ຕອນບ່າຍວັນທີ 18 ພຶດສະພາ, ທ່ານຮອງປະທານສະພາແຫ່ງຊາດລາວ ນາງ ສູນທອນ ໄຊຍະຈັກ ໄດ້ຕີລາຄາສູງການຢ້ຽມຢາມ ແລະ ເຮັດວຽກຂອງທ່ານປະທານສະພາແຫ່ງຊາດຫວຽດນາມ ເວືອງດິ່ງເຫ້ວ ແຕ່ວັນທີ 15-17 ພຶດສະພາ ຕາມຄຳເຊີນຂອງທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ສໍາເລັດຜົນຢ່າງຈົບງາມ.
 |
| ການຢ້ຽມຢາມ ສປປ ລາວ ຂອງປະທານສະພາແຫ່ງຊາດ “ປະສົບຜົນສຳເລັດຢ່າງຈົບງາມ”. ພາບ: TTXVN |
ເມື່ອຕອບສຳພາດຕໍ່ນັກຂ່າວສໍານັກຂ່າວສານຫວຽດນາມ ປະຈຳນະຄອນຫຼວງວຽງຈັນ, ທ່ານນາງ ສູນທອນ ໄຊຍະຈັກ ໃຫ້ຮູ້ວ່າ ນີ້ແມ່ນການຢ້ຽມຢາມລາວຄັ້ງທຳອິດຂອງທ່ານ ເວືອງດິ່ງເຫ້ວ ໃນຖານະເປັນປະທານສະພາແຫ່ງຊາດ ແລະ ແມ່ນເຫດການ ແລະ ກິດຈະກໍາມີຄວາມໝາຍສຳຄັນທີ່ສຸດໃນສະພາບການ 2 ປະເທດຖືປີ 2022 ເປັນປີສາມັກຄີມິດຕະພາບ ຫວຽດນາມ - ລາວ; ລາວ - ຫວຽດນາມ ເພື່ອສະເຫຼີມສະຫຼອງ 2 ວັນປະຫວັດສາດ 60 ປີແຫ່ງວັນສ້າງຕັ້ງສາຍພົວພັນທາງການທູດ ລາວ - ຫວຽດນາມ ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື.
ຕາມທ່ານຮອງປະທານສະພາແຫ່ງຊາດລາວ ສູນທອນ ໄຊຍະຈັກ ແລ້ວ, ໃນຂອບເຂດການຢ້ຽມຢາມ, ປະທານສະພາແຫ່ງຊາດຂອງສອງປະເທດໄດ້ມີການເຈລະຈາ ແລະ ຕີລາຄາຜົນການຮ່ວມມືລະຫວ່າງສະພາແຫ່ງຊາດສອງປະເທດໃນຊຸມປີຜ່ານມາ, ພິເສດແມ່ນການຈັດຕັ້ງປະຕິບັດສັນຍາການຮ່ວມມືທີ່ສອງຝ່າຍໄດ້ລົງນາມໃນປີ 2017 ແລະ ວາງທິດທາງການຮ່ວມມືໃນໄລຍະຈະມາເຖິງ.
ສອງຝ່າຍກໍ່ໄດ້ລົງນາມໃນບົດບັນທຶກຄວາມເຂົ້າໃຈສະບັບໃໝ່ ເພື່ອເປັນບ່ອນອີງ ໃຫ້ແກ່ການຮ່ວມມືລະຫວ່າງສອງອົງການນິຕິບັນຍັດຂອງລາວ ແລະ ຫວຽດນາມ ໃນໄລຍະຈະມາເຖິງ.
ສິ້ນສຸດການສໍາພາດ, ທ່ານຮອງປະທານສະພາແຫ່ງຊາດລາວ ນາງ ສູນທອນ ໄຊຍະຈັກ ເນັ້ນໜັກວ່າ: ການຢ້ຽມຢາມຂອງທ່ານປະທານສະພາແຫ່ງຊາດ ເວືອງດິ່ງເຫ້ວ ແລະ ຄະນະໃນຄັ້ງນີ້ ແມ່ນໄດ້ຮັບຜົນສຳເລັດຢ່າງຈົບງາມ; ເຊື່ອໝັ້ນວ່າ ການຢ້ຽມຢາມຈະປະກອບສ່ວນອັນສຳຄັນເຂົ້າໃນການປັບປຸງ ແລະ ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ລາວ-ຫວຽດນາມ ອ້າຍນ້ອງ.
ບູນມີ
