ຫວຽດນາມ ພ້ອມແລ້ວທີ່ຈະຮ່ວມແຮງຮ່ວມໃຈແກ້ໄຂບັນດາບັນຫາສາກົນ

14:00 | 21/02/2023

ຄະນະປະຕິບັດງານລວມມີພະນັກງານ, ນັກຮົບກອງທັບ ແລະ ຕຳຫຼວດ ຫວຽດນາມ 100 ຄົນພວມເຂົ້າຮ່ວມການເຄື່ອນໄຫວກູ້ໄພກູ້ຊີບ ພ້ອມກັບກຳລັງສາກົນ ຢູ່ເຂດຖືກຜົນສະທ້ອນຈາກເຫດແຜ່ນດິນໄຫວ ມີ ແຮງສັ່ນສະເທືອນ 7,8 ຣິກເຕີ ຢູ່ຕວັກກີ. ນີ້ແມ່ນຄັ້ງທຳອິດທີ່ ຫວຽດນາມ ໄດ້ຈັດສົ່ງກຳລັງເຂົ້າຮ່ວມການຊອກຮູ້, ກູ້ໄພກູ້ຊີບໃນເຫດໄພພິບັດທຳມະຊາດສາກົນ. ໃນໂອກາດນີ້, ລັດຖະບານ ຫວຽດນາມ ກໍ່ຕັດສິນໃຈໜູນຊ່ວຍເງິນຢ່າງຮີບດ່ວນ ໃຫ້ແກ່ ຕວັກກີ ແລະ ຊີຣີ ປະເທດລະ 100.000 USD. ການກະທຳອັນສູງສົ່ງຂອງ ຫວຽດນາມໄດ້ ສະແດງໃຫ້ເຫັນນະໂຍບາຍການຕ່າງປະເທດທີ່ດີ, ມີຄວາມຮັບຜິດຊອບສູງຕໍ່ປະຊາຄົມສາກົນ ພ້ອມທັງຢັ້ງຢືນກຳລັງຄວາມສາມາດຂອງ ຫວຽດນາມ ໃນຄວາມພ້ອມຮ່ວມແຮງຮ່ວມໃຈເຂົ້າຮ່ວມແກ້ໄຂບັນດາບັນຫາສາກົນ.

	ການພົວພັນຄູ່ຮ່ວມມືຍຸດທະສາດ ຫວຽດນາມ - ສິງກະໂປ ນັບມື້ນັບພັດທະນາຢ່າງຮອບດ້ານ
	ຍົກລະດັບການຮ່ວມມືລະຫວ່າງ ຫວຽດນາມ ກັບສິງກະໂປ ແລະ ບຣູໄນ ດາຣູຊາລາມ

ກຳລັງກູ້ໄພກູ້ຊີບ ຫວຽດນາມ ທີ່ໄປຕວັກກີ ແມ່ນບັນດາພະນັກງານ, ນາຍທະຫານ ແລະ ຕຳຫຼວດວິຊາສະເພາະ ຂອງກອງທັບ ແລະ ຕຳຫຼວດ. ເຂົາເຈົ້າໄດ້ປະຕິບັດສຳເລັດທຸກວຽກງານກະກຽມໃນໄລຍະເວລາສັ້ນທີ່ສຸດ ເພື່ອເດີນທາງໄປປະຕິບັດວຽກງານກູ້ໄພກູ້ຊີບ ແລະ ໜູນຊ່ວຍມະນຸດສະທຳ.

ກຳລັງຂອງກອງທັບ ຫວຽດນາມ ເຂົ້າຮ່ວມການກູ້ໄພກູ້ຊີບຢູ່ ຕວັກກີລວມມີ 76 ຄົນ ໃນນັ້ນມີນັກຮົບເສນາຮັກ ສັງກັດກົມໃຫຍ່ພະລາທິການ36 ຄົນ, ມີ ກຸ່ມກູ້ໄພກູ້ຊີບການພັງທະລາຍ ຂຶ້ນກັບເຫຼົ່າຮົບທະຫານຊ່າງ, ກອງບັນຊາການ 30 ຄົນ. ນອກຈາກນັ້ນຍັງມີ ກົມກອງໝາກວິຊາການຮັບໃຊ້ການຊອກຫາກູ້ໄພກູ້ຊີບຂຶ້ນກັບກອງບັນຊາການທະຫານປ້ອງກັນຊາຍແດນອີກດ້ວຍ. ໄປຄຽງຄູ່ກັນນັ້ນ, ວັດຖຸອຸປະກອນ 42 ໂຕນກໍ່ໄດ້ຮັບການລະດົມເພື່ອໜູນຊ່ວຍວຽກງານກູ້ໄພກູ້ຊີບ. ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມໃຫ້ຮູ້ວ່າ:

