ວັນທີ 27 ກໍລະກົດ 2022, ສະຖານທູດ ຫວຽດນາມ ປະຈຳ ຝະລັ່ງ ໄດ້ຈັດຕັ້ງພິທີສະເຫຼີມສະຫຼອງ 75 ປີແຫ່ງວັນທະຫານເສຍອົງຄະ ແລະ ນັກຮົບເສຍສະຫຼະຊີວິດເພື່ອຊາດ ໂດຍມີທ່ານເອກອັກຄະລັດຖະທູດ ຫວຽດນາມ ປະຈຳ ຝະລັ່ງ ດິ່ງຕວ່ານຖັ໊ງ, ທ່ານນາງເອກອັກຄະລັດຖະທູດ ຫວຽດນາມ ປະຈຳ UNESCO ເລທິຮົ່ງເວິນ, ທີ່ປຶກສາຝ່າຍປ້ອງກັນຊາດ ຫວຽດນາມ ປະຈຳ ຝະລັ່ງ, ຜູ້ຕາງໜ້າບັນດາອົງການອ້ອມຂ້າງສະຖານທູດ, ຜູ້ຕາງໜ້າບັນດາຄອບຄົວທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ ແລະ ບັນດາຄອບຄົວທີ່ມີຄຸນງາມຄວາມດີຕໍ່ປະເທດຊາດ.
 |
| ພົບປະຕອບບຸນແທນຄຸນສະເຫຼີມສະຫຼອງວັນທະຫານເສຍອົງຄະ-ນັກຮົບເສຍສະຫຼະຊີວິດເພື່ອຊາດ ຢູ່ຝະລັ່ງ. |
ກ່າວຄຳເຫັນທີ່ພິທີ, ທ່ານເອກອັກຄະລັດຖະທູດ ດິ່ງຕວ່ານຖັ໊ງ ໄດ້ສະແດງຄວາມຂອບອົກຂອບໃຈຢ່າງເລິກເຊິ່ງຕໍ່ການປະກອບສ່ວນຂອງບັນດາວິລະຊົນ, ທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ, ຜູ້ມີຄຸນງາມຄວາມດີ ຕໍ່ການປະຕິວັດ ທີ່ອຸທິດສ່ວນ ແລະ ຕໍ່ສູ້ຢ່າງບໍ່ຍອມຈຳນົນ, ກ້າຫານ, ສ້າງສິ່ງມະຫັດສະຈັນ, ປະຫວັດສາດອັນສະຫງ່າລາສີຂອງປະເທດຊາດ.
ທ່ານເອກອັກຄະລັດຖະທູດຢືນຢັນຄວາມຕັດສິນໃຈຂອງຄົນລຸ້ນຫຼັງ, ພະນັກງານໃນແນວຮົບພົວພັນຕ່າງປະເທດ ໃນນັ້ນມີພະນັກງານສຳນັກງານຜູ້ຕາງໜ້າ ຫວຽດນາມ ປະຈຳ ຝະລັ່ງ ສືບຕໍ່ປະຕິບັດໜ້າທີ່ອັນສະຫງ່າລາສີໃນພາລະກິດສ້າງສາ ແລະ ປົກປັກຮັກສາປະເທດຊາດ, ປະກອບສ່ວນຈົນສຸດຄວາມສາມາດຂອງຕົນໃຫ້ປະເທດຊາດນັບມື້ນັບມີອຳນາດ ແລະ ສະຫງ່າລາສີ, ສົມກັບການເສຍສະຫຼະອັນສູງສົ່ງຂອງປະຊາຊົນຫວຽດນາມ ທີ່ໄດ້ເສຍສະຫຼະໃນເມື່ອກ່ອນ ເພື່ອປະເທດຊາດເປັນເອກະລາດ, ອິດສະຫຼະພາບໃນປະຈຸບັນ.
ພາຍຫຼັງພິທີຖະຫວາຍທູບທຽນ, ການພົບປະຕອບບຸນແທນຄຸນສະເຫຼີມສະຫຼອງວັນທະຫານເສຍອົງຄະ ແລະ ນັກຮົບເສຍສະຫຼະຊີວິດເພື່ອຊາດ ໄດ້ດຳເນີນໄປດ້ວຍບັນຍາກາດທີ່ຕື້ນຕັນໃຈທີ່ສຸດ.
ບູນມີ
