| ສະເຫຼີມສະຫຼອງ 55 ປີແຫ່ງວັນສ້າງຕັ້ງ ອາຊຽນ ຢູ່ນິວຢອກ | |
| ກອງປະຊຸມ AMM 55: ຫວຽດນາມ ຮຽກຮ້ອງບັນດາປະເທດສ້າງທະເລຕາເວັນອອກໃຫ້ກາຍເປັນເຂດທະເລສັນຕິພາບ, ສະຖຽນລະພາບ, ຮ່ວມມື |
 |
| ພິທີຊັກທຸງ ອາຊຽນ ຂຶ້ນ (ພາບ: TTXVN) |
ຫວ່າງແລ້ວນີ້, ກະຊວງການຕ່າງປະເທດ ໄດ້ຈັດຕັ້ງພິທີຊັກທຸງ ອາຊຽນ ຂຶ້ນຢ່າງສະຫງ່າຜ່າເຜີຍ ເນື່ອງໃນໂອກາດສະເຫຼີມສະຫຼອງ 55 ປີແຫ່ງວັນສ້າງຕັ້ງສະມາຄົມປະຊາຊາດ ອາຊີຕາເວັນອອກສ່ຽງໃຕ້ (8 ສິງຫາ 1967 – 8 ສິງຫາ 2022) ແລະ 27 ປີແຫ່ງວັນ ຫວຽດນາມ ກາຍເປັນສະມາຊິກຂອງອົງການຈັດຕັ້ງນີ້ຢ່າງເປັນທາງການ (28 ກໍລະກົດ 1995 - 28 ສິງຫາ 2022).
ທ່ານລັດຖະມົນຕີກະຊວງການຕ່າງປະເທດ ຫວຽດນາມ ບູຍແທັງເຊີນ ເປັນປະທານ ພິທີຊັກທຸງຂຶ້ນ. ການເຂົ້າຮ່ວມມີທ່ານ ເອກອັກຄະລັດຖະທູດ ບັນດາປະເທດ ອາຊຽນ, ບັນດາປະເທດຄູ່ຮ່ວມມື ອາຊຽນ; ການນຳບັນດາກະຊວງ, ຄະນະ, ຂະແໜງການຂອງ ຫວຽດນາມ.
ພິທີຊັກທຸງປະຈຳປີ ເນື່ອງໃນໂອກາດວັນສ້າງຕັ້ງ ອາຊຽນ ໄດ້ກາຍເປັນທໍານຽມທີ່ໜ້າພາກພູມໃຈຂອງບັນດາປະເທດທີ່ເປັນສະມາຊິກ ອາຊຽນ ເພື່ອສະແດງໃຫ້ເຫັນການເຊີດຊູບັນດາຄຸນຄ່າລວມ ແລະ ໃຫ້ຄຳໝັ້ນສັນຍາຊຸກຍູ້ນໍ້າໃຈສັນຕິພາບສາມັກຄີ, ການຮ່ວມມືພາຍໃຕ້ຊາຍຄາລວມແມ່ນປະຊາຄົມອາຊຽນ ເພື່ອສັນຕິພາບ ແລະ ຄວາມຈະເລີນຮຸ່ງເຮືອງ.
ທຸງອາຊຽນປະກອບດ້ວຍ 4 ສີຄື ສີຟ້າ, ສີແດງ, ສີຂາວ ແລະ ສີເຫຼືອງ, ເຊິ່ງແຕ່ລະສີແມ່ນຕາງໜ້າໃຫ້ບັນດາສີຕົ້ນຕໍຂອງທຸງຊາດແຕ່ລະປະເທດທີ່ເປັນສະມາຊິກອາຊຽນ. ສີຟ້າໝາຍເຖິງສັນຕິພາບ ແລະ ຄວາມໝັ້ນຄົງ. ສີແດງໝາຍເຖິງຄວາມກ້າຫານ ແລະ ຄວາມກ້າວໜ້າ. ສີຂາວໝາຍເຖິງຄວາມບໍລິສຸດ. ສີເຫຼືອງໝາຍເຖິງຄວາມຈະເລີນຮຸ່ງເຮືອງ. ວົງກົມສີແດງ ແລະ ຂອບຂອງວົງກົມສີຂາວ ໝາຍເຖິງຄວາມເປັນເອກະພາບຂອງປະຊາຄົມ ອາຊຽນ.
ຮູບພາບຕົ້ນເຂົ້າມັດລວມກັນໄວ້ ໝາຍເຖິງຄວາມໄຝ່ຝັນຂອງບັນດາປະເທດທີ່ເປັນສະມາຊິກສ້າງຕັ້ງອາຊຽນ ລວມທັງປະເທດທັງໝົດໃນພາກພື້ນອາຊີຕາເວັນອອກສ່ຽງໃຕ້, ເຊິ່ງຜູກພັນກັນດ້ວຍນໍ້າໃຈມິດຕະພາບ ແລະ ຄວາມສາມັກຄີ.
ທຸງອາຊຽນແມ່ນສັນຍາລັກແຫ່ງຄວາມເປັນເອກະພາບຂອງບັນດາປະເທດທີ່ເປັນສະມາຊິກກ່ຽວກັບຫຼັກການ ແລະ ຄວາມມານະພະຍາຍາມຂອງອາຊຽນ; ເຊິ່ງເປັນເຄື່ອງມືເພື່ອເພີ່ມຄວາມຮັບຮູ້ ແລະ ຄວາມສາມັກຄີຂອງປະຊາຄົມ ອາຊຽນ.
ໂດຍການກ່າວຄໍາເຫັນທີ່ພິທີຊັກທຸງຂຶ້ນ, ທ່ານລັດຖະມົນຕີ ບູຍແທັງເຊີນ ເນັ້ນໜັກຄືນໃໝ່ ເລື່ອງອາຊຽນໄດ້ສ້າງຕັ້ງເປັນເວລາ 55 ປີແລ້ວເຊິ່ງໄດ້ສ້າງປະຖົມປັດໄຈ ເພື່ອໃຫ້ບັນດາປະເທດພ້ອມກັນປະຕິບັດຄວາມມຸ່ງມາດປາດຖະໜາກ່ຽວກັບພາກພື້ນແຫ່ງສັນຕິພາບ, ສະຖຽນລະພາບຍາວນານ, ພັດທະນາແບບຍືນຍົງ ແລະ ກວມລວມ.
ທ່ານລັດຖະມົນຕີ ບູຍແທັງເຊີນ ໃຫ້ຮູ້ວ່າ ມາຮອດປັດຈຸບັນ, ບັນດາປະເທດທີ່ເປັນສະມາຊິກ ອາຊຽນ ສາມາດເອກອ້າງທະນົງໃຈຕໍ່ບັນດາຜົນງານທີ່ບັນລຸໄດ້ໃນການຫັນເປົ້າໝາຍອັນສູງສົ່ງນັ້ນໃຫ້ປະກົດຜົນເປັນຈິງ, ຕອບສະໜອງຄວາມມຸ່ງມາດປາດຖະໜາຂອງປະຊາຊົນອາຊີຕາເວັນອອກສ່ຽງໃຕ້ເກືອບ 700 ລ້ານຄົນ.
ການສະເຫຼີມສະຫຼອງ 55 ປີແຫ່ງວັນສ້າງຕັ້ງອາຊຽນ ໃນປີນີ້ ແມ່ນເປັນໂອກາດທີ່ສຳຄັນເພື່ອຫວນຄືນການເດີທາງທີ່ຜ່ານໄປ ແລະ ສະແດງຄວາມຮູ້ບຸນຄຸນຕໍ່ບັນດາຜົນງານທີ່ບັນດາລຸ້ນການນຳ ອາຊຽນ ບັນລຸໄດ້ໃນຕະຫຼອດ 55 ປີຜ່ານມາ.
ຕາມທ່ານລັດຖະມົນຕີ ບູຍແທັງເຊີນ, ປະຈຸບັນ, ໂລກພວມມີການປ່ຽນແປງຢ່າງເລິກເຊິ່ງ ແລະ ກວ້າງຂວາງ ຍ້ອນຖືກຮັບຜົນສະທ້ອນຈາກໂລກລະບາດ COVID-19, ການປ່ຽນແປງຂອງດິນຟ້າອາກາດ, ການປະຕິວັດອຸດສາຫະກຳຄັ້ງທີ 4 ກໍຄືການຫັນປ່ຽນດ້ານພູມີສາດການເມືອງຢ່າງວ່ອງໄວ.
ເພື່ອປະສົບຜົນສໍາເລັດໃນຄວາມມານະພະຍາຍາມປະຕິບັດບັນລຸເປົ້າໝາຍ ແລະ ວິໄສທັດອາຊຽນ, ທ່ານລັດຖະມົນຕີ ບູຍແທັງເຊີນໃຫ້ຮູ້ວ່າ, ປະຊາຄົມ ອາຊຽນ ຄວນເພີ່ມທະວີຄວາມມານະພະຍາຍາມປັບປຸງພື້ນຖານ ອາຊຽນ, ຊຸກຍູ້ການຟື້ນຟູຫຼັງໂລກລະບາດຢ່າງວ່ອງໄວ, ຍືນຍົງ ແລະ ຮອບດ້ານ, ພັດທະນາວິໄສທັດຫຼັງປີ 2025 ໃຫ້ໄລຍະພັດທະນາຕໍ່ໄປຂອງປະຊາຄົມ.
ຫອມມາລາ
