| ຍົກລະດັບການຮ່ວມມືລະຫວ່າງ ຫວຽດນາມ ກັບສິງກະໂປ ແລະ ບຣູໄນ ດາຣູຊາລາມ | |
| 93 ປີແຫ່ງການສ້າງຕັ້ງພັກ: ກອງປະຊຸມສຳມະນາກ່ຽວກັບການພົວພັນຮ່ວມມື ລະຫວ່າງ ການາດາ ແລະ ຫວຽດນາມ. |
ຊຸກຍູ້ການຮ່ວມມືທາງການຄ້າ ລະຫວ່າງ ຫວຽດນາມ - ອິນເດຍ
ວັນທີ 14 ກຸມພາ 2023, ຢູ່ຮ່າໂນ້ຍ, ທ່ານລັດຖະມົນຕີ ຫງວຽນຮົ່ງຢຽນ ໄດ້ໃຫ້ການຕ້ອນຮັບ ແລະ ເຮັດວຽກກັບທ່ານ Sandeep Arya ເອກອັກຄະລັດຖະທູດຜູ້ມີອຳນາດເຕັມແຫ່ງອິນເດຍ ປະຈຳ ຫວຽດນາມ.
ທີ່ການເຮັດວຽກ, ທ່ານລັດຖະມົນຕີ ຫງວຽນຮົ່ງຢຽນ ແລະ ທ່ານເອກອັກຄະລັດຖະທູດ Sandeep Arya ໄດ້ປຶກສາຫາລື ແລະ ສະແດງຄວາມພໍໃຈຕໍ່ການພົວພັນຮ່ວມມືດ້ານເສດຖະກິດ, ການຄ້າ ແລະ ການລົງທຶນ ຫວຽດນາມ - ອິນເດຍ ທີ່ບັນລຸໄດ້ບັນດາບາດກ້າວພັດທະນາຢ່າງແຮງໃນໄລຍະຜ່ານມາ. ປັດຈຸບັນ, ອິນເດຍ ໄດ້ກາຍເປັນຄູ່ຮ່ວມມືລົງທຶນໃຫຍ່ທີ່ສຸດ, ຄູ່ຮ່ວມມືການຄ້າໃຫຍ່ທີ່ສຸດຂອງ ຫວຽດນາມ ຢູ່ພາກພື້ນ ອາຊີໃຕ້.
ເພື່ອຂຸດຄົ້ນຄວາມສາມາດບົ່ມຊ້ອນ, ທ່າແຮງ ໃນການພົວພັນດ້ານເສດຖະກິດ, ການຄ້າ, ການລົງທຶນລະຫວ່າງສອງປະເທດຢ່າງຄົບຖ້ວນ, ທ່ານລັດຖະມົນຕີ ຫງວຽນຮົ່ງຢຽນ ໄດ້ສະເໜີຝ່າຍອິນເດຍ ສົມທົບຢ່າງແໜ້ນແຟ້ນເພື່ອຕ້ານການຂາດວັກຂາດຕອນລະບອບສະໜອງ, ຜະລິດໃນພາກພື້ນ ແລະ ໃນໂລກ, ຍູ້ແຮງການເຄື່ອນໄຫວສົ່ງເສີມການຄ້າ ແລະ ການເຄື່ອນໄຫວເຊື່ອມຕໍ່ວິສາຫະກິດ…
 |
| ທ່ານລັດຖະມົນຕີ ຫງວຽນຮົ່ງຢຽນ ແລະ ທ່ານ Sandeep Arya ເອກອັກຄະລັດຖະທູດຜູ້ມີອຳນາດເຕັມແຫ່ງອິນເດຍ ປະຈຳ ຫວຽດນາມ |
ທ່ານລັດຖະມົນຕີ ຫງວຽນຮົ່ງຢຽນ ສະເໜີໃຫ້ຝ່າຍ ອິນເດຍ ຍູ້ແຮງການເປີດກວ້າງຕະຫຼາດສຳລັບຜະລິດຕະພັນກະເສດ ແລະ ໝາກໄມ້ສົດຂອງ ຫວຽດນາມ. ທ່ານລັດຖະມົນຕີເນັ້ນໜັກວ່າ ຫວຽດນາມ ມີໝາກໄມ້ເຂດຮ້ອນທີ່ສົດ ແລະ ແຊບຫຼາຍ, ແຕ່ມາຮອດປະຈຸບັນມີພຽງໝາກມັງກອນທີ່ໄດ້ຮັບອະນຸຍາດນຳເຂົ້າອິນເດຍ. ທ່ານລັດຖະມົນຕີສະເໜີໃຫ້ທ່ານເອກອັກຄະລັດຖະທູດ ຊ່ວຍຍູ້ໄວຂະບວນການອອກໃບອະນຸຍາດນຳເຂົ້າໝາກໄມ້ຂອງຫວຽດນາມ, ທຳອິດແມ່ນລຳໄຍ, ໝາກກ້ຽງໃຫຍ່, ໝາກເງາະ ແລະ ຖົ່ວລຽນ, ຫຼັງຈາກນັ້ນຈະແມ່ນ ອາໂວກາໂດ, ໝາກພ້າວ, ໝາກໂມ, ສະຕໍເບີຣີ.
