 |
ທະເລ ໂກໂຕ, ແຂວງ ກວ້າງນິງ: ເປັນສະຖານທີ່ທ່ອງທ່ຽວທີ່ທ່ານຄວນຈັດເຂົ້າໃນແຜນການທ່ອງທ່ຽວໃນເດືອນ ກໍລະກົດ, ທະເລ ໂກໂຕ ປຽບເໝືອນໄຂ່ມຸກທີ່ສວຍງາມທີ່ສຸດ ທີ່ມີປະກາລັງໃຕ້ທະເລອັນງົດງາມ, ນ້ຳທະເລສີຟ້າໃສ ແລະ ຫາດຊາຍຂາວທີ່ຍາວສຸດສາຍຕາ.
 |
ທະເລ-ໝູ່ເກາະ ກ໋າດບ່າ, ແຂວງ ຫ໋າຍຟ່ອງ: ໄດ້ຮັບການຂະໜານນາມຄື: “ ອັນຍະມະນີ ຂອງອ່າວ-ທະເລ ພາກເໝືອ” ທະເລ ກ໋າດບ່າ ເປັນສະຖານທີ່ທ່ອງທ່ຽວທີ່ມີຄວາມດຶງດູດນັກທ່ອງທ່ຽວໃນເດືອນ ກໍລະກົດ. ນອກຈາກຈະມີ ຫາດຊາຍຂາວ-ສະອາດ ສວຍງາມ ເໝາະແກ່ການລອຍ-ຫຼິ້ນນ້ຳທະເລແລ້ວ, ທີ່ນີ້ຍັງມີສະຖານທີ່ທ່ອງທ່ຽວທີ່ດືງດູດອີກຫຼາຍແຫ່ງຄື: ປ່າສະຫງວນແຫ່ງຊາດ ທີ່ມີລີງ-ຄ່າງ ກ໋າດບ່າ ເປັນສັດຫາຍາກ ແລະ ຖ້ຳ ຈຸງຈາງ ອັນລຶກລັບ-ໜ້າຄົ້ນຫາ.
 |
ທະເລ ວຸ໋ງເຕົ່າ: ທະເລ-ທ້ອງຟ້າ ປະສົມປະສານກັບຢ່າງລົງໂຕເປັນສີຟ້າໃສອັນຮົ່ມເຢັນ ປະກອບໃສ່ຫາດຊາຍຂາວ ທອດຍາວ ຢ່າງສວຍສົດງົດງາມ ເຮັດໃຫ້ສະຖານທີ່ທ່ອງທ່ຽວນີ້ ບໍ່ຄວນທີ່ຈະຂາດໃນໂປແກຼມການທ່ອງທ່ຽວທະເລຂອງທ່ານໃນລະດູຮ້ອນນີ້.
 |
ທະເລ ຫະລ໋ອງ, ແຂວງ ກວ້າງນິງ: ເປັນຊື່ທີ່ຄຸ້ນເຄີຍແຕ່ບໍ່ເຄີຍທີ່ຈະເກົ່າ, ທະເລຫະລ໋ອງ ເປັນບ່ອນທີ່ມີທະເລໃສ, ທິວທັດທຳມະຊາດສວຍງາມ ທີ່ທຳມະຊາດສ້າງໄວ້ໃຫ້.
 |
ທະເລ ຫາງຣ໋າຍ, ແຂວງນິງທົ້ນ: ທະເລ ຫາງຣ໋າຍ ບົດປະພັນທາງທຳມະຊາດຂອງ ແຂວງ ນິງທົ້ນ ດ້ວຍຄວາມງາມທີ່ມະຫັດສະຈັນ, ຄົງຄວາມປະຖົມປະຖານ ແລະ ງົດງາມອັນເລິກເຊິ່ງ. ທີ່ນີ້ ເປັນສະຖານທີ່ພົ້ນເດັ່ນ ດືງດູດແກ່ນັກຖ່າຍຮູບ ແລະ ນັກທ່ອງທ່ຽວທີ່ມັກໃນການພະຈົນໄພ, ເອົາຊະນະສິ່ງທີ່ທ້າທາຍຂອງທຳມະຊາດ.
 |
ທະເລ ມຸ໋ຍແນ໋, ແຂວງ ຟານທ໋ຽດ: ຄວາມງາມຂອງ ມຸ໋ຍແນ໋ ບໍ່ແມ່ນມີແຕ່ຄວາມງາມຂອງທະເລ-ທ້ອງຟ້າ ຫຼື ການດຳລົງຊີວິດຢູ່ໃນຟາມປະມົງ ຜ່ານບົດເພງ ກາງໃບເຮືອຮັບລົມ ກັງບ່ວມເວີ໋ຍຢໍເຄີຍ ແຕ່ຍັງແມ່ນຄວາມງາມຂອງ ພູດິນຊາຍ ອັນກວ້າງໃຫຍ່ໄພສານ ແລະ ຄວາມງາມຂອງຍິງສາວ ຊາວຫວຽດນາມເຊື້ອສາຍອິດສະລາມແບກໄຫນ້ຳເທິງຫົວ.
 |
ທະເລ ເກື້ອດ້າຍ, ແຂວງກ້ວາງນາມ: ເກື້ອດ້າຍ ແມ່ນທະເລ-ຊາຍຫາດ ທີ່ງາມທີ່ສຸດຂອງແຂວງ ກ້ວາງນາມ ດ້ວຍຄວາມງາມອັນສະຫງົບ ບັນເລງຜ່ານສຽງຄື້ນກະທົບຊາຍຝັ່ງ-ແສງລະຍິບລະຍັບຂອງໜ້ານ້ຳທະເລ ກະທົບຈາກແສງຕາເວັນຕອນແລງ.
 |
ທະເລ ກູ່ລາວຈ່າມ, ແຂວງ ກວ້າງນາມ: ເປັນສະຖານທີ່ທ່ອງທ່ຽວທີ່ບໍ່ອາດຈະພາດເມື່ອມາທ່ຽວທີ່ແຂວງ ກວ້າງນາມ ເດືອນ ກໍລະກົດນີ້. ອັນຍະມະນີ ລະຫວ່າງກາງຂອງທະເລຈີນໃຕ້, ຂຽວອຸ່ມທຸ່ມດ້ວຍພືກສາຊາດນາໆພັນ, ປະສົມປະສານກັບ ທະເລ-ທ້ອງຟ້າ ເປັນແດນສະຫວັນຂອງນັກທ່ອງທ່ຽວທີ່ຢາກຜ່ອນຄາຍຈາກຕົວເມືອງອັນເຄັງຕຶງ ແລະ ຮ້ອນອົບເອົ້າ.
 |
ທະເລ ທຽນເກີ່ມ ແຂວງຮ່າຕິ໋ງ: ຄຳວ່າທຽນເກີ່ມແປວ່າ: ເຄື່ອງດົນຕີປະເພດສາຍຈາກສະຫວັນ ເມື່ອມາທ່ຽວທີ່ນີ້ທ່ານຈະຮູ້ສືກຜ່ອນຄາຍ ຈາກທ່ວງທຳນອງຂອງສຽງຄື້ນທະເລ ກັ່ນຕອງມາຈາກ ການບັນເລງຂອງສາຍລົມແລະນ້ຳທະເລ
 |
ທະເລ-ເກາະຟູ໋ກ໋ວກ ແຂວງ ກຽນຢາງ: ຟູ໋ກ໋ວກບໍ່ເປັນພຽງແຕ່ເກາະທີ່ສວຍງາມເທົ່ານັ້ນແຕ່ຍັງເປັນສະຖານທີ່ດຽວທີ່ທ່ານຈະສາມາດຊົມຕາເວັນຕົກໄດ້ຢ່າງ ໂລເມັນຕິກ.
 |
ທະເລ ຢາຈາງ: ໃຜທີ່ມາທ່ຽວ ຢາຈາງຄັ້ງທຳອິດລ້ວນແລ້ວແຕ່ຕ້ອງກ່າວຄຳຊົມເຖິງຄວາມງາມຂອງທະເລ-ຊາຍຫາດແຫ່ງນີ້ ທີ່ມີນ້ຳທະເລສີຟ້າໃສເຢັນ, ຫາດຊາຍຂາວສະອາດ ແສງແດງເຫຼືອງອະລ່າມ ໄປຈົນຮອດ ວິຫານຈ່າມເຣວຟ໋ອງ ອັນເກົ່າແກ່.
（ຫັດທະບູນ）
