| ຫວຽດນາມເປັນຄູ່ຮ່ວມມືທີ່ສຳຄັນໃນພາກພື້ນມະຫາສະມຸດອິນເດຍ-ປາຊີຟິກ ຂອງລາຊາອານາຈັກອັງກິດ | |
| ສະໜັບສະໜູນພົນລະເມືອງຫວຽດນາມເຂົ້າຮ່ວມໂຄງການແຮງງານກະສິກຳທີ່ອົດສະຕາລີ |
 |
| ທ່ານພົນເອກ ຫງວຽນດຶກຮ່ວາ, ຮອງຫົວໜ້າຄະນະກຳມະການການເມືອງ, ຫົວໜ້າຄະນະຊີ້ນຳ 515 ທະຫານເຂດລົງກວດກາວຽກງານສຳຫຼວດ ແລະ ຊອກຄົ້ນ, ທ້ອນໂຮມອັດຖິຂອງນັກຮົບ (ພາບ: baoquangbinh.vn) |
ໃນວັນທີ 25 – 26 ມີນາ, ຄະນະຜູ້ແທນຄະນະຊີ້ນຳ 515 ທະຫານເຂດ 4 ນຳໜ້າໂດຍທ່ານພົນເອກ ຫງວຽນດຶກຮ່ວາ, ຮອງຫົວໜ້າຄະນະກຳມະການການເມືອງ, ຫົວໜ້າຄະນະຊີ້ນຳ 515 ທະຫານເຂດ ໄດ້ລົງກວດກາວຽກງານສຳຫຼວດ ແລະ ຊອກຄົ້ນ, ທ້ອນໂຮມອັດຖິຂອງນັກຮົບ, ທະຫານອາສາສະໝັກ ແລະ ນັກຊ່ຽວຊານທີ່ເສຍສະຫຼະຊີວິດຢູ່ເຂດແຂວງຄໍາມ່ວນ (ລາວ) ໃນລະດູແລ້ງ 2021-2022 ຂອງໜ່ວຍງານ 589 ຂອງກອງບັນຊາການທະຫານ ແຂວງກວາງບິ່ງ.
ໃນລະດູແລ້ງ, ການສຳຫຼວດ, ຄົ້ນຫາ, ທ້ອນໂຮມອັດຖິຂອງບັນດານັກຮົບອາສາສະໝັກ ແລະ ຊ່ຽວຊານ ຫວຽດນາມ ທີ່ເສຍສະຫຼະຊີວິດຢູ່ແຂວງ ຄຳມ່ວນ ປະສົບກັບຄວາມຫຍຸ້ງຍາກຫຼາຍຢ່າງ, ພິເສດແມ່ນສະພາບດິນຟ້າອາກາດ, ອາກາດປ່ຽນແປງຢ່າງຮ້າຍແຮງ, ພື້ນທີ່ດຳເນີນງານຂອງທີມງານຕົ້ນຕໍແມ່ນຢູ່ບ່ອນບຸກໂຈມຕີທີ່ສຳຄັນຂອງສັດຕູກ່ອນໜ້ານີ້, ໂດຍມີລູກລະເບີດ ແລະ ລະເບີດຝັງດິນທີ່ຕົກຄ້າງເປັນຈຳນວນຫຼວງຫຼາຍ, ຄວາມສ່ຽງບໍ່ປອດໄພໃນການຊອກຫາ ແລະ ການທ້ອນໂຮມສູງ.
ແນວໃດກໍດີ, ດ້ວຍຄວາມເອົາໃຈໃສ່ ແລະ ຊີ້ນຳຂອງກອງບັນຊາການທະຫານເຂດ 4, ກອງບັນຊາການທະຫານ ກວາງບິ່ງ; ດ້ວຍການຮ່ວມມື ແລະ ການຊ່ວຍເຫຼືອຂອງຄະນະພັກ, ອຳນາດການປົກຄອງ, ກໍາລັງປະກອບອາວຸດ ແລະ ປະຊາຊົນແຂວງຄຳມ່ວນ, ພະນັກງານ, ລັດຖະກອນໜ່ວຍງານ 589 ໄດ້ຜ່ານຜ່າທຸກຄວາມຫຍຸ້ງຍາກ ແລະ ປະສົບຜົນສຳເລັດໃນໜ້າທີ່. ມາຮອດປະຈຸບັນ, ໜ່ວຍງານ 589 ໄດ້ຊອກຄົ້ນ ແລະ ທ້ອນໂຮມອັດຖິຢູ່ແຂວງຄຳມ່ວນໄດ້ 17 ອັດຖິ, ລື່ນກາຍຄາດໝາຍທີ່ວາງໄວ້.
ໜ່ວຍງານ 589 ປະຕິບັດໜ້າທີ່ທ້ອນໂຮມອັດຖິຂອງນັກຮົບເສຍສະຫຼະຊີວິດເພື່ອຊາດຢູ່ແຂວງ ກວາງບິ່ງ ແລະ ແຂວງຄຳມ່ວນ. ໃນຊຸມປີມໍ່ໆມານີ້, ການຊອກຫາອັດຖິຂອງນັກຮົບເສຍສະຫຼະຊີວິດເພື່ອຊາດໄດ້ປະສົບກັບຄວາມຫຍຸ້ງຍາກຫຼາຍດ້ານຍ້ອນພື້ນທີ່ດຳເນີນງານກວ້າງ, ຈຳນວນທະຫານກະແຈກກະຈາຍ, ອາກາດປ່ຽນແປງຢ່າງຮ້າຍແຮງ, ເວລາຈາກມື້ນັ້ນຮອດມື້ນີ້ນັບມື້ນັບຫ່າງອອກ, ພູມສັນຖານໄດ້ມີການປ່ຽນແປງຫຼາຍຢ່າງ, ແຕ່ດ້ວຍຄວາມມານະພະຍາຍາມ ໄດ້ເອົາຊະນະຄວາມຫຍຸ້ງຍາກທັງໝົດ.
ບຸນຄົງ
