ທີ່ເຫດການນີ້, ຫົວໜ້າຫ້ອງການທີ່ປຶກສາທູດປ້ອງກັນຊາດຫວຽດນາມ ໄດ້ແນະນໍາບັນດາເນື້ອໃນຂອງປຶ້ມປົກຂາວປ້ອງກັນຊາດຫວຽດນາມ ປີ 2019 ດ້ວຍການເຂົ້າຮ່ວມຂອງທ່ານ ຫວູກວາງມິງ ເອກອັກຄະລັດຖະທູດຫວຽດນາມ ປະຈໍາ ກໍາປູເຈຍ, ຜູ້ຕາງໜ້າສະຖານທູດ ແລະຄະນະທີ່ປຶກສາທູດທະຫານບັນດາປະເທດປະຈໍາ ກໍາປູເຈຍ.

ກ່າວຄໍາເຫັນໄຂເຫດການ, ທ່ານພັນເອກພິເສດ ຫງວຽນແທັ່ງຈີ໊ງ ຫົວໜ້າຫ້ອງການທີ່ປຶກສາທູດປ້ອງກັນຊາດຫວຽດນາມ ປະຈໍາ ກໍາປູເຈຍ ເນັ້ນໜັກວ່າ ທົ່ວປວງຊົນປ້ອງກັນຊາດຂອງຫວຽດນາມ ແມ່ນພື້ນຖານປ້ອງກັນຊາດ “ເພື່ອປະຊາຊົນ, ໂດຍປະຊາຊົນ, ຂອງປະຊາຊົນ”; ພື້ນຖານປ້ອງກັນຊາດມີລັກສະນະສັນຕິພາບ, ປ້ອງກັນຕົນເອງ.

ທ່ານ Tea Banh ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດກໍາປູເຈຍ ແລະທ່ານພັນເອກພິເສດ ຫງວຽນແທັ່ງຈີ໊ງ ຫົວໜ້າຫ້ອງການທີ່ປຶກສາທູດປ້ອງກັນຊາດຫວຽດນາມ ປະຈໍາກໍາປູເຈຍ ທີ່ພິທີ. (ພາບ: TTXVN)

ແນະນໍາປຶ້ມປົກຂາວປ້ອງກັນຊາດຫວຽດນາມ ປີ 2019, ທ່ານພັນເອກພິເສດ ຫງວຽນແທັ່ງຈີ໊ງ ໄດ້ເຕື້ືອງເຖິງແຜນນະໂຍບາຍຂອງຫວຽດນາມ ແມ່ນບໍ່ຮ່ວມສຳພັນກັບປະເທດນີ້ເພື່ອຕ້ານປະເທດອື່ນ; ບໍ່ໃຫ້ປະເທດອື່ນມາຕັ້ງຖານທັບ ຫຼື ນໍາໃຊ້ຜືນແຜ່ນດິນຫວຽດນາມ ເພື່ອຕ້ານຄືນປະເທດອື່ນ; ບໍ່ນໍາໃຊ້ກໍາລັງອາວຸດ ຫຼື ນາບຂູ່ນໍາໃຊ້ກໍາລັງອາວຸດໃນການພົວພັນສາກົນ... ໃນການພົວພັນຮ່ວມມືກັບກໍາປູເຈຍ, ກອງທັບສອງປະເທດສືບຕໍ່ເສີມຂະຫຍາຍບັນດາໝາກຜົນທີ່ບັນລຸໄດ້ຕາມເນື້ອໃນຂອງອະນຸສັນຍາ ແລະແຜນການຮ່ວມມືດ້ານປ້ອງກັນຊາດໃນແຕ່ລະປີ.

ກ່າວຄໍາເຫັນທີ່ພິທີ, ທ່ານພົນຕີ Phat Vibolsopheak ຮອງຫົວໜ້າກົມໃຫຍ່ນະໂຍບາຍ ແລະພົວພັນຕ່າງປະເທດ, ຫົວໜ້າກົມພົວພັນສາກົນກະຊວງປ້ອງກັນປະເທດກໍາປູເຈຍ ໄດ້ຕາງໜ້າການນໍາກະຊວງປ້ອງກັນປະເທດກໍາປູເຈຍ ສະແດງຄວາມຊົມເຊີຍຢ່າງສຸດໃຈ ແລະຕີລາຄາສູງຕໍ່ບັນດາຜົນງານ, ມູນເຊື້ອຂອງກອງທັບປະຊາຊົນຫວຽດນາມ.

ທ່ານພົນຕີ Phat Vibolsopheak ເນັ້ນໜັກວ່າ ການພົວພັນທີ່ເປັນມູນເຊື້ອນັບມື້ນັບໄດ້ຮັບການຮັດແໜ້ນ ແລະປັບປຸງຜ່ານບັນດາການຢ້ຽມຢາມຂັ້ນສູງ, ບັນດາການພົບປະແລກປ່ຽນນາຍທະຫານໃນແຕ່ລະປີ, ພິເສດແມ່ນໃນຂົງເຂດບໍາລຸງສ້າງບຸກຄະລາກອນ ຈະເປັນພື້ນຖານໃຫ້ແກ່ການພົວພັນທີ່ສະໜິດແໜ້ນ ແລະໝັ້ນແກ່ນກວ່າອີກລະຫວ່າງສອງກອງທັບ.

（ຄຳຮຸ່ງ）