 |
| ທ່ານເອກອັກຄະລັດຖະທູດ ຫວຽດນາມ ປະຈຳ ເດນມາກ ເລືອງແທງງິ ຕ້ອນຮັບທ່ານນາງປະທານສະມາຄົມມິດຕະພາບ ເດນມາກ - ຫວຽດນາມ (DAVIFO) Trine Glue Doan |
ທ່ານນາງປະທານສະມາຄົມມິດຕະພາບ ເດນມາກ - ຫວຽດນາມ (DAVIFO) Trine Glue Doan ໃຫ້ຮູ້ວ່າ ບາງໂຄງການເຊິ່ງ DAVIFO ໄດ້ ແລະ ພວມຜັນຂະຫຍາຍຢ່າງມີປະສິດທິຜົນຢູ່ ຫວຽດນາມ ຄືໂຄງການຂົນຂວາຍການສະໜອງວັດຖຸອຸປະກອນການແພດໃຫ້ແກ່ໂຮງໝໍ, ໜູນຊ່ວຍເດັກນ້ອຍປະສົບກັບຄວາມຫຍຸ້ງຍາກ ຢູ່ ຫວຽດນາມ. ເຖິງວ່າ ຂອບຂະໜາດຂອງໂຄງການບໍ່ໃຫຍ່ ແຕ່ກໍໄດ້ຮັບການຮັກສາເປັນປະຈຳ ແລະ ມີສະຖຽນລະພາບ, ມຸ່ງໄປເຖິງບັນດາເປົ້າໝາຍທີ່ມີຄວາມສ່ຽງສູງ, ເປັນຕົ້ນແມ່ນເດັກນ້ອຍ, ເຂດຊົນນະບົດ, ເຂດຫ່າງໄກສອກຫຼີກ.
ເປົ້າໝາຍຂອງ DAVIFO ໃນໄລຍະຈະມາເຖິງ ແມ່ນສືບຕໍ່ມານະພະຍາຍາມ, ລະດົມທຶນ ເພື່ອຊ່ວຍບັນດາໂຄງການຂອງ ສະມາຄົມມີການເຄື່ອນໄຫວຢ່າງມີປະສິດທິຜົນ, ເປີດກວ້າງຂອບຂະໜາດຂອງໂຄງການທີ່ພວມໄດ້ຮັບການປະຕິບັດ ແລະ ເປີດກວ້າງອອກສູ່ບັນດາຂົງເຂດໃໝ່ຄື ການແລກປ່ຽນການສຶກສາ, ບັນດາການເຄື່ອນໄຫວພົວພັນແລກປ່ຽນວັດທະນະທຳຄື ຈັດຕັ້ງໂຄງການແນະນຳວັດທະນະທຳ, ສິລະປະຂອງ ຫວຽດນາມ, ເປີດກວ້າງຊຸດສອນປຸງແຕ່ງອາຫານ ຫວຽດນາມ ໃຫ້ແກ່ເພື່ອນມິດເດນມາກ, ຍ້ອນວ່າ ປັດຈຸບັນ ອາຫານການກິນຂອງ ຫວຽດນາມ ໄດ້ຮັບຄວາມນິຍົມຊົມຊອບຈາກຊາວເດນມາກ.
ທ່ານເອກອັກຄະລັດຖະທູດ ເລືອງແທງງິ ໄດ້ສະແດງຄວາມຂອບອົກຂອບໃຈ ແລະ ຕີລາຄາສູງ DAVIFO ທີ່ໄດ້ຕັ້ງໜ້າ, ເປັນເຈົ້າການຜັນຂະຫຍາຍຫຼາຍການເຄື່ອນໄຫວ, ໂຄງການທີ່ມີຄວາມໝາຍເພື່ອແນໃສ່ໜູນຊ່ວຍຫວຽດນາມ ແລະ ຊຸກຍູ້ການພົວພັນແລກປ່ຽນປະຊາຊົນ, ເພີ່ມທະວີຄວາມເຂົ້າໃຈເຊິ່ງກັນແລະກັນ ລະຫວ່າງ ຫວຽດນາມ ແລະ ເດນມາກ ໃນໄລຍະ 45 ປີຜ່ານມາ. ທ່ານເອກອັກຄະລັດຖະທູດ ໃຫ້ຮູ້ວ່າ ຜ່ານການພົບປະກັບປະຊາຊົນເດນມາກ, ຍາມໃດກໍ່ໍ່ຮູ້ສຶກໄດ້ເຖິງນ້ຳໃຈຄວາມຮັກແພງທີ່ສະຫງວນໃຫ້ແກ່ ຫວຽດນາມ ແລະ ຖືນີ້ແມ່ນພື້ນຖານຢ່າງໝັ້ນແກ່ນເພື່ອຊຸກຍູ້ການພົວພັນສອງປະເທດ.
ບຸນຄົງ
