AFD ແລະ ບັນດາອົງການຈັດຕັ້ງທີ່ບໍ່ສັງກັດລັດຖະບານ ຝຣັ່ງ ມີຄວາມສົນໃຈໜູນຊ່ວຍ ຫວຽດນາມ

10:42 | 29/09/2022

ຍສໝ - ອົງການເພື່ອການພັດທະນາສາກົນຝຣັ່ງ (AFD) ຈະເພີ່ມທະວີການໜູນຊ່ວຍ ແລະ ສະໜອງທຶນໃຫ້ແກ່ບັນດາໂຄງການຂອງອົງການຈັດຕັ້ງທີ່ບໍ່ສັງກັດລັດຖະບານ ແລະ ສະມາຄົມຂອງຝະລັ່ງ ທີ່ດຳເນີນຢູ່ ຫວຽດນາມ, ໂດຍຜ່ານບັນດາຂົງເຂດທີ່ໄດ້ພິສູດໃຫ້ເຫັນປະສິດທິຜົນ, ໃນນັ້ນມີການຍົກສູງກຳລັງຄວາມສາມາດຂອງອຳນາດການປົກຄອງທ້ອງຖິ່ນ, ບຳລຸງສ້າງວິຊາອາຊີບໃຫ້ຊາວໜຸ່ມ, ເບິ່ງແຍງດູແລເດັກ ແລະ ຍົກສູງປະສິດທິພາບໃນການຜະລິດກະສິກຳ ແລະ ຫັດຖະກຳ.

	ສະມາຄົມນັກສຶກສາຫວຽດນາມປະຈຳຝຣັ່ງຈັດລະນຶກການສ້າງຕັ້ງຂຶ້ນຄົບຮອບ 18 ປີ
	ໃນປີ 2020: ອົງການຈັດຕັ້ງທີ່ບໍ່ຂຶ້ນກັບລັດຖະບານ ໃຫ້ການສະໜັບສະໜູນຫວຽດນາມ ໃນການຮັບມືກັບໄພພິບັດທາງທຳມະຊາດ ແລະ ໂລກລະບາດ

ນັ້ນແມ່ນຄຳຢືນຢັນຂອງຜູ້ຕາງໜ້າ AFD ທ່ານ Nicolas Le Guen ທີ່ການພົບປະລະຫວ່າງອົງການນີ້ ແລະ ການນຳສະຫະພັນບັນດາອົງການມິດຕະພາບ ຫວຽດນາມ (VUFO) ໃນວັນທີ 23 ກັນຍາ ຢູ່ ຝລັ່ງ. ກອງປະຊຸມໄດ້ດຳເນີນໄປດ້ວຍຮູບການເຊິ່ງໜ້າ ແລະ ອອນລາຍ, ໂດຍມີການເຂົ້າຮ່ວມຂອງຄະນະຜູ້ແທນໂດຍທ່ານຮອງປະທານ VUFO ຫງວຽນວັນແຢັງ ນຳໜ້າ ທີ່ພວມດຳເນີນການຢ້ຽມຢາມ ຝະລັ່ງ. ເຂົ້າຮ່ວມມີຜູ້ຕາງໜ້າກົມອາຊີ - ອົດສະຕາລີ, ກະຊວງການຕ່າງປະເທດ ຝະລັ່ງ, ປະທານສະມາຄົມມິດຕະພາບ ແລະ ການຮ່ວມມື ຝະລັ່ງ - ຫວຽດນາມ, ທ່ານອະດີດລັດຖະມົນຕີກະຊວງສາທາລະນະສຸກ ນາງ ຫງວຽນທິກິມຕ໋ຽນ, ຜູ້ຕາງໜ້າສະມາຄົມມິດຕະພາບຝະລັ່ງ - ຫວຽດນາມ (AAFV) ແລະ ບັນດາອົງການຈັດຕັ້ງທີ່ບໍ່ສັງກັດລັດຖະບານ ຝຣັ່ງ ທີ່ມີການພົວພັນກັບຫວຽດນາມ.