ໂດຍຍົກໃຫ້ເຫັນຄວາມກັງວົນກ່ຽວກັບບັນດາມາດຕະການນະໂຍບາຍຂອງ ອິນເດຍ ໃນໄລຍະຜ່ານມາໄດ້ສ້າງພາລະ ແລະ ສ້າງຄວາມເສຍຫາຍໃຫ້ແກ່ວິສາຫະກິດສົ່ງອອກ ແລະ ອາດຈະກີດຂວາງການຄ້າ, ທ່ານລັດຖະມົນຕີຮຽກຮ້ອງໃຫ້ທ່ານເອກອັກຄະລັດຖະທູດ ເອົາໃຈໃສ່ ແລະ ໜູນຊ່ວຍຊຸກຍູ້ບັນດາອົງການທີ່ກ່ຽວຂ້ອງຂອງ ອິນເດຍ ພິຈາລະນາສຳລັບ ຫວຽດນາມ ເວົ້າສະເພາະ ແລະ ບັນດາປະເທດ ອາຊຽນ ເວົ້າລວມ; ມີມາດຕະການແກ້ໄຂທີ່ເໝາະສົມ, ບົນພື້ນຖານການປະຕິບັດລະບຽບການ/ຄຳໝັ້ນສັນຍາໃນຂອບເຂດຫຼາຍຝ່າຍ ແລະ ຜົນປະໂຫຍດອັນຊອບທຳຂອງຝ່າຍຕ່າງໆ.
ສ່ວນທ່ານເອກອັກຄະລັດຖະທູດ Sandeep Arya ໃຫ້ຮູ້ວ່າ: ຫວຽດນາມ ແມ່ນຄູ່ຮ່ວມມືການຄ້າສຳຄັນທີ່ສຸດໃນ ອາຊຽນ ຂອງ ອິນເດຍ, ເສດຖະກິດ ຫວຽດນາມ ແລະ ອິນເດຍ ມີການໜູນຊ່ວຍເຊິ່ງກັນແລະກັນ. ພິເສດ, ການພົວພັນລະຫວ່າງສອງປະເທດໃນປະຈຸບັນແມ່ນການພົວພັນຄູ່ຮ່ວມມືຍຸດທະສາດຮອບດ້ານ. ຫວຽດນາມ ແມ່ນຄູ່ຮ່ວມມືສຳຄັນຂອງອິນເດຍ ໃນວິໄສທັດມະຫາສະໝຸດອິນເດຍ - ປາຊີຟິກ ກໍ່ຄືນະໂຍບາຍກະທຳຕາມທິດຕາເວັນອອກຂອງລັດຖະບານ ອິນເດຍ.
ທ່ານເອກອັກຄະລັດຖະທູດ Sandeep Arya ຕີລາຄາສູງຄວາມສາມາດບົ່ມຊ້ອນການຮ່ວມມືລະຫວ່າງ 2 ປະເທດ, ພິເສດແມ່ນໃນບັນດາຂົງເຂດພະລັງງານທົດແທນ, ນ້ຳມັນອາຍແກັສ, ເຕັກໂນໂລຢີຂໍ້ມູນຂ່າວສານ, ເສດຖະກິດດີຈີຕອນ, ການຢາໃນສະພາບການປະຕິວັດອຸດສາຫະກຳ 4.0… ບັນດາຂົງເຂດນີ້ສາມາດເປີດກາລະໂອກາດຮ່ວມມືລະຫວ່າງລະຫວ່າງສອງປະເທດໃນປະຈຸບັນ ແລະ ອະນາຄົດ.
ທ່ານເອກອັກຄະລັດຖະທູດ Sandeep Arya ກໍ່ສະແດງຄວາມເຫັນດີເປັນເອກະພາບຕໍ່ບັນດາມາດຕະການເພີ່ມທະວີການວິເຄາະເສດຖະກິດ - ການຄ້າ 2 ຝ່າຍ, ພິເສດແມ່ນຕ້ານການຂາດວັກຂາດຕອນ ແລະ ຫັນລະບົບສະໜອງເປັນຫຼາຍຮູບແບບ, ການຊຸກຍູ້ທາງການຄ້າ ແລະ ການເປີດກວ້າງການຄ້າຜະລິດຕະພັນກະເສດ. ພ້ອມກັນນັ້ນ, ທ່ານເອກອັກຄະລັດຖະທູດ ກໍ່ປາດຖະໜາວ່າ ຈະປຶກສາຫາລືກັບບັນດາອົງການທີ່ກ່ຽວຂ້ອງຂອງ ອິນເດຍ ເພື່ອແກ້ໄຂບັນດານະໂຍບາຍຈຳກັດດ້ານການຄ້າທີ່ ຫວຽດນາມ ມີຄວາມເປັນຫ່ວງ.
ເພື່ອຊຸກຍູ້ ແລະ ກະກຽມໃຫ້ແກ່ການຢ້ຽມຢາມເຊິ່ງກັນ ແລະ ກັນຂອງການນຳ 2 ປະເທດໃນປີ 2023, ທ່ານເອກອັກຄະລັດຖະທູດ Sandeep Arya ເນັ້ນໜັກວ່າ 2 ຝ່າຍຕ້ອງຈັດຕັ້ງບັນດາການພົບປະດ້ານເຕັກນິກຢ່າງວ່ອງໄວ ເພື່ອແກ້ໄຂບັນດາຂໍ້ຄົງຄ້າງ ແລະ ສິ່ງກີດຂວາງໃນການພົວພັນເສດຖະກິດ - ການຄ້າ 2 ຝ່າຍ.
ບຸນຄົງ
