 |
ບັນຍາກາດກອງປະຊຸມພົບປະ. (ພາບ: ເກດສະໜາ )
ໃນວັນທີ 24 ທັນວາ 2018, ຄະນະຜູ້ແທນສັນຕິພາບສອງຝ່າຍ ໄດ້ພົບປະທີ່ນະຄອນຫລວງວຽງຈັນ, ເຊິ່ງຝ່າຍລາວ ນຳໂດຍ ສະຫາຍ ອາລຸນໄຊ ສູນນະລາດ, ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ, ຮອງປະທານຄະນະສັນຕິພາບ ແລະ ສາ ມັກຄີ ຂອງ ລາວ ແລະ ຝ່າຍ ຫວຽດນາມ ນຳໂດຍ ສະຫາຍ ຟາມ ວັນເຈືອງ, ອາດີດຮອງຫົວໜ້າຄະ ນະພົວພັນຕ່າງປະເທດສູນກາງພັກ, ຮອງປະທານຄະນະສັນຕິພາບຫວຽດນາມ ສອງຝ່າຍໄດ້ແຈ້ງສະພາບການພົ້ນເດັ່ນ ການພັດທະນາເສດຖະກິດ-ສັງຄົມ ຂອງແຕ່ລະປະເທດໃຫ້ກັນຊາບ, ປຶກສາຫາລື, ແລກ ປ່ຽນປະສົບການເຄື່ອນໄຫວວຽກງານສັນຕິພາບ ພ້ອມທັງແລກປ່ຽນທັດສະນະ ແລະ ຂໍ້ມູນຂ່າວສານ ກ່ຽວກັບສະພາບການພົ້ນເດັ່ນ ຂອງ ພາກພື້ນ ແລະ ໃນໂລກ ທີ່ສອງຝ່າຍມີຄວາມສົນໃຈ.
ໃນວັນດຽວກັນ ຄະນະຜູ້ແທນສັນຕິພາບ ຫວຽດນາມ ໄດ້ເຂົ້າຢ້ຽມຂ່ຳນັບ ສະຫາຍ ສົມພັນ ແພງຄຳມີ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີຂອງລາວ. ສອງຝ່າຍ ໄດ້ຕີລາຄາສູງ ຕໍ່ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ນັບມື້ໄດ້ຮັບການເສີມຂະຫຍາຍທັງທາງກ້ວາງ ແລະ ລວງເລິກ.
ໃນໂອກາດດັ່ງກ່າວ, ສະຫາຍ ປະທານຄະນະສັນຕິພາບ ແລະ ສາມັກຄີຂອງລາວ ໄດ້ສະແດງຄວາມເຊື່ອໝັ້ນວ່າ ຄະນະສັນຕິພາບສອງປະເທດ ຈະສືບຕໍ່ພົວພັນຮ່ວມມື, ຖອດຖອນບົດຮຽນນຳກັນ ກ່ຽວກັບການເຄື່ອນໄຫວວຽກງານ ສັນຕິພາບ ແລະ ເພີ່ມທະວີການແລກປ່ຽນຂໍ້ມູນຂ່າວສານ ແລະ ແລກປ່ຽນ ທັດສະນະ ຕໍ່ບັນຫາທີ່ພົ້ນເດັ່ນໃນພາກພື້ນ ແລະ ສາກົນ ພ້ອມກັນສືບຕໍ່ປະກອບສ່ວນເຂົ້າໃນພາລະກິດສັນຕິພາບ, ມິດຕະພາບ ແລະ ການຮ່ວມມືໃນພາກພື້ນ ແລະ ສາກົນ.
ນອກຈາກ ພົບປະເຮັດວຽກແລ້ວ ຄະນະຜູ້ແທນສັນຕິພາບ ຫວຽດນາມ ຍັງໄດ້ຢ້ຽມຊົມສະຖານທີ່ ທ່ອງທ່ຽວທາງທຳມະຊາດ, ວັດທະນາທຳ ແລະ ປະຫັວດສາດ ໃນນະຄອນຫລວງວຽງຈັນ ແລະ ແຂວງຈຳປາສັກ ອີກດ້ວຍ.
（ແຫຼ່ງຂໍ້ມູນ： ຂປລ）