AFD ແລະ ບັນດາອົງການຈັດຕັ້ງທີ່ບໍ່ສັງກັດລັດຖະບານ ຝຣັ່ງ ມີຄວາມສົນໃຈໜູນຊ່ວຍ ຫວຽດນາມ. (ພາບ: vietnamplus)

ທ່ານຮອງປະທານ VUFO ຫງວຽນວັນແຢັງ ໄດ້ຕີລາຄາສູງປະສິດທິຜົນທີ່ແທດຈິງຂອງບັນດາໂຄງການທີ່ໄດ້ຮັບທຶນຈາກ AFD ຜ່ານບັນດາອົງການຈັດຕັ້ງທີ່ບໍ່ສັງກັດລັດຖະບານ. ຕາມສະຖິຕິຂອງຄະນະກຳມະການຈັດທຳການຊ່ວຍເຫຼືອປະຊາຊົນຂອງ VUFO (Pacom), ປະຈຸບັນ, ຝລັ່ງ ມີ 61 ອົງການທີ່ເຄື່ອນໄຫວຢູ່ຫວຽດນາມ, ເປັນອັນດັບ 2 ໃນຈຳນວນບັນດາອົງການຈັດຕັ້ງຢູ່ຫວຽດນາມ, ດ້ວຍຈຳນວນປ່ອຍເງິນປະຈຳປີແມ່ນຂ້ອນຂ້າງເປັນປົກກະຕິ, ຄາດວ່າ ເກືອບ 9 ລ້ານ USD.

ໂດຍຕອບຄຳເຫັນຂອງຜູ້ຕາງໜ້າບັນດາສະມາຄົມຝະລັ່ງ ທີ່ເຂົ້າຮ່ວມກອງປະຊຸມ, ທ່ານ ຫງວຽນວັນແຢັງ ຢືນຢັນວ່າ VUFO ໄດ້ຮັບຮູ້ຄຳເຫັນຂອງຜູ້ຕາງໜ້າບັນດາສະມາຄົມຢູ່ ຝະລັ່ງ. ສະຫະພັນ ຈະກວດກາຄືນບັນດາລັດຖະດຳລັດ ແລະ ເອກະສານຂອງລັດຖະບານ ແລະ ບັນດາຂະແໜງການ, ສະເໜີລັດຖະບານແກ້ໄຂບາງບັນຫາທີ່ບໍ່ເໝາະສົມ, ໃນນັ້ນມີດຳລັດ 80/2020 ND-CP ກ່ຽວກັບການຄຸ້ມຄອງການຊ່ວຍເຫຼືອລ້າ. ທ່ານກ່າວວ່າ VUFO ໄດ້ຈັດຕັ້ງບັນດາຄະນະຜູ້ແທນໄປປະຕິບັດງານຢູ່ທ້ອງຖິ່ນ ເພື່ອຝຶກອົບຮົມກ່ຽວກັບການຮັບເອົາບັນດາໂຄງການຈາກອົງການຈັດຕັ້ງທີ່ບໍ່ສັງກັດລັດຖະບານ ຂອງຕ່າງປະເທດ ແລະ ສະເໜີໃຫ້ບັນດາອົງການພົວພັນກັບ Pacom ໂດຍກົງເພື່ອແກ້ໄຂບັນຫາທີີ່ເກີດຂຶ້ນໃໝ່.

ສະຖິຕິຂອງ AFD ສະແດງໃຫ້ເຫັນວ່າ ໃນ 10 ປີຜ່ານມາ, ອົງການນີ້ ໄດ້ບໍລິຈາກເງິນປະມານ 140 ລ້ານເອີໂຣ ຕໍ່ປີ ໃຫ້ບັນດາອົງການຈັດຕັ້ງທີ່ບໍ່ສັງກັດລັດຖະບານຂອງຝະລັ່ງ, ຊຸກຍູ້ບັນດາໂຄງການທີ່ນຳມາເຊິ່ງການປ່ຽນແປງຢ່າງຕັ້ງໜ້າໃຫ້ບັນດາທ້ອງຖິ່ນທີ່ຮັບເອົາ. ໂດຍສະເພາະ ໃນໄລຍະການແຜ່ລະບາດຂອງ COVID-19, AFD ໄດ້ເບີກຈ່າຍປະມານ 400 ລ້ານເອີໂຣໃຫ້ແກ່ບັນດາເປົ້າໝາຍເຫຼົ່ານີ້.

