ໃນຊຸມເດືອນທ້າຍປີ, ຖ້າມີໂອກາດແວ່ຢາມດ່າລາດ (ເລິມດົ່ງ), ແຂກທ່ອງທ່ຽວບໍ່ຄວນພາດໂອກາດມາຢາມ 3 ລະດູດອກໄມ້ພິເສດພວມບານສະພັ່ງອວດອ້າງສີສັນຄວາມງາມນີ້ໄດ້.
ດອກຕາເວັນປ່າ
ດອກຕາເວັນປ່າ ແມ່ນດອກໄມ້ປ່າ ເກີດຂຶ້ນສ່ວນຫຼາຍຢູ່ໄຕງວຽນ ແລະ ຫຼາຍແຂວງພູດອຍທາງທິດເໜືອ. ດ່າລາດເລີ່ມໄດ້ປົກຄຸມດ້ວຍສີເຫຼືອງຂອງດອກໄມ້ຊະນິດນີ້ນັບແຕ່ທ້າຍເດືອນຕຸລາ
ດອກຕາເວັນປ່າບານສະພ່ັງໃນໄລຍະ 3 ອາທິດ. ໃນຈຸດເວລານີ້, ແຂກທ່ອງທ່ຽວອາດຈະເຫັນດອກໄມ້ຊະນິດນີ້ຢູ່ຫຼາຍແຫ່ງນັບແຕ່ໃຈກາງຮອດຊານເມືອງ
ຈຸດເວລາເໝາະສົມທີ່ສຸດເພື່ອຖ່າຍຮູບ check-in ກັບດອກຕາເວັນປ່າແມ່ນໄລຍະເວລາ ແຕ່ 9 – 10 ໂມງ, ເມື່ອໝອກເລີ່ມຈາງ ຫຼື ຕອນເວລາ 17 – 18 ໂມງເມື່ອຕາເວັນກຳລັງຕົກ.
ຢູ່ເຂດຊານເມືອງດ່າລາດມັກເຫັນດອກຕາເວັນປ່າຫຼາຍທີ່ສຸດ. ຕາມເສັ້ນທາງໝູ່ບ້ານດອກໄມ້ ວ້ານແທງ - ຕ່ານຸງ - ທາກວອຍ - ລາງບີອາງ ເຕັມໄປດ້ວຍສີເຫຼືອງອາລ່າມ ເຊິ່ງໄດ້ຮັບຄວາມນິຍົມຊົມຊອບຂອງຜູ້ຄົນທີ່ມັກໄປທ່ອງທ່ຽວ. ນອກຈາກນັ້ນ, ຈ້າຍມາດ - ເກົ່າດິດ, ຮ່ອມພູຄຳ, ຕູຈາ - ບົ່ງບາຍ… ກໍ່ແມ່ນບັນດາສະຖານທີ່ໄດ້ຮັບຄວາມນິຍົມຈາກແຂກທ່ອງທ່ຽວ.
ດອກສະກຸຣະ
ລະດູດອກໄມ້ພິເສດທີ່ບໍ່ອາດບໍ່ເວົ້າເຖິງເມື່ອມາດ່າລາດ ຍາມທ້າຍປີນັ້ນແມ່ນດອກສະກຸຣະ. ເຖິງຢ່າງໃດກໍ່ຕາມ, ໄລຍະດອກໄມ້ບານ ບໍ່ເປັນປົກກະຕິ, ອາດຈະເລີ່ມແຕ່ເດືອນທັນວາ, ແລ້ວແຕ່ຕາມສະພາບອາກາດ.
ຢູ່ຫວຽດນາມ ມີບໍ່ຫຼາຍແຫ່ງທີ່ມີດອກໄມ້ຊະນິດນີ້, ດັ່ງນັ້ນ ຍາມດອກໄມ້ຊະນິດນີ້ເບັ່ງບານ ດ່າລາດ ຈະຕ້ອນຮັບແຂກທ່ອງທ່ຽວມາຖ່າຍຮູບເປັນຈຳນວນຫຼາຍ.
ແຂກທ່ອງທ່ຽວອາດຈະເລືອກເວລາຖ່າຍຮູບກັບດອກໄມ້ ໃນຍາມຮຸ່ງເຊົ້າ ຫຼື ຕອນບ່າຍ. ອາກາດໃນຈຸດເວລານັ້ນ ພໍດີຢູ່ ແລະ ແສງກໍ່ດີຫຼາຍ.
ຢູ່ເຂດຊານເມືອງ, ເຫັນດອກສະກຸຣຸຫຼາຍແມ່ນຢູ່ຕາມຖະໜົນແຕ່ ຈ້າຍມາດ ໄປ ເກົ່າເດິດ, ຄ້ອຍ ດາກຸຍ, ລາກເຟືອງ ຫຼື ໜອງ ຕວຽນເລິມ. ເພື່ອສະດວກໃນການເດີນທາງກ່ວາ, ແຂກທ່ອງທ່ຽວກໍ່ສາມາດເລືອກຖ່າຍຮູບພ້ອມກັບດອກໄມ້ສີມ່ວງຢູ່ລຽບຕາມບາງຖະໜົນໃນນະຄອນຄື ຖະໜົນເຈິ່ນຮືງດ້າວ, ລຽບຕາມໜອງຊວັນເຮືອງ.
ຫຍ້າບົວ
ຫຍ້າບົວ ຫຼື ໜ້າຫິມະ ແມ່ນປະເພດດອກໄມ້ທີ່ປົ່ງຂຶ້ນເປັນພຸ່ມ. ນັບແຕ່ຕົ້ນເດືອນພະຈິກ ຮອດທ້າຍເດືອນທັນວາ ແມ່ນຈຸດເວລາຫຍ້າບົວເລີ່ມບານສະພັ່ງ. ຫຍ້າຊະນິດນີ້ຍັງປົກຄຸມແຕ່ລະໜ່ວຍພູ, ສ້າງເປັນໜ່ວຍພູຫຍ້າບົວທີ່ສວຍງາມດັ່ງໃນຝັນ.
ໃບຫຍ້າບົວຂ້ອນຂ້າງບາງ, ສາມາດປິວໄປຕາມລົມໄດ້ງ່າຍ. ລະດູຫຍ້າບົວ ບໍ່ແກ່ຍາວ ແຕ່ຄວາມງາມຂອງມັນຍັງເຮັດໃຫ້ແຂກທ່ອງທ່ຽວຮູ້ສຶກຕື່ນເຕັ້ນທີ່ໄດ້ເຫັນ.
ບຸນຄົງ