ວັນທີ 30 ມັງກອນ, ຄະນະກໍາມະການພົວພັນຕ່າງປະເທດນະຄອນ St.Petersburg, ລັດເຊຍ ໄດ້ເປັນປະທານກອງປະຊຸມສໍາມະນາວິທະຍາສາດ ເນື່ອງໃນໂອກາດສະເຫຼີມສະຫຼອງ 73 ປີແຫ່ງວັນສ້າງຕັ້ງການພົວພັນທາງການທູດ ລັດເຊຍ-ຫວຽດນາມ.
ເຂົ້າຮ່ວມກອງປະຊຸມສໍາມະນາ, ຝ່າຍລັດເຊຍ ມີທ່ານ Evgeny Grigoriev ປະທານຄະນະກໍາມະການພົວພັນຕ່າງປະເທດນະຄອນ St.Petersburg, ຜູ້ຕາງໜ້າຄະນະ, ຂະແໜງ, ອົງການທີ່ກ່ຽວຂ້ອງຂອງນະຄອນ. ທ່ານ G.Bezdetko ເອກອັກຄະລັດຖະທູດລັດເຊຍ ປະຈໍາຫວຽດນາມ ເຂົ້າຮ່ວມຜ່ານວິດີໂອ. ຝ່າຍຫວຽດນາມ ມີທ່ານ ດັ້ງມິງຄອຍ ເອກອັກຄະລັດຖະທູດຫວຽດນາມ ປະຈໍາ ລັດເຊຍ, ທ່ານນາງ ຫງວຽນທິຮ່ວາງເວິນ ຮອງຫົວໜ້າຄະນະກໍາມະການພົວພັນຕ່າງປະເທດສູນກາງ ພ້ອມກັບຜູ້ຕາງໜ້າການນໍາບາງທ້ອງຖິ່ນ, ສະມາຄົມຊາວຫວຽດນາມ ຢູ່ລັດເຊຍ.
 |
| ທ່ານນາງ ຫງວຽນທິຮວ່າງເວິນ ຮອງຫົວໜ້າຄະນະພົວພັນຕ່າງປະເທດສູນກາງ ກ່າວຄໍາເຫັນໃນກອງປະຊຸມສຳມະນາທີ່ຮ່າໂນ້ຍ. ພາບ: TTXVN |
ກ່າວຄໍາເຫັນທີ່ພິທີໄຂກອງປະຊຸມສໍາມະນາ, ທ່ານເອກອັກຄະລັດຖະທູດ ດັ້ງມິງຄອຍ ເນັ້ນໜັກວ່າ ສາຍພົວພັນລະຫວ່າງສອງປະເທດ ຫວຽດນາມ-ລັດເຊຍ ໄດ້ຜ່ານການທົດສອບຫຼາຍຢ່າງ ແລະ ປະຈຸບັນພວມພັດທະນາຢ່າງຕັ້ງໜ້າ ທັງລວງກວ້າງ ແລະ ລວງເລິກໃນທຸກຂົງເຂດ ຄື ເສດຖະກິດ, ການຄ້າ, ວັດທະນະທໍາ, ການສຶກສາ, ການທູດປະຊາຊົນ, ທັງແມ່ນຊັບສົມບັດອັນລໍ້າຄ່າຂອງສອງປະເທດ.
ກ່າວຄໍາເຫັນທີ່ກອງປະຊຸມສໍາມະນາຜ່ານລະບົບທາງໄກທີ່ຮ່າໂນ້ຍ, ທ່ານນາງ ຫງວຽນທິຮວ່າງເວິນ ຮອງຫົວໜ້າຄະນະພົວພັນຕ່າງປະເທດສູນກາງ ໄດ້ຕີລາຄາສູງຂໍ້ລິເລີ່ມຈັດຕັ້ງເຫດການດັ່ງກ່າວທີ່ເປັນປະຈໍາປີຂອງຄະນະກໍາມະການພົວພັນຕ່າງປະເທດນະຄອນ St.Petersburg. ທ່ານນາງ ເນັ້ນໜັກວ່າ ໃນປີ 2023 ສອງປະເທດຈະມີຫຼາຍກິດຈະກຳດ້ານການເມືອງທີ່ສໍາຄັນ, ພິເສດແມ່ນການກະກຽມເປີດສະຫຼອງອະນຸສາວະລີປະທານ ໂຮ່ຈີມິນ ເນື່ອງໃນໂອກາດ 100 ປີແຫ່ງວັນປະທານໂຮ່ຈີມິນ ມາຢ້ຽມຢາມນະຄອນ St.Petersburg. ນີ້ແມ່ນອະນຸສາວະລີ ທີຫ້າ ຂອງເພິ່ນຢູ່ລັດເຊຍ.
ເຂົ້າຮ່ວມຜ່ານວິດີໂອ, ທ່ານ G.Bezdetko ຢັ້ງຢືນວ່າ ໃນກວ່າ 70 ປີຜ່ານມາ, ລັດເຊຍ ແລະ ຫວຽດນາມ ໄດ້ສະໜິດຕິດພັນກັນດ້ວຍການພົວພັນມິດຕະພາບ ແລະ ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ. ຫວຽດນາມ ຍາມໃດກໍ່ແມ່ນໜຶ່ງໃນບັນດາຄູ່ຮ່ວມມືທີ່ສະໜິດສະໜົມ ແລະ ໄວ້ເນື້ອເຊື່ອໃຈທີ່ສຸດຂອງລັດເຊຍ ຢູ່ອາຊີ-ປາຊີຟິກ.
ບູນມີ