ຄາດວ່າໃນປີ 2023, AFD ຈະໜູນຊ່ວຍ 12 ໂຄງການຢູ່ຫວຽດນາມ ດ້ວຍງົບປະມານປະມານ 3 ລ້ານເອີໂຣ, ໃນນັ້ນມີໂຄງການໜູນຊ່ວຍເດັກນ້ອຍ.

ທ່ານ ຫງວຽນວັນແຢັງ ໃຫ້ຮູ້ວ່າ: ຫວຽດນາມ ພວມໄດ້ຮັບການໜູນຊ່ວຍໂດຍອົງການບໍ່ສັງກັດລັດຖະບານ ຈາກຫຼາຍປະເທດ, ແຕ່ ຝລັ່ງ ແມ່ນຄູ່ຮ່ວມມືສຳຄັນທີ່ສຸດ ຍ້ອນມີຫຼາຍອົງການ, ບັນດາໂຄງການໜູນຊ່ວຍສຸມໃສ່ບັນດາບັນຫາທີ່ກ່ຽວຂ້ອງເຖິງການຮັບປະກັນຊີວິດສັງຄົມ, ໜູນຊ່ວຍຄົນທຸກຍາກ, ຜູ້ດ້ອຍໂອກາດໃນສັງຄົມ, ຊົນເຜົ່າສ່ວນໜ້ອຍຢູ່ເຂດພູດອຍ, ແຜ່ຂະຫຍາຍໄປທົ່ວໃນຂົງເຂດສາທາລະນະສຸກ, ການສຶກສາ, ການເບິ່ງແຍງຮັກສາສຸຂະພາບຂອງຊຸມຊົນ, ທາດພິດສີສົ້ມ... ຊົມໃຊ້ໂຄງການນີ້ແມ່ນປະຊາຊົນໂດຍກົງ, ດັ່ງນັ້ນ ປະສິດທິຜົນຂອງໂຄງການກໍ່ດີ. AFD ແລະ ບັນດາອົງການລັດຖະບານ ຝລັ່ງ ມີທັດສະນະຢ່າງຈະແຈ້ງວ່າ ຖ້າຫາກໂຄງການໃດຖືກປະຕິບັດຢູ່ຫວຽດນາມ ແມ່ນຕ້ອງສອດຄ່ອງກັບຍຸດທະສາດ ແລະ ນະໂຍບາຍຂອງຫວຽດນາມ.

ໃນເວລາເຮັດວຽກຢູ່ຝລັ່ງ, ຄະນະຜູ້ແທນ VUFO ໄດ້ມີການພົບປະກັບຜູ້ຕາງໜ້າຂອງຫຼາຍສະມາຄົມຫວຽດນາມ ແລະ ບັນດາອົງການມິດຕະພາບຝລັ່ງ ທີ່ຊ່ວຍເຫຼືອ ແລະ ໜູນຊ່ວຍ ຫວຽດນາມ. ຄະນະຜູ້ແທນໄດ້ປຶກສາຫາລືກັບສະມາຄົມມິດຕະພາບຝະລັ່ງ - ຫວຽດນາມ ແລະ ສະມາຄົມຊາວ ຫວຽດນາມ ຢູ່ ຝະລັ່ງ ກ່ຽວກັບວຽກງານກະກຽມໃຫ້ແກ່ບັນດາການເຄື່ອນໄຫວສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຝະລັ່ງ - ຫວຽດນາມ ແລະ 10 ປີແຫ່ງວັນເຊັນສັນຍາຄູ່ຮ່ວມມືຍຸດທະສາດລະຫວ່າງ 2 ປະເທດ ແລະ ສະເຫຼີມສະຫຼອງ 50 ປີແຫ່ງວັນເຊັນສັນຍາປາຣີສິ້ນສຸດສົງຄາມຫວຽດນາມ.

ຄຳຮຸ່ງ