ການເຄື່ອນໄຫວພົບປະແລກປ່ຽນມິດຕະພາບ ທີ່ມີຄວາມໝາຍ ຢູ່ຮ່າໂນ້ຍ

	ຮາຍຟອງ ຈັດການພົບປະແລກປ່ຽນມິດຕະພາບ ແລະ ມອບຂອງຂວັນໃຫ້ນັກສຶກສາລາວ
	ສົມທົບກັນຢ່າງແໜ້ນແຟ້ນເພື່ອຮັບປະກັນຄວາມສະຫງົບປອດໄພໃຫ້ແກ່ການພົບປະແລກປ່ຽນມິດຕະພາບປ້ອງກັນຊາດເຂດຊາຍແດນ ຫວຽດນາມ-ລາວ

ການເຄື່ອນໄຫວມິດຕະພາບ ແມ່ນລາຍການທີ່ນອນໃນການເຄື່ອນໄຫວປະຈຳປີຂອງສະຫະພັນບັນດາອົງການຈັດຕັ້ງມິດຕະພາບນະຄອນຮ່າໂນ້ຍ, ເຊິ່ງໄດ້ຮັບຄວາມສົນໃຈ ແລະ ລໍຄອຍຈາກເພື່ອນມິດທັງພາຍໃນ ແລະ ຕ່າງປະເທດເປັນຈຳນວນຫຼາຍ.

​ໂດຍ​ສືບ​ຕໍ່​ປະສົບ​ຜົນສຳ​ເລັດ​ໃນ​ຊຸມ​ປີ​ກ່ອນ, ການ​ເຄື່ອນໄຫວຂອງ​ປີ​ນີ້​ ໄດ້​ພາ​ຄະນະ​ຜູ້​ແທນ​ສູນ​ກາງ, ນະຄອນ​ຮ່າ​ໂນ້ຍ ​ແລະ ​ໂດຍ​ສະ​ເພາະ ​ແມ່ນ​ເພື່ອນ​ມິດສາ​ກົນ​ໄປ​ຢ້ຽມຢາມສະຖານທີ່ທ່ອງ​ທ່ຽວແຫ່ງ​ຄວາມສັດທາເຫຼື້ອມໃສ ວັດໄທ່ ​ ​ແລະ​ ໄປ​ຢ້ຽມ​ຢາມ, ລົງຕົວຈິງການ​ບໍລິການ​ທ່ອງ​ທ່ຽວ​ທີ່​ເປັນ​ເອກະລັກ​ສະ​ເພາະ, ຄຽງ​ຄູ່​ກັບ​ວັດທະນະທຳ​ພື້ນ​ເມືອງ​ຢູ່​ເຂດ​ທ່ອງ​ທ່ຽວ ຕວ່ນເຈົາ, ຮ່າໂນ້ຍ.

ການເຄື່ອນໄຫວພົບປະແລກປ່ຽນມິດຕະພາບ ທີ່ມີຄວາມໝາຍ ຢູ່ຮ່າໂນ້ຍ. (ພາບ: baoquocte)

ກ່າວ​ຄຳ​ເຫັນ​ທີ່​ລາຍການ​ພົບ​ປະ​ແລກປ່ຽນ, ທ່ານ​ນາງ ຫງວຽນ​ລານ​ເຮືອງ, ປະທານ​ຄະນະ​ກຳມະການ​ແນວ​ໂຮມ​ປະ​ເທດ​ຊາດ ຫວຽດນາມ ນະຄອນ ຮ່າ​ໂນ້ຍ, ປະທານ​ສະຫະພັນ​ບັນດາ​ອົງການ​ມິດຕະພາບ​ນະຄອນຮ່າ​ໂນ້ຍ ​ເນັ້ນ​ໜັກ​ວ່າ ນີ້​ແມ່ນ​ໂອກາດ​ທີ່​ມີ​ຄວາມ​ໝາຍ​ ເພື່ອ​ແນະນຳ​ວັດທະນະທຳ ຫວຽດນາມ ​ເຖິງ​ເພື່ອນ​ມິດ​ໃນ​ທົ່ວ​ໂລກ, ​ພ້ອມກັນນັ້ນ ກໍທັງ​ເປັນ​ໂອກາດ​ ເພື່ອ​ພົບ​ປະ ​ແລະ ​ແລກປ່ຽນ​ວັດທະນະທຳ ​ເພື່ອ​ຮັດ​ແໜ້ນ​ສາຍ​ພົວພັນ​ມິດຕະພາບ ​ແລະ ຄວາມ​ເຂົ້າ​ໃຈ​ເຊິ່ງກັນ ​ແລະ ກັນ​ລະຫວ່າງ​ປະຊາຊົນ​ຫວຽດນາມ ​ແລະ ​ເພື່ອນ​ມິດສາ​ກົນ.

