ.
ບັນດາຜູ້ແທນ ໄດ້ປຶກສາຫາລື ແລະ ແລກປ່ຽນປະສົບການຢ່າງຕັ້ງໜ້າໃນການເຄື່ອນໄຫວວຽກງານການຕ່າງປະເທດຂອງບັນດາອົງການຈັດຕັ້ງລາວ, ໄດ້ສະເໜີຫຼາຍຂໍ້ສະເໜີແນະ ເພື່ອຍົກສູງຄຸນນະພາບ ແລະ ປະສິດທິພາບການເຄື່ອນໄຫວການທູດປະຊາຊົນ, ເນັ້ນໜັກເຖິງຄວາມສຳຄັນຂອງການພົບປະແລກປ່ຽນປະຊາຊົນ ແລະ ຄວາມຈຳເປັນຕ້ອງເພີ່ມທະວີການສຶກສາມູນເຊື້ອ, ການສຶກສາກ່ຽວກັບສັນຕິພາບໃຫ້ແກ່ລຸ້ນໜຸ່ມ, ໂດຍຜ່ານຫລາຍຮູບການທີ່ຫຼາກຫຼາຍ ເພື່ອເພີ່ມພູນຄູນສ້າງ ແລະ ເຮັດໃຫ້ສາຍພົວພັນມິດຕະພາບທີ່ເປັນມູນເຊື້ອ ແລະ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ເລິກເຊິ່ງຂຶ້ນຕື່ມ.
ຄຳຮຸ່ງ
