| ຍູ້ແຮງການໂຄສະນາເຜີຍແຜ່ວຽກງານຊາຍແດນທາງບົກ ໃນປີ 2022 | |
| EuroCham ຫວຽດນາມ ຈັດ “ເວທີປາໄສ ແລະ ງານວາງສະແດງເສດຖະກິດສີຂຽວ (GEFE) 2022” ໃນທ້າຍເດືອນ ພະຈິກ 2022 |
 |
| ທ່ານຮອງລັດຖະມົນຕີກະຊວງການຕ່າງປະເທດຫວຽດນາມ ຮ່າກິມຫງອກ(ເບື້ອງຊ້າຍ) ແລະ ທ່ານນາງຮອງລັດຖະມົນຕີຜູ້ທີໜຶ່ງກະຊວງການຕ່າງປະເທດອາເມລິກາ Wendy Sherman (ພາບ: ກະຊວງການຕ່າງປະເທດ) |
ຫວ່າງແລ້ວນີ້, ທ່ານຮອງລັດຖະມົນຕີກະຊວງການຕ່າງປະເທດ ຮ່າກິມຫງອກ ໄດ້ມີການເຮັດວຽກກັບ ທ່ານນາງຮອງລັດຖະມົນຕີຜູ້ທີໜຶ່ງກະຊວງການຕ່າງປະເທດອາເມລິກາ Wendy Shermanເນື່ອງໃນໂອກາດມາຢ້ຽມຢາມ ຫວຽດນາມ ໃນລະຫວ່າງວັນທີ 10 – 13 ມິຖຸນາ 2022.
ທ່ານຮອງລັດຖະມົນຕີ ຮ່າກິມຫງອກ ໃຫ້ຮູ້ວ່າ: ການຢ້ຽມຢາມ ຫວຽດນາມ ຂອງທ່ານປະທານາທິບໍດີ Joe Biden ໃນປີ 2022 ແມ່ນການເຄື່ອນໄຫວສືບຕໍ່ຜົນສຳເລັດຂອງການຢ້ຽມຢາມ ແລະ ເຮັດວຽກຂອງທ່ານນາຍົກລັດຖະມົນຕີ ຟ້າມມິງຈິ໋ງ ເນື່ອງໃນໂອກາດເຂົ້າຮ່ວມກອງປະຊຸມຂັ້ນສູງພິເສດ ອາຊຽນ - ອາເມລິກາ ຢູ່ Washington ໃນເດືອນ ພຶດສະພາ ທີ່ຜ່ານມາ.
ທ່ານຮອງລັດຖະມົນຕີ ປາດຖະໜາວ່າ ອາເມລິກາ ຈະສືບຕໍ່ແລກປ່ຽນ ແລະ ແບ່ງປັນຂໍ້ມູນກັບຫວຽດນາມ ກ່ຽວກັບບັນດາຫົວຄິດປະດິດສ້າງພາກພື້ນ, ມີຄວາມເອົາໃຈໃສ່ ແລະ ໜູນຊ່ວຍ ຫວຽດນາມ ໃນການແກ້ໄຂຜົນຮ້າຍຂອງສົງຄາມ, ຫັນເປັນພະລັງງານສະອາດ.
ໂດຍຕອບຄືນ, ທ່ານນາງຮອງລັດຖະມົນຕີການຕ່າງປະເທດ ອາເມລິກາ Sherman ໄດ້ສະແດງຄວາມຍິນດີເມື່ອສອງຝ່າຍເຊື່ອມຕໍ່ຄືນບັນດາການເຄື່ອນໄຫວຢ່າງເຊິ່ງໜ້າ ແລະ ແລກປ່ຽນຄະນະພາຍຫຼັງ Covid-19 ເປັນເທື່ອລະກ້າວ. ນອກນີ້, ທ່ານນາງກໍຍັງໄດ້ປະກາດງົບປະມານເພີ່ມເຕີມ 19 ລ້ານ USD ໃຫ້ແກ່ການເຄື່ອນໄຫວກວດຄືນ ແລະ ທໍາລາຍລະເບີດທີ່ຍັງບໍ່ທັນແຕກຢູ່ ຫວຽດນາມ, ຢືນຢັນວ່າ ອາເມລິກາ ແລະ ບັນດາປະເທດພ້ອມແລ້ວທີ່ຈະໜູນຊ່ວຍດ້ານແຫຼ່ງກຳລັງ, ການເງິນ, ເຕັກໂນໂລຢີ ແລະ ເຕັກນິກໃຫ້ ຫວຽດນາມ ເພື່ືອປະຕິບັດບັນດາຄຳໝັ້ນສັນຍາທີ່ COP26 ໃຫ້ສຳເລັດຜົນ.
ກ່ອນໜ້ານັ້ນ, ໃນການພົບປະກັບທ່ານລັດຖະມົນຕີການຕ່າງປະເທດ ບູຍແທັງເຊີນ ໃນວັນດຽວກັນ, ທ່ານນາງ Sherman ຢືນຢັນວ່າ ອາເມລິກາ ຖືເປັນສຳຄັນການພົວພັນຄູ່ຮ່ວມມືຮອບດ້ານກັບ ຫວຽດນາມ ແລະ ປາດຖະໜາຢາກຍົກລະດັບການພົວພັນເມື່ອມີຄວາມເໝາະສົມ, ພ້ອມກັນນັ້ນ ກໍສະແດງຄວາມສະໜັບສະໜູນໃຫ້ຫວຽດນາມກາຍເປັນປະເທດໜຶ່ງທີ່ຮັ່ງມີເຂັ້ມແຂງ ແລະ ຈະເລີນຮຸ່ງເຮືອງ.
ທ່ານລັດຖະມົນຕີ ບູຍແທັງເຊີນ ກໍເນັ້ນໜັກວ່າ ຫວຽດນາມ ຖື ອາເມລິກາ ແມ່ນໜຶ່ງໃນບັນດາຄູ່ຮ່ວມມືທີ່ສຳຄັນທີ່ສຸດ, ພ້ອມແລ້ວທີ່ຈະຮ່ວມກັບ ອາເມລິກາ “ຊຸກຍູ້ການພົວພັນຄູ່ຮ່ວມມືຮອບດ້ານຢ່າງເລິກເຊິ່ງ, ມີປະສິດທິຜົນ, ແທ້ຈິງ ບົນພື້ນຖານເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ລະບອບລະບຽບການການເມືອງຂອງກັນ ແລະ ກັນ”. ທ່ານລັດຖະມົນຕີ ກໍສະແດງຄວາມຊົມເຊີຍ ອາເມລິກາ ທີ່ໄດ້ຈັດຕັ້ງກອງປະຊຸມຂັ້ນສູງພິເສດ ອາຊຽນ - ອາເມລິກາ ຢ່າງສຳເລັດຜົນ, ຜ່ານນັ້ນ ກໍຢືນຢັນໃຫ້ຄຳໝັ້ນສັນຍາໃນໄລຍະຍາວຂອງ ອາເມລິກາ ເພີ່ມທະວີການຮ່ວມມື ແລະ ສະໜັບສະໜູນບົດບາດໃຈກາງຂອງ ອາຊຽນ, ປະກອບສ່ວນເຂົ້າໃນຄວາມສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ.
ທ່ານນາງ Sherman ຕີລາຄາວ່າ ການຢ້ຽມຢາມ ແລະ ເຮັດວຽກຢູ່ ອາເມລິກາ ຂອງທ່ານນາຍົກລັດຖະມົນຕີ ຟ້າມມິງຈິ໋ງ ໄດ້ຮັບຫຼາຍໝາກຜົນທີ່ດີ, ສ້າງກຳລັງແຮງໃຫ້ການພົວພັນລະຫວ່າງສອງປະເທດສືບຕໍ່ພັດທະນາເປັນຢ່າງແຮງ, ໂດຍສະເພາະແມ່ນໃນຂົງເຂດເສດຖະກິດ - ການຄ້າ, ການລົງທຶນ.
ພ້ອມກັນນັ້ນ, ທ່ານນາງ Sherman ກໍໄດ້ສະແດງຄວາມເຫັນດີເຫັນພ້ອມກ່ຽວກັບ ກອງປະຊຸມຂັ້ນສູງພິເສດອາຊຽນ - ອາເມລິກາ ມີຫຼາຍຜົນສະທ້ອນຢ່າງຕັ້ງໜ້າທັງຕໍ່ສອງຝ່າຍ ແລະ ຫຼາຍຝ່າຍ; ດີໃຈທີ່ຜົນປະໂຫຍດ ແລະ ນະໂຍບາຍຂອງ ອາເມລິກາ ແລະ ອາຊຽນ ແມ່ນມີຫຼາຍຈຸດສອດຄ່ອງກັນ; ຢືນຢັນວ່າ ອາເມລິກາຈະສືບຕໍ່ຮ່ວມມືຢ່າງເລິກເຊິ່ງກວ້າງຂວາງ ແລະ ມີຄວາມຮັບຜິດຊອບກັບອາຊີ - ປາຊີຟິກ ແລະ ມະຫາສະໝຸດອິນເດຍ, ພ້ອມກັນນັ້ນ ກໍຈະເພີ່ມທະວີການຮ່ວມມືກັບບັນດາປະເທດສະມາຊິກ ອາຊຽນ ກວ່າອີກ ເພື່ອຂຸດຄົ້ນຊ່ອງຫວ່າງຂອງການພົວພັນຢ່າງມີປະສິດທິຜົນ.
ທີ່ການຕ້ອນຮັບ, ສອງຝ່າຍກໍໄດ້ປຶກສາຫາລືກ່ຽວກັບບັນດາບັນຫາ, ຫົວຄິດປະດິດສ້າງເຊື່ອມຕໍ່ຢູ່ພາກພື້ນ ອາຊີ - ປາຊີຟິກ ແລະ ມະຫາສະໝຸດອິນເດຍ, ບັນຫາທະເລຕາເວັນອອກ, ການພັດທະນາແບບຍືນຍົງ ແລະ ເພີ່ມທະວີການຮ່ວມມືດ້ານການສຶກສາຢູ່ພາກພື້ນແມ່ນ້ຳຂອງ, ສະຖານະການ ລັດເຊຍ - ຢູແກຼນ...
ຫອມມາລາ