ໂດຍເລີ່ມມາຈາກການພົວພັນອັນດີງາມລະຫວ່າງ ຫວຽດນາມ ແລະ ຕວັກກີ ເວົ້າລວມ ແລະ ການພົວພັນລະຫວ່າງກະຊວງຕຳຫຼວດ ກັບບັນດາອົງການປະຕິບັດກົດໝາຍຂອງຕວັກກີເວົ້າສະເພາະ, ເພື່ອປະກອບສ່ວນແບ່ງປັນຄວາມຫຍຸ້ງຍາກເຊິ່ງ ຕວັກກີພວມປະສົບ, ກະຊວງໄດ້ຈັດສົ່ງຄະນະປະຕິບັດງານໄປຍັງຕວັກກີ ດ້ວຍເປົ້າມາຍໜູນຊ່ວຍການກູ້ໄພກູ້ຊີບ, ໜູນຊ່ວຍການຊອກຫາ ແລະ ສະໜອງການໜູນຊ່ວຍມະນຸດສະທຳຢ່າງວ່ອງໄວ ແລະ ຕັ້ງໜ້າທີ່ສຸດ.

ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມ (ພາບ: TTXVN)

ພາຍຫຼັງໄປຮອດຕວັກກີ, ຜ່ານຜ່າສະພາບດິນຟ້າອາກາດຮ້າຍແຮງ, ກຳລັງກູ້ໄພກູ້ຊີບ ຫວຽດນາມ ໄດ້ເຂົ້າຮ່ວມການເຄື່ອນໄຫວກູ້ໄພກູ້ຊີບ ພ້ອມກັບພະນັກງານກູ້ໄພກູ້ຊີບກ່ວາ 8000 ຄົນຂອງສາກົນ. ບໍລິເວນເຄື່ອນໄຫວຂອງກຳລັງກູ້ໄພກູ້ຊີບ ຫວຽດນາມ ໃນປັດຈຸບັນແມ່ນບາງສະຖານທີ່ຢູ່ນະຄອນ Adiyaman , ຕາແສງ Haci Omer Alpagot, ເມືອງ Antakya, ແຂວງ Hatay, ໜຶ່ງໃນບັນດາແຂວງໄດ້ຮັບຜົນສະທ້ອນຢ່າງໜັກໜ່ວງທີ່ສຸດຈາກເຫດແຜ່ນດິນໄຫວ. ທ່ານພັນໂທ ຟ້ານເຈິ່ນຈຸງ, ຮອງຫົວໜ້າພະແນກບາດເຈັບສັນຍະກຳ ໂຮງໝໍເສນາຮັກ 354 ແບ່ງປັນວ່າ:

ຄະນະໄດ້ຮັບໜ້າທີ່ຕ້ອນຮັບ, ປິ່ນປົວ ຜູ້ປະສົບເຄາະຮ້າຍໝົດທຸກຄົນ ໃນເຫດແຜ່ນດິນໄຫວຢູ່ຕວັກກີ. ພວກຂ້າພະເຈົ້າໄດ້ຊາບຊຶມຕ້ອງປະຕິບັດໃຫ້ສຳເລັດໜ້າທີ່ ໃນບໍ່ວ່າສະພາບການໃດຢ່າງເດັດຂາດ.

ຕາມທ່ານພັນເອກ ຫງວຽນມິງເຄືອງ, ຫົວໜ້າຄະນະປະຕິບັດງານກູ້ໄພກູ້ຊີບກະຊວງຕຳຫຼວດແລ້ວ, ຄະນະກູ້ໄພກູ້ຊີບ ຫວຽດນາມ ໄດ້ນຳໃຊ້ວັດຖຸອຸປະກອນວິຊາການສະເພາະທີ່ໄດ້ນຳມາຈາກຫວຽດນາມ. ນັ້ນແມ່ນ ອຸປະກອນເຈາະເບຕົງ, ອຸປະກອນກວດຊອກຫາຜູ້ປະສົບເຄາະຮ້າຍຈາກຄືນຣາດາ, ກໍ່ຄືອຸປະກອນກວດຊອກຫາຜູ້ປະສົບເຄາະຮ້າຍດ້ວຍກ້ອງຖ່າຍ ແລະ ສຽງ. ນອກຈາກນັ້ນ, ຄະນະກູ້ໄພກູ້ຊີບ ຫວຽດນາມ ໄດ້ມອບຢຸກຢາສຸກເສີນ, ຢຸກຢາຈຳເປັນ, ວັດຖຸອຸປະກອນການແພດ, ຕູບ, ຄ້າຍ ນຳໃຊ້ຢູ່ສະໜາມໃຫ້ແກ່ຕວັກກີ.

vovworld.vn