ຍ້ອນມີຄຸນນະພາບ ແລະ ເຄື່ອງໝາຍສະເພາະ ນັບມື້ນັບໄດ້ຮັບການຢັ້ງຢືນ, ໃນໄລຍະຜ່ານມາ, ເຂົ້າສານຍີ່ຫໍ້ຫວຽດນາມ ໄດ້ສືບຕໍ່ເປີກດກວ້າງອັດຕາສ່ວນກວມໃນຫຼາຍຕະຫຼາດສາກົນ, ໃນນັ້ນມີຫຼາຍຕະຫຼາດທີ່ທັນສະໄໝ. ຕາມນັ້ນແລ້ວ, ບໍ່ພຽງແຕ່ໄດ້ປະກົດຕົວໃນຄາບອາຫານທ່ຽງຢູ່ສຳນັກງານຄະນະລັດຖະບານຍີ່ປຸ່ນເທົ່ານັ້ນ, ເຂົ້າສານຍີ່ຫໍ້ຂອງຫວຽດນາມ ກໍ່ຍັງມີວາງຂາຍຢູ່ຮ້ານຊຸບເປີມາເກັດ ຂອງຝະລັ່ງ ແລະ ຈະໄດ້ນຳໄປຂາຍຢູ່ເຢຍລະມັນ ແລະ ອາເມລິກາ ໃນໄລຍະຈະມາເຖິງ.
ຕາມຫ້ອງການການຄ້າຫວຽດນາມປະຈຳຍີ່ປຸ່ນແລ້ວ, ໃນຕົ້ນເດືອນກັນຍານີ້, ເປັນຄັ້ງທຳອິດ, ເຂົ້າຜັດທີ່ນຳໃຊ້ເຂົ້າສານ ST25, ເຄື່ອງໝາຍ “Made in Vietnam” ໄດ້ກາຍເປັນອາຫານທ່ຽງພິເສດ ຢູ່ສຳນັກງານຄະນະລັດຖະບານຍີ່ປຸ່ນ. ເພື່ອນຳເຂົ້າສານ ST25 ເຂົ້າຕະຫຼາດຍີ່ປຸ່ນ, ວິສາຫະກິດຫວຽດນາມ ຕ້ອງບັນລຸມາດຕະຖານເຕັກນິກທີ່ເຂັ້ມງວດ ເຊິ່ງປະກອບມີກວ່າ 600 ມາດຕະຖານ ແລະ ຄວາມຮຽກຮ້ອງຕ້ອງການສູງຂອງປະເທດນີ້. ນີ້ແມ່ນຄວາມມານະພະຍາຍາມອັນໃຫຍ່ຫຼວງ ຂອງບັນດາວິສາຫະກິດ ຫວຽດນາມ ພາຍຫຼັງ 1 ປີແຫ່ງການເຈລະຈາກັບຝ່າຍ ຍີ່ປຸ່ນ.
 |
| ເຂົ້າສານຫວຽດນາມ ພິຊິດຕະຫຼາດສາກົນດ້ວຍຍີ່ຫໍ້ສະເພາະ. |
ໂດຍສືບຕໍ່ຜົນສຳເລັດດັ່ງກ່າວ, ໃນເດືອນກັນຍາ, ຜະລິດຕະພັນເຂົ້າສານ ຫວຽດນາມ ຍີ່ຫໍ້ “Com Vietnam Rice” ຂອງກຸ່ມບໍລິສັດ Loc Troi ທີ່ສົ່ງອອກຜ່ານ TT Foods ໄດ້ສຳເລັດການແຊກຊຶມເຂົ້າຕະຫຼາດຂາຍຍ່ອຍ E.Leclerc ຊັ້ນນຳຂອງຝລັ່ງ. ກ່ອນນັ້ນ, “Com Vietnam Rice” 500 ໂຕນ ກໍ່ໄດ້ວາງຢູ່ຊັ້ນວາງຂາຍຂອງລະບົບ Carrefour ທີ່ມີຊື່ສຽງຢູ່ຝະລັ່ງ.
ໃນໄລຍະ 20 ກວ່າປີຜ່ານມາ, ເຂົ້າສານຂອງຫວຽດນາມ ໄດ້ສົ່ງອອກພຽງແຕ່ໃນຮູບແບບຖົງ/ເປົາທຳມະດາ ທີ່ບໍ່ມີກາຊື່ ຫຼື ຫຸ້ມຫໍ່ດ້ວຍຊື່ຍີ່ຫໍ້ຂອງຜູ້ນໍາເຂົ້າຈາກຕ່າງປະເທດ. ປີ 2022 ແມ່ນປີທຳອິດທີ່ບັນດາຜະລິດຕະພັນເຂົ້າສານສົ່ງອອກ ໄດ້ມີເຄື່ອງໝາຍ “Made in Vietnam”, ຫຸ້ມຫໍ່ດ້ວຍຍີ່ຫໍ້ສະເພາະຂອງວິສາຫະກິດຫວຽດນາມ ແລະ ໄດ້ລົງທະບຽນຮູບແບບສາກົນ. ບໍ່ພຽງແຕ່ເທົ່ານັ້ນ, ໃນເມື່ອກ່ອນ, ເຂົ້າສານ ຫວຽດນາມ ທີ່ສົ່ງອອກໄປຍັງໂລກຕົ້ນຕໍແມ່ນການຂາຍແບບທົ່ວໄປ, ແຕ່ປະຈຸບັນ, ຄຸນນະພາບຂອງຜະລິດຕະພັນນີ້ນັບມື້ນັບດີຂຶ້ນ ອັນໄດ້ດຶງດູດຜູ້ບໍລິໂພກຊັ້ນສູງເປັນຈຳນວນຫຼວງຫຼາຍ.
ປະຈຸບັນ, ຫວຽດນາມ ແມ່ນປະເທດສົ່ງອອກເຂົ້າໃຫຍ່ອັນດັບ 3 ໃນໂລກ, ຖັດຈາກ ອິນເດຍ ແລະ ໄທ. ປະລິມານສົ່ງອອກແຕ່ລະປີແມ່ນປະມານ 6-6,5 ລ້ານໂຕນ, ກວມເອົາ 7,8% ຂອງການຊື້ຂາຍການຄ້າທົ່ວໂລກ. ປະຈຸບັນ, ເຂົ້າຫວຽດນາມ ຍັງໄດ້ສົ່ງອອກໄປຍັງ 28 ປະເທດ ແລະ ເຂດແຄ້ວນ, ຂະຫຍາຍໄປທົ່ວທຸກທະວີບ, ພິເສດແມ່ນອາຊີ ແລະ ເອີລົບ.
ເພື່ອໃຫ້ເຂົ້າສານຄຸນນະພາບສູງຂອງຫວຽດນາມ ສືບຕໍ່ຢືນຢັນທີ່ຕັ້ງຂອງຕົນ, ຫວ່າງມໍ່ໆມານີ້, ທ່ານນາຍົກລັດຖະມົນຕີ ໄດ້ມອບໃຫ້ກະຊວງກະສິກຳ ແລະ ພັດທະນາຊົນນະບົດ ກໍ່ສ້າງໂຄງການຜະລິດແບບຍືນຍົງ 1 ລ້ານເຮັກຕາ ເພື່ອການປູກເຂົ້າຄຸນນະພາບສູງ ຢູ່ເຂດທົ່ງພຽງແມ່ນ້ຳຂອງ ໂດຍສະເພາະ. ຕາມແຜນຮ່າງເບື້ອງຕົ້ນ, ເນື້ອທີ່ປູກເຂົ້າຄຸນນະພາບສູງປະມານ 1 ລ້ານເຮັກຕາຈະປູກຢູ່ບັນດາແຂວງ ດົ່ງທາບ, ລອງອານ, ອານຢາງ ແລະ ສ່ວນໜື່ງຢູ່ແຂວງກຽນຢາງ ເກິ່ນເທີ.
