ຕອນເຊົ້າວັນທີ 28 ມິຖຸນາ, ຢູ່ຮ່າໂນ້ຍ, ທ່ານນາງເອກອັກຄະລັດຖະທູດ ຫງວຽນເຟືອງງາ, ປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນ Algeria Abdelhamid Boubazine ເຂົ້າຢ້ຽມຂ່ຳນັບ ເນື່ອງໃນໂອກາດມາຮັບໜ້າທີ່ໃໝ່ ຢູ່ຫວຽດນາມ.
 |
| ທ່ານນາງເອກອັກຄະລັດຖະທູດ ຫງວຽນເຟືອງງາ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ຕ້ອນຮັບທ່ານເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນ Algeria Abdelhamid Boubazine. ພາບ: vufo.org.vn |
ທີ່ການພົບປະ, ທ່ານເອກອັກຄະລັດຖະທູດ Abdelhamid Boubazine ໄດ້ຂອບອົກຂອບໃຈທ່ານນາງປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ຫງວຽນເຟືອງງາ ທີ່ໄດ້ສະຫງວນເວລາໃຫ້ການຕ້ອນຮັບ ແລະ ຕີລາຄາສູງການພົວພັນມິດຕະພາບທີ່ເປັນມູນເຊື້ອລະຫວ່າງ ຫວຽດນາມ - Algeria.
ທ່ານເອກອັກຄະລັດຖະທູດ Abdelhamid Boubazine ໄດ້ຂອບອົກຂອບໃຈລັດຖະບານ ແລະ ປະຊາຊົນ ຫວຽດນາມ ທີ່ຍາມໃດກໍ່ຄຽງບ່າຄຽງໄຫຼ່ກັບປະຊາຊົນ Algeria ໃນການຕໍ່ສູ້ຍາດເອົາເອກະລາດແຫ່ງຊາດ.
ທ່ານເອກອັກຄະລັດຖະທູດຢືນຢັນວ່າ ໃນອາຍຸການຂອງຕົນ ຈະມານະພະຍາຍາມຊຸກຍູ້ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມື ລະຫວ່າງ Algeria ແລະ ຫວຽດນາມ. ທ່ານເອກອັກຄະລັດຖະທູດ ກໍ່ຫວັງວ່າຈະໄດ້ຮັບການໜູນຊ່ວຍ ແລະ ສົມທົບກັນຂອງສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະ ສະມາຄົມມິດຕະພາບ ຫວຽດນາມ - Algeria ໃນການປະຕິບັດບັນດາການເຄື່ອນໄຫວມິດຕະພາບ, ເພີ່ມທະວີຄວາມເຂົ້າໃຈກັນ.
ທ່ານນາງປະທານ VUFO ຫງວຽນເຟືອງງາ ຢືນຢັນວ່າ VUFO ຈະສົມທົບກັນຢ່າງຕັ້ງໜ້າກັບສະຖານທູດ Algeria ປະຈຳ ຫວຽດນາມ ຈັດຕັ້ງບັນດາການເຄື່ອນໄຫວພົບປະແລກປ່ຽນປະຊາຊົນ ຄື: ກອງປະຊຸມສຳມະນາ, ໂອ້ລົມສົນມະນາ, ແລກປ່ຽນວັດທະນະທຳ, ສິລະປະ, ສະເຫຼີມສະຫຼອງເຫດການສຳຄັນຂອງສອງປະເທດ... ໂດຍສະເພາະ ໃນປີ 2022, ເມື່ອສອງປະເທດຈະສະເຫຼີມສະຫຼອງວັນສ້າງຕັ້ງການພົວພັນທາງການທູດຄົບຮອບ 60 ປີ ເພື່ອແນໃສ່ເພີ່ມທະວີຄວາມເຂົ້າໃຈ, ຊຸກຍູ້ການຮ່ວມມືລະຫວ່າງປະຊາຊົນສອງປະເທດ.
ບູນມີ