“ພວກຂ້າພະເຈົ້າຫວັງວ່າ ລາຍການຈະນຳປະສົບການທີ່ໜ້າສົນໃຈຫຼາຍຢ່າງ ກ່ຽວກັບບັນດາຄຸນຄ່າວັດທະນະທຳທີ່ເປັນເອກະລັກສະເພາະ ແລະ ການຕ້ອນຮັບອັນດີງາມຂອງຊາວນະຄອນຫຼວງ ຮ່າໂນ້ຍ ກໍ່ຄື ປະຊາຊົນ ຫວຽດນາມ ມາໃຫ້ເພື່ອນມິດສາກົນ, ພ້ອມກັນນັ້ນ, ກໍເປີດກາລະໂອກາດຮ່ວມມືໃໝ່ກັບເມືອງກວັກອວາຍ ໃນອະນາຄົດອັນໃກ້ນີ້”.

ຕາງໜ້າຄະນະຜູ້ແທນການທູດ, ທ່ານເອກອັກຄະລັດຖະທູດ ເວເນຊູເອລາ ປະຈຳ ຫວຽດນາມ Tatiana Pugh Moreno ໄດ້ແບ່ງປັນຄວາມຕື້ນຕັນໃຈທີ່ຄະນະຈັດຕັ້ງໄດ້ໃຫ້ການຕ້ອນຮັບບັນດາຜູ້ເຂົ້າຮ່ວມໂຄງການເຄື່ອນໄຫວມິດຕະພາບເປັນຢ່າງດີ.

ທ່ານ​ນາງ Tatiana Pugh Moreno ຢືນຢັນ​ວ່າ ຮ່າ​ໂນ້ຍ ​ແມ່ນ​ນະຄອນ​ທີ່​ມີການສະຫຼັບກັນທັງ​ປະ​ເພນີດັ້ງເດີມ ​ແລະ ທັນ​ສະ​ໄໝ, ​ແມ່ນ​ດິນ​ແດນ​ທີ່​ເຕັມ​ໄປ​ດ້ວຍ​ທ່າ​ແຮງ​ດ້ານ​ການ​ຄ້າ, ການທ່ອງທ່ຽວ ​ແລະ ວັດທະນະທຳ. ພິ​ເສດ, ຮ່າ​ໂນ້ຍ ຍາດ​ໄດ້​ໄຊ​ຊະ​ນະ​ໂລກ​ລະ​ບາດ Covid – 19 ແລະ ສືບ​ຕໍ່​ເດີນ​ຕາມ​ເສັ້ນ​ທາງ​ພັດ​ທະ​ນາ. ໂດຍສົ່ງຄຳຂອບໃຈເຖິງຄະນະຈັດຕັ້ງ, ທ່ານເອກອັກຄະລັດຖະທູດ ຫວັງເປັນຢ່າງຍິ່ງວ່າການເຄື່ອນໄຫວນີ້ຈະໄດ້ຮັບການສືບຕໍ່ໃນຊຸມປີຕໍ່ໜ້າ.

ນີ້​ແມ່ນ​ການ​ເຄື່ອນ​ໄຫວ​ທີ່​ມີ​ຄວາມ​ໝາຍ​ອັນ​ໃຫຍ່​ຫຼວງ, ​ເພື່ອ​ແນ​ໃສ່​ແນະນຳ​ບັນດາ​ສະຖານ​ທີ່​ປະຫວັດສາດ, ທັດສະນີ​ຍະ​ພາບ, ໝູ່​ບ້ານ​ຫັດຖະກຳ​ພື້ນ​ເມືອງ ​ແລະ ບັນດາ​ກິດຈະກຳ​ວັດທະນະທຳ​ພື້ນ​ເມືອງ​ບາງ​ປະ​ເພດ​ຂອງ​ເມືອງ ກວັກອວາຍ ​ແລະ ຍັງ​ແມ່ນ​ໂອກາດ​ເພື່ອ​ແລກປ່ຽນ ​ແລະ ​ເປີດ​ກວ້າງ​ການ​ຮ່ວມ​ມື​ດ້ານ​ເສດຖະກິດ, ວັດທະນະທຳ ​ແລະ ທ່ອງ​ທ່ຽວ​ໃນການເຊື່ອມໂຍງສາກົນ​ປະຈຸ​ບັນ.