ເພີ່ມທະວີການແລກປ່ຽນ ແລະ ການຮ່ວມມືລະຫວ່າງຊາວໜຸ່ມ ຫວຽດນາມ - ສ.ເກົາຫຼີ

	ວົງເງິນການຄ້າຫວຽດນາມ - ສ.ເກົາຫຼີ ມຸ່ງໄປເຖິງຕັ້ງບັນລຸເປົ້າໝາຍ 150 ຕື້ USD ໃນປີ 2030
	ຫວຽດນາມ - ສ.ເກົາຫຼີ :ເພີ່ມທະວີການຮ່ວມມືສອງຝ່າຍ, ໂດຍສະເພາະແມ່ນໃນການຮ່ວມມືດ້ານເສດຖະກິດ

​ໂຄງການ​ແລກປ່ຽນ​ຊາວ​ໜຸ່ມ ຫວຽດນາມ - ສ.​ເກົາຫຼີ ໄດ້​ຈັດ​ຕັ້ງ​ໂດຍ​ຄະນະ​ກຳມະການ​ຊາວ​ໜຸ່ມ​ແຫ່ງ​ຊາດ ຫວຽດນາມ ສົມທົບ​ກັບ​ກະຊວງ​ຄອບຄົວ ​ແລະ ຄວາມ​ສະ​ເໝີ​ພາບ​ລະຫວ່າງຍິງ-ຊາຍ ສ.​ເກົາຫຼີ.

ຄະນະ​ຜູ້​ແທນ​ ຈະ​ໄປ​ໄວ້ອາໄລຢູ່​ສຸສານ​ປະທານ​ໂຮ່ຈິ​ມິນ; ຢ້ຽມຢາມ ແລະ ເຮັດວຽກກັບຄະນະຊາວໜຸ່ມ ແຂວງ ກວາງນິງ; ຢ້ຽມ​ຢາມ​ຮູບ​ແບບ​ຊາວ​ໜຸ່ມ​ພັດ​ທະ​ນາ​ເສດ​ຖະ​ກິດ; ໄປ​ທັດສະນະທັດສະນີຍະພາບ, ຮ່ອງຮອຍປະຫວັດສາດ, ໝູ່​ບ້ານ​ຫັດ​ຖະ​ກຳ; ລົງຕົວຈິງ ແລະ ຮຽນຮູ້ວັດທະນະທໍາຫວຽດນາມ; ພົບປະແລກປ່ຽນກັບນັກສຶກສາຫວຽດນາມ...

ທີ່​ການ​ຕ້ອນຮັບ​ຄະນະ​ຜູ້​ແທນ ສ.​ເກົາຫຼີ ທີ່​ເຂົ້າ​ຮ່ວມ​ໂຄງການ​ແລກປ່ຽນ​ຊາວ​ໜຸ່ມ ຫວຽດນາມ - ສ.​ເກົາຫຼີ 2023 ​ໃນ​ຕອນ​ເຊົ້າ​ວັນ​ທີ 1 ສິງຫາ, ທ່ານ​ນາງ ຫງວຽນ​ທິ​ງາ - ​ເລ​ຂາ​ທິ​ການ, ຫົວໜ້າ​ຫ້ອງ​ວ່າການ​ຄະນະ​ກຳມະການແຫ່ງ​ຊາດ ກ່ຽວກັບຊາວໜຸ່ມ ຫວຽດນາມ ​ໃຫ້​ຮູ້​ວ່າ: ການ​ພົວພັນ​ລະຫວ່າງ ຫວຽດນາມ - ສ.​ເກົາຫຼີ ພວມ​ຢູ່​ໃນ​ໄລຍະ​ພັດທະນາ​ທີ່​ດີ, ພິ​ເສດ​ແມ່ນ​ໃນ​ປີ 2022, 2 ຝ່າຍ​ໄດ້​ອອກ​ຖະ​ແຫຼ​ງການ​ຮ່ວມ​ ກ່ຽວ​ກັບ​ການ​ຍົກ​ລະດັບ​ການ​ພົວພັນ ຫວຽດນາມ - ສ.​ເກົາຫຼີ ຂຶ້ນ​ເປັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ. ສິ່ງ​ດັ່ງກ່າວ​ໄດ້​ເປີດ​ໂອກາດ​ໃໝ່​ຫຼາຍ​ຢ່າງ​ໃຫ້​ແກ່​ການ​ແລກປ່ຽນ ​ແລະ ພັດທະນາ​ການ​ຮ່ວມ​ມື​ລະຫວ່າງ ຫວຽດນາມ ​ແລະ ສ.​ເກົາຫຼີ, ​ໃນ​ນັ້ນ​ມີ​ການ​ເຄື່ອນ​ໄຫວ​ການ​ທູດ​ປະຊາຊົນ ​ແລະ ຊາວ​ໜຸ່ມ​ຂອງ 2 ປະ​ເທດ.

ຕາມ​ທ່ານ​ນາງ ຫງວຽນ​ທິ​ງາ ແລ້ວ, ​ໃນ​ໄລຍະ​ຜ່ານ​ມາ, ​ເຖິງ​ວ່າ​ຈະ​ໄດ້​ຮັບ​ຜົນ​ກະທົບ​ຈາກ​ພະຍາດ​ໂຄ​ວິດ-19, ​ແຕ່​ຄະນະ​ກຳມະການ​ຊາວ​ໜຸ່ມ​ແຫ່ງ​ຊາດ ຫວຽດນາມ, ກະຊວງ​ຄອບຄົວ ​ແລະ ຄວາມ​ສະ​ເໝີ​ພາບ​ລະຫວ່າງຍິງ-ຊາຍ ສ.​ເກົາຫຼີ, ພ້ອມກັບບັນດາ​ອົງການ​ຊາວ​ໜຸ່ມ 2 ປະ​ເທດ ​ກໍ່ຍັງ​ຮັກສາ​ການ​ຮ່ວມ​ມື​​ດ້ານ​ຊາວ​ໜຸ່ມ, ​ແລກປ່ຽນ​ບັນດາ​ການ​ເຄື່ອນ​ໄຫວ ​ແລະ ​ເວທີ​ປາ​ໄສດ້ວຍ​ຫົວ​ຂໍ້​ທີ່ຊາວ​ໜຸ່ມ​ຂອງ​ສອງ​ປະ​ເທດມີຄວາມສົນໃຈໃນ​ການ​ຊຸກຍູ້​ບົດບາດ​ຂອງ​ໄວ​ໜຸ່ມ​ເຂົ້າ​ຮ່ວມ​ການ​ພັດທະນາ​ປະ​ເທດຊາດ.

ພ້ອມ​ກັນ​ນັ້ນ, ສອງ​ຝ່າຍກໍ່ໄດ້ແລກປ່ຽນ​ບົດຮຽນ​ໃນ​ການ​ສ້າງ ​ແລະ ປະຕິບັດ​ນະ​ໂຍບາຍ​ພັດທະນາ​ຊາວ​ໜຸ່ມ​ຕື່ມ​ອີກ; ​ແລກປ່ຽນ​ປະສົບ​ການ​ດ້ານ​ການເລີ່ມ​ປະກອບ​ການ​ຂອງ​ຊາວ​ໜຸ່ມ... ທ່ານ​ນາງ​ ຫງວຽນ​ທິ​ງາ ​ໄດ້​ສະ​ເໜີ​ໃຫ້​ສອງ​ຝ່າຍ​ເພີ່ມ​ທະວີ​ການ​ແລກປ່ຽນ​ກ່ຽວ​ກັບ​ເຍົາວະຊົນ​ຢູ່ໃນ​ໂຮງຮຽນນຳອີກ.

ຄຳຮຸ່ງ