| ນຳການພົວພັນຄູ່ຮ່ວມມື ແລະ ຮ່ວມມືຍຸດທະສາດ ຫວຽດນາມ - ຝລັ່ງ ໄປສູ່ໄລຍະພັດທະນາໃໝ່ | |
| ຕໍ່ກຳລັງໜູນໃໝ່ໃຫ້ແກ່ສາຍພົວພັນຄູ່ຮ່ວມມື, ການຮ່ວມມືຍຸດທະສາດຮອບດ້ານ ຫວຽດນາມ-ຈີນ |
 |
| ສາດສະດາຈານ Aleksius Jemadu (ພາບ: TTXVN) |
ນັກຮຽນຮູ້ທີ່ມີຊື່ສຽງຊາວອິນໂດເນເຊຍ, ສາດສະດາຈານ Aleksius Jemadu ຖືວ່າ ດ້ວຍບັນດາພື້ນຖານການພົວພັນທີ່ເປັນມູນເຊື້ອອັນດີງາມ, ທັດສະນະທີ່ຄ້າຍຄືກັນກ່ຽວກັບຫຼາຍບັນຫາ, ອິນໂດເນເຊຍ ແລະ ຫວຽດນາມ ມີຄວາມສາມາດບົ່ມຊ້ອນຫຼາຍຢ່າງໃນການເພີ່ມທະວີການພົວພັນຮ່ວມມືດ້ານເສດຖະກິດ, ການຄ້າ, ການລົງທຶນ, ກໍ່ຄືພ້ອມກັນຊຸກຍູ້ ແລະ ຮັກສາສະຖຽນລະພາບໃນພາກພື້ນ.
ໂດຍແລກປ່ຽນກັບນັກຂ່າວສຳນັກຂ່າວສານ ຫວຽດນາມ ປະຈຳ ຈາກາຕາ, ທ່ານສາດສະດາຈານ Aleksius Jemadu ຕີລາຄາວ່າ ການຢ້ຽມຢາມທາງລັດຖະກິດອິນໂດເນເຊຍ ໃນລະຫວ່າງວັນທີ 21 – 23 ທັນວາຂອງທ່ານປະທານປະເທດ ຫວຽດນາມ ຫງວຽນຊວັນຟຸກ ແມ່ນສຳຄັນທີ່ສຸດ, ໃນຕົວຈິງ ຫວຽດນາມ ແລະ ອິນໂດເນເຊຍ ຄວນຮ່ວມມືນຳກັນເພື່ອປະກອບສ່ວນເຂົ້າໃນການຮັກສາສະຖຽນລະພາບໃນພາກພື້ນ ຢູ່ອາຊີຕາເວັນອອກສ່ຽງໃຕ້ ໃນສະພາບການບັນດາປະເທດພວມມານະພະຍາຍາມຟື້ນຟູຫຼັງພະຍາດໂຄວິດ - 19.
ທ່ານສາດສະດາຈານ Aleksius Jemadu ກໍ່ຢັ້ງຢືນວ່າ ການພົວພັນຮ່ວມມືສອງຝ່າຍ ພວມ ແລະ ຈະສືບຕໍ່ພັດທະນາຢ່າງແຮງກ່ຽວກັບທາງດ້ານການຄ້າ ແລະ ການລົງທຶນ, ພິຈາລະນາກ່ຽວກັບອັດຕາການເຕີບໂຕເສດຖະກິດຂອງສອງປະເທດ.
ຕາມທ່ານແລ້ວ, ອິນໂດເນເຊຍ ແມ່ນຕະຫຼາດໃຫຍ່ທີ່ສຸດຢູ່ອາຊຽນ ແລະ ຫວຽດນາມ ຈະໄດ້ຮັບຜົນປະໂຫຍດຈາກການເຕີບໂຕຂອງອິນໂດເນເຊຍ.
ຢ້ຳຄືນວ່າ ອິນໂດເນເຊຍ ແລະ ຫວຽດນາມ ມີການພົວພັນທີ່ສະໜິດຕິດແທດ ໃນປະຫວັດສາແຫ່ງການຕໍ່ສູ້ຍາດເອົາເອກະລາດແຫ່ງຊາດ ແລະ ສ້າງສາປະເທດຊາດ, ທ່ານສາດສະດາຈານ Aleksius Jemadu ໃຫ້ຮູ້ວ່າ ທ່ານຮູ້ສຶກປະທັບໃຈຕໍ່ຈິດໃຈຊົນຊາດຢ່າງແຮງຂອງປະຊາຊົນ ຫວຽດນາມ - ເຊິ່ງແມ່ນສິ່ງທີ່ສຳຄັນທີ່ສຸດ ໃນສະພາບການໂລກແກ້ງແຍ້ງປັດຈຸບັນ.
ຕາມທ່ານແລ້ວ, ຫວຽດນາມ ໄດ້ສ້າງແຫຼ່ງບັນດານໃຈໃຫ້ແກ່ອາຊີຕາເວັນອອກສ່ຽງໃຕ້ ກ່ຽວກັບຈິດໃຈເຮັດວຽກທີ່ດຸໝັ່ນຂະຫຍັນພຽນ, ວິທີການປະຕິບັດບັນດາຫຼັກການສະເພາະຂອງຕົນໃນການພົວພັນກັບບັນດາປະເທດມະຫາອຳນາດ.
ນອກຈາກນັ້ນ, ຄວາມຂະຫຍັນຂັນເຄື່ອນຂອງພື້ນຖານເສດຖະກິດ ຫວຽດນາມ ກໍ່ສ້າງຄວາມປະທັບໃຈ, ສ້າງແຫຼ່ງບັນດານໃຈໃຫ້ແກ່ປະເທດຕ່າງໆໃນພາກພື້ນ.
ທ່ານສາດສະດາຈານລົງເລິກຂະແໜງການພົວພັນສາກົນນີ້ກໍ່ຖືວ່າ ໂດຍແມ່ນສອງປະເທດສະມາຊິກສຳຄັນຂອງ ອາຊຽນ ແລະ ບັນດາປະເທດມະຫາອຳນາດລະດັບກາງ, ອິນໂດເນເຊຍ ແລະ ຫວຽດນາມ ສວມບົດບາດສຳຄັນທີ່ສຸດໃນການຮັກສາບົດບາດເປັນໃຈກາງຂອງ ອາຊຽນ ແລະ ຮັກສາສະຖຽນລະພາບໃນພາກພື້ນ, ເປັນຕົ້ນແມ່ນສະພາບການທຸກປະເທດອາຊຽນ ພວມແຕ່ຕ້ອງປັບປຸງການພົວພັນກັບບັນດາປະເທດມະຫາອຳນາດ.
ບຸນຄົງ
