ບໍລິສັດໃຫຍ່ ເຕິນກາງ ໄຊງ່ອນ ຮ່ວມເດີນທາງກັບວິສາຫະກິດ, ລັດຖະບານ ຊຸກຍູ້ການຮ່ວມມືດ້ານກະສິກຳລະຫວ່າງ ຫວຽດນາມ ແລະ ລາວ

15:00 | 02/03/2023

ຍສໝ - ບໍລິສັດໃຫຍ່ ເຕິນກາງ ໄຊງ່ອນ ມີຄວາມເປັນກຽດເມື່ອໄດ້ຮ່ວມເດີນທາງກັບບັນດາວິສາຫະກິດ ແລະ ອົງການລັດຖະບານໃນການເພີ່ມທະວີການເຊື່ອມຈອດ, ພັດທະນາການຂົນສົ່ງ ແລະ ຂະແໜງກະສິກຳ.

	ອາຊຽນ ແລະ ສະຫະພາບເອີລົບ ຊຸກຍູ້ການຮ່ວມມືສອງຝ່າຍ
	ຫວຽດນາມ ພ້ອມແລ້ວທີ່ຈະຮ່ວມແຮງຮ່ວມໃຈແກ້ໄຂບັນດາບັນຫາສາກົນ

ວັນທີ 27 ກຸມພາ, ຜູ້ຕາງໜ້າບໍລິສັດໃຫຍ່ ເຕິນກາງ ໄຊງ່ອນ ໄດ້ເຂົ້າຮ່ວມກອງປະຊຸມຊຸກຍູ້ການຮ່ວມມືດ້ານກະສິກຳລະຫວ່າງ ຫວຽດນາມ ແລະ ລາວ.

ທ່ານລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ເລມິງຮວານ ໄດ້ເປັນປະທານກອງປະຊຸມກັບບັນດາວິສາຫະກິດນຳໜ້າໃນຂົງເຂດກະສິກຳ ແລະ ຂົນສົ່ງ ເພື່ອແນໃສ່ຊອກຫາວິທີການຊຸກຍູ້ ແລະ ພັດທະນາການຄ້າ, ການລົງທຶນ ແລະ ການຂົນສົ່ງໃຫ້ແກ່ຂະແໜງກະສິກຳສຳລັບຕະຫຼາດລາວ.

ບໍລິສັດໃຫຍ່ ເຕິນກາງ ໄຊງ່ອນ ຮ່ວມເດີນທາງກັບວິສາຫະກິດ, ລັດຖະບານ ຊຸກຍູ້ການຮ່ວມມືດ້ານກະສິກຳລະຫວ່າງ ຫວຽດນາມ ແລະ ລາວ

ທ່ານລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ເລມິງຮວານ ກ່າວຄຳເຫັນທີ່ກອງປະຊຸມ (ພາບ: congthuong.vn)

ຄຽງຄູ່ກັບນັ້ນແມ່ນແຜນການກໍ່ສ້າງທາງດ່ວນວຽງຈັນ - ຮ່າໂນ້ຍ ແລະ ທາງດ່ວນວຽງຈັນ - ຫວຸງອາງ ດ້ວຍຄວາມມຸ່ງມາດປາດຖະໜາ ແລະ ເປົ້າໝາຍກາຍເປັນໃຈກາງຂົນສົ່ງຂອງເຂດອາຊີຕາເວັນອອກສ່ຽງໃຕ້, ເຊື່ອມຕໍ່ກັບຕະຫຼາດຈີນ. ການພັດທະນາດ້ານຄົມມະນາຄົມຢູ່ລາວ ໄດ້ເປີດກາລະໂອກາດຫຼາຍຢ່າງໃຫ້ບັນດາຜະລິດຕະພັນກະເສດຂອງບັນດາປະເທດບ້ານໃກ້ເຮືອນຄຽງ, ໃນນັ້ນມີ ຫວຽດນາມ.

ທີ່ກອງປະຊຸມ, ທ່ານລັດຖະມົນຕີ ເລມິງຮວານ ເນັ້ນໜັກເຖິງບົດບາດຂອງບໍລິສັດໃຫຍ່ ເຕິນກາງ ໄຊງ່ອນ ໄດ້ເປັນເຈົ້າການ ແລະ ນຳໜ້າໃນການເຄື່ອນໄຫວຂຸດຄົ້ນທ່າກຳປັ່ນ, ພັດທະນາຕາໜ່າງຂົນສົ່ງ ແລະ ສະໜອງການບໍລິການ, ພິເສດແມ່ນຜັນຂະຫຍາຍເສັ້ນທາງຂົນສົ່ງເຊື່ອມຕໍ່ທ່າກຳປັ່ນພາກໃຕ້ - ພາກກາງ - ພາກເໜືອກັບເຂດທົ່ງພຽງແມ່ນ້ຳຂອງຜ່ານທ່າກຳປັ່ນຫວຸງອາງ ລາວ - ຫວຽດນາມ, ປະກອບສ່ວນຊຸກຍູ້ແລວເສດຖະກິດຕາເວັນອອກ - ຕາເວັນຕົກເຊື່ອມຕໍ່ ຫວຽດນາມ - ລາວ.

ທ່ານ ບຸຍວັນກຸຍ, ຮອງຜູ້ອຳນວຍການໃຫຍ່ບໍລິສັດໃຫຍ່ ເຕິນກາງ ໄຊງ່ອນ ໃຫ້ຮູ້ວ່າ: ປະຈຸບັນ ລາວມີ ສາງ 7 ແຫ່ງ, ພ້ອມດ້ວຍການໜູນຊ່ວຍຈາກ ຫວຽດນາມ ເພື່ອຂຸດຄົ້ນທ່າກຳປັ່ນຫວຸງອາງ ແລະ ພິເສດແມ່ນຍຸດທະສາດບຸກທະລຸທາງຄົມມະນາຄົມ, ໃນໄລຍະຈະມາເຖິງ ລາວຈະກາຍເປັນຈຸດໃຈກາງຂອງພາກພື້ນ. ສິ່ງນີ້ມີຄວາມໝາຍວ່າ ກາລະໂອກາດການລົງທຶນ ແລະ ການພັດທະນາຂະແໜງກະສິກຳຢູ່ປະເທດນີ້ ຍັງມີຄວາມສາມາດບ່ົມຊ້ອນ ແລະ ທ່າໄດ້ປຽບອັນໃຫຍ່ຫຼວງ.

ການຍູ້ແຮງການສ້າງຕັ້ງສະມາຄົມວິສາຫະກິດກະສິກຳ ຫວຽດນາມ - ລາວ ແມ່ນເພື່ອແນໃສ່ເຊື່ອມຕໍ່, ຮ່ວມມືລົງທຶນ, ພັດທະນາ, ສົມທົບກັນຈັດຕັ້ງບັນດາການເຄື່ອນໄຫວຮ່ວມມືລະຫວ່າງ 2 ປະເທດໃນຂົງເຂດກະສິກຳຕາມຄວາມຕ້ອງການຂອງວິສາຫະກິດ, ຮັບໃຊ້ຜົນປະໂຫຍດຂອງວິສາຫະກິດ ແລະ ປະຊາຊົນຂອງສອງປະເທດ. ບໍລິສັດໃຫຍ່ ເຕິນກາງ ໄຊງ່ອນ ມີຄວາມເປັນກຽດເມື່ອໄດ້ຮ່ວມເດີນທາງກັບບັນດາວິສາຫະກິດ ແລະ ບັນດາອົງການລັດຖະບານໃນການເພີ່ມທະວີການເຊື່ອມຈອດ, ພັດທະນາການຂົນສົ່ງ ແລະ ອຸດສາຫະກຳກະສິກຳ ຫວຽດນາມ - ລາວ, ພ້ອມກັນນັ້ນ ກໍ່ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອທີ່ຫາຍາກລະຫວ່າງ 2 ປະເທດ.

ບຸນຄົງ